በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 10:1-42

10  ከዚህ በኋላ ጌታ ሌሎች ሰባ ሰዎች ሾመ፤ እሱ ሊሄድበት ወዳሰበው ከተማና ቦታ ሁሉ ቀድመውት እንዲሄዱም ሁለት ሁለት አድርጎ ላካቸው።  ከዚያም እንዲህ ይላቸው ጀመር:- “በእርግጥም አዝመራው ብዙ ነው፤ ሠራተኞቹ ግን ጥቂት ናቸው። ስለዚህ የመከሩ ሥራ ኃላፊ ወደ መከሩ ሥራ ሠራተኞች እንዲልክ ለምኑት።  እንግዲህ ሂዱ። እነሆ፣ በተኩላዎች መካከል እንዳሉ በጎች እልካችኋለሁ።  ኮሮጆ ወይም የምግብ ከረጢት ወይም ትርፍ ጫማ አትያዙ፤ በመንገድ ላይም ቆማችሁ ከማንም ጋር ሰላምታ አትለዋወጡ።  ወደ ማንኛውም ቤት ስትገቡ በቅድሚያ ‘ሰላም ለዚህ ቤት ይሁን’ በሉ።  በዚያም ሰላም ወዳድ ሰው ከሌለ ሰላማችሁ ወደ እናንተ ይመለሳል። ሰላም ወዳድ ሰው ካለ ግን ሰላማችሁ ያርፍበታል።  ለሠራተኛ ደሞዙ ስለሚገባው ያቀረቡላችሁን ነገር እየበላችሁና እየጠጣችሁ በዚያው ቤት ቆዩ። ከአንዱ ቤት ወደ ሌላው ቤት አትዘዋወሩ።  “በተጨማሪም ወደ ማንኛውም ከተማ ስትገቡ ሰዎቹ ከተቀበሏችሁ ያቀረቡላችሁን ብሉ፤  እንዲሁም በዚያ ያሉትን በሽተኞች ፈውሱ፤ ‘የአምላክ መንግሥት ወደ እናንተ ቀርቧል’ ብላችሁም ንገሯቸው። 10  ሆኖም ወደ ማንኛውም ከተማ ስትገቡ ሰዎቹ ካልተቀበሏችሁ ወደ አውራ ጎዳናዎች ወጥታችሁ እንዲህ በሉ:- 11  ‘በእግራችን ላይ ያለውን የከተማችሁን አቧራ እንኳ ሳይቀር አራግፈንላችሁ እንሄዳለን። ይሁንና የአምላክ መንግሥት እንደቀረበ አትዘንጉ።’ 12  እላችኋለሁ፣ በዚያ ቀን ከዚያች ከተማ ይልቅ ለሰዶም ቅጣቱ ይቀልላታል። 13  “ወዮልሽ ኮራዚን! ወዮልሽ ቤተሳይዳ! በእናንተ ውስጥ የተደረጉት ተአምራት በጢሮስና በሲዶና ተደርገው ቢሆን ኖሮ ገና ድሮ ማቅ ለብሰውና አመድ ላይ ተቀምጠው ንስሐ በገቡ ነበር። 14  ስለዚህ በፍርድ ወቅት ከእናንተ ይልቅ ለጢሮስና ለሲዶና ቅጣቱ ይቀልላቸዋል። 15  አንቺም ቅፍርናሆም ወደ ሰማይ ከፍ የምትዪ ይመስልሻል? ወደ ሔዲስ* ትወርጃለሽ! 16  “እናንተን የሚሰማ እኔንም ይሰማል። እናንተን የማይቀበል ደግሞ እኔንም አይቀበልም። ከዚህም በላይ እኔን የማይቀበል የላከኝንም አይቀበልም።” 17  ከዚያም ሰባዎቹ ደስ እያላቸው ተመልሰው “ጌታ ሆይ፣ አጋንንት እንኳ ሳይቀሩ በስምህ ተገዙልን” አሉት። 18  በዚህ ጊዜ ኢየሱስ እንዲህ አላቸው:- “ሰይጣን እንደ መብረቅ ከሰማይ ሲወድቅ አየሁ። 19  እነሆ፣ እባቦችንና ጊንጦችን እንድትረግጡ እንዲሁም የጠላትን ኃይል ሁሉ እንድትቋቋሙ ሥልጣን ሰጥቻችኋለሁ፤ የሚጎዳችሁም አንዳች ነገር አይኖርም። 20  ይሁን እንጂ መናፍስት ስለተገዙላችሁ በዚህ ደስ አይበላችሁ፤ ከዚህ ይልቅ ስማችሁ በሰማያት ስለተጻፈ ደስ ይበላችሁ።” 21  በዚያን ሰዓት ኢየሱስ በመንፈስ ቅዱስ ሐሴት አድርጎ እንዲህ አለ:- “የሰማይና የምድር ጌታ አባት ሆይ፣ እነዚህን ነገሮች ከጥበበኞችና ከአዋቂዎች ሰውረህ ለሕፃናት ስለገለጥክላቸው በሕዝብ ፊት አወድስሃለሁ። አዎ፣ አባት ሆይ፣ ይህን ማድረጉ የአንተ ፈቃድ ሆኖ ተገኝቷል። 22  ሁሉንም ነገር አባቴ ሰጥቶኛል፤ ከአብ በስተቀር ወልድ ማን እንደሆነ የሚያውቅ የለም፤ እንዲሁም ከወልድና ወልድ ሊገልጥለት ከሚፈቅድለት በስተቀር አብ ማን እንደሆነ የሚያውቅ የለም።” 23  ከዚያም ወደ ደቀ መዛሙርቱ ዞር ብሎ ለብቻቸው እንዲህ አላቸው:- “እናንተ እያያችሁት ያላችሁትን ነገር የሚያዩ ዓይኖች ደስተኞች ናቸው። 24  እላችኋለሁ፣ ብዙ ነቢያትና ነገሥታት እናንተ እያያችሁት ያለውን ነገር ለማየት ተመኝተው ነበር፤ ግን አላዩም፤ እየሰማችሁት ያለውን ነገርም ለመስማት ተመኝተው ነበር፤ ግን አልሰሙም።” 25  እነሆም አንድ ሕግ አዋቂ ኢየሱስን ሊፈትነው ተነስቶ “መምህር፣ የዘላለም ሕይወት የማገኘው ምን ባደርግ ነው?” አለው። 26  ኢየሱስም “በሕጉ ላይ የተጻፈው ምንድን ነው? አንተስ ምን ትረዳለህ?” አለው። 27  እሱም መልሶ “‘አምላክህን ይሖዋን በሙሉ ልብህ፣ በሙሉ ነፍስህ፣ በሙሉ ኃይልህና በሙሉ አእምሮህ ውደድ’፤ እንዲሁም ‘ባልንጀራህን* እንደ ራስህ ውደድ’” አለው። 28  ኢየሱስም “በትክክል መልሰሃል፤ ‘ዘወትር ይህን አድርግ፤ ሕይወትም ታገኛለህ’” አለው። 29  ሰውየው ግን ጻድቅ መሆኑን ለማሳየት ፈልጎ ኢየሱስን “ለመሆኑ ባልንጀራዬ ማን ነው?” አለው። 30  ኢየሱስም መልሶ እንዲህ አለው:- “አንድ ሰው ከኢየሩሳሌም ወደ ኢያሪኮ ሲወርድ በዘራፊዎች እጅ ወደቀ፤ እነሱም ከገፈፉትና ከደበደቡት በኋላ በሕይወትና በሞት መካከል ጥለውት ሄዱ። 31  እንደ አጋጣሚ አንድ ካህን በዚያ መንገድ ሲወርድ ሰውየውን አየውና ገለል ብሎ አልፎት ሄደ። 32  በተመሳሳይም አንድ ሌዋዊ እዚያ ቦታ ሲደርስ አየውና ገለል ብሎ አልፎት ሄደ። 33  ሆኖም አንድ ሳምራዊ በዚያ መንገድ ሲጓዝ ሰውየው ወዳለበት ቦታ ደረሰ፤ ባየውም ጊዜ በጣም አዘነለት። 34  ስለሆነም ወደ ሰውየው ቀርቦ በቁስሎቹ ላይ ዘይትና የወይን ጠጅ በማፍሰስ በጨርቅ አሰረለት። ከዚያም በራሱ አህያ ላይ ካስቀመጠው በኋላ ወደ አንድ የእንግዶች ማረፊያ በመውሰድ ተንከባከበው። 35  በማግስቱም ሁለት ዲናር አውጥቶ ለእንግዶች ማረፊያ ቤቱ ባለቤት ሰጠውና ‘ይህን ሰው አስታመው፤ ከዚህ በላይ የምታወጣውን ተጨማሪ ወጪ ሁሉ ስመለስ እከፍልሃለሁ’ አለው። 36  ታዲያ ከእነዚህ ሦስት ሰዎች በዘራፊዎች እጅ ለወደቀው ሰው ባልንጀራ ሆኖ የተገኘው የትኛው ይመስልሃል?” 37  እሱም “ምሕረት በማሳየት የረዳው ነው” አለ። ከዚያም ኢየሱስ “አንተም ሂድና እንዲሁ አድርግ” አለው። 38  እየተጓዙ ሳሉም ወደ አንድ መንደር ገባ። በዚያም ማርታ የምትባል አንዲት ሴት በቤቷ በእንግድነት ተቀበለችው። 39  ይህች ሴት ማርያም የምትባል እህት ነበረቻት፤ ይሁንና ማርያም በጌታ እግር ሥር ተቀምጣ የሚናገረውን ታዳምጥ ነበር። 40  ማርታ ግን በብዙ ሥራ ተጠምዳ ትባክን ነበር። በመሆኑም ወደ እሱ ቀርባ “ጌታ ሆይ፣ እህቴ ሥራውን ሁሉ ለእኔ ጥላ ስትቀመጥ ምንም ግድ አይሰጥህም? እንድታግዘኝ ንገራት እንጂ” አለችው። 41  ጌታም መልሶ እንዲህ አላት:- “ማርታ፣ ማርታ፣ ስለ ብዙ ነገር ትጨነቂያለሽ፣ ትጠበቢያለሽ። 42  ይሁንና የሚያስፈልገው ጥቂት ወይም አንድ ነገር ብቻ ነው። ማርያም በበኩሏ የተሻለውን ነገር መርጣለች፤ ይህም ከእሷ አይወሰድባትም።”

የግርጌ ማስታወሻዎች

ሉቃስ 10:15 * ከተጨማሪው መረጃ ላይ 8ኛውን ርዕስ ተመልከት።
ሉቃስ 10:27 * “ባልንጀራ” ተብሎ የተተረጎመው ግሪክኛ ቃል የአንድን ሰው የቅርብ ጓደኛ ብቻ ሳይሆን ማንኛውንም ሰው ሊያመለክት ይችላል።