በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 16:1-31

16  ከዚያም ለደቀ መዛሙርቱ ደግሞ እንዲህ ይላቸው ጀመር:- “አንድ ሀብታም ሰው አንድ የቤት አስተዳዳሪ ነበረው፤ ይህ ሀብታም ሰው፣ አስተዳዳሪው ንብረቱን እያባከነበት እንዳለ የሚገልጽ ክስ ደረሰው።  ስለዚህ አስተዳዳሪውን ጠራውና ‘ይህ ስለ አንተ የምሰማው ነገር ምንድን ነው? ከዚህ በኋላ ቤቱን ማስተዳደር ስለማትችል በአስተዳዳሪነት ስትሠራበት የነበረውን የሒሳብ መዝገብ አስረክብ’ አለው።  በዚህ ጊዜ አስተዳዳሪው በልቡ እንዲህ አለ:- ‘ጌታዬ የአስተዳዳሪነት ኃላፊነቴን ሊወስድብኝ ነው፤ ታዲያ ምን ባደርግ ይሻላል? እንዳልቆፍር አቅም የለኝም፤ እንዳለምን ያሳፍረኛል።  አሃ! ምን እንደማደርግ አውቃለሁ፤ ከኃላፊነቴ ስነሳ በቤታቸው የሚቀበሉኝ ሰዎች እንዲኖሩ አንድ ነገር አደርጋለሁ።’  ከዚያም ከጌታው የተበደሩትን ሰዎች አንድ በአንድ በመጥራት የመጀመሪያውን ‘ከጌታዬ የተበደርከው ምን ያህል ነው?’ አለው።  እሱም ‘አንድ መቶ የባዶስ መስፈሪያ* የወይራ ዘይት’ አለው። አስተዳዳሪውም ‘የውል ሰነድህ ይኸውልህ፤ ቁጭ በልና ቶሎ ብለህ ሃምሳ ብለህ ጻፍ’ አለው።  ቀጥሎም ሌላውን ‘አንተስ፣ የተበደርከው ምን ያህል ነው?’ አለው። እሱም ‘አንድ መቶ የቆሮስ መስፈሪያ* ስንዴ’ አለው። አስተዳዳሪውም ‘የውል ሰነድህ ይኸውልህ፤ ሰማንያ ብለህ ጻፍ’ አለው።  ጌታውም አስተዳዳሪው ዓመፀኛ ቢሆንም እንኳ አርቆ በማሰብ ባደረገው ነገር አደነቀው፤ ምክንያቱም የዚህ ሥርዓት ልጆች በእነሱ ትውልድ ካሉት ሰዎች ጋር ባላቸው ግንኙነት ከብርሃን ልጆች ይበልጥ ብልሆች ናቸው።  “ደግሞም እላችኋለሁ፣ በዓመፅ ሀብት ለራሳችሁ ወዳጆች አፍሩ፤ እንዲህ ካደረጋችሁ የዓመፅ ሀብት ሲያልቅ በዘላለማዊ መኖሪያ ይቀበሏችኋል። 10  በትንሽ ነገር ታማኝ የሆነ ሰው በብዙ ነገርም ታማኝ ነው፤ በትንሽ ነገር ዓመፀኛ የሆነ ሰው ደግሞ በብዙ ነገርም ዓመፀኛ ነው። 11  ስለዚህ ከዓመፅ ሀብት ጋር በተያያዘ ታማኝ ሆናችሁ ካልተገኛችሁ እውነተኛውን ሀብት ማን በአደራ ይሰጣችኋል? 12  የሌላ ሰው በሆነው ነገር ታማኝ ሆናችሁ ካልተገኛችሁ ለእናንተ የታሰበውን ነገር ማን ይሰጣችኋል? 13  ለሁለት ጌቶች ባሪያ መሆን የሚችል የቤት አገልጋይ የለም፤ አንዱን ጠልቶ ሌላውን ይወዳል ወይም ለአንዱ ተገዝቶ ሌላውን ይንቃል። ለአምላክም ለሀብትም በአንድ ጊዜ ባሪያ መሆን አትችሉም።” 14  በዚህ ጊዜ ገንዘብ ወዳዶች የሆኑት ፈሪሳውያን ይህን ሁሉ ሲናገር ሰምተው ያሽሟጥጡት ጀመር። 15  በመሆኑም ኢየሱስ እንዲህ አላቸው:- “እናንተ በሰዎች ፊት ጻድቅ መስላችሁ ትቀርባላችሁ፤ አምላክ ግን ልባችሁን ያውቃል፤ ምክንያቱም በሰዎች ፊት ከፍ ተደርጎ የሚታየው ነገር በአምላክ ፊት የተናቀ ነው። 16  “ሕጉም ሆነ ነቢያት እስከ ዮሐንስ ድረስ ተናግረዋል። ከዚያን ጊዜ አንስቶ የአምላክ መንግሥት እንደ ምሥራች እየታወጀ ነው፤ የተለያዩ ዓይነት ሰዎችም ወደዚያ ለመግባት ከፍተኛ ተጋድሎ እያደረጉ ነው። 17  እንደ እውነቱ ከሆነ ከሕጉ አንዲት ነጥብ ሳትፈጸም ከምትቀር ሰማይና ምድር ቢያልፉ ይቀላል። 18  “ሚስቱን ፈቶ ሌላ የሚያገባ ሁሉ ምንዝር ይፈጽማል፤ ባሏ የፈታትንም ሴት የሚያገባ ምንዝር ይፈጽማል። 19  “ደግሞም አንድ ሀብታም ሰው ነበር፤ ይህ ሰው ሐምራዊ ልብስና በፍታ ይለብስ የነበረ ከመሆኑም በላይ ዕለት ተዕለት በደስታና በቅንጦት ይኖር ነበር። 20  ይሁን እንጂ እዚህ ሰው ደጃፍ ላይ እያመጡ የሚያስቀምጡት መላ ሰውነቱን ቁስል የወረሰው አልዓዛር የሚባል አንድ ለማኝ ነበር፤ 21  እሱም ከሀብታሙ ማዕድ የሚወድቀውን ፍርፋሪ በልቶ ለመጥገብ ይመኝ ነበር። ውሾችም እየመጡ ቁስሉን ይልሱ ነበር። 22  ከጊዜ በኋላ ለማኙ ሞተ፤ መላእክትም ወደ አብርሃም እቅፍ ወሰዱት። “ሀብታሙም ሰው ደግሞ ሞተና ተቀበረ። 23  በሔዲስም* ሆኖ እየተሠቃየ ሳለ አሻቅቦ ሲመለከት ከሩቅ አብርሃምንና በእቅፉ ያለውን አልዓዛርን አየ። 24  በዚህ ጊዜ ድምፁን ከፍ አድርጎ ‘አብርሃም አባት ሆይ፣ በዚህ የሚንቀለቀል እሳት እየተሠቃየሁ ስለሆነ እባክህ ራራልኝና አልዓዛር የጣቱን ጫፍ ውኃ ውስጥ ነክሮ ምላሴን እንዲያቀዘቅዝልኝ ላክልኝ’ አለ። 25  አብርሃም ግን እንዲህ አለው:- ‘ልጄ ሆይ፣ አንተ በሕይወት ዘመንህ መልካም ነገሮችን ሁሉ እንደተቀበልክ፣ በአንጻሩ ደግሞ አልዓዛር መጥፎ ነገሮችን እንደተቀበለ አስታውስ። አሁን ግን እሱ እዚህ ሲጽናና አንተ ትሠቃያለህ። 26  ከዚህ ሁሉ በተጨማሪ ደግሞ ከእኛ ወደ እናንተ መሻገር የሚፈልጉ መሻገር እንዳይችሉ እንዲሁም ሰዎች ከእናንተ ወደ እኛ እንዳይሻገሩ በእኛና በእናንተ መካከል ትልቅ ገደል ተደርጓል።’ 27  በዚህ ጊዜ ሀብታሙ ሰው እንዲህ አለ:- ‘አባት ሆይ፣ እንደዚያ ከሆነ አልዓዛርን ወደ አባቴ ቤት እንድትልከው እለምንሃለሁ፤ 28  አምስት ወንድሞች አሉኝ፤ እነሱም ወደዚህ የሥቃይ ስፍራ እንዳይገቡ በደንብ ይመሥክርላቸው።’ 29  አብርሃም ግን ‘ሙሴና ነቢያት አሉላቸው፤ እነሱን ይስሙ’ አለው። 30  እሱም ‘አይ እንደሱ አይደለም፤ አብርሃም አባት ሆይ፣ ከሙታን አንድ ሰው ወደ እነሱ ቢሄድ ንስሐ ይገባሉ’ አለ። 31  አብርሃም ግን ‘ሙሴና ነቢያትን የማይሰሙ ከሆነ አንድ ሰው ከሞት ቢነሳም አምነው አይቀበሉም’ አለው።”

የግርጌ ማስታወሻዎች

ሉቃስ 16:6 * አንድ የባዶስ መስፈሪያ 22 ሊትር ይይዛል።
ሉቃስ 16:7 * አንድ የቆሮስ መስፈሪያ 170 ኪሎ ግራም ገደማ ስንዴ ይይዛል።
ሉቃስ 16:23 * ከተጨማሪው መረጃ ላይ 8ኛውን ርዕስ ተመልከት።