በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 11:1-54

11  አንድ ቀን ኢየሱስ በአንድ ስፍራ እየጸለየ ነበር፤ ጸሎቱንም ሲጨርስ ከደቀ መዛሙርቱ አንዱ “ጌታ ሆይ፣ ዮሐንስ ደቀ መዛሙርቱን ጸሎት እንዳስተማራቸው ሁሉ አንተም እንዴት እንደምንጸልይ አስተምረን” አለው።  በዚህ ጊዜ እንዲህ አላቸው:- “በምትጸልዩበት ጊዜ ሁሉ እንዲህ በሉ:- ‘አባት ሆይ፣ ስምህ ይቀደስ። መንግሥትህ ይምጣ።  የዕለቱን ምግባችንን ለዕለቱ የሚያስፈልገንን ያህል ስጠን።  እኛ የበደሉንን* ሁሉ ይቅር ስለምንል ኃጢአታችንን ይቅር በለን፤ ወደ ፈተናም አታግባን።’”  ደግሞም እንዲህ አላቸው:- “ለምሳሌ ከእናንተ መካከል አንዱ፣ አንድ ወዳጅ አለው እንበል፤ በእኩለ ሌሊት ወደ እሱ ሄዶ እንዲህ አለው:- ‘ወዳጄ ሆይ፣ እባክህ ሦስት ዳቦ አበድረኝ፤  አንድ ወዳጄ ከሩቅ መንገድ መጥቶብኝ የማቀርብለት ምንም ነገር አጣሁ።’  ወዳጁም ከውስጥ ሆኖ ‘ባክህ አታስቸግረኝ። በሩ ተቆልፏል፤ ልጆቼም አብረውኝ ተኝተዋል፤ አሁን ተነስቼ ምንም ነገር ልሰጥህ አልችልም’ ይለዋል።  እላችኋለሁ፣ ወዳጁ ስለሆነ ተነስቶ ባይሰጠው እንኳ ስለ ውትወታው ሲል ተነስቶ የፈለገውን ነገር ይሰጠዋል።  ስለዚህ እላችኋለሁ፣ ደጋግማችሁ ለምኑ፣ ይሰጣችኋል፤ ሳታሰልሱ ፈልጉ፣ ታገኛላችሁ፤ ደጋግማችሁ አንኳኩ፣ ይከፈትላችኋል። 10  ምክንያቱም የሚለምን ሁሉ ይሰጠዋል፤ የሚፈልግ ሁሉ ያገኛል፤ የሚያንኳኳም ሁሉ ይከፈትለታል። 11  ደግሞስ ከመካከላችሁ ልጁ ዓሣ ቢለምነው በዓሣ ፋንታ እባብ የሚሰጥ አባት ይኖራል? 12  ወይስ እንቁላል ቢለምነው ጊንጥ ይሰጠዋል? 13  ታዲያ እናንተ ክፉዎች ሆናችሁ ሳላችሁ ለልጆቻችሁ መልካም ስጦታ መስጠት ካወቃችሁ በሰማይ ያለው አባት ለሚለምኑት መንፈስ ቅዱስን እንዴት አብልጦ አይሰጣቸውም!” 14  በሌላ ጊዜ ደግሞ ኢየሱስ ዲዳ ጋኔን እያስወጣ ነበር። ጋኔኑ ከወጣ በኋላ ዲዳው ሰው መናገር ጀመረ። ሕዝቡም ተደነቀ። 15  ከሕዝቡ መካከል አንዳንዶቹ ግን “አጋንንትን የሚያስወጣው በአጋንንት አለቃ በብዔልዜቡል ነው” አሉ። 16  ሌሎች ደግሞ ሊፈትኑት ፈልገው ከሰማይ ምልክት እንዲያሳያቸው ይጠይቁት ጀመር። 17  ኢየሱስም ሐሳባቸውን አውቆ እንዲህ አላቸው:- “እርስ በርሱ የሚከፋፈል መንግሥት ሁሉ ይጠፋል፤ እንዲሁም እርስ በርሱ የሚከፋፈል ቤት ይወድቃል። 18  ስለዚህ ሰይጣንም እርስ በርሱ ከተከፋፈለ መንግሥቱ እንዴት ይቆማል? ምክንያቱም እናንተ አጋንንትን የማስወጣው በብዔልዜቡል እንደሆነ ትናገራላችሁ። 19  እኔ አጋንንትን የማስወጣው በብዔልዜቡል ከሆነ፣ ልጆቻችሁ የሚያስወጧቸው ታዲያ በማን ነው? በዚህም የተነሳ ልጆቻችሁ ፈራጆች ይሆኑባችኋል። 20  ሆኖም አጋንንትን የማስወጣው በአምላክ ጣት ከሆነ የአምላክ መንግሥት ሳታስቡት ደርሶባችኋል። 21  አንድ ብርቱ ሰው በደንብ ታጥቆ ቤቱን ከጠበቀ ንብረቱ ምንም አይነካበትም። 22  ይሁን እንጂ ከእሱ ይበልጥ ብርቱ የሆነ ሰው ካጠቃውና ካሸነፈው ተማምኖበት የነበረውን መሣሪያ ሁሉ ይወስድበታል፤ ከእሱ የዘረፈውንም ለሌሎች ያከፋፍላል። 23  ከእኔ ጎን ያልቆመ ሁሉ ይቃወመኛል፤ ከእኔ ጋር የማይሰበስብም ሁሉ ይበትናል። 24  “ርኩስ መንፈስ ከሰው ሲወጣ የሚያርፍበት ቦታ ፍለጋ በደረቅ ስፍራ ይንከራተታል፤ የሚያርፍበት ቦታ ሲያጣ ግን ‘ወደወጣሁበት ቤቴ እመለሳለሁ’ ይላል። 25  ሲመለስም ጸድቶና አጊጦ ያገኘዋል። 26  ከዚያም ሄዶ ከእሱ የከፉ የተለያዩ ሰባት መናፍስት ይዞ ይመጣል፤ ገብተውም ይኖሩበታል፤ የዚያም ሰው የኋለኛው ሁኔታ ከቀድሞው የከፋ ይሆንበታል።” 27  ይህንም እየተናገረ ሳለ ከሕዝቡ መካከል አንዲት ሴት ድምፅዋን ከፍ አድርጋ “አንተን የተሸከመ ማህፀንና የጠባሃቸው ጡቶች ደስተኞች ናቸው!” አለችው። 28  እሱ ግን “ደስተኞችስ የአምላክን ቃል ሰምተው የሚጠብቁት ናቸው!” አለ። 29  ብዙ ሕዝብ በተሰበሰበ ጊዜ እንዲህ ይል ጀመር:- “ይህ ትውልድ ክፉ ትውልድ ነው። ምልክት ማየት ይፈልጋል። ሆኖም ከዮናስ ምልክት በስተቀር ምንም ምልክት አይሰጠውም። 30  ምክንያቱም ዮናስ ለነነዌ ሰዎች ምልክት እንደሆነ ሁሉ የሰው ልጅም ለዚህ ትውልድ ምልክት ይሆናል። 31  የደቡቧ ንግሥት በፍርድ ወቅት ከዚህ ትውልድ ሰዎች ጋር ተነስታ ትኮንናቸዋለች፤ ምክንያቱም የሰለሞንን ጥበብ ለመስማት ከምድር ዳርቻ መጥታለች፤ ነገር ግን ከሰለሞን የሚበልጥ እዚህ አለ። 32  የነነዌ ሰዎች የዮናስን ስብከት ሰምተው ንስሐ ስለገቡ በፍርድ ቀን ከዚህ ትውልድ ጋር ተነስተው ይኮንኑታል፤ ነገር ግን ከዮናስ የሚበልጥ እዚህ አለ። 33  አንድ ሰው መብራት ካበራ በኋላ በሰዋራ ቦታ አያስቀምጠውም ወይም እንቅብ አይደፋበትም፤ ከዚህ ይልቅ ወደ ቤት የሚገቡ ሁሉ ብርሃን እንዲያገኙ በመቅረዝ ላይ ያስቀምጠዋል። 34  የሰውነት መብራት ዓይን ነው። ዓይንህ አጥርቶ በሚያይበት ጊዜ* መላ ሰውነትህም ብሩህ ይሆናል፤ ዓይንህ በሚቅበዘበዝበት ጊዜ* ግን መላ ሰውነትህም ጨለማ ይሆናል። 35  ስለዚህ በውስጥህ ያለው ብርሃን ምናልባት ጨለማ ሆኖ እንዳይገኝ ተጠንቀቅ። 36  እንግዲህ መላ ሰውነትህ ምንም ጨለማ ሳይኖርበት ብሩህ ከሆነ፣ ልክ ብርሃን እንደሚፈነጥቅልህ መብራት ሁለንተናህ ብሩህ ይሆናል።” 37  ኢየሱስ ይህን ከተናገረ በኋላ አንድ ፈሪሳዊ አብሮት እንዲበላ ጋበዘው። እሱም ወደ ቤቱ ገብቶ በማዕድ ተቀመጠ። 38  ይሁን እንጂ ፈሪሳዊው ኢየሱስ ከምሳ በፊት እጁን እንዳልታጠበ* ባየ ጊዜ ተገረመ። 39  ጌታ ግን እንዲህ አለው:- “እናንተ ፈሪሳውያን ጽዋውንና ሳህኑን ከውጭ በኩል ታጸዳላችሁ፤ ውስጣችሁ ግን በቅሚያና በክፋት የተሞላ ነው። 40  እናንተ ማስተዋል የጎደላችሁ! የውስጡንስ የሠራው የውጭውን የሠራው አይደለም? 41  ይሁንና በውስጥ ያሉትን ነገሮች ምጽዋት* አድርጋችሁ ስጡ፤ ያን ጊዜ በቀረው ነገር ሁሉ ንጹሕ ትሆናላችሁ። 42  እናንተ ፈሪሳውያን ወዮላችሁ! ምክንያቱም ከኮሰረት፣ ከጤና አዳምና ከሌሎች አትክልቶች ሁሉ አሥራት ትሰጣላችሁ፤ ነገር ግን ፍትሕንና አምላክን መውደድን ችላ ትላላችሁ። እርግጥ አሥራት የመስጠት ግዴታ ነበረባችሁ፤ ሆኖም ሌሎቹን ነገሮች መተው አልነበረባችሁም። 43  እናንተ ፈሪሳውያን ወዮላችሁ! ምክንያቱም በምኩራብ ከፊት መቀመጥ፣ በገበያ ቦታ ደግሞ ሰዎች እጅ እንዲነሷችሁ ትፈልጋላችሁ። 44  ሰዎች ሳያውቁ በላዩ ላይ የሚሄዱበትን ምንም ምልክት የሌለው መቃብር ስለምትመስሉ ወዮላችሁ!” 45  ከሕጉ አዋቂዎችም አንዱ መልሶ “መምህር፣ እንዲህ ስትል እኮ እኛንም መስደብህ ነው” አለው። 46  በዚህ ጊዜ እንዲህ አለ:- “እናንተ የሕጉ አዋቂዎችም ወዮላችሁ! ምክንያቱም ለመሸከም የሚከብድ ሸክም በሰዎች ላይ ትጭናላችሁ፤ እናንተ ራሳችሁ ግን ሸክሙን በጣታችሁ እንኳ አትነኩትም። 47  “የነቢያትን የመታሰቢያ መቃብሮች ስለምትሠሩ ወዮላችሁ! ነገር ግን እነዚህን ነቢያት የገደሏቸው አባቶቻችሁ ናቸው። 48  እንግዲህ እናንተ ለአባቶቻችሁ ሥራ ምሥክሮች ናችሁ፤ ያም ሆኖ በእነሱ ሥራ ተባባሪ ናችሁ፤ ምክንያቱም እነሱ ነቢያትን ገደሉ፤ እናንተ ደግሞ መቃብሮቻቸውን ትገነባላችሁ። 49  ስለዚህ የአምላክ ጥበብ እንዲህ አለች:- ‘ነቢያትንና ሐዋርያትን ወደ እነሱ እልካለሁ፤ እነሱም አንዳንዶቹን ይገድላሉ በአንዳንዶቹም ላይ ስደት ያደርሳሉ፤ 50  በመሆኑም ይህ ትውልድ ዓለም ከተመሠረተበት ጊዜ ጀምሮ ለፈሰሰው የነቢያት ደም ሁሉ ተጠያቂ ነው፤ 51  ከአቤል አንስቶ በመሠዊያውና በመቅደሱ መካከል እስከተገደለው እስከ ዘካርያስ ድረስ ለፈሰሰው ደም ተጠያቂ ነው።’ አዎ፣ እላችኋለሁ፣ ይህ ትውልድ በኃላፊነት ይጠየቅበታል። 52  “እናንተ የሕጉ አዋቂዎች ወዮላችሁ! ምክንያቱም የእውቀትን ቁልፍ ነጥቃችሁ ወስዳችኋል፤ እናንተ ራሳችሁ አትገቡም፤ ለመግባት የሚሞክሩትንም ትከለክላላችሁ።” 53  ኢየሱስ ከዚያ ወጥቶ ሲሄድ ጸሐፍትና ፈሪሳውያን ክብብ አድርገው ስለተለያዩ ነገሮች በመጠየቅ ያዋክቡት ጀመር፤ 54  ከአፉ በሚወጣው ቃልም ሊያጠምዱት ያደቡ ነበር።

የግርጌ ማስታወሻዎች

ሉቃስ 11:4 * ቃል በቃል፣ “ዕዳ ያለባቸውን።”
ሉቃስ 11:34 * ወይም፣ “ዓይንህ በአንድ ነገር ላይ በሚያተኩርበት ጊዜ።”
ሉቃስ 11:34 * ቃል በቃል፣ “ዓይንህ ክፉ በሚሆንበት ጊዜ።”
ሉቃስ 11:38 * ይህ አነጋገር በወጉና በሥርዓቱ መሠረት አለመታጠቡን ያሳያል። ማርቆስ 7:3ን ተመልከት።
ሉቃስ 11:41 ማቴዎስ 6:2 ላይ የሚገኘውን የግርጌ ማስታወሻ ተመልከት።