በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 12:1-59

12  በዚያን ጊዜ በብዙ ሺህ የሚቆጠር ሕዝብ እርስ በርስ እየተጋፋ እስኪረጋገጥ ድረስ ተሰብስቦ ሳለ ኢየሱስ በቅድሚያ ለደቀ መዛሙርቱ እንዲህ ይል ጀመር:- “ከፈሪሳውያን እርሾ ይኸውም ከግብዝነት ተጠንቀቁ።  ይሁንና የተሰወረ መገለጡ፣ ሚስጥር የሆነም መታወቁ አይቀርም።  ስለዚህ በጨለማ የምትናገሩት በብርሃን ይሰማል፤ በጓዳ የምታንሾካሹኩት በሰገነት ላይ ይሰበካል።  በተጨማሪም ወዳጆቼ ሆይ፣ እላችኋለሁ፣ ሥጋን የሚገድሉትን ከዚያ በላይ ግን ምንም ማድረግ የማይችሉትን አትፍሩ።  ይልቁንስ ማንን መፍራት እንደሚገባችሁ እነግራችኋለሁ:- ከገደለ በኋላ ወደ ገሃነም የመጣል ሥልጣን ያለውን ፍሩ። አዎ፣ እላችኋለሁ እሱን ፍሩ።  አምስት ድንቢጦች አነስተኛ ዋጋ ባላቸው ሁለት ሳንቲሞች ይሸጡ የለም? ሆኖም አንዷም እንኳ በአምላክ ፊት አትረሳም።  የእናንተ የራሳችሁ ፀጉር እንኳ በሙሉ የተቆጠረ ነው። ስለዚህ አትፍሩ፤ እናንተ ከብዙ ድንቢጦች የላቀ ዋጋ አላችሁ።  “እንግዲያው እላችኋለሁ፣ በሰዎች ፊት ለሚመሠክርልኝ ሁሉ የሰው ልጅም በአምላክ መላእክት ፊት ይመሠክርለታል።  በሰዎች ፊት የሚክደኝ ግን በአምላክ መላእክት ፊት ይካዳል። 10  በሰው ልጅ ላይ ክፉ ቃል የሚናገር ሁሉ ይቅር ይባልለታል፤ መንፈስ ቅዱስን የሚሳደብ ግን ይቅር አይባልለትም። 11  በሕዝባዊ ሸንጎ እንዲሁም በመንግሥት ሹማምንትና ባለሥልጣናት ፊት ሲያቀርቧችሁ እንዴት ብለን ወይም ምን ብለን የመከላከያ መልስ እንሰጣለን ወይም ደግሞ ምን እንላለን ብላችሁ አትጨነቁ፤ 12  ምክንያቱም ምን መናገር እንዳለባችሁ መንፈስ ቅዱስ በዚያኑ ሰዓት ያስተምራችኋል።” 13  ከዚያም ከሕዝቡ መካከል አንድ ሰው “መምህር፣ ወንድሜ ውርሳችንን እንዲያካፍለኝ ንገረው” አለው። 14  ኢየሱስም “አንተ ሰው፣ በእናንተ ላይ ፈራጅ እንድሆንና ውርስ እንዳካፍል ማን ሾመኝ?” አለው። 15  ከዚያም “አንድ ሰው ሀብታም ቢሆንም እንኳ ሕይወቱ በንብረቱ ላይ የተመካ ስላልሆነ ተጠንቀቁ፤ ከመጎምጀትም ሁሉ ተጠበቁ” አላቸው። 16  ይህን ካለ በኋላ እንዲህ ሲል አንድ ምሳሌ ነገራቸው:- “አንድ ሀብታም ሰው እርሻው እጅግ ፍሬያማ ሆነለት። 17  ከዚህም የተነሳ ‘ምርቴን የማከማችበት ቦታ ስለሌለኝ ምን ባደርግ ይሻላል?’ ብሎ በልቡ ማሰብ ጀመረ። 18  እንዲህም አለ:- ‘እንዲህ አደርጋለሁ፤ ያሉኝን ጎተራዎች አፈርስና ትልልቅ ጎተራዎች እሠራለሁ፤ በዚያም እህሌን ሁሉና ያሉኝን ጥሩ ነገሮች ሁሉ አከማቻለሁ፤ 19  ነፍሴንም “ነፍሴ ሆይ፣ ለብዙ ዘመን የሚበቃ የተከማቸ ሀብት አለሽ፤ እንግዲህ ዘና በይ፣ ብዪ፣ ጠጪ፣ ደስም ይበልሽ” እላታለሁ።’ 20  አምላክ ግን ‘አንተ ማስተዋል የጎደለህ፣ በዚህች ሌሊት ነፍስህን ይፈልጓታል። ታዲያ ያከማቸኸው ሀብት ለማን ይሆናል?’ አለው። 21  ለራሱ ሀብት የሚያከማች በአምላክ ዘንድ ግን ሀብታም ያልሆነ ሰው መጨረሻው ይኸው ነው።” 22  ከዚያም ደቀ መዛሙርቱን እንዲህ አላቸው:- “ስለዚህ እላችኋለሁ፣ ስለ ነፍሳችሁ ምን እንበላለን ወይም ደግሞ ስለ ሰውነታችሁ ምን እንለብሳለን ብላችሁ መጨነቃችሁን ተዉ። 23  ምክንያቱም ነፍስ ከምግብ ሰውነትም ከልብስ የላቀ ዋጋ አለው። 24  ቁራዎችን አስተውሉ፤ አይዘሩም፣ አያጭዱም እንዲሁም የእህል ማከማቻ ወይም ጎተራ የላቸውም፤ ሆኖም አምላክ ይመግባቸዋል። ታዲያ እናንተ ከወፎች እጅግ የላቀ ዋጋ የላችሁም? 25  ከእናንተ መካከል ተጨንቆ በዕድሜው ርዝማኔ ላይ አንድ ክንድ መጨመር የሚችል ይኖራል? 26  ታዲያ ይህን ትንሹን ነገር እንኳ ማድረግ የማትችሉ ከሆነ ስለቀሩት ነገሮች ለምን ትጨነቃላችሁ? 27  እስቲ አበቦች እንዴት እንደሚያድጉ አስተውሉ፤ አይለፉም ወይም አይፈትሉም፤ ነገር ግን እላችኋለሁ፣ ያን ያህል ክብር የነበረው ሰለሞን እንኳ ከእነዚህ አበቦች እንደ አንዷ አላሸበረቀም። 28  አምላክ ዛሬ ያለውንና ነገ ወደ ምድጃ የሚጣለውን በሜዳ ያለ ተክል እንዲህ የሚያለብሰው ከሆነ እናንተ እምነት የጎደላችሁ፣ እናንተንማ እንዴት አብልጦ ያለብሳችሁ! 29  ስለዚህ ስለምትበሉትና ስለምትጠጡት ነገር ከልክ በላይ ማሰብ አቁሙ፤ እንዲሁም መጨነቃችሁን ተዉ፤ 30  እነዚህ ነገሮች ሁሉ በዓለም ያሉ ሰዎች አጥብቀው የሚፈልጓቸው ናቸው፤ ይሁንና አባታችሁ እነዚህ ነገሮች እንደሚያስፈልጓችሁ ያውቃል። 31  ስለሆነም ዘወትር መንግሥቱን ፈልጉ፤ እነዚህም ነገሮች ይሰጧችኋል። 32  “አንተ ትንሽ መንጋ፣ አባታችሁ መንግሥትን ሊሰጣችሁ ስለፈቀደ አትፍሩ። 33  ያላችሁን ንብረት ሸጣችሁ ምጽዋት ስጡ። የማያረጁ ኮሮጆዎች ይኸውም የማያልቅ ውድ ሀብት ሌባ በማይደርስበት፣ ብልም ሊበላው በማይችልበት በሰማያት ለራሳችሁ አከማቹ። 34  ምክንያቱም ሀብታችሁ ባለበት ልባችሁም በዚያ ይሆናል። 35  “ወገባችሁን ታጠቁ፤ መብራታችሁንም አብሩ፤ 36  ጌታቸው ከሠርግ እስኪመለስ እንደሚጠባበቁና መጥቶ ሲያንኳኳ ወዲያው ለመክፈት እንደተዘጋጁ ዓይነት ሰዎች ሁኑ። 37  ጌታቸው በሚመጣበት ጊዜ ነቅተው ሲጠባበቁ የሚያገኛቸው ባሪያዎች ደስተኞች ናቸው! እውነት እላችኋለሁ፣ ጌታቸው ካሸረጠና በማዕድ እንዲቀመጡ ካደረገ በኋላ አጠገባቸው ሆኖ ያስተናግዳቸዋል። 38  በሁለተኛው ክፍለ ሌሊትም* ይምጣ በሦስተኛው፣ እንደዚያው ነቅተው ሲጠብቁ ካገኛቸው ደስተኞች ናቸው! 39  ነገር ግን ይህን እወቁ፣ አንድ ሰው ሌባ በየትኛው ሰዓት እንደሚመጣ ቢያውቅ ኖሮ ነቅቶ በጠበቀና ቤቱ እንዳይደፈር በተከላከለ ነበር። 40  እናንተም የሰው ልጅ ይመጣል ብላችሁ ባላሰባችሁት ሰዓት ስለሚመጣ ዝግጁ ሆናችሁ ጠብቁ።” 41  በዚህ ጊዜ ጴጥሮስ “ጌታ ሆይ፣ ይህን ምሳሌ እየተናገርክ ያለኸው ለእኛ ብቻ ነው ወይስ ለሁሉም?” አለው። 42  ጌታም እንዲህ አለ:- “ጌታው የሚያስፈልጋቸውን በቂ ምግብ በተገቢው ጊዜ እንዲሰጣቸው በአገልጋዮቹ ላይ የሾመው ታማኝና ልባም መጋቢ በእርግጥ ማን ነው? 43  ጌታው ተመልሶ በሚመጣበት ጊዜ እንዲህ ሲያደርግ ካገኘው ያ ባሪያ ደስተኛ ነው! 44  እውነት እላችኋለሁ፣ ጌታው በንብረቱ ሁሉ ላይ ይሾመዋል። 45  ነገር ግን ያ ባሪያ በልቡ ‘ጌታዬ የሚመጣው ዘግይቶ ነው’ ብሎ በማሰብ ወንድና ሴት አገልጋዮችን መደብደብ እንዲሁም መብላት፣ መጠጣትና መስከር ቢጀምር 46  የዚያ ባሪያ ጌታ ባልጠበቀው ቀንና ባላሰበው ሰዓት ይመጣል፤ ከባድ ቅጣት ይቀጣዋል፣ ዕጣውንም ታማኝ ካልሆኑ ሰዎች ጋር ያደርገዋል። 47  ደግሞም የጌታውን ፈቃድ እያወቀ ያልተዘጋጀው ወይም ከጌታው ፈቃድ ጋር የሚስማማ ነገር ያላደረገው ያ ባሪያ ብዙ ግርፋት ይገረፋል። 48  ነገር ግን ሳያውቅ ቀርቶ ግርፋት የሚገባው ድርጊት የፈጸመ ጥቂት ይገረፋል። በእርግጥም ብዙ ከተሰጠው ሁሉ ብዙ ይጠበቅበታል፤ ሰዎች ብዙ ኃላፊነት ከሰጡት ሰውም ብዙ ይጠብቁበታል። 49  “እኔ የመጣሁት በምድር ላይ እሳት ለመለኮስ ነው፤ ታዲያ ተቀጣጥሎ ካየሁ ከዚህ በላይ ምን እፈልጋለሁ? 50  እርግጥ እኔ የምጠመቀው አንድ ጥምቀት አለኝ፤ ይህ እስኪፈጸም ድረስ በጣም እጨነቃለሁ! 51  የመጣሁት በምድር ላይ ሰላም ለማስፈን ይመስላችኋል? በፍጹም አይደለም፤ እላችኋለሁ፣ የመጣሁት ለመከፋፈል ነው። 52  ከአሁን ጀምሮ በአንድ ቤት ውስጥ እርስ በርስ የተከፋፈሉ አምስት ሰዎች ይኖራሉ፤ ሦስቱ በሁለቱ ላይ ሁለቱ ደግሞ በሦስቱ ላይ ይነሳሉ። 53  አባት በልጁ፣ ልጅ በአባቱ፣ እናት በልጇ፣ ልጅ በእናቷ፣ አማት በምራቷ፣ ምራት በአማቷ ላይ በመነሳት እርስ በርስ ይከፋፈላሉ።” 54  ከዚያም ለሕዝቡ ደግሞ እንዲህ ይል ጀመር:- “ከምዕራብ በኩል ደመና ሲመጣ ስታዩ ወዲያውኑ ‘ዶፍ ዝናብ ሊመጣ ነው’ ትላላችሁ፤ እንዳላችሁትም ይሆናል። 55  የደቡብ ነፋስ ሲነፍስ ስታዩ ደግሞ ‘ኃይለኛ ሙቀት ይሆናል’ ትላላችሁ፤ በእርግጥም ይሆናል። 56  እናንተ ግብዞች፣ የምድሩንና የሰማዩን መልክ አይታችሁ መረዳት ትችላላችሁ፤ ታዲያ ይህን የአሁኑን ዘመን መርምራችሁ መረዳት እንዴት ተሳናችሁ? 57  ደግሞስ ጽድቅ የሆነውን ነገር ራሳችሁ ለራሳችሁ ለምን አትፈርዱም? 58  ለምሳሌ ከከሳሽህ ጋር ወደ ዳኛ እየሄድክ ሳለ ከእሱ ጋር ያለህን ቅራኔ እዚያው በመንገድ ላይ ለመፍታት ጥረት አድርግ፤ አለዚያ ጎትቶ ዳኛ ፊት ያቀርብሃል፤ ዳኛውም ለፍርድ ቤቱ መኮንን አሳልፎ ይሰጥሃል፤ መኮንኑ ደግሞ እስር ቤት ያስገባሃል። 59  እልሃለሁ፣ በጣም አነስተኛ ዋጋ ያላትን የመጨረሻዋን ትንሽ ሳንቲም ከፍለህ እስክትጨርስ ድረስ ከዚያ ፈጽሞ አትወጣም።”

የግርጌ ማስታወሻዎች

ሉቃስ 12:38 ማርቆስ 13:35 ላይ የሚገኘውን የግርጌ ማስታወሻ ተመልከት።