በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 26

“ይቅር ባይ” አምላክ

“ይቅር ባይ” አምላክ

1-3. (ሀ) መዝሙራዊው ዳዊት ከባድ ሸክም ሆኖበት የነበረው ምንድን ነው? ማጽናኛ ያገኘውስ እንዴት ነው? (ለ) ኃጢአት በምንሠራበት ጊዜ ምን ነገር ሸክም ሊሆንብን ይችላል? ሆኖም ይሖዋ ምን ማረጋገጫ ሰጥቶናል?

መዝሙራዊው ዳዊት “ኃጢአቴ በራሴ ላይ ከፍ ከፍ ብሎአልና፣ እንደ ከባድ ሸክምም በላዬ ከብዶአልና። ታመምሁ እጅግም ተቸገርሁ” ሲል ጽፏል። (መዝሙር 38:4, 8) ዳዊት የሕሊና ወቀሳ ምን ያህል ከባድ ሸክም እንደሆነ ያውቅ ነበር። ይሁን እንጂ የተረበሸውን ልቡን የሚያረጋጋ ማጽናኛ አግኝቷል። ይሖዋ ኃጢአትን የሚጠላ ቢሆንም እንኳ ንስሐ የገባንና መጥፎ ድርጊቱን እርግፍ አድርጎ የተወን ሰው እንደማይጠላ ተገንዝቦ ነበር። ዳዊት፣ ይሖዋ ንስሐ የገቡ ሰዎችን ይቅር ለማለት ዝግጁ እንደሆነ ሙሉ በሙሉ በመተማመን “አቤቱ፣ አንተ . . . ይቅር ባይ ነህ” ሲል ተናግሯል።—መዝሙር 86:5

2 እኛም ኃጢአት በምንሠራበት ጊዜ የሕሊና ወቀሳ እረፍት ሊነሳንና ከባድ ሸክም ሊሆንብን ይችላል። በሠራነው ድርጊት መጸጸታችን ጥሩ ነው። የሠራነውን ስህተት ለማረም አስፈላጊ የሆኑ እርምጃዎችን እንድንወስድ ሊያነሳሳን ይችላል። ይሁን እንጂ ከመጠን በላይ በጥፋተኝነት ስሜት እንዳንዋጥ መጠንቀቅ ይኖርብናል። ራሱን የመኮነን ዝንባሌ ያለው ልባችን ምንም ያህል ንስሐ ብንገባ ይሖዋ ይቅር እንደማይለን ሆኖ እንዲሰማን ሊያደርገን ይችላል። በጥፋተኝነት ስሜት ‘ከተዋጥን’ ሰይጣን በይሖዋ ፊት ዋጋ እንደሌለንና እሱን ለማገልገል ብቁ እንዳልሆንን ሆኖ እንዲሰማን በማድረግ ተስፋ ሊያስቆርጠን ይሞክራል።—2 ቆሮንቶስ 2:5-11

3 ይሁንና ይሖዋ የሚመለከተን በዚህ መንገድ ነው? በፍጹም! ታላቅ የሆነው የይሖዋ ፍቅር አንዱ ገጽታ ይቅር ባይነት ነው። ከልብ የመነጨ እውነተኛ የንስሐ ፍሬ ካሳየን ይቅር እንደሚለን በቃሉ አማካኝነት ማረጋገጫ ሰጥቶናል። (ምሳሌ 28:13) ይሖዋ ፈጽሞ ይቅር ሊለኝ አይችልም የሚለውን ስሜት ማሸነፍ እንድንችል በመጀመሪያ ይሖዋ ለምንና እንዴት ይቅር እንደሚል እንመርምር።

 ይሖዋ “ይቅር ባይ” የሆነው ለምንድን ነው?

4. ይሖዋ አፈጣጠራችንን በተመለከተ የማይዘነጋው ነገር ምንድን ነው? ይህስ ስለ እኛ ያለውን አመለካከት የሚነካው እንዴት ነው?

4 ይሖዋ ያለብንን የአቅም ገደብ በሚገባ ያውቃል። መዝሙር 103:14 “ፍጥረታችንን እርሱ ያውቃልና፤ አቤቱ፣ እኛ አፈር እንደ ሆንን አስብ” ይላል። ከአፈር እንደተሠራንና በአለፍጽምና ምክንያት ድክመት ወይም ጉድለት እንዳለብን ፈጽሞ አይዘነጋም። “ፍጥረታችንን” ያውቃል የሚለው አገላለጽ መጽሐፍ ቅዱስ ይሖዋን ከሸክላ ሠሪ እኛን ደግሞ እሱ ከሚሠራቸው የሸክላ ዕቃዎች ጋር በማመሳሰል የሚሰጠውን ሐሳብ እንድናስታውስ ያደርገናል። * (ኤርምያስ 18:2-6) ታላቁ ሸክላ ሠሪ ይሖዋ በወረስነው ኃጢአት ምክንያት ያለብንን ድክመት የሚረዳ ከመሆኑም በላይ ለመመሪያው የምንሰጠውን ምላሽም ግምት ውስጥ ያስገባል።

5. የሮሜ መጽሐፍ ኃጢአት ያለውን ኃይል የሚገልጸው እንዴት ነው?

5 ይሖዋ ኃጢአት ምን ያህል ኃይል እንዳለው ያውቃል። ቃሉ እንደሚገልጸው ኃጢአት የሰውን ዘር አንቆ የያዘ ኃይል ነው። ኃጢአት የሰውን ዘር አንቆ የያዘው ምን ያህል ነው? ሐዋርያው ጳውሎስ በሮሜ መጽሐፍ ላይ እንዲህ ሲል ገልጿል:- ወታደሮች በአዛዣቸው ሥልጣን ሥር እንደሆኑ ሁሉ እኛም “ከኃጢአት በታች” ነን (ሮሜ 3:9)፤ ኃጢአት በሰው ልጆች ላይ ‘ነግሦአል’ (ሮሜ 5:20, 21)፤ በእኛ ውስጥ “የሚያድር” ወይም “የሚኖር” ነው (ሮሜ 7:17, 20)፤ የኃጢአት “ሕግ” ያለማቋረጥ በውስጣችን ይሠራል፤ በሌላ አነጋገር አኗኗራችንን ሊቆጣጠረው ይሞክራል። (ሮሜ 7:23, 25) በእርግጥም ኃጢአት ፍጽምና የጎደለውን ሥጋችንን በቁጥጥሩ ሥር አድርጎታል!—ሮሜ 7:21, 24

6, 7. (ሀ) ይሖዋ ልባቸው ለተሰበረና የእሱን ምሕረት ለሚሹ ሰዎች ምን ዓይነት አመለካከት አለው? (ለ) የአምላክን ምሕረት አላግባብ ልንጠቀምበት የማይገባው ለምንድን ነው?

6 በመሆኑም ይሖዋ እሱን ለመታዘዝ የቱንም ያህል ልባዊ ፍላጎት ቢኖረን ፍጹም በሆነ ደረጃ ልንታዘዘው እንደማንችል ያውቃል። ከልብ ንስሐ ገብተን ይቅር እንዲለን ብንለምነው ምሕረት እንደሚያደርግልን ዋስትና ሰጥቶናል። መዝሙር 51:17 “የእግዚአብሔር መሥዋዕት የተሰበረ  መንፈስ ነው፣ የተሰበ[ረ]ውንና የተዋረደውን ልብ እግዚአብሔር አይንቅም” ይላል። ይሖዋ ልቡ በጥፋተኝነት ስሜት ‘የተሰበረንና የተዋረደን’ ሰው መቼም ቢሆን ፊት አይነሳም።

7 ይሁን እንጂ እንዲህ ሲባል አለፍጽምናችንን ለኃጢአት ማሳበቢያ በማድረግ የአምላክን ምሕረት አላግባብ ልንጠቀምበት እንችላለን ማለት ነው? በፍጹም! ይሖዋ እንዲሁ በስሜት የሚመራ አምላክ አይደለም። ምሕረቱ ገደብ አለው። ምንም ዓይነት የንስሐ መንፈስ ሳያሳዩ ሆን ብለው በልበ ደንዳናነት ኃጢአት መሥራታቸውን የሚቀጥሉ ሰዎችን ይቅር አይልም። (ዕብራውያን 10:26) በሌላ በኩል ግን ከልቡ የተጸጸተን ሰው ይቅር ለማለት ዝግጁ ነው። አስደናቂ የሆነውን ይህን የይሖዋ ፍቅር ገጽታ ሕያው አድርገው የሚገልጹ አንዳንድ የመጽሐፍ ቅዱስ መግለጫዎችን እስቲ እንመልከት።

ይሖዋ ሙሉ በሙሉ ይቅር ይላል ሲባል ምን ማለት ነው?

8. ይሖዋ ኃጢአታችንን ይተውልናል ሲባል ምን ማለት ነው? ይህስ ምን እምነት ያሳድርብናል?

8 ዳዊት ንስሐ በገባ ጊዜ ‘ኃጢአቴን ለአንተ አስታወቅሁ፣ በደሌንም አልሸፈንሁም፤ አንተም የልቤን ኃጢአት ተውህልኝ ’ ሲል ተናግሯል። (መዝሙር 32:5) እዚህ ላይ “ተውህልኝ” ተብሎ የተተረጎመው የዕብራይስጥ ቃል “ማንሳት” ወይም “መሸከም” የሚል ትርጉም አለው። ቃሉ እዚህ ጥቅስ ላይ የተሠራበት “የጥፋተኝነት ስሜትን፣ ኃጢአትንና በደልን” ማስወገድ የሚለውን ሐሳብ በሚያስተላልፍ መንገድ ነው። በመሆኑም ይሖዋ የዳዊትን ኃጢአት ከላዩ አንስቶ ያስወገደለት ያህል ነበር። ይህም ዳዊት እንደ ሸክም ሆኖበት የነበረውን የጥፋተኝነት ስሜት እንዳቀለለለት ምንም ጥርጥር የለውም። (መዝሙር 32:3) እኛም በኢየሱስ ቤዛዊ መሥዋዕት በማመን ምሕረቱን ለማግኘት የሚጥሩ ሰዎችን ኃጢአት ከላያቸው በሚያስወግደው አምላክ ሙሉ በሙሉ መታመን እንችላለን።—ማቴዎስ 20:28

9. ይሖዋ ኃጢአታችንን ከእኛ ምን ያህል ያርቀዋል?

9 ዳዊት የይሖዋን ይቅር ባይነት ለመግለጽ ሌላ ሕያው የሆነ መግለጫም ተጠቅሟል:- ‘ምሥራቅ ከምዕራብ እንደሚርቅ፣ እንዲሁ ኃጢአታችንን ከእኛ አራቀ።’ (መዝሙር 103:12) ምሥራቅ ከምዕራብ ምን ያህል ይርቃል?  ምሥራቅና ምዕራብ በተለያየ ጽንፍ የሚገኙ አቅጣጫዎች እንደ መሆናቸው መጠን ፈጽሞ ሊገናኙ አይችሉም። አንድ ምሑር እንዳሉት ይህ አገላለጽ “በጣም ሩቅ፣ ከምንገምተው በላይ ሩቅ” የሆነን ቦታ ያመለክታል። ዳዊት በአምላክ መንፈስ አነሳሽነት የተናገራቸው ቃላት ይሖዋ ይቅር ሲለን ኃጢአታችንን ከምንገምተው በላይ ከእኛ እንደሚያርቀው ይጠቁማሉ።

“ኃጢአታችሁ . . . እንደ አመዳይ ትነጻለች”

10. ይሖዋ ኃጢአታችንን ይቅር ካለን በቀሪው የሕይወት ዘመናችን ኃጢአታችን ያስከተለብንን ኃፍረት ተሸክመን እንደምንኖር ሆኖ ሊሰማን የማይገባው ለምንድን ነው?

10 የመነቸከ ነጭ ልብስ ለማስለቀቅ ሞክረህ ታውቃለህ? የቱንም ያህል ብትፈትገው ቆሻሻው አልለቅ ይል ይሆናል። ይሁን እንጂ ይሖዋ ይቅር ባይነቱን እንዴት እንደገለጸው ልብ በል:- ‘ኃጢአታችሁ እንደ አለላ ብትሆን [“ደማቅ ቀይ ብትሆን፣” NW] እንደ አመዳይ ትነጻለች፤ እንደ ደምም ብትቀላ እንደ ባዘቶ ትጠራለች።’ (ኢሳይያስ 1:18) * በራሳችን ጥረት ኃጢአታችንን ልናጠራ ወይም ልናስወግድ አንችልም። ይሁን  እንጂ ይሖዋ እንደ ደም የቀላውን ኃጢአታችንን እንደ አመዳይና እንደ ባዘቶ ሊያጠራውና ነጭ ሊያደርገው ይችላል። ስለሆነም ይሖዋ ኃጢአታችንን አንዴ ይቅር ካለን በቀሪው የሕይወት ዘመናችን ሁሉ ኃጢአታችን ያስከተለብንን ኃፍረት ተሸክመን እንደምንኖር ሆኖ ሊሰማን አይገባም።

11. ይሖዋ ኃጢአታችንን ወደ ኋላው ይጥላል ሲባል ምን ማለት ነው?

11 ሕዝቅያስ ታሞ ከሞት አፋፍ ከተረፈ በኋላ ባቀናበረው ስሜት የሚነካ የምስጋና መዝሙር ላይ ይሖዋን ‘ኃጢአቴንም ሁሉ ወደ ኋላህ ጣልህ ’ ብሎታል። (ኢሳይያስ 38:17) እዚህ ላይ ይሖዋ ሕጉን የተላለፈ ሰው ንስሐ በሚገባበት ጊዜ ግለሰቡ የሠራውን ኃጢአት ወደ ኋላው በመጣል ዳግመኛ እንደማያየውና ትኩረት እንደማይሰጠው ተደርጎ ተገልጿል። አንድ ጽሑፍ እንደሚለው እዚህ ላይ የተጠቀሰው ሐሳብ “ጨርሶ [ኃጢአት] እንዳልሠራሁ ያህል አድርገህ ቆጠርከኝ” እንደ ማለት ያህል ነው። ይህ የሚያጽናና አይደለም?

12. ነቢዩ ሚክያስ ይሖዋ ይቅር ሲል ኃጢአታችንን ለዘለቄታው እንደሚያስወግደው ያመለከተው እንዴት ነው?

12 ነቢዩ ሚክያስ ተሃድሶን አስመልክቶ በተናገረው ትንቢት ላይ ይሖዋ ንስሐ የሚገቡ ሕዝቦቹን ይቅር እንደሚል ያለውን ጠንካራ እምነት እንዲህ ሲል ገልጿል:- ‘የርስቱን ቅሬታ ዓመፅ የሚያሳልፍ እንደ አንተ ያለ አምላክ ማን ነው? ኃጢአታችንን በባሕሩ ጥልቅ ትጥለዋለህ።’ (ሚክያስ 7:18, 19) እነዚህ ቃላት በጥንት ዘመን ይኖሩ ለነበሩ ሰዎች ምን ትርጉም እንዳላቸው አስብ። በዚያ ዘመን ‘በባሕር ጥልቅ’ ውስጥ የተጣለን ነገር መልሶ ማግኘት የሚቻልበት ምንም ዓይነት መንገድ አልነበረም። በመሆኑም የሚክያስ ቃላት ይሖዋ ይቅር ሲል ኃጢአታችንን ለዘለቄታው እንደሚያስወግድ የሚያመለክቱ ናቸው።

13. “በደላችንን ይቅር በለን” የሚለው የኢየሱስ አነጋገር ምን ትርጉም አለው?

13 ኢየሱስ የይሖዋን ይቅር ባይነት ለማስረዳት ስለ አበዳሪና ተበዳሪ የሚገልጽ ምሳሌ ተጠቅሟል። (ማቴዎስ 18:23-35) በተጨማሪም “በደላችንን ይቅር በለን” ብለን እንድንጸልይ መክሮናል። (ማቴዎስ 6:12) እዚህ ላይ በደል ተብሎ የተተረጎመው የግሪክኛ ቃል “ዕዳ” ማለት ነው። በመሆኑም ኢየሱስ ኃጢአትን ከዕዳ ጋር አመሳስሎ ገልጾታል። ኃጢአት በምንሠራበት ጊዜ የይሖዋ ባለዕዳ እንሆናለን። አንድ የማመሳከሪያ ጽሑፍ “ይቅር  በለን” ተብሎ የተተረጎመው የግሪክኛ ግስ “ዕዳን መተው፣ መሰረዝ ወይም አለማስከፈል” የሚል ሐሳብ እንደሚያስተላልፍ ገልጿል። በመሆኑም ይሖዋ ይቅር ሲለን ሊያስጠይቀን የሚችለውን ዕዳ የሰረዘልን ያህል ነው። ይህም ንስሐ የሚገቡ ኃጢአተኞችን የሚያጽናና ነው። ይሖዋ ዕዳን አንዴ ከሰረዘ መልሶ አይጠይቅም።—መዝሙር 32:1, 2

14. “ኃጢአታችሁ ይደመሰስ ዘንድ” የሚለው ሐረግ ምን ትርጉም አለው?

14 የይሖዋ ይቅር ባይነት በሐዋርያት ሥራ 3:19 ላይም ተገልጿል:- ‘ኃጢአታችሁ ይደመሰስ ዘንድ ንስሐ ግቡ ተመለሱም።’ “ይደመሰስ ዘንድ” ተብሎ የተተረጎመው የግሪክኛ ግስ “ሙልጭ አድርጎ መጥረግን፣ . . . መሰረዝን ወይም ማጥፋትን” ሊያመለክት ይችላል። አንዳንድ ምሑራን እንደሚሉት እዚህ ላይ ያለው አገላለጽ አንድን የእጅ ጽሑፍ ማጥፋትን የሚጠቁም ነው። ይህ ሊሆን የሚችለው እንዴት ነው? በጥንት ዘመን ሰዎች ለመጻፍ ይጠቀሙበት የነበረው ቀለም ከካርቦን፣ ከሙጫና ከውኃ የተሠራ ነበር። አንድ ሰው በዚህ ቀለም ሲጽፍ ከቆየ በኋላ ጽሑፉን በእርጥብ ስፖንጅ ሊያጠፋው ይችል ነበር። ይህ የይሖዋን ምሕረት የሚያሳይ ግሩም መግለጫ ነው። ኃጢአታችንን ይቅር በሚልበት ጊዜ በስፖንጅ የማጥፋት ያህል ሙሉ በሙሉ ይደመስሰዋል።

ይሖዋ “ይቅር ባይ” አምላክ መሆኑን እንድናውቅ ይፈልጋል

15. ይሖዋ ምን እንድናውቅ ይፈልጋል?

15 እነዚህን የተለያዩ አገላለጾች ስንመረምር ከልባችን ንስሐ እስከገባን ድረስ ይሖዋ እኛን ይቅር ለማለት ዝግጁ መሆኑን እንድናውቅ እንደሚፈልግ በግልጽ እንረዳለን። ኃጢአታችንን መዝግቦ እንደሚይዝ አድርገን በማሰብ ስጋት ሊያድርብን አይገባም። መጽሐፍ ቅዱስ ይሖዋ ይቅር ሲል የሠራነውን ኃጢአት እንደሚረሳው የሚገልጽ መሆኑ ኃጢአታችንን መዝግቦ እንደማይዝ የሚያሳይ ተጨማሪ ማስረጃ ነው።

“ኃጢአታቸውንም ከእንግዲህ ወዲህ አላስብም”

16, 17. መጽሐፍ ቅዱስ ይሖዋ ኃጢአታችንን እንደሚረሳው ሲናገር ምን ማለቱ ነው? እንደዚያ ብለህ የመለስከውስ ለምንድን ነው?

16 ይሖዋ በአዲሱ ቃል ኪዳን የታቀፉትን ሰዎች በተመለከተ “በደላቸውን እምራቸዋለሁና፣ ኃጢአታቸውንም ከእንግዲህ ወዲህ አላስብም” ሲል ቃል ገብቷል። (ኤርምያስ 31:34) እንዲህ ሲባል ግን ይሖዋ ይቅር ሲል የሠራነውን ኃጢአት ማስታወስ ይሳነዋል ማለት ነው? በፍጹም፣ እንደዚያ  ማለት አይደለም። መጽሐፍ ቅዱስ ዳዊትን ጨምሮ የይሖዋን ምሕረት ያገኙ በርካታ ሰዎች ስለሠሯቸው ኃጢአቶች ይናገራል። (2 ሳሙኤል 11:1-17፤ 12:13) ይሖዋ ኃጢአታቸውን ይቅር ካላቸው በኋላም የፈጸሙትን ድርጊት ያስታውስ እንደነበረ ግልጽ ነው። የሠሩትን ኃጢአትም ሆነ ያሳዩትን የንስሐ ፍሬ እንዲሁም ይሖዋ ያደረገላቸውን ምሕረት የሚገልጸው ዘገባ ለትምህርታችን ሲባል በመጽሐፍ ቅዱስ ውስጥ ሰፍሮ እንዲቆይ ተደርጓል። (ሮሜ 15:4) እንግዲያው መጽሐፍ ቅዱስ ይሖዋ ይቅር ያላቸው ሰዎች የሠሩትን ኃጢአት ‘አያስብም’ ሲል ምን ማለቱ ነው?

17 ‘ማሰብ’ ወይም ማስታወስ ተብሎ የተተረጎመው የዕብራይስጥ ግስ የሚያመለክተው ያለፈውን ነገር አለመዘንጋትን ብቻ አይደለም። ቲኦሎጂካል ወርድቡክ ኦቭ ዚ ኦልድ ቴስታመንት የተባለው መጽሐፍ እንደሚገልጸው  ቃሉ “ተገቢውን እርምጃ መውሰድ የሚል መልእክትም ያስተላልፋል።” ከዚህ አንጻር ሲታይ ኃጢአትን ‘ማሰብ’ ወይም ማስታወስ የሚለው አነጋገር በኃጢአተኞች ላይ እርምጃ መውሰድንም ያመለክታል። (ሆሴዕ 9:9) ሆኖም አምላክ “ኃጢአታቸውንም ከእንግዲህ ወዲህ አላስብም” ብሎ ሲናገር ንስሐ የገቡ ኃጢአተኞችን አንዴ ይቅር ካለ ወደፊት በዚያ ኃጢአት ምክንያት እንደማይቀጣቸው ማረጋገጫ መስጠቱ ነው። (ሕዝቅኤል 18:21, 22) በመሆኑም ይሖዋ ኃጢአታችንን አያስታውስም ሲባል የፈጸምነውን ድርጊት በየጊዜው እያነሳ በተደጋጋሚ አይቀጣንም ማለት ነው። ይሖዋ ይቅር የሚልና ኃጢአታችንን የማያስብ መሆኑ የሚያጽናና አይደለም?

የፈጸምነው ኃጢአት የሚያስከተለው መዘዝስ?

18. ንስሐ የገባ አንድ ኃጢአተኛ የይሖዋን ምሕረት አገኘ ማለት የፈጸመው ድርጊት ከሚያስከትልበት መዘዝ ሁሉ ነፃ ይሆናል ማለት አይደለም የምንለው ለምንድን ነው?

18 ይሖዋ ኃጢአታችንን ይቅር ለማለት ዝግጁ ነው ሲባል ንስሐ የገባ አንድ ኃጢአተኛ የፈጸመው ድርጊት ከሚያስከትልበት መዘዝ ሙሉ በሙሉ ነፃ ይሆናል ማለት ነው? እንደዚያ ማለት አይደለም። ኃጢአት ከሠራን የፈጸምነው ድርጊት ከሚያስከትልብን መዘዝ ነፃ እንሆናለን ብለን ልንጠብቅ አንችልም። ጳውሎስ “ሰው የሚዘራውን ሁሉ ያንኑ ደግሞ ያጭዳልና” ሲል ጽፏል። (ገላትያ 6:7) በፈጸምነው ድርጊት ሳቢያ አንዳንድ ችግሮች ሊደርሱብን ይችላሉ። ይህ ማለት ግን ይሖዋ ይቅር ካለን በኋላ መከራ እንዲደርስብን ያደርጋል ማለት አይደለም። አንድ ክርስቲያን ችግር ሲገጥመው ‘ይሖዋ ቀደም ሲል ለሠራሁት ኃጢአት እየቀጣኝ ይሆናል’ ብሎ ማሰብ የለበትም። (ያዕቆብ 1:13) በሌላ በኩል ግን ይሖዋ የፈጸምነው ድርጊት ከሚያስከትልብን መዘዝ ሙሉ በሙሉ ነፃ አያደርገንም። እንደ ፍቺ፣ ያልተፈለገ እርግዝና፣ በጾታ ግንኙነት የሚተላለፉ በሽታዎችና በሰዎች ዘንድ የነበረንን አመኔታ ወይም ክብር እንደማጣት ያሉ ሁኔታዎች በሠራነው ኃጢአት ምክንያት የሚመጡ ልናስወግዳቸው የማንችላቸው አስከፊ መዘዞች ሊሆኑ ይችላሉ። ይሖዋ ንጉሥ ዳዊትን ከቤርሳቤህና ከኦርዮ ጋር በተያያዘ ለፈጸመው ኃጢአት ይቅር ካለው በኋላም እንኳ ድርጊቱ ካስከተለበት ከባድ መዘዝ እንዳልታደገው አስታውስ።—2 ሳሙኤል 12:9-12

19-21. (ሀ) በዘሌዋውያን 6:1-7 ላይ ተመዝግቦ የሚገኘው ሕግ ተበዳዩንም ሆነ በዳዩን ወገን የሚጠቅመው እንዴት ነው? (ለ) በሠራነው ኃጢአት ምክንያት ሌሎች ተጎድተው ከሆነ ይሖዋ ምን እርምጃ እንድንወስድ ይፈልጋል?

 19 በፈጸምነው ድርጊት ሌሎች ሰዎችም ተጎድተው ከሆነ የሠራነው ኃጢአት ተጨማሪ መዘዝ ሊያስከትል ይችላል። ለምሳሌ ያህል በዘሌዋውያን ምዕራፍ 6 ላይ የሚገኘውን ዘገባ ተመልከት። በዚህ ምዕራፍ ላይ የሠፈረው የሙሴ ሕግ አንድ ሰው የሌላውን እስራኤላዊ ንብረት በመስረቅ፣ በመቀማት ወይም አጭበርብሮ በመውሰድ ከባድ ኃጢአት በሚፈጽምበት ጊዜ ሊደረግ ስለሚገባው ነገር ይናገራል። ኃጢአተኛው ጥፋተኛ መሆኑን ሊክድ ብሎም በሐሰት እስከመማል ሊደርስ ይችላል። በዚህ ጊዜ ድርጊቱ ሲፈጸም ያየ ምሥክር ላይኖር ይችላል። ይሁንና ከጊዜ በኋላ በደሉን የፈጸመው ሰው ሕሊናው ይወቅሰውና ኃጢአቱን ይናዘዛል። ይህ ሰው የአምላክን ምሕረት ማግኘት እንዲችል ኃጢአቱን ከመናዘዝ በተጨማሪ ሌሎች ሦስት ነገሮች ማድረግ ይጠበቅበታል። የወሰደውን መመለስ፣ የሠረቀውን ንብረት ዋጋ 20 በመቶ የሚሆን ካሳ መክፈልና የበደል መሥዋዕት እንዲሆን አውራ በግ ማቅረብ ይጠበቅበት ነበር። ከዚያም ሕጉ እንደሚለው “ካህኑም በእግዚአብሔር ፊት ያስተሰርይለታል፣ ስለዚያም ስላደረገው በደል ሁሉ ይቅር ይባላል።”—ዘሌዋውያን 6:1-7

20 ይህ ሕግ የአምላክ የምሕረት ዝግጅት ነው። ተበዳዩ ወገን የጠፋበትን ንብረት መልሶ ማግኘቱም ሆነ ጥፋተኛው ሰው የሠራውን ኃጢአት ማመኑ ደስ እንደሚያሰኘው የታወቀ ነው። በተጨማሪም ሕጉ በፈጸመው ድርጊት ተጸጽቶ ተገቢውን እርምጃ ለሚወስደው ግለሰብም ትልቅ ጥቅም አለው። ደግሞም ጥፋቱን አምኖ ለመስተካከል ፈቃደኛ ካልሆነ የአምላክን ምሕረት ማግኘት አይችልም።

21 ምንም እንኳ እኛ በሙሴ ሕግ ሥር ባንሆንም ይህ ሕግ ይሖዋ ስለ ይቅር ባይነት ያለውን አመለካከት ጨምሮ በአጠቃላይ ምን ዓይነት አስተሳሰብ እንዳለው ጠለቅ ያለ ግንዛቤ እንድናገኝ ይረዳናል። (ቆላስይስ 2:13, 14) እኛ በሠራነው ኃጢአት ሌሎች ተጎድተው ከሆነ አምላክ የፈጸምነውን ስህተት ለማረም የምንችለውን ሁሉ ጥረት ስናደርግ ሲያይ በጣም ይደሰታል። (ማቴዎስ 5:23, 24) ይህም ጥፋታችንን አምነን መቀበልና የበደልነውን ሰው ይቅርታ መጠየቅን ሊጨምር ይችላል። ከዚያም በኢየሱስ መሥዋዕት አማካኝነት ይሖዋ ይቅር እንዲለን በመለመን ምሕረቱን ማግኘት እንችላለን።—ዕብራውያን 10:21, 22

22. የይሖዋ ምሕረት ምን ነገርንም ያቀፈ ሊሆን ይችላል?

 22 እንደ ማንኛውም አፍቃሪ ወላጅ ይሖዋም ምሕረት በሚያደርግበት ጊዜ በተወሰነ ደረጃ ተግሣጽ ሊሰጥ ይችላል። (ምሳሌ 3:11, 12) ንስሐ የገባ አንድ ክርስቲያን የሽምግልና፣ የጉባኤ አገልጋይነት ወይም የሙሉ ጊዜ ወንጌላዊነት መብቱን ለማጣት ሊገደድ ይችላል። ከፍ አድርጎ ይመለከታቸው የነበሩትን መብቶች ለተወሰነም ጊዜ ቢሆን ማጣቱ ከባድ ሐዘን ሊያስከትልበት ይችላል። ይሁን እንጂ ይህን ተግሣጽ መቀበሉ ይሖዋ ምሕረት አላደረገለትም ማለት አይደለም። ይሖዋ የሚገሥጸን ስለሚወደን እንደሆነ መዘንጋት የለብንም። ተግሣጹን መቀበላችንና ተግባራዊ ማድረጋችን የሚጠቅመው እኛኑ ነው።—ዕብራውያን 12:5-11

23. የይሖዋን ምሕረት ልናገኝ እንደማንችል ሆኖ ሊሰማን የማይገባው ለምንድን ነው? የእሱን የይቅር ባይነት ባሕርይ ለመኮረጅ ጥረት ማድረግ ያለብንስ ለምንድን ነው?

23 አምላካችን “ይቅር ባይ” መሆኑን ማወቃችን ምንኛ የሚያጽናና ነው! ምንም ያህል ከባድ ስህተት ብንሠራ የይሖዋን ምሕረት ልናገኝ እንደማንችል ሆኖ ሊሰማን አይገባም። ከልብ ንስሐ ከገባን፣ የሠራነውን ስህተት ለማረም አስፈላጊውን እርምጃ ከወሰድንና በፈሰሰው የኢየሱስ ደም አማካኝነት ምሕረት ለማግኘት አጥብቀን ከጸለይን ይሖዋ ይቅር እንደሚለን ሙሉ በሙሉ መተማመን እንችላለን። (1 ዮሐንስ 1:9) እንግዲያው እርስ በርስ ባለን ግንኙነት ረገድ የይሖዋን የይቅር ባይነት ባሕርይ ለመኮረጅ ጥረት እናድርግ። ኃጢአት የማይሠራው አምላካችን ይሖዋ በፍቅር ተገፋፍቶ ይቅር የሚለን ከሆነ ኃጢአተኛ የሆንነው እኛ የሰው ልጆች እርስ በርስ ይቅር ለመባባል የተቻለንን ጥረት ማድረግ አይገባንም?

^ አን.4 “ፍጥረታችንን” ተብሎ የተተረጎመው የዕብራይስጥ ቃል አንድ ሸክላ ሠሪ የሠራቸውን የሸክላ ዕቃዎች ለማመልከትም ተሠርቶበታል።—ኢሳይያስ 29:16

^ አን.10 አንድ ምሑር እንደገለጹት እዚህ ላይ የተጠቀሰው ደማቅ ቀይ ቀለም “የማይለቅ ወይም የማይደበዝዝ ነው። እርጥበት፣ ዝናብ፣ እጥበት ወይም የረጅም ጊዜ አገልግሎት ሊያስለቅቀው አይችልም።”