በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 14:1-35

14  ኢየሱስ በአንድ የሰንበት ቀን ከፈሪሳውያን አለቆች ወደ አንዱ ቤት ምግብ ሊበላ በገባ ጊዜ በቤቱ ውስጥ ያሉት ሰዎች በትኩረት ይከታተሉት ነበር።  በዚያም ሰውነት የሚያሳብጥ በሽታ የያዘው አንድ ሰው ከፊት ለፊቱ ነበር።  ኢየሱስም ሕግ አዋቂዎችንና ፈሪሳውያንን “በሰንበት መፈወስ በሕግ ተፈቅዷል ወይስ አልተፈቀደም?” ሲል ጠየቃቸው።  እነሱ ግን ዝም አሉ። በዚህ ጊዜ ሰውየውን ይዞ ፈወሰውና አሰናበተው።  ከዚያም “ከእናንተ መካከል ልጁ ወይም በሬው በሰንበት ቀን የውኃ ጉድጓድ ውስጥ ቢወድቅ ወዲያውኑ ጎትቶ የማያወጣው ማን ነው?” አላቸው።  እነሱም ስለዚህ ጉዳይ ምንም መልስ ሊሰጡት አልቻሉም።  ኢየሱስ የተጋበዙት ሰዎች ለራሳቸው የክብር ቦታ ሲመርጡ ተመልክቶ እንዲህ ሲል አንድ ምሳሌ ነገራቸው:-  “አንድ ሰው ወደ ሠርግ ግብዣ ሲጠራህ የክብር ቦታ አትያዝ። ምናልባት ጋባዡ ከአንተ የበለጠ የተከበረ ሰው ጠርቶ ሊሆን ይችላል፤  ስለዚህ አንተንም ሆነ እሱን የጋበዘው ሰው መጥቶ ‘ቦታውን ለዚህ ሰው ልቀቅለት’ ይልሃል። በዚህ ጊዜ እያፈርክ ወደ ዝቅተኛው ቦታ ፈቀቅ ትላለህ። 10  አንተ ግን ስትጋበዝ ሄደህ በዝቅተኛው ስፍራ ተቀመጥ፤ የጋበዘህም ሰው ሲመጣ ‘ወዳጄ ሆይ፣ ወደ ላይ ከፍ በል’ ይልሃል። በዚህ ጊዜ አብረውህ በተጋበዙት ሰዎች ሁሉ ፊት ክብር ታገኛለህ። 11  ምክንያቱም ራሱን ከፍ ከፍ የሚያደርግ ሁሉ ዝቅ ይደረጋል፤ ራሱን ዝቅ የሚያደርግ ደግሞ ከፍ ይደረጋል።” 12  ቀጥሎ ደግሞ የጋበዘውን ሰው እንዲህ አለው:- “የምሳ ወይም የራት ግብዣ በምታደርግበት ጊዜ ጓደኞችህን ወይም ወንድሞችህን ወይም ዘመዶችህን ወይም ሀብታም ጎረቤቶችህን አትጥራ። ምክንያቱም እነሱም አንድ ቀን ሊጋብዙህና ብድር ሊመልሱልህ ይችላሉ። 13  ሆኖም ግብዣ በምታደርግበት ጊዜ ድሆችን፣ አካለ ስንኩላንን፣ አንካሶችንና ዓይነ ስውሮችን ጥራ፤ 14  ብድር ሊመልሱልህ ስለማይችሉ ደስተኛ ትሆናለህ። ምክንያቱም በጻድቃን ትንሣኤ ብድራት ይመለስልሃል።” 15  ከተጋበዙት መካከል አንዱ ይህን ሲሰማ “በአምላክ መንግሥት በማዕድ የሚቀመጥ ደስተኛ ነው” አለው። 16  ኢየሱስም እንዲህ አለው:- “አንድ ሰው ትልቅ የራት ግብዣ አዘጋጅቶ ብዙ ሰዎች ጠራ። 17  የራት ግብዣው ሰዓት በደረሰም ጊዜ የተጋበዙትን ሰዎች ‘አሁን ሁሉም ነገር ስለተዘጋጀ ኑ’ ብሎ እንዲጠራቸው ባሪያውን ላከ። 18  ይሁን እንጂ ሁሉም ሰበብ ያቀርቡ ጀመር። የመጀመሪያው ‘እርሻ ስለገዛሁ ሄጄ ማየት አለብኝ፤ ስለዚህ እባክህ ይቅርታ አድርግልኝ’ አለው። 19  ሌላውም ‘አምስት ጥማድ በሬዎች ገዝቻለሁ፤ ልፈትናቸው ስለሆነ እባክህ ይቅርታ አድርግልኝ’ አለ። 20  ሌላኛው ደግሞ ‘ገና ማግባቴ ስለሆነ መምጣት አልችልም’ አለ። 21  ባሪያውም ተመልሶ መጥቶ ለጌታው ይህን ነገረው። በዚህ ጊዜ የቤቱ ባለቤት ተቆጥቶ ባሪያውን ‘ፈጥነህ ወደ ከተማው አውራ ጎዳናዎችና ስላች መንገዶች ሄደህ ድሆችን፣ አካለ ስንኩላንን፣ ዓይነ ስውሮችንና አንካሶችን ወደዚህ አምጣቸው’ አለው። 22  በኋላም ባሪያው ‘ጌታዬ፣ ያዘዝከው ተፈጽሟል፤ ያም ሆኖ አሁንም ቦታ አለ’ አለው። 23  ጌታውም ባሪያውን እንዲህ አለው:- ‘ቤቴ እንዲሞላ ወደ ጎዳናዎችና ወደ ገጠር መንገዶች ሄደህ ያገኘሃቸውን ሰዎች በግድ አምጥተህ አስገባ። 24  እናንተ ሰዎች እላችኋለሁ፣ ከእነዚያ ከተጋበዙት ሰዎች መካከል አንዳቸውም ያዘጋጀሁትን ራት አይቀምሱም።’” 25  ከዚያም እጅግ ብዙ ሕዝብ አብሮት እየተጓዘ ሳለ ወደ እነሱ ዞሮ እንዲህ አላቸው:- 26  “ወደ እኔ የሚመጣ ሁሉ አባቱን፣ እናቱን፣ ሚስቱን፣ ልጆቹን፣ ወንድሞቹንና እህቶቹን ሌላው ቀርቶ የገዛ ራሱን ነፍስ እንኳ የማይጠላ ከሆነ ደቀ መዝሙሬ ሊሆን አይችልም። 27  የራሱን የመከራ እንጨት* ተሸክሞ የማይከተለኝ ሁሉ ደቀ መዝሙሬ ሊሆን አይችልም። 28  ለምሳሌ ከእናንተ መካከል፣ ግንብ ለመገንባት ፈልጎ ለመጨረስ የሚያስችል በቂ ገንዘብ እንዳለው ለማወቅ በመጀመሪያ ተቀምጦ ወጪውን የማያሰላ ማን ነው? 29  እንዲህ ካላደረገ ግን መሠረቱን ከጣለ በኋላ ፍጻሜ ላይ ማድረስ ሊያቅተውና የሚያዩት ሰዎች ሁሉ ሊያፌዙበት ይችላሉ፤ 30  ‘ይህ ሰው መገንባት ጀምሮ ነበር፤ መጨረስ ግን አቃተው’ ይሉታል። 31  ወይም ደግሞ አንድ ንጉሥ ሌላን ንጉሥ ጦርነት ለመግጠም በሚነሳበት ጊዜ ሃያ ሺህ ሠራዊት አስከትቶ የመጣበትን ንጉሥ በአሥር ሺህ ሠራዊት ሊቋቋመው ይችል እንደሆነ ለማወቅ በቅድሚያ ተቀምጦ አይማከርም? 32  መቋቋም የማይችል ከሆነ ሊገጥመው የሚመጣው ንጉሥ ገና ሩቅ ሳለ መልእክተኞች ልኮ እርቅ ለመፍጠር ይደራደራል። 33  እንደዚሁም ከእናንተ መካከል ያለውን ንብረት ሁሉ የማይተው ደቀ መዝሙሬ ሊሆን እንደማይችል አረጋግጥላችኋለሁ። 34  “ጨው ጥሩ ነገር እንደሆነ የታወቀ ነው። ሆኖም ጨው ራሱ የጨውነት ጣዕሙን ቢያጣ በምን ሊጣፍጥ ይችላል? 35  ለአፈርም ሆነ ለማዳበሪያ የማይጠቅም ስለሆነ ሰዎች ወደ ውጭ ይጥሉታል። ስለዚህ የሚሰማ ጆሮ ያለው ይስማ።”

የግርጌ ማስታወሻዎች

ሉቃስ 14:27 * ከተጨማሪው መረጃ ላይ 6ኛውን ርዕስ ተመልከት።