በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

መጽሐፍ ቅዱስ በኢንተርኔት | መጽሐፍ ቅዱስ--አዲስ ዓለም ትርጉም በ2013 ተሻሽሎ የወጣውን ተመልከት

ሉቃስ 1:1-80

1  ብዙዎች እኛ ሙሉ እምነት የጣልንባቸውን መረጃዎች ለማጠናቀር የተቻላቸውን ጥረት አድርገዋል፤  ከመጀመሪያው አንስቶ የዓይን ምሥክሮችና የመልእክቱ አገልጋዮች የነበሩት ሰዎችም እነዚህን መረጃዎች ለእኛ አስተላልፈዋል።  ክቡር ቴዎፍሎስ ሆይ፣ እኔም በበኩሌ ሁሉንም ነገር ከመጀመሪያው አንስቶ በጥንቃቄ ስለመረመርኩ ታሪኩን በቅደም ተከተል ልጽፍልህ ወሰንኩ።  ይህንንም ያደረግኩት በቃል የተማርካቸው ነገሮች እርግጠኛ መሆናቸውን በሚገባ እንድታውቅ ነው።  በይሁዳ ንጉሥ በሄሮድስ* ዘመን፣ በአቢያ የክህነት ምድብ ውስጥ የሚያገለግል ዘካርያስ የሚባል አንድ ካህን ነበር፤ እሱም የአሮን ዘር የሆነች ኤልሳቤጥ የምትባል ሚስት ነበረችው።  የይሖዋን ትእዛዛትና ሕግጋት እየጠበቁ ያለ ነቀፋ ይኖሩ ስለነበር ሁለቱም በአምላክ ፊት ጻድቃን ነበሩ።  ይሁን እንጂ ኤልሳቤጥ መሃን ስለነበረች ልጅ አልነበራቸውም፤ እንዲሁም ሁለቱም በዕድሜ የገፉ ነበሩ።  አንድ ቀን ዘካርያስ እሱ ያለበት ምድብ ተራ ደርሶ በአምላክ ፊት በክህነት እያገለገለ ሳለ  በሥርዓተ ክህነቱ መሠረት ወደ ይሖዋ ቤተ መቅደስ ገብቶ ዕጣን የሚያጥንበት ተራ ደረሰው፤ 10  ዕጣን በሚቀርብበት ሰዓት ሕዝቡ ሁሉ በውጭ ሆነው ይጸልዩ ነበር። 11  የይሖዋም መልአክ ከዕጣን መሠዊያው በስተቀኝ ቆሞ ታየው። 12  ዘካርያስም መልአኩን ባየው ጊዜ ደነገጠ፤ በፍርሃትም ተዋጠ። 13  መልአኩ ግን እንዲህ አለው:- “ዘካርያስ፣ አትፍራ፤ ምክንያቱም ልመናህ ተሰምቶልሃል፤ ሚስትህ ኤልሳቤጥም ወንድ ልጅ ትወልድልሃለች፤ ስሙንም ዮሐንስ ትለዋለህ። 14  እጅግ ትደሰታለህ፣ ሐሴትም ታደርጋለህ፤ ብዙዎችም በእሱ መወለድ ደስ ይላቸዋል፤ 15  ምክንያቱም በይሖዋ ፊት ታላቅ ይሆናል። ይሁንና የወይን ጠጅም ሆነ ሌላ የሚያሰክር መጠጥ ፈጽሞ መጠጣት የለበትም፤ በእናቱ ማህፀን ውስጥ ካለበት ጊዜ ጀምሮም በመንፈስ ቅዱስ ይሞላል፤ 16  ከእስራኤል ልጆች መካከልም ብዙዎቹን ወደ አምላካቸው ወደ ይሖዋ ይመልሳል። 17  በተጨማሪም የአባቶችን ልብ ወደ ልጆች፣ የማይታዘዙትንም ሰዎች ወደ ጻድቃን ጥበብ ለመመለስ እንዲሁም ሰዎችን ለይሖዋ ለማዘጋጀት በኤልያስ መንፈስና ኃይል በፊቱ ይሄዳል።” 18  ዘካርያስም መልአኩን “ይህ ነገር እርግጠኛ መሆኑን በምን አውቃለሁ? እኔ እንደሆነ አርጅቻለሁ፤ ሚስቴም ዕድሜዋ ገፍቷል” አለው። 19  መልአኩም መልሶ እንዲህ አለው:- “እኔ በአምላክ ፊት የምቆመው ገብርኤል ነኝ፤ አንተን እንዳነጋግርህና ይህን የምሥራች እንዳበስርህ ተልኬ መጥቻለሁ። 20  ሆኖም በተወሰነለት ጊዜ የሚፈጸመውን ቃሌን ስላላመንክ ይህ ነገር እስኪፈጸም ድረስ ዲዳ ትሆናለህ፣ መናገርም አትችልም።” 21  ይህ በእንዲህ እንዳለ ሕዝቡ ዘካርያስን በመጠባበቅ ላይ ነበሩ፤ በቤተ መቅደሱ ውስጥ በመዘግየቱም ግራ ተጋቡ። 22  በወጣ ጊዜም ሊያናግራቸው አልቻለም፤ እነሱም በቤተ መቅደሱ ውስጥ አንድ ራእይ እንዳየ ተገነዘቡ፤ ከዚያ በኋላ ዲዳ ስለሆነ በምልክት ብቻ ያናግራቸው ነበር። 23  በቤተ መቅደሱ ውስጥ የሚያገለግልባቸው ቀናት ሲያበቁ ወደ ቤቱ ሄደ። 24  ከዚህ በኋላ ሚስቱ ኤልሳቤጥ ፀነሰች፤ ለአምስት ወርም ከቤት ሳትወጣ ቆየች፤ እንዲህም አለች:- 25  “ይሖዋ በሰዎች መካከል ይደርስብኝ የነበረውን ነቀፋ ለማስወገድ ፊቱን ወደ እኔ በመመለስ በዚህ ወቅት ይህን አደረገልኝ።” 26  ኤልሳቤጥ በፀነሰች በስድስተኛ ወሯ አምላክ መልአኩ ገብርኤልን በገሊላ ወደምትገኝ ናዝሬት ወደተባለች ከተማ ላከው፤ 27  የተላከውም ከዳዊት ቤት ለሆነ ዮሴፍ ለሚባል ሰው ወደታጨች አንዲት ድንግል ሲሆን የድንግሊቱም ስም ማርያም ነበር። 28  መልአኩም እሷ ወዳለችበት ገብቶ “እጅግ የተወደድሽ ሆይ፣ ሰላም ለአንቺ ይሁን፤ ይሖዋ ከአንቺ ጋር ነው” አላት። 29  እሷ ግን በንግግሩ በጣም ደንግጣ ‘ይህ ምን ዓይነት ሰላምታ ነው?’ በማለት በውስጧ ታስብ ጀመር። 30  ስለዚህ መልአኩ እንዲህ አላት:- “ማርያም ሆይ፣ በአምላክ ፊት ሞገስ ስላገኘሽ አትፍሪ፤ 31  እነሆም፣ ትፀንሻለሽ፣ ወንድ ልጅም ትወልጃለሽ፤ ስሙንም ኢየሱስ ትዪዋለሽ። 32  እሱም ታላቅ ይሆናል፣ የልዑሉም ልጅ ይባላል፤ ይሖዋ አምላክም የአባቱን የዳዊትን ዙፋን ይሰጠዋል፤ 33  በያዕቆብ ቤትም ላይ ለዘላለም ንጉሥ ሆኖ ይገዛል፤ መንግሥቱም መጨረሻ የለውም።” 34  ማርያም ግን መልአኩን “እኔ ከወንድ ጋር ግንኙነት አድርጌ ስለማላውቅ ይህ እንዴት ሊሆን ይችላል?” አለችው። 35  መልአኩም መልሶ እንዲህ አላት:- “መንፈስ ቅዱስ በአንቺ ላይ ይመጣል፤ የልዑሉም ኃይል በአንቺ ላይ ያርፋል። ስለሆነም የሚወለደው ልጅ ቅዱስ፣ የአምላክ ልጅ ይባላል። 36  እነሆ፣ ዘመድሽ ኤልሳቤጥም በስተርጅናዋ ወንድ ልጅ ፀንሳለች፤ መሃን የተባለችው ሴትም ይኸው ስድስተኛ ወሯን ይዛለች፤ 37  ምክንያቱም አምላክ የተናገረው ቃል በምንም ዓይነት ሳይፈጸም አይቀርም።” 38  በዚህ ጊዜ ማርያም “እነሆ፣ እኔ የይሖዋ ባሪያ ነኝ! እንደ ቃልህ ይሁንልኝ” አለች። ከዚያም መልአኩ ተለይቷት ሄደ። 39  በመሆኑም ማርያም በዚያው ሰሞን ተነስታ በተራራማው አገር ወደምትገኝ አንዲት የይሁዳ ከተማ በፍጥነት ሄደች፤ 40  ወደ ዘካርያስ ቤት ገብታም ኤልሳቤጥን ሰላም አለቻት። 41  ኤልሳቤጥ የማርያምን ሰላምታ በሰማች ጊዜ በማህፀኗ ውስጥ ያለው ፅንስ ዘለለ፤ ኤልሳቤጥም በመንፈስ ቅዱስ ተሞላች፤ 42  ድምፅዋንም ከፍ አድርጋ እንዲህ አለች:- “አንቺ ከሴቶች መካከል የተባረክሽ ነሽ፤ የማህፀንሽ ፍሬም የተባረከ ነው! 43  የጌታዬ እናት ወደ እኔ መምጣቷ ለእኔ እንዴት ያለ ታላቅ ክብር ነው! 44  ምክንያቱም የሰላምታሽን ድምፅ እንደሰማሁ በማህፀኔ ያለው ፅንስ በታላቅ ደስታ ዘሏል። 45  ይሖዋ የነገራት ነገር ሙሉ በሙሉ የሚፈጸም በመሆኑ ይህን ያመነች ደስተኛ ነች።” 46  ማርያምም እንዲህ አለች:- “ነፍሴ ይሖዋን ከፍ ከፍ ታደርገዋለች፤ 47  መንፈሴም አዳኜ በሆነው አምላክ እጅግ ደስ ይሰኛል፤ 48  ምክንያቱም ባሪያው ያለችበትን ዝቅ ያለ ሁኔታ ተመልክቷል። እነሆ፣ ከአሁን ጀምሮ ትውልድ ሁሉ ደስተኛ ይሉኛል፤ 49  ምክንያቱም ኃያል የሆነው እሱ ታላላቅ ነገሮች አድርጎልኛል፤ ስሙም ቅዱስ ነው፤ 50  ምሕረቱም በሚፈሩት ሁሉ ላይ ከትውልድ እስከ ትውልድ ይኖራል። 51  በክንዱም ታላላቅ ሥራዎች አከናውኗል፤ በልባቸው በሚያስቡት ነገር ትዕቢተኛ የሆኑትንም በትኗቸዋል። 52  ገዥዎችን ከዙፋናቸው አውርዷል፤ ዝቅ ያሉትንም ከፍ አድርጓል፤ 53  የተራቡትን በመልካም ነገሮች አጥግቧል፤ ሀብታሞችንም ባዷቸውን ሰዷቸዋል። 54  ለዘላለም ምሕረት ለማሳየት የገባው ቃል እንዲታወስ ሲል አገልጋዩን እስራኤልን ረድቷል፤ 55  ይህንንም ያደረገው ለአባቶቻችን ይኸውም ለአብርሃምና ለዘሩ በገባው ቃል መሠረት ነው።” 56  ማርያምም ከኤልሳቤጥ ጋር ሦስት ወር ያህል ከቆየች በኋላ ወደ ቤቷ ተመለሰች። 57  ኤልሳቤጥ የመውለጃዋ ጊዜ ደረሰና ወንድ ልጅ ወለደች። 58  ጎረቤቶቿና ዘመዶቿም ይሖዋ ታላቅ ምሕረት እንዳደረገላት ሰምተው የደስታዋ ተካፋዮች ሆኑ። 59  በስምንተኛውም ቀን ሕፃኑን ሊገርዙት መጡ፤ በአባቱም ስም ዘካርያስ ብለው ሊጠሩት ፈልገው ነበር። 60  እናትየው ግን መልሳ “አይሆንም! ዮሐንስ መባል አለበት” አለች። 61  በዚህ ጊዜ “ከዘመዶችሽ መካከል በዚህ ስም የተጠራ ማንም የለም” አሏት። 62  ከዚያም አባቱን ማን ተብሎ እንዲጠራ እንደሚፈልግ በምልክት ጠየቁት። 63  እሱም የእንጨት ጽላት እንዲያመጡለት ጠየቀና “ስሙ ዮሐንስ ነው” ብሎ ጻፈ። በዚህ ጊዜ ሁሉም ተደነቁ። 64  ወዲያውም አፉ ተከፈተ፣ አንደበቱም ተፈቶ መናገር ጀመረ፤ አምላክንም ባረከ። 65  ጎረቤቶቻቸውም ሁሉ በፍርሃት ተዋጡ፤ የሆነውም ነገር ሁሉ በተራራማው የይሁዳ አገር በሙሉ ይወራ ጀመር፤ 66  ይህንም የሰሙ ሁሉ “የዚህ ሕፃን መጨረሻ ምን ይሆን?” በማለት ነገሩን በልባቸው ያዙ። ምክንያቱም የይሖዋ እጅ ከእሱ ጋር እንደሆነ በግልጽ ይታይ ነበር። 67  አባቱ ዘካርያስም በመንፈስ ቅዱስ ተሞልቶ እንዲህ ሲል ትንቢት ተናገረ:- 68  “የእስራኤል አምላክ ይሖዋ ፊቱን ወደ ሕዝቡ በመመለስ ለሕዝቡ የማዳን ተግባር ስለፈጸመ የተባረከ ይሁን። 69  በአገልጋዩ በዳዊት ቤት የመዳን ቀንድ አስነስቶልናል፤ 70  ይህም ከጥንት ዘመን ጀምሮ በነበሩት ቅዱሳን ነቢያቱ አፍ በተናገረው መሠረት ሲሆን 71  ከጠላቶቻችንና ከሚጠሉን ሰዎች ሁሉ እጅ እንደሚያድነን 72  እንዲሁም ለአባቶቻችን ሲል ምሕረት እንደሚያሳየንና ቅዱስ ቃል ኪዳኑ እንዲታወስ እንደሚያደርግ ተናግሯል፤ 73  ይህም ቃል ኪዳን ለአባታችን ለአብርሃም የማለው መሐላ ነው፤ 74  በመሐላው መሠረትም ከጠላቶቻችን እጅ ነፃ ካወጣን በኋላ ለእሱ ያለ ፍርሃት ቅዱስ አገልግሎት የማቅረብ መብት ይሰጠናል፤ 75  ይህንንም የምናከናውነው በሕይወት ዘመናችን ሁሉ በፊቱ በታማኝነትና በጽድቅ በመኖር ነው። 76  ደግሞም አንተ ሕፃን፣ መንገዱን ለማዘጋጀት ቀድመህ በይሖዋ ፊት ስለምትሄድ የልዑሉ ነቢይ ትባላለህ፤ 77  ለሕዝቡም ኃጢአታቸው ይቅር ተብሎላቸው መዳን እንዲያገኙ የሚያስችላቸውን እውቀት ትሰጣቸዋለህ፤ 78  ይህም የሆነው በአምላካችን ከአንጀት የመነጨ ርኅራኄ ነው። ከዚህ ርኅራኄም የተነሳ እንደ ንጋት ፀሐይ የሚያበራ ብርሃን ከላይ ይወጣልናል፤ 79  ይኸውም በጨለማና በሞት ጥላ ውስጥ ለተቀመጡት ብርሃን ለመስጠት እንዲሁም እግሮቻችንን በሰላም መንገድ ላይ በተቃና ሁኔታ ለመምራት ነው።” 80  ሕፃኑም በአካል እያደገና በመንፈስ እየጠነከረ ሄደ፤ ለእስራኤልም በይፋ እስከታየበት ቀን ድረስ በበረሃ ኖረ።

የግርጌ ማስታወሻዎች

ሉቃስ 1:5 ማቴዎስ 2:1 ላይ የሚገኘውን የግርጌ ማስታወሻ ተመልከት።