በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ትክክለኛው የመጽሐፍ ቅዱስ ትምህርት ምንድን ነው?

 ተጨማሪ ክፍል

ኢየሱስ ክርስቶስ—አስቀድሞ የተነገረለት መሲሕ

ኢየሱስ ክርስቶስ—አስቀድሞ የተነገረለት መሲሕ

ይሖዋ አምላክ መሲሑን ለይተን ማወቅ እንድንችል ለመርዳት በርካታ የመጽሐፍ ቅዱስ ነቢያት የሰውን ዘር ነፃ እንደሚያወጣ የተነገረለት ይህ መሲሕ ስለሚወለድበት ሁኔታ፣ ስለ አገልግሎቱና ስለ አሟሟቱ ዝርዝር መረጃዎችን እንዲሰጡ በመንፈሱ አነሳስቷቸዋል። እነዚህ የመጽሐፍ ቅዱስ ትንቢቶች  በሙሉ በኢየሱስ ክርስቶስ ላይ ተፈጽመዋል። ትንቢቶቹ በሚያስገርም ሁኔታ ትክክለኛ ከመሆናቸውም በላይ ዝርዝር መረጃዎችን የያዙ ናቸው። ይህን በምሳሌ ለማስረዳት መሲሑ ከሚወለድበት ሁኔታና ከልጅነት ዘመኑ ጋር የተያያዙ ክንውኖችን የሚገልጹ ጥቂት ትንቢቶችን እስቲ እንመልከት።

ነቢዩ ኢሳይያስ መሲሑ የንጉሥ ዳዊት ዘር እንደሚሆን አስቀድሞ ተናግሮ ነበር። (ኢሳይያስ 9:7) በእርግጥም ኢየሱስ የተወለደው ከዳዊት ዘር ነው።—ማቴዎስ 1:1, 6-17

 ሚክያስ የተባለ ሌላ የአምላክ ነቢይ ይህ ልጅ ከጊዜ በኋላ ገዥ እንደሚሆንና ‘በቤተ ልሔም ኤፍራታ’ እንደሚወለድ ተንብዮአል። (ሚክያስ 5:2) ኢየሱስ በተወለደበት ዘመን በእስራኤል ቤተልሔም ተብለው የሚጠሩ ሁለት ከተሞች ነበሩ። አንደኛዋ ከተማ በሰሜናዊው የአገሪቱ ክፍል ናዝሬት አጠገብ የምትገኝ ሲሆን ሌላዋ ደግሞ በይሁዳ ምድር ኢየሩሳሌም አቅራቢያ ትገኝ ነበር። ኢየሩሳሌም አቅራቢያ የምትገኘው ቤተልሔም ቀደም ሲል ኤፍራታ ትባል ነበር። ልክ አስቀድሞ እንደተተነበየው ኢየሱስ የተወለደው በዚህች ከተማ ነው!—ማቴዎስ 2:1

ሌላ የመጽሐፍ ቅዱስ ትንቢት ደግሞ የአምላክ ልጅ ‘ከግብፅ እንደሚጠራ’ አስቀድሞ ተናግሮ ነበር። ኢየሱስ ሕፃን ሳለ ወደ ግብፅ ተወስዶ ነበር። ሄሮድስ ከሞተ በኋላ ከግብፅ የተመለሰ በመሆኑ ትንቢቱ በትክክል ተፈጽሟል።—ሆሴዕ 11:1፤ ማቴዎስ 2:15

 ገጽ 200 ላይ በሚገኘው ሰንጠረዥ ላይ “ትንቢት” በሚለው ርዕስ ሥር የተዘረዘሩት ጥቅሶች መሲሑን አስመልክተው የተነገሩ ዝርዝር መረጃዎችን ይዘዋል። እባክህ እነዚህን ጥቅሶች “ፍጻሜ” በሚል ርዕስ ሥር ከሰፈሩት ጥቅሶች ጋር አመሳክር። ይህን ማድረግህ በአምላክ ቃል እውነተኝነት ላይ ያለህን እምነት ይበልጥ ያጠናክርልሃል።

እነዚህን ጥቅሶች ስታነብ ትንቢቶቹ የተጻፉት ኢየሱስ ከመወለዱ ከብዙ መቶ ዓመታት በፊት መሆኑን አስታውስ። ኢየሱስ “በሙሴ ሕግ፣ በነቢያትና በመዝሙር መጻሕፍት ስለ እኔ የተጻፈው ሁሉ ይፈጸም ዘንድ ይገባል” ሲል ተናግሯል። (ሉቃስ 24:44) በራስህ መጽሐፍ ቅዱስ ማረጋገጥ እንደምትችለው በትንቢቶቹ ላይ የተጠቀሰው እያንዳንዱ ዝርዝር መግለጫ በትክክል ተፈጽሟል!