በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

የይሖዋ ምሥክሮች

ቋንቋ ምረጥ አማርኛ

ሉቃስ 13:1-35

13  በዚያን ወቅት ጲላጦስ ደማቸውን ከመሥዋዕታቸው ጋር ስለደባለቀው ስለ ገሊላ ሰዎች ለኢየሱስ ያወሩለት የተወሰኑ ሰዎች በዚያ ተገኝተው ነበር።  እሱም መልሶ እንዲህ አላቸው:- “እነዚህ የገሊላ ሰዎች ይህ ስለደረሰባቸው ከሌሎቹ የገሊላ ሰዎች ይበልጥ ኃጢአተኞች እንደሆኑ አድርጋችሁ ታስባላችሁ?  እላችኋለሁ፣ በፍጹም አይደለም፤ ነገር ግን ንስሐ ካልገባችሁ ሁላችሁም እንደዚሁ ትጠፋላችሁ።  ወይም ደግሞ የሰሊሆም ግንብ ተንዶባቸው የሞቱት አሥራ ስምንት ሰዎች በኢየሩሳሌም ከሚኖሩት ሌሎች ሰዎች ሁሉ ይበልጥ ኃጢአተኞች* የነበሩ ይመስላችኋል?  እላችኋለሁ፣ በፍጹም አይደለም፤ ነገር ግን ንስሐ ካልገባችሁ ሁላችሁም ልክ እንደዚሁ ትጠፋላችሁ።”  ከዚያም እንዲህ ሲል ይህን ምሳሌ ተናገረ:- “አንድ ሰው በወይን እርሻው ውስጥ የተተከለች አንዲት የበለስ ዛፍ ነበረችው፤ እሱም ከዛፏ ፍሬ ሊለቅም መጣ፤ ሆኖም ምንም አላገኘባትም።  በዚህ ጊዜ የወይን አትክልት ሠራተኛውን ‘ከዚህች የበለስ ዛፍ ፍሬ ለማግኘት ሦስት ዓመት ሙሉ ተመላለስኩ፤ ሆኖም ምንም አላገኘሁባትም። ስለዚህ ቁረጣት! ለምን በከንቱ ቦታ ትይዛለች?’ አለው።  እሱም መልሶ እንዲህ አለው:- ‘ጌታዬ፣ ዙሪያዋን ቆፍሬ ፍግ ላድርግባትና እስቲ ይህን ዓመት ደግሞ እንያት፤  ወደፊት ፍሬ ካፈራች ጥሩ፤ ካልሆነ ግን ትቆርጣታለህ።’” 10  ኢየሱስ በሰንበት ቀን በአንድ ምኩራብ እያስተማረ ነበር። 11  በዚያም በጋኔን ተጽዕኖ ለአሥራ ስምንት ዓመት በበሽታ ስትማቅቅ የኖረች አንዲት ሴት ነበረች፤ በጣም ከመጉበጧም የተነሳ ፈጽሞ ቀና ማለት አትችልም ነበር። 12  ኢየሱስም ባያት ጊዜ ጠራትና “አንቺ ሴት፣ ከበሽታሽ ተላቀሻል” አላት። 13  እጁንም ጫነባት፤ ወዲያውም ቀጥ አለች፤ አምላክንም ማመስገን ጀመረች። 14  የምኩራቡ አለቃ ግን ኢየሱስ በሰንበት ቀን በመፈወሱ ተቆጥቶ ሕዝቡን “ሥራ ሊሠራባቸው የሚገባ ስድስት ቀኖች አሉ፤ ስለዚህ በእነዚያ ቀኖች እየመጣችሁ ተፈወሱ እንጂ በሰንበት ቀን አይደለም” ይላቸው ጀመር። 15  ይሁን እንጂ ጌታ እንዲህ ሲል መለሰለት:- “እናንተ ግብዞች፣ እያንዳንዳችሁ በሰንበት ቀን በሬያችሁን ወይም አህያችሁን ከጋጣው ፈታችሁ ውኃ ለማጠጣት ትወስዱ የለም? 16  ታዲያ የአብርሃም ልጅ የሆነችው ይህች ሴት አሥራ ስምንት ዓመት ሙሉ በሰይጣን ታስራ ስትኖር በሰንበት ቀን ከዚህ እስራቷ ብትፈታ ተገቢ አይደለም?” 17  ኢየሱስ ይህን በተናገረ ጊዜ ተቃዋሚዎቹ ሁሉ በኀፍረት ተሸማቀቁ፤ ሕዝቡ በሙሉ ግን እሱ ባደረጋቸው አስደናቂ ነገሮች ሁሉ ይደሰቱ ጀመር። 18  ስለሆነም ኢየሱስ እንዲህ ሲል መናገሩን ቀጠለ:- “የአምላክ መንግሥት ከምን ጋር ይመሳሰላል? ከምንስ ጋር አነጻጽረዋለሁ? 19  አንድ ሰው ወስዶ በአትክልት ቦታው ከዘራት የሰናፍጭ ዘር ጋር ይመሳሰላል፤ ይህች ዘር አድጋ ዛፍ ሆነች፤ የሰማይ ወፎችም በቅርንጫፎቿ ላይ ሰፈሩ።” 20  ደግሞም እንዲህ አለ:- “የአምላክን መንግሥት ከምን ጋር ላነጻጽረው? 21  አንዲት ሴት ወስዳ ሊጡ በሙሉ እስኪቦካ ድረስ በሦስት ትልልቅ መስፈሪያ ዱቄት ውስጥ ከሰወረችው እርሾ ጋር ይመሳሰላል።” 22  ኢየሱስም ወደ ኢየሩሳሌም እየተጓዘ ሳለ በየከተማውና በየመንደሩ እያስተማረ ያልፍ ነበር። 23  በዚህ ጊዜ አንድ ሰው “ጌታ ሆይ፣ የሚድኑት ጥቂቶች ናቸው?” ሲል ጠየቀው። እሱም እንዲህ አላቸው:- 24  “በጠባቡ በር ለመግባት ከፍተኛ ተጋድሎ አድርጉ፤ እላችኋለሁ፣ ብዙዎች ለመግባት ይፈልጋሉ፣ ነገር ግን አይችሉም፤ 25  ምክንያቱም የቤቱ ባለቤት ተነስቶ አንዴ በሩን ከዘጋው በኋላ ውጭ ቆማችሁ ‘ጌታ ሆይ፣ ክፈትልን’ እያላችሁ በሩን ማንኳኳት ብትጀምሩ ‘ከየት እንደመጣችሁ አላውቅም’ ብሎ ይመልስላችኋል። 26  በዚህ ጊዜ ‘አብረንህ እኮ በልተናል፣ ጠጥተናል፤ በአደባባዮቻችንም አስተምረሃል’ ማለት ትጀምራላችሁ። 27  እሱ ግን ‘ከየት እንደመጣችሁ አላውቅም። እናንተ ክፉ አድራጊዎች ሁሉ፣ ከእኔ ራቁ!’ ይላችኋል። 28  አብርሃምን፣ ይስሐቅን፣ ያዕቆብንና ነቢያትን ሁሉ በአምላክ መንግሥት ውስጥ ስታዩና እናንተ ግን በውጭ ተጥላችሁ ስትቀሩ በዚያ ታለቅሳላችሁ፣ በሐዘንም ጥርሳችሁን ታፋጫላችሁ። 29  በተጨማሪም ሰዎች ከምሥራቅና ከምዕራብ እንዲሁም ከሰሜንና ከደቡብ መጥተው በአምላክ መንግሥት በማዕድ ይቀመጣሉ። 30  ደግሞም ከኋለኞች መካከል ፊተኞች የሚሆኑ፣ ከፊተኞች መካከልም ኋለኞች የሚሆኑ አሉ።” 31  በዚያን ጊዜ አንዳንድ ፈሪሳውያን መጥተው “ሄሮድስ ሊገድልህ ስለሚፈልግ ከዚህ ወጥተህ ሂድ” አሉት። 32  እሱም እንዲህ አላቸው:- “ሄዳችሁ ያንን ቀበሮ ‘ዛሬና ነገ አጋንንትን አስወጣለሁ እንዲሁም ሕመምተኞችን እፈውሳለሁ፤ በሦስተኛውም ቀን ሥራዬን አጠናቅቃለሁ’ በሉት። 33  ይሁንና ነቢይ ከኢየሩሳሌም ውጭ ይገደል ዘንድ ስለማይገባ ዛሬና ነገ እንዲሁም ከነገ ወዲያ ጉዞዬን መቀጠል አለብኝ። 34  ኢየሩሳሌም፣ ኢየሩሳሌም፣ ነቢያትን የምትገድል፣ ወደ እሷ የተላኩትንም በድንጋይ የምትወግር፤ ዶሮ ጫጩቶቿን በክንፎቿ ሥር እንደምትሰበስብ እኔም ልጆችሽን ለመሰብሰብ ስንት ጊዜ ፈለግሁ! እናንተ ግን አልፈለጋችሁም። 35  እነሆ፣ ቤታችሁ ለእናንተ የተተወ ይሆናል። እላችኋለሁ፣ ‘በይሖዋ ስም የሚመጣ የተባረከ ነው!’ እስክትሉ ድረስ ፈጽሞ አታዩኝም።”

የግርጌ ማስታወሻዎች

ሉቃስ 13:4 * ቃል በቃል፣ “ባለ ዕዳዎች።”