በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 15:1-32

15  አንድ ቀን ቀራጮችና ኃጢአተኞች ሁሉ ኢየሱስን ለመስማት ወደ እሱ እየተሰበሰቡ ነበር።  ከዚህም የተነሳ ፈሪሳውያንም ሆኑ ጸሐፍት “ይህ ሰው ኃጢአተኞችን ይቀበላል፤ ከእነሱም ጋር ይበላል” እያሉ አጉረመረሙ።  በዚህ ጊዜ የሚከተለውን ምሳሌ ነገራቸው:-  “ከእናንተ መካከል መቶ በጎች ያሉት ሰው አንዷ በግ ብትጠፋበት ዘጠና ዘጠኙን በምድረ በዳ ትቶ የጠፋችውን እስኪያገኝ ድረስ ፍለጋ አይሄድም?  በሚያገኛትም ጊዜ ደስ ብሎት በጫንቃው ላይ ይሸከማታል።  ቤት ሲደርስም ጓደኞቹንና ጎረቤቶቹን በአንድነት ጠርቶ ‘የጠፋችውን በጌን ስላገኘኋት የደስታዬ ተካፋዮች ሁኑ’ ይላቸዋል።  እላችኋለሁ፣ ልክ እንደዚሁ ሁሉ ንስሐ መግባት ከማያስፈልጋቸው ዘጠና ዘጠኝ ጻድቃን ይልቅ ንስሐ በሚገባ አንድ ኃጢአተኛ በሰማይ ታላቅ ደስታ ይሆናል።  “ወይም ደግሞ አሥር የብር ሳንቲሞች* ያላት አንዲት ሴት አንዱ ሳንቲም ቢጠፋባት መብራት አብርታ ቤቷን በመጥረግ እስክታገኘው ድረስ በደንብ አትፈልገውም?  ሳንቲሙን ባገኘችው ጊዜም ጓደኞቿና ጎረቤቶቿ የሆኑትን ሴቶች በአንድነት ጠርታ ‘የጠፋብኝን የብር ሳንቲም ስላገኘሁት የደስታዬ ተካፋዮች ሁኑ’ ትላቸዋለች። 10  እላችኋለሁ፣ ልክ እንደዚሁ ንስሐ በሚገባ በአንድ ኃጢአተኛ በአምላክ መላእክት ዘንድ ደስታ ይሆናል።” 11  ከዚያም እንዲህ አለ:- “አንድ ሰው ሁለት ልጆች ነበሩት። 12  ታናሽየውም ልጅ አባቱን ‘አባቴ ሆይ፣ ከንብረትህ ድርሻዬን ስጠኝ’ አለው። አባትየውም ንብረቱን ለልጆቹ አካፈላቸው። 13  ከጥቂት ቀንም በኋላ ታናሽየው ልጅ ያለውን ነገር ሁሉ ሰብስቦ ወደ ሩቅ አገር ተጓዘ፤ በዚያም ልቅ የሆነ ሕይወት በመኖር ንብረቱን አባከነ። 14  ያለውን ሁሉ ከጨረሰ በኋላ በዚያ አገር በሙሉ ከባድ ረሃብ ተከሰተ፤ በዚህ ጊዜ ችግር ላይ ወደቀ። 15  ከችግሩም የተነሳ ከዚያ አገር ሰዎች ወደ አንዱ ሄዶ የሙጥኝ አለ፤ ሰውየውም አሳማ እንዲጠብቅለት ወደ ሜዳ ላከው። 16  እሱም አሳማዎቹ የሚመገቡትን ምግብ በልቶ ለመጥገብ ይመኝ ነበር፤ ነገር ግን የሚሰጠው አልነበረም። 17  “ወደ ልቦናው ሲመለስ ግን እንዲህ አለ:- ‘ስንቶቹ የአባቴ ቅጥር ሠራተኞች ምግብ ተርፏቸው እኔ እዚህ በረሃብ ልሞት ነው! 18  ተነስቼ ወደ አባቴ በመሄድ እንዲህ እለዋለሁ:- “አባቴ ሆይ፣ በሰማይና በአንተ ላይ በደል ፈጽሜያለሁ። 19  ከእንግዲህ ልጅህ ተብዬ ልጠራ አይገባኝም። ከቅጥር ሠራተኞችህ እንደ አንዱ አድርገኝ።”’ 20  ስለዚህ ተነስቶ ወደ አባቱ ሄደ። ገና ሩቅ ሳለም አባቱ አየው፤ በዚህ ጊዜ አንጀቱ ተላወሰ፤ እየሮጠ ሄዶም አንገቱ ላይ ተጠምጥሞ ሳመው። 21  ከዚያም ልጁ ‘አባቴ ሆይ፣ በሰማይና በአንተ ላይ በደል ፈጽሜያለሁ። ከእንግዲህ ልጅህ ተብዬ ልጠራ አይገባኝም። ከቅጥር ሠራተኞችህ እንደ አንዱ አድርገኝ’ አለው። 22  አባትየው ግን ባሪያዎቹን እንዲህ አላቸው:- ‘ቶሎ በሉ! ምርጥ የሆነውን ልብስ አምጥታችሁ አልብሱት፤ ለእጁ ቀለበት፣ ለእግሩም ጫማ አድርጉለት። 23  የሰባውንም ወይፈን አምጥታችሁ እረዱ፤ እንብላ፣ እንደሰት፤ 24  ምክንያቱም ይህ ልጄ ሞቶ ነበር፤ አሁን ግን ሕያው ሆኗል፤ ጠፍቶ ነበር፣ ተገኝቷል።’ ከዚያም ይደሰቱ ጀመር። 25  “በዚህ ጊዜ ታላቁ ልጅ በእርሻ ቦታ ነበር፤ ተመልሶ መጥቶ ወደ ቤት በተቃረበ ጊዜ የሙዚቃና የጭፈራ ድምፅ ሰማ። 26  ስለዚህ ከአገልጋዮቹ አንዱን ጠርቶ ነገሩ ምን እንደሆነ ጠየቀው። 27  አገልጋዩም ‘ወንድምህ መጥቷል፤ በደህና ስለመጣም አባትህ የሰባውን ወይፈን አርዶለታል’ አለው። 28  እሱ ግን ተቆጣ፤ ወደ ቤት ለመግባትም አሻፈረኝ አለ። ከዚያም አባቱ ወጥቶ ይለምነው ጀመር። 29  እሱም መልሶ አባቱን እንዲህ አለው:- ‘እኔ ስንት ዓመት ሙሉ እንደ ባሪያ ሳገለግልህ ኖርኩ፤ አንድም ጊዜ ከትእዛዝህ ዝንፍ ብዬ አላውቅም፤ አንተ ግን ከጓደኞቼ ጋር እንድደሰት አንዲት የፍየል ጠቦት እንኳ ሰጥተኸኝ አታውቅም። 30  ሆኖም ሀብትህን ከጋለሞቶች ጋር ያወደመው ይህ ልጅህ ገና ከመምጣቱ የሰባውን ወይፈን አረድክለት።’ 31  በዚህ ጊዜ አባቱ እንዲህ አለው:- ‘ልጄ፣ አንተ ሁልጊዜ ከእኔ ጋር ነህ፤ ደግሞም የእኔ የሆነው ሁሉ የአንተ ነው፤ 32  ይህ ወንድምህ ግን ሞቶ ነበር፤ አሁን ግን ሕያው ሆኗል፤ ጠፍቶ ነበር፣ ተገኝቷል፤ ስለዚህ ልንደሰትና ልንፈነድቅ ይገባል።’”

የግርጌ ማስታወሻዎች

ሉቃስ 15:8 * ቃል በቃል፣ “ድራክማ ሳንቲሞች።” አንድ ድራክማ ሳንቲም የቀን ደሞዝ ሦስት አራተኛ ያህል ዋጋ አለው።