በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 24

“ከእግዚአብሔር ፍቅር ሊለየን” የሚችል ነገር የለም

“ከእግዚአብሔር ፍቅር ሊለየን” የሚችል ነገር የለም

1. አንዳንድ እውነተኛ ክርስቲያኖችን ጨምሮ ብዙ ሰዎች ምን ዓይነት አፍራሽ ስሜት ይሰማቸዋል?

ይሖዋ አንተን በግል እንደሚወድህ ይሰማሃል? አንዳንዶች ዮሐንስ 3:16 እንደሚገልጸው አምላክ የሰውን ዘር በጠቅላላ እንደሚወድ ያምናሉ። ይሁን እንጂ ‘አምላክ እኔን በግለሰብ ደረጃ ሊወደኝ አይችልም’ ብለው ያስባሉ። እውነተኛ ክርስቲያኖችም እንኳ አልፎ አልፎ እንዲህ ያለ ስሜት ሊሰማቸው ይችላል። የተስፋ መቁረጥ ስሜት ያደረበት አንድ ሰው “አምላክ ስለ እኔ ያስባል ብዬ ለማመን ይከብደኛል” ሲል ተናግሯል። አንተስ አንዳንድ ጊዜ እንዲህ ያለ ስሜት ይሰማሃል?

2, 3. ‘ይሖዋ አይወደኝም ወይም ከቁብ አይቆጥረኝም’ ብለን እንድናስብ የሚፈልገው ማን ነው? እንዲህ ዓይነቱን አስተሳሰብ መዋጋት የምንችለውስ እንዴት ነው?

2 ሰይጣን ‘ይሖዋ አይወደኝም ወይም ከቁብ አይቆጥረኝም’ ብለን እንድናስብ ይፈልጋል። ብዙውን ጊዜ ሰዎችን የትዕቢትና የኩራት መንፈስ እንዲያድርባቸው በማድረግ እንደሚያስት የታወቀ ነው። (2 ቆሮንቶስ 11:3) ይሁን እንጂ ሰዎች ተስፋ እንዲቆርጡና የከንቱነት ስሜት እንዲሰማቸው ማድረግም ያስደስተዋል። (ዮሐንስ 7:47-49፤ 8:13, 44) በተለይ ደግሞ አስጨናቂ በሆነው በዚህ ‘የመጨረሻ ቀን’ ይህን ዘዴ በእጅጉ እየተጠቀመበት ይገኛል። በዛሬው ጊዜ ብዙ ሰዎች ያደጉት ‘ፍቅር በሌለበት’ ቤተሰብ ውስጥ ነው። ሌሎች ደግሞ የዕለት ተዕለት ውሏቸው ጨካኞች፣ ራስ ወዳዶችና ችኩሎች ከሆኑ ሰዎች ጋር ነው። (2 ጢሞቴዎስ 3:1-5) እንዲህ ያሉ ሰዎች ለብዙ ዓመታት ሲደርስባቸው የኖረው ግፍ፣ የዘር መድልዎ ወይም ጥላቻ ምንም ዋጋ እንደሌላቸው አሊያም ደግሞ የሚወዳቸው እንደሌለ ሆኖ እንዲሰማቸው አድርጓቸው ሊሆን ይችላል።

3 እንዲህ ያለ ስሜት የሚሰማህ ከሆነ ፈጽሞ ተስፋ አትቁረጥ። ብዙዎቻችን አንዳንድ ጊዜ አላግባብ ራሳችንን እንኮንናለን። ይሁን እንጂ የአምላክ ቃል ‘ልብን ለማቅናት’ እና “ምሽግን ለመስበር” ማለትም ሥር የሰደዱ ነገሮችን ለማስወገድ እንደሚረዳ አስታውስ። (2 ጢሞቴዎስ 3:16፤ 2 ቆሮንቶስ 10:4) መጽሐፍ ቅዱስ “ልባችንም በእኛ ላይ በሚፈርድበት  ሁሉ፣ ከእውነት እንደ ሆንን በዚህ እናውቃለን በፊቱም ልባችንን እናሳርፋለን፣ እግዚአብሔር ከልባችን ይልቅ ታላቅ ነውና ሁሉንም ያውቃል” ይላል። (1 ዮሐንስ 3:19, 20) ቅዱሳን ጽሑፎች ‘ልባችን እንዲያርፍ’ ማለትም ይሖዋ እንደሚወደን እርግጠኞች እንድንሆን የሚያደርጉ አራት አሳማኝ ነጥቦችን ይጠቅሱልናል። እስቲ እነዚህን ነጥቦች አንድ በአንድ እንመልከት።

በይሖዋ ፊት ውድ ነህ

4, 5. ኢየሱስ ድንቢጦችን አስመልክቶ የተናገረው ምሳሌ በይሖዋ ፊት ከፍ ያለ ዋጋ እንዳለን የሚያሳየው እንዴት ነው?

4 በመጀመሪያ ደረጃ መጽሐፍ ቅዱስ እያንዳንዱ የአምላክ አገልጋይ በአምላክ ፊት ዋጋ እንዳለው በግልጽ ይናገራል። ለምሳሌ ያህል ኢየሱስ እንዲህ ሲል ተናግሯል:- “ሁለት ድንቢጦች በአምስት ሳንቲም ይሸጡ የለምን? ከእነርሱም አንዲቱ ያለ አባታችሁ ፈቃድ በምድር ላይ አትወድቅም። የእናንተስ የራሳችሁ ጠጉር እንኳ ተቈጥሮአል። እንግዲህ አትፍሩ፤ ከብዙ ድንቢጦች እናንተ ትበልጣላችሁ።” (ማቴዎስ 10:29-31) እነዚህ ቃላት በመጀመሪያው መቶ ዘመን ለነበሩት የኢየሱስ አድማጮች ምን ትርጉም እንደነበራቸው ተመልከት።

“ከብዙ ድንቢጦች እናንተ ትበልጣላችሁ”

5 አንድ ሰው ድንቢጥ የሚገዛበት ምን ምክንያት አለ ብለን እንጠይቅ ይሆናል። በኢየሱስ ዘመን ለምግብነት ይሸጡ ከነበሩት ወፎች ሁሉ በጣም ርካሿ ድንቢጥ ነበረች። አንድ ሰው በጣም ዝቅተኛ ዋጋ ባላት አምስት ሳንቲም ሁለት ድንቢጦች መግዛት ይችል እንደነበረ ልብ በል። ይሁን እንጂ ኢየሱስ በኋላ እንደገለጸው አንድ ሰው አሥር ሳንቲም ካወጣ አራት ሳይሆን አምስት ድንቢጦች መግዛት ይችል ነበር። አምስተኛዋ ወፍ ምንም ዋጋ እንደሌለው ነገር በምርቃት መልክ የምትሰጥ ናት። እነዚህ ፍጥረታት በሰዎች ፊት ዋጋ አይኖራቸው ይሆናል፤ ይሁን እንጂ ፈጣሪ ለእነዚህ ፍጥረታት ያለው አመለካከት ምንድን ነው? ኢየሱስ “ከእነርሱም አንዲቱ ስንኳ [በምርቃት መልክ የምትሰጠው እንኳ ሳትቀር] በእግዚአብሔር ፊት አትረሳም” ሲል ተናግሯል። (ሉቃስ 12:6, 7) ከዚህ በመነሳት ኢየሱስ ምን ለማለት እንደፈለገ መረዳት እንችላለን። ይሖዋ ለአንዲት ድንቢጥ እንኳ ይህን ያህል ግምት የሚሰጥ ከሆነ ሰውንማ ምን ያህል ከፍ አድርጎ እንደሚመለከት መገመት አያዳግትም! ኢየሱስ እንደገለጸው ይሖዋ ስለ እኛ እያንዳንዷን ነገር ጠንቅቆ ያውቃል። የራሳችን ፀጉር እንኳ ሳይቀር የተቆጠረ ነው!

6. ኢየሱስ የራሳችን ፀጉር እንኳ የተቆጠረ ነው ብሎ ሲናገር ማጋነኑ እንዳልነበር እርግጠኞች መሆን የምንችለው ለምንድን ነው?

 6 ፀጉር ደግሞ ይቆጠራል እንዴ? አንዳንዶች እዚህ ላይ ኢየሱስ በጣም እንዳጋነነ አድርገው ያስባሉ። ይሁን እንጂ እስቲ ስለ ትንሣኤ ተስፋ አስብ። ይሖዋ እኛን መልሶ የሚፈጥረን ምን ያህል ቢያውቀን ነው! በእሱ ፊት ውድ በመሆናችን ጀነቲካዊ ንድፋችንን እንዲሁም የብዙ ዓመት ትዝታዎቻችንንና ተሞክሮዎቻችንን ጨምሮ እያንዳንዷን ነገር በሚገባ ያስታውሳል። * ከዚህ አንጻር ሲታይ በአማካይ 100,000 ገደማ የሚሆነውን ፀጉራችንን መቁጠር በጣም ቀላል ነገር ነው።

ይሖዋ እኛን ሲመረምር የሚያተኩረው በምን ላይ ነው?

7, 8. (ሀ) ይሖዋ የሰዎችን ልብ በሚመረምርበት ጊዜ የሚደሰተው የትኞቹን ባሕርያት ሲመለከት ነው? (ለ) ይሖዋ ከፍ አድርጎ የሚመለከታቸው አንዳንድ ሥራዎች ምንድን ናቸው?

7 በሁለተኛ ደረጃ መጽሐፍ ቅዱስ ይሖዋ አገልጋዮቹን በሚመረምርበት ጊዜ ትኩረት የሚያደርገው በምን ነገር ላይ እንደሆነ ይገልጻል። በአጭር አነጋገር ይሖዋ መልካም ባሕርያችንንና የምናደርገውን ጥረት ሲመለከት ይደሰታል። ንጉሥ ዳዊት ልጁን ሰሎሞንን “እግዚአብሔር ልብን ሁሉ ይመረምራልና፣ የነፍስንም አሳብ ሁሉ ያውቃል” ብሎታል። (1 ዜና መዋዕል 28:9) አምላክ ዓመጸኛ በሆነውና በጥላቻ በተሞላው በዚህ ዓለም ውስጥ በቢሊዮን የሚቆጠሩ ሰዎችን ልብ በሚመረምርበት ጊዜ ሰላምን፣ እውነትንና ጽድቅን የሚወድ ልብ ሲያገኝ ምንኛ ይደሰት ይሆን! እሱን የሚወድ እንዲሁም ስለ እሱ ለመማርና እንዲህ ያለውን እውቀት ለሌሎች ለማካፈል የሚፈልግ ልብ ሲያገኝ ምን ያደርጋል? ይሖዋ ስለ እሱ ለሌሎች የሚናገሩ ሰዎችን በትኩረት እንደሚመለከት ተናግሯል። እንዲያውም ‘እግዚአብሔርን ለሚፈሩና ስሙንም ለሚያስቡ’ ሰዎች ያዘጋጀው “የመታሰቢያ መጽሐፍ” አለው። (ሚልክያስ 3:16) እንዲህ ያሉት ባሕርያት በይሖዋ ፊት የተወደዱ ናቸው።

8 ይሖዋ ከፍ አድርጎ የሚመለከታቸው አንዳንድ መልካም ሥራዎች ምንድን ናቸው? ልጁን ኢየሱስ ክርስቶስን ለመምሰል የምናደርገውን ጥረት  ከፍ አድርጎ እንደሚመለከት ምንም ጥርጥር የለውም። (1 ጴጥሮስ 2:21) አምላክ ከፍ አድርጎ የሚመለከተው አንዱ በጣም አስፈላጊ የሆነ ሥራ የመንግሥቱን ምሥራች መስበክ ነው። ሮሜ 10:15 “መልካሙን የምሥራች የሚያወሩ እግሮቻቸው እንዴት ያማሩ ናቸው” ይላል። እግሮቻችን “ያማሩ” ወይም ውብ እንደሆኑ አድርገን አናስብ ይሆናል። ይሁን እንጂ እዚህ ላይ የተጠቀሱት እግሮች የሚያመለክቱት የይሖዋ አገልጋዮች ምሥራቹን ለመስበክ የሚያደርጉትን ጥረት ነው። እንዲህ ያለው ጥረት በይሖዋ ፊት ያማረና የተወደደ ነው።—ማቴዎስ 24:14፤ 28:19, 20

9, 10. (ሀ) ይሖዋ የተለያዩ ችግሮችን በጽናት ለመቋቋም የምናደርገውን ጥረት እንደሚያደንቅ እርግጠኞች መሆን የምንችለው ለምንድን ነው? (ለ) ይሖዋ ታማኝ አገልጋዮቹን በተመለከተ ምን ዓይነት አፍራሽ አመለካከት የለውም?

9 ይሖዋ የምናሳየውንም ጽናት ከፍ አድርጎ ይመለከታል። (ማቴዎስ 24:13) ሰይጣን ይሖዋን ማምለክህን እንድትተው እንደሚፈልግ አስታውስ። እያንዳንዱን ቀን ለይሖዋ ታማኝ ሆነህ የምታሳልፍ ከሆነ ይሖዋን ለሚሰድበው ለሰይጣን መልስ በመስጠት ረገድ የበኩልህን አስተዋጽኦ ታደርጋለህ። (ምሳሌ 27:11) ይሁንና ጸንቶ መኖር ቀላል አይደለም። የጤና እክል፣ የኑሮ ውድነት፣ ጭንቀትና ሌሎች ችግሮች እያንዳንዱን ቀን ፈታኝ ሊያደርጉብን ይችላሉ። በተጨማሪም የጠበቅነው ነገር እንዳሰብነው ቶሎ አለመፈጸሙ ተስፋ ሊያስቆርጠን ይችላል። (ምሳሌ 13:12) እንዲህ ያሉ  ፈታኝ ሁኔታዎችን ተቋቁመን ስንጸና ይሖዋ እጅግ ይደሰታል። ንጉሥ ዳዊት ይሖዋ እንባውን “በዕቃ” እንዲያጠራቅምለት የጠየቀው ለዚህ ነው። አክሎም “ሁሉስ በመዝገብህ የተያዘ አይደለምን?” ሲል በእርግጠኝነት ተናግሯል። (መዝሙር 56:8 አ.መ.ት) አዎን፣ ይሖዋ ከእሱ ጎን በታማኝነት ለመቆም ስንል የምናፈስሰውን እንባና የሚደርስብንን ሥቃይ የሚያስታውስ ከመሆኑም በላይ አቅልሎ አይመለከተውም። እንዲህ ያለውን መከራና ሥቃይ በጽናት ለመቋቋም የምናደርገው ጥረት በይሖዋ ዘንድ ከፍ ያለ ግምት ይሰጠዋል።

የተለያዩ ፈተናዎችን ተቋቁመን የምናሳየውን ጽናት ይሖዋ ከፍ አድርጎ ይመለከተዋል

10 ይሁንና ራሱን የሚኮንን ልብ በአምላክ ፊት ምን ያህል ውድ እንደሆንን የሚያሳየውን ይህን ማስረጃ ላይቀበል ይችላል። ‘ከእኔ ይበልጥ ግሩም ምሳሌ የሚሆኑ ብዙ አገልጋዮች አሉ። ይሖዋ እኔን ከእነሱ ጋር ሲያነጻጽረኝ ምንኛ ያዝንብኝ ይሆን!’ እያለ ራሱን ሊኮንን ይችላል። ሆኖም ይሖዋ አንዱን ከሌላው አያወዳድርም፤ በተጨማሪም ጨካኝ ወይም ሐሳበ ግትር አይደለም። (ገላትያ 6:4) ልባችንን ጠልቆ የመመርመር ችሎታ ያለው ሲሆን ትንሽም እንኳ ብትሆን ያለችንን መልካም ነገር ያደንቃል።

ይሖዋ መልካም የሆነውን ብቻ ለይቶ ያስቀራል

11. ይሖዋ ለአብያ ካደረገው ነገር ምን ልንማር እንችላለን?

11 በሦስተኛ ደረጃ ይሖዋ ልባችንን በሚመረምርበት ጊዜ መልካም የሆነውን ብቻ እየለየ ያስቀራል። ለምሳሌ ያህል ይሖዋ ከሃዲ የሆነው የንጉሥ ኢዮርብዓም ሥርወ መንግሥት ሙሉ በሙሉ እንዲጠፋ በወሰነ ጊዜ ከንጉሡ ልጆች አንዱ የሆነው አብያ በወግ በማዕረግ እንዲቀበር አዝዞ ነበር። ለምን? “በእግዚአብሔር ዘንድ . . . በዚህ ልጅ መልካም ነገር ተገኝቶበታል።” (1 ነገሥት 14:1, 10-13) ይሖዋ የአብያን ልብ ሲመረምር “መልካም ነገር” አግኝቶበታል። በአብያ ልብ ውስጥ የተገኘው መልካም ነገር ምንም ያህል ትንሽ ቢሆን ይሖዋ ከፍ አድርጎ ስለተመለከተው በቃሉ ውስጥ እንዲሰፍር አድርጓል። አልፎ ተርፎም የዚያ ከሃዲ ቤተሰብ አባል ለነበረው ለዚህ ልጅ ተገቢውን ምሕረት በማሳየት ክሶታል።

12, 13. (ሀ) ይሖዋ ለንጉሥ ኢዮሣፍጥ ያደረገው ነገር ኃጢአት በምንሠራበት ጊዜም እንኳ መልካም ጎናችንን እንደሚመለከት የሚያሳየው እንዴት ነው? (ለ) ይሖዋ እንደ አንድ አፍቃሪ ወላጅ መልካም ባሕርይዎቻችንንና ሥራዎቻችንን በተመለከተ ምን ያደርጋል?

12 ይሖዋ ጥሩ ንጉሥ ለነበረው ለኢዮሣፍጥ ያደረገው ነገር በዚህ ረገድ  የተሻለ ምሳሌ ሊሆን ይችላል። ንጉሡ ማስተዋል የጎደለው ድርጊት በፈጸመ ጊዜ የይሖዋ ነቢይ “ስለዚህም ነገር ከእግዚአብሔር ዘንድ ቁጣ ሆኖብሃል” ብሎታል። ይህ እንዴት የሚያስደነግጥ አነጋገር ነው! ይሁን እንጂ ይሖዋ በነቢዩ በኩል ያስተላለፈው መልእክት በዚህ ብቻ አላበቃም። “ነገር ግን . . . መልካም ነገር ተገኝቶብሃል” ሲል አክሎ ተናግሯል። (2 ዜና መዋዕል 19:1-3) በመሆኑም ይሖዋ የጽድቅ ቁጣው የኢዮሣፍጥን መልካም ነገር እንዳያይ አላገደውም። ይሖዋ ፍጽምና ከጎደላቸው የሰው ልጆች ምንኛ የተለየ ነው! ብዙውን ጊዜ ሰዎች ሲያበሳጩን መልካም ጎናቸው አይታየንም። ራሳችንም ኃጢአት በምንሠራበት ጊዜ የሚሰማን ኀዘን፣ ኀፍረትና የጥፋተኝነት ስሜት መልካም ጎናችን እንዳይታየን ሊያደርገን ይችላል። ይሁን እንጂ ንስሐ ከገባንና የሠራነውን ኃጢአት ላለመድገም ጥረት ካደረግን ይሖዋ ይቅር እንደሚለን አስታውስ።

13 አንድ የወርቅ ማዕድን የሚፈልግ ሰው ወርቁን ብቻ እየለየ በማስቀረት አላስፈላጊ የሆነውን ኮረት እንደሚያስወግድ ሁሉ ይሖዋም ልብህን በሚመረምርበት ጊዜ እንዲህ ያሉ ኃጢአቶችን እየለየ ያስወግዳል። መልካም ባሕርይዎችህንና ሥራዎችህንስ ምን ያደርጋል? እነዚህን እንደ “ተፈላጊ ማዕድናት” ለይቶ ያስቀራቸዋል! አፍቃሪ የሆኑ አንዳንድ ወላጆች ልጆቻቸው በሕፃንነታቸው የሳሏቸውን ሥዕሎች ወይም የሠሯቸውን የእጅ ሥራዎች እንደ ማስታወሻ አድርገው ለረጅም ዓመታት  እንደሚያስቀምጡ አስተውለሃል? ምናልባትም ልጆቹ እነዚህን ነገሮች ረስተዋቸው ሊሆን ይችላል። ይሖዋ ደግሞ ከሁሉ ይበልጥ አፍቃሪ የሆነ ወላጅ ነው። ከእሱ ጎን በታማኝነት እስከቆምን ድረስ መልካም ሥራዎቻችንንና ባሕርይዎቻችንን ፈጽሞ አይረሳም። እንዲያውም እንዲህ ያሉ ነገሮችን መርሳት በይሖዋ ዘንድ እንደ ዓመጽ የሚቆጠር ሲሆን እሱ ደግሞ ዓመጸኛ አይደለም። (ዕብራውያን 6:10) ይሖዋ እኛን የሚያይበት ሌላም መንገድ አለ።

14, 15. (ሀ) ፍጽምና የጎደለን መሆናችን ይሖዋ መልካም ጎናችንን እንዳያይ ሊያግደው የማይችለው ለምንድን ነው? በምሳሌ አስረዳ። (ለ) ይሖዋ መልካም ባሕርያችን ምን እንዲሆን ያደርጋል? ታማኝ አገልጋዮቹንስ እንዴት ይመለከታቸዋል?

14 ይሖዋ ካለብን አለፍጽምና ባሻገር ይመለከታል። ይህን በምሳሌ ለማስረዳት ያህል:- የሥነ ጥበብ አፍቃሪዎች ጉዳት የደረሰባቸውን ሥዕሎች ወይም ሌሎች የሥነ ጥበብ ሥራዎች ለመጠገን ከፍተኛ ጥረት ያደርጋሉ። ለምሳሌ ያህል አንድ ሰው ለንደን በሚገኘው ብሔራዊ ሙዚየም ውስጥ ባለው 30 ሚሊዮን ዶላር ገደማ የሚያወጣ የሊዮናርዶ ዳ ቪንቺ ሥዕል ላይ ተኩሶ ጉዳት አድርሶ ነበር። ይሁንና ይህ ሥዕል ጉዳት ስለደረሰበት መጣል አለበት ያለ ሰው አልነበረም። ከዚህ ይልቅ ወደ 500 ዓመት የሚጠጋ ዕድሜ ያስቆጠረውን ይህን ድንቅ የጥበብ ሥራ ቀድሞ ወደነበረበት ሁኔታ ለመመለስ ወዲያውኑ ጥረት ማድረግ ተጀመረ። ለምን? ምክንያቱም በሥነ ጥበብ አፍቃሪያን ዘንድ በጣም ተወዳጅ ስለሆነ ነው። ታዲያ አንተ በእርሳስ ከተሳለ ሥዕል አትበልጥም? በወረስከው አለፍጽምና ምክንያት እንከን ቢኖርብህም እንኳ በአምላክ ፊት ከዚህ የላቀ ዋጋ እንዳለህ ምንም ጥርጥር የለውም። (መዝሙር 72:12-14) የሰው ዘር ፈጣሪ የሆነው ጥበበኛው አምላክ ይሖዋ ለፍቅራዊ እንክብካቤው ምላሽ የሚሰጡ ሰዎችን ወደ ፍጽምና ደረጃ ለማድረስ አስፈላጊ የሆነውን ነገር ሁሉ ከማድረግ ወደ ኋላ አይልም።—የሐዋርያት ሥራ 3:21፤ ሮሜ 8:20-22

15 አዎን፣ ይሖዋ እኛ ራሳችን እንኳ ሳናስተውለው የምንቀረውን መልካም ጎን ይመለከታል። በተጨማሪም እሱን በታማኝነት ማገልገላችንን ከቀጠልን ፍጽምና ደረጃ ላይ እስክንደርስ ድረስ መልካም ባሕርያችን እየዳበረ እንዲሄድ ያደርጋል። የሰይጣን ዓለም ለእኛ ያለው አመለካከት ምንም ይሁን ምን ይሖዋ ታማኝ አገልጋዮቹን እንደተመረጠ ዕቃ ከፍ አድርጎ ይመለከታቸዋል።—ሐጌ 2:7

 ይሖዋ ፍቅሩን በተግባር ያሳያል

16. ይሖዋ ለእኛ ያለውን ፍቅር የሚያሳየው ከሁሉ የላቀ ማስረጃ ምንድን ነው? ይህስ ለእያንዳንዳችን በግለሰብ ደረጃ የቀረበ ስጦታ እንደሆነ ማወቅ የምንችለው እንዴት ነው?

16 በአራተኛ ደረጃ ደግሞ ይሖዋ ለእኛ ያለውን ፍቅር ለማሳየት ብዙ ነገር አድርጓል። ሰይጣን፣ ይሖዋ አይወዳችሁም ወይም በአምላክ ፊት ዋጋ የላችሁም እያለ ለሚያስፋፋው ውሸት የክርስቶስ ቤዛዊ መሥዋዕት አጥጋቢ መልስ ይሆናል። ኢየሱስ በመከራ እንጨት ላይ ተሠቅሎ ሲሞት የደረሰበት ሥቃይም ሆነ ይሖዋ የሚወደው ልጁ ሲሞት ዝም ብሎ ማየቱ ያስከተለበት ከዚያ የባሰ ሥቃይ ይሖዋና ኢየሱስ ምን ያህል እንደሚወዱን የሚያሳይ ማስረጃ ነው። የሚያሳዝነው ግን ብዙ ሰዎች ይህ መሥዋዕት ለእነሱ በግለሰብ ደረጃ የቀረበ ስጦታ እንደሆነ አድርገው ለማመን ይከብዳቸዋል። ይህ ፈጽሞ እንደማይገባቸው ሆኖ ይሰማቸዋል። ይሁንና ሐዋርያው ጳውሎስ የክርስቶስን ተከታዮች ያሳድድ እንደነበረ አስታውስ። ሆኖም ‘የእግዚአብሔር ልጅ እንደወደደውና ስለ እሱም ራሱን አሳልፎ እንደሰጠ’ ተናግሯል።—ገላትያ 1:13፤ 2:20

17. ይሖዋ ወደ ራሱና ወደ ልጁ የሚስበን እንዴት ነው?

17 ይሖዋ ከክርስቶስ መሥዋዕት ተጠቃሚዎች እንድንሆን በግለሰብ ደረጃ በመርዳት ለእኛ ያለውን ፍቅር ያሳያል። ኢየሱስ “የላከኝ አብ ከሳበው በቀር ወደ እኔ ሊመጣ የሚችል የለም” ብሏል። (ዮሐንስ 6:44) አዎን፣ ይሖዋ በግለሰብ ደረጃ ወደ ልጁና ወደ ዘላለም ሕይወት ተስፋ ይስበናል። እንዴት? በግለሰብ ደረጃ ምሥክርነቱ እንዲደርሰን በማድረግ እንዲሁም የአቅም ገደብና አለፍጽምና ቢኖርብንም እንኳ መንፈሳዊ እውነቶችን ማስተዋልና ተግባራዊ ማድረግ እንድንችል በቅዱስ መንፈሱ በመርዳት ነው። ይሖዋ እስራኤልን በተመለከተ “በዘላለም ፍቅር ወድጄሻለሁ፤ ስለዚህ በቸርነት ሳብሁሽ” ሲል እንደተናገረ ሁሉ ለእኛም እንዲሁ ሊናገር ይችላል።—ኤርምያስ 31:3

18, 19. (ሀ) ይሖዋ ምን ያህል እንደሚወደን ልናይ የምንችልበት ትልቁ መንገድ ምንድን ነው? ይህን ጉዳይ የሚከታተለው ራሱ እንደሆነ የሚያሳየውስ ምንድን ነው? (ለ) የአምላክ ቃል ይሖዋ ጸሎታችንን በርኅራኄ እንደሚያዳምጥ የሚያረጋግጥልን እንዴት ነው?

18 ይሖዋ በግለሰብ ደረጃ ምን ያህል እንደሚወደን ልናይ የምንችልበት ትልቁ መንገድ የጸሎት መብት ነው ሊባል ይችላል። መጽሐፍ ቅዱስ እያንዳንዳችን ‘ሳናቋርጥ ወደ አምላክ እንድንጸልይ’ ያበረታታናል። (1 ተሰሎንቄ 5:17) በተጨማሪም ይሖዋ የምናቀርበውን ‘ጸሎት እንደሚሰማ’  በግልጽ ይናገራል። (መዝሙር 65:2) ይህን ሥልጣን ለማንም፣ ሌላው ቀርቶ ለልጁ እንኳ አልሰጠም። ይህ ምን ማለት እንደሆነ አስበው፤ የጽንፈ ዓለም ፈጣሪ የሆነው አምላክ ሳንሸማቀቅ የልባችንን አውጥተን እንድንነግረው መፍቀዱ በእርግጥም ትልቅ መብት ነው። ጸሎታችንንስ የሚሰማው እንዴት ነው? በግድየለሽነትና በቀዘቀዘ ስሜት ነው? በፍጹም።

19 ይሖዋ አዛኝ አምላክ ነው። አዘኔታ ምንድን ነው? አንድ በዕድሜ የገፉ ታማኝ ክርስቲያን “አዘኔታ ማሳየት ሲባል ሌላው ሲሠቃይ አብሮ መሠቃየት ማለት ነው” ሲሉ ተናግረዋል። ይሖዋ የእኛ ሥቃይ ይሰማዋል ማለት ነው? መጽሐፍ ቅዱስ በሕዝቡ ማለትም በእስራኤላውያን ላይ የደረሰውን ሥቃይ አስመልክቶ ሲናገር “በጭንቃቸው ሁሉ እርሱ ተጨነቀ” ይላል። (ኢሳይያስ 63:9) ይሖዋ እንዲሁ ችግራቸውን መመልከት ብቻ ሳይሆን እሱም አብሮ ተሠቃይቷል። “እናንተን የሚነካ ውድ የሆነውን የዐይኔን ብሌን እንደሚነካ ነው” በማለት ለአገልጋዮቹ የተናገረው ቃል ሥቃያቸው ምን ያህል እንደሚሰማው በግልጽ የሚያሳይ ነው። * (ዘካርያስ 2:8 የ1980 ትርጉም) የዓይን ብሌን ሲነካ ምን ያህል እንደሚያም መገመት አያዳግትም! አዎን፣ ይሖዋ ለእኛ ያዝናል። ስንሠቃይ እሱም አብሮ ይሠቃያል።

20. በ⁠ሮሜ 12:3 ላይ የሚገኘውን ምክር ተግባራዊ ለማድረግ የትኛውን ሚዛናዊ ያልሆነ አስተሳሰብ ማስወገድ ያስፈልገናል?

20 ጥሩ ማስተዋል ያለው አንድ ክርስቲያን አምላክ ለእኛ ያለውን ፍቅርና ከፍ ያለ ግምት የሚያሳየውን ይህን ማስረጃ ሰበብ አድርጎ በመጠቀም ለመኩራራት ወይም ራሱን ከፍ አድርጎ ለመመልከት አይዳዳውም። ሐዋርያው ጳውሎስ እንዲህ ሲል ጽፏል:- “እግዚአብሔር ለእያንዳንዱ የእምነትን መጠን እንዳካፈለው፣ እንደ ባለ አእምሮ እንዲያስብ እንጂ ማሰብ ከሚገባው አልፎ በትዕቢት እንዳያስብ በመካከላችሁ ላለው ለእያንዳንዱ በተሰጠኝ ጸጋ እናገራለሁ።” (ሮሜ 12:3) ሌላ የመጽሐፍ ቅዱስ ትርጉም ደግሞ “ራሳችሁን በአግባቡ መዝኑ እንጂ፣ ከሆናችሁት በላይ ራሳችሁን ከፍ አድርጋችሁ እንዳታስቡ በተሰጠኝ ጸጋ እያንዳንዳችሁን እመክራለሁ” ሲል ይገልጻል። (አዲሱ መደበኛ ትርጉም) ስለዚህ ሰማያዊ አባታችን እንዲህ የሚወደን  መሆኑ የሚያስደስተን ቢሆንም የአምላክ ፍቅር ይገባናል የምንለው እንዳልሆነ በማስታወስ ሚዛናችንን መጠበቅ ይኖርብናል።—ሉቃስ 17:10

21. ሰይጣን የሚያስፋፋቸውን የትኞቹን ውሸቶች መቀበል የለብንም? ልባችን የትኛውን ሐቅ እንዲቀበል ማድረግ ይኖርብናል?

21 ይሖዋ አይወዳችሁም ወይም በአምላክ ፊት ዋጋ የላችሁም የሚለውን ውሸት ጨምሮ ሰይጣን የሚያስፋፋው ማንኛውም ውሸት ተጽዕኖ እንዳያሳድርብን የተቻለንን ሁሉ ጥረት እናድርግ። በሕይወትህ ውስጥ ያሳለፍከው ነገር አምላክ የቱንም ያህል ታላቅ ፍቅር ያለው ቢሆን አንተን ሊወድህ እንደማይችል ሆኖ እንዲሰማህ ካደረገህ ወይም ያከናወንከው መልካም ሥራ ሁሉን ማየት የሚችለው የአምላክ ዓይን እንኳ ሊያስተውለው የማይችል ኢምንት ነገር እንደሆነ ከተሰማህ አሊያም የሠራኸውን ኃጢአት የአምላክ ውድ ልጅ የከፈለው መሥዋዕት እንኳ ሊሸፍነው እንደማይችል አድርገህ የምታስብ ከሆነ በጣም ተሳስተሃል። ሰይጣን የሚያስፋፋውን እንዲህ ያለ ውሸት ፈጽሞ መቀበል የለብህም! ልባችን ጳውሎስ በአምላክ መንፈስ አነሳሽነት የጻፈውን የሚከተለውን ሐቅ አምኖ እንዲቀበል ማድረግ ይኖርብናል:- “ሞት ቢሆን፣ ሕይወትም ቢሆን፣ መላእክትም ቢሆኑ፣ ግዛትም ቢሆን፣ ያለውም ቢሆን፣ የሚመጣውም ቢሆን፣ ኃይላትም ቢሆኑ፣ ከፍታም ቢሆን፣ ዝቅታም ቢሆን፣ ልዩ ፍጥረትም ቢሆን በክርስቶስ ኢየሱስ በጌታችን ካለ ከእግዚአብሔር ፍቅር ሊለየን እንዳይችል ተረድቼአለሁ።”—ሮሜ 8:38, 39

^ አን.6 መጽሐፍ ቅዱስ በተደጋጋሚ ጊዜያት የትንሣኤን ተስፋ ከይሖዋ የማስታወስ ችሎታ ጋር አያይዞ ይገልጸዋል። ታማኙ የአምላክ አገልጋይ ኢዮብ ይሖዋን አስመልክቶ ሲናገር ‘ምነው ቀጠሮ ሰጥተህ፣ ከዚያ በኋላ ባስታወስኸኝ’ ብሏል። (ኢዮብ 14:13 አ.መ.ት) ይሖዋ ከሞት ሊያስነሳቸው የሚፈልጋቸውን ሰዎች በሚገባ የሚያስታውሳቸው በመሆኑ ይህ የኢዮብ አነጋገር ትክክል ነው።

^ አን.19 አንዳንድ የመጽሐፍ ቅዱስ ትርጉሞች ይህን ጥቅስ ሲተረጉሙ የአምላክን ሕዝብ የሚነካ የአምላክን ሳይሆን የራሱን የእስራኤልን ሕዝብ ዓይን እንደሚነካ አድርገው ገልጸውታል። ይህ ስህተት የተፈጠረው በጥቅሱ ላይ የሰፈረው ሐሳብ አክብሮት የጎደለው እንደሆነ የተሰማቸው አንዳንድ ጸሐፊዎች ጥቅሱን በራሳቸው መንገድ ለማስተካከል በመሞከራቸው ነው። የወሰዱት የተሳሳተ እርምጃ የይሖዋ ጥልቅ የርኅራኄ ስሜት እንዲሰወር አድርጓል።