በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 25

‘የአምላካችን ምሕረትና ርኅራኄ’

‘የአምላካችን ምሕረትና ርኅራኄ’

1, 2. (ሀ) አንዲት እናት ልጅዋ ሲያለቅስ ምን ታደርጋለች? (ለ) እናት ለልጅዋ ካላት ርኅራኄ የሚበልጠው የትኛው ርኅራኄ ነው?

እኩለ ሌሊት ላይ ሕፃኑ ያለቅሳል። እናትየው ወዲያውኑ ከእንቅልፏ ትነቃለች። የልጅዋ ነገር ስለሚያሳስባት እንደወትሮው እንቅልፍ ድብን አድርጎ አይወስዳትም። ሕፃኑ ምን ፈልጎ እንዳለቀሰ ለይታ ታውቃለች። ጡት ፈልጎ፣ መታቀፍ ፈልጎ ወይም ደግሞ የሽንት ጨርቅ እንዲቀየርለት ፈልጎ ሊሆን ይችላል። ሕፃኑ ያለቀሰበት ምክንያት ምንም ይሁን ምን የሚያስፈልገውን ታደርግለታለች። ልጅዋ እያለቀሰ አስችሏት ዝም ብላ አትተኛም።

2 አንዲት እናት የአብራኳ ክፋይ ለሆነው ልጅዋ ያላት ርኅራኄ በጣም ከፍተኛ እንደሆነ የታወቀ ነው። ይሁን እንጂ ይሖዋ አምላካችን ለሰው ልጆች ያለው ርኅራኄ ከዚህ እጅግ የላቀ ነው። ይህን ግሩም ባሕርይ መመርመራችን ወደ ይሖዋ እንድንቀርብ ሊረዳን ይችላል። እንግዲያው ርኅራኄ ምን እንደሆነና አምላካችን ይህን ባሕርይ የሚያንጸባርቀው እንዴት እንደሆነ እንመርምር።

ርኅራኄ ምንድን ነው?

3. “ምሕረት ማሳየት” ወይም “ለሌላው ማዘን” ተብሎ የተተረጎመው የዕብራይስጥ ግስ ምን ያመለክታል?

3 በመጽሐፍ ቅዱስ አገላለጽ መሠረት በርኅራኄና በምሕረት መካከል የቅርብ ዝምድና አለ። ከአንጀት የመራራትን ስሜት የሚገልጹ በርከት ያሉ የዕብራይስጥና የግሪክኛ ቃላት አሉ። ለምሳሌ ያህል ራኻም የተባለው የዕብራይስጥ ግስ ብዙውን ጊዜ “ምሕረት ማሳየት” ወይም “ለሌላው ማዘን” ተብሎ ይተረጎማል። አንድ የማመሳከሪያ ጽሑፍ ይህ ግስ “የምንወዳቸውን ወይም የእኛን እርዳታ የሚሹ ሰዎችን ችግር ወይም ሥቃይ ስንመለከት የሚሰማንን ጥልቅ የሆነ የርኅራኄ ስሜት” እንደሚያመለክት ገልጿል። ይሖዋ ስሜቱን ለመግለጽ  የተጠቀመበት ይህ የዕብራይስጥ ቃል “ማህፀን” የሚል ትርጉም ካለው ቃል ጋር ዝምድና ያለው ሲሆን “የእናት ርኅራኄ” ተብሎ ሊገለጽ ይችላል። *ዘጸአት 33:19፤ ኤርምያስ 33:26

‘በውኑ ሴት ከማኅፀንዋ የተወለደውን ሕፃንዋን ትረሳ ዘንድ ትችላለችን?’

4, 5. መጽሐፍ ቅዱስ የይሖዋን ርኅራኄ ለመግለጽ እናት ለልጅዋ ያላትን ፍቅር እንደ ምሳሌ አድርጎ የሚጠቀመው እንዴት ነው?

4 መጽሐፍ ቅዱስ የይሖዋን ርኅራኄ ለመግለጽ እናት ለልጅዋ ያላትን ፍቅር እንደ ምሳሌ አድርጎ ይጠቀማል። በ⁠ኢሳይያስ 49:15 ላይ እንዲህ የሚል እናነባለን:- “በውኑ ሴት ከማኅፀንዋ ለተወለደው ልጅ እስከማትራራ [ራኻም] ድረስ ሕፃንዋን ትረሳ ዘንድ ትችላለችን? አዎን፣ እርስዋ ትረሳ ይሆናል፣ እኔ ግን አልረሳሽም።” ይህ ልብ የሚነካ አገላለጽ ይሖዋ ለሕዝቦቹ ምን ያህል እንደሚራራ ጎላ አድርጎ ያሳያል። እንዴት?

5 አንዲት እናት ሕፃን ልጅዋን ማጥባት ወይም መንከባከብ ትረሳለች ብሎ ማሰብ የማይመስል ነገር ነው። አንድ ሕፃን ሌት ተቀን የእናቱን ፍቅርና እንክብካቤ ካላገኘ በራሱ ምንም ማድረግ እንደማይችል የታወቀ ነው። የሚያሳዝነው ግን “ፍቅር” በጠፋበት በዚህ ‘የመጨረሻ ዘመን’ ልጆቻቸውን ቸል የሚሉ አልፎ ተርፎም የሚጥሉ እናቶች እንዳሉ የሚገልጹ ዘገባዎችን መስማት እንግዳ ነገር አይደለም። (2 ጢሞቴዎስ 3:1, 3) ይሖዋ “እኔ ግን አልረሳሽም” ሲል ተናግሯል። ይሖዋ ለአገልጋዮቹ ያለው ርኅራኄ ምንጊዜም አይለወጥም። እናት ለልጅዋ ካላት ርኅራኄ እንኳ የላቀ ነው። አንድ የመጽሐፍ ቅዱስ ተንታኝ ኢሳይያስ 49:15ን አስመልክተው ሲናገሩ “ይህ አገላለጽ የአምላክን ፍቅር በተመለከተ በብሉይ ኪዳን ውስጥ ከተጠቀሱት እጅግ ልብ የሚነኩ መግለጫዎች አንዱ ነው” ብለዋል።

6. ብዙ ሰዎች ርኅራኄን በተመለከተ ምን አመለካከት አላቸው? ሆኖም ይሖዋ ምን ማረጋገጫ ሰጥቶናል?

6 ርኅራኄ የደካማነት ምልክት ነው? ብዙ ሰዎች እንዲህ ዓይነት አመለካከት አላቸው። ለምሳሌ ያህል በኢየሱስ ዘመን የነበረው ሮማዊው  ፈላስፋና የታወቀው ምሑር ሴኔካ “አዘኔታ የሚያሳይ ደካማ አእምሮ ያለው ነው” ሲል አስተምሯል። ሴኔካ ስሜት አልባ መሆንን የሚያበረታታው የኢስጦኢኮች ፍልስፍና አራማጅ ነበር። አስተዋይ ሰው ችግር ላይ የወደቁ ሰዎችን መርዳት ቢችልም እንዲህ ላሉ ሰዎች በማዘን አእምሮውን እረፍት መንሳት የለበትም ሲል ተናግሯል። እንዲህ ዓይነቱ የራስ ወዳድነት አመለካከት ሰዎች ለሌሎች ምንም ርኅራኄ እንዳይኖራቸው የሚያደርግ ነው። ይሖዋ ግን እንዲህ ዓይነት አምላክ አይደለም! “እጅግ የሚምር የሚራራ” አምላክ ስለመሆኑ በቃሉ ውስጥ ማረጋገጫ ሰጥቶናል። (ያዕቆብ 5:11) ቀጥለን እንደምንመለከተው ርኅራኄ ደካማነትን ሳይሆን ጥንካሬን የሚያሳይ አስፈላጊ የሆነ ባሕርይ ነው። ይሖዋ እንደ አንድ አፍቃሪ ወላጅ ይህን ባሕርይ የሚያሳየው እንዴት እንደሆነ እንመልከት።

ይሖዋ ለአንድ ሕዝብ ያሳየው ርኅራኄ

7, 8. እስራኤላውያን በጥንቷ ግብጽ መከራ የደረሰባቸው እንዴት ነው? ይሖዋስ ምን ምላሽ ሰጠ?

7 ይሖዋ ለእስራኤል ሕዝብ ያደረገው ነገር ርኅራኄውን በግልጽ የሚያሳይ ነበር። በ16ኛው መቶ ዘመን ከክርስቶስ ልደት በፊት በሚሊዮን የሚቆጠሩ እስራኤላውያን በግብጽ አገር በከባድ ጭቆና በባርነት ይኖሩ ነበር። ግብጻውያን “በጽኑ ሥራ፣ በጭቃ በጡብም . . . ሥራ ሁሉ፣ ሕይወታቸውን ያስመርሩአቸው ነበር።” (ዘጸአት 1:11, 14) እስራኤላውያን ሥቃዩ ሲበዛባቸው ወደ ይሖዋ ጮኹ። ርኅሩኅ የሆነው አምላክ ምላሽ የሰጠው እንዴት ነበር?

8 ይሖዋ በእጅጉ አዘነላቸው። እንዲህ ሲል ተናገረ:- “በግብፅ ያለውን የሕዝቤን መከራ በእውነት አየሁ፣ ከአስገባሪዎቻቸውም የተነሣ ጩኸታቸውን ሰማሁ፤ ሥቃያቸውንም አውቄአለሁ።” (ዘጸአት 3:7) ይሖዋ በሕዝቦቹ ላይ የሚደርሰውን ሥቃይ እያየ ወይም ጩኸታቸውን እየሰማ አስችሎት ዝም አይልም። በምዕራፍ 24 ላይ  እንዳየነው ይሖዋ አዛኝ አምላክ ነው። ሌላው ሲሠቃይ አብሮ መሠቃየትን የሚያመለክተው አዘኔታ የሚለው ቃል ከርኅራኄ ጋር የቅርብ ዝምድና አለው። ይሁንና ይሖዋ ለሕዝቦቹ በማዘን ብቻ አልተወሰነም፤ ከዚህ ይልቅ እነሱን ለመርዳት እርምጃ ወስዷል። ኢሳይያስ 63:9 “በፍቅሩና በርኅራኄውም ተቤዣቸው” ይላል። ይሖዋ እስራኤላውያንን “በጸናች እጅ” ከግብፅ ነፃ አወጣቸው። (ዘዳግም 4:34) ከዚያም በተአምር እየመገበ ለም ወደሆነች ምድር አገባቸው።

9, 10. (ሀ) ይሖዋ እስራኤላውያን ተስፋይቱ ምድር ከገቡ በኋላም በተደጋጋሚ ከጠላቶቻቸው ያድናቸው የነበረው ለምንድን ነው? (ለ) በዮፍታሔ ዘመን ይሖዋ እስራኤላውያንን ነፃ ያወጣቸው ከእነማን ጭቆና ነው? ይህን እርምጃ እንዲወስድ የገፋፋውስ ምንድን ነው?

9 ይሖዋ ለእስራኤላውያን ያሳየው ርኅራኄ በዚህ ብቻ አላበቃም። እስራኤላውያን ተስፋይቱ ምድር ከገቡ በኋላ በተደጋጋሚ ጊዜያት በማመጽ ለችግር ይዳረጉ ነበር። ሆኖም ይሖዋ ተጸጽተው ወደ እሱ በጮኹ ቁጥር ያድናቸው ነበር። ለምን? ‘ለሕዝቡ ስላዘነ ነው።’—2 ዜና መዋዕል 36:15፤ መሳፍንት 2:11-16

10 እስቲ በዮፍታሔ ዘመን የተፈጸመውን ሁኔታ ተመልከት። እስራኤላውያን የሐሰት አማልክትን ወደማምለክ ዘወር ብለው ስለነበረ ይሖዋ ለ18 ዓመታት አሞናውያን እንዲጨቁኗቸው ፈቀደ። በመጨረሻ እስራኤላውያን ንስሐ ገቡ። መጽሐፍ ቅዱስ “ሌሎችንም አማልክት ከመካከላቸው አስወገዱ፣ እግዚአብሔርንም አመለኩ፤ ነፍሱም ስለ እስራኤል ጉስቁልና አዘነች” በማለት ይገልጻል። (መሳፍንት 10:6-16) ይሖዋ ሕዝቦቹ ከልብ ንስሐ ከገቡ በኋላ ሲሠቃዩ ማየት አያስችለውም። በመሆኑም የርኅራኄ አምላክ የሆነው ይሖዋ እስራኤላውያንን ከጠላቶቻቸው እጅ ነፃ እንዲያወጣ ለዮፍታሔ ኃይል ሰጠው።—መሳፍንት 11:30-33

11. ይሖዋ ለእስራኤል ሕዝብ ካደረገው ነገር ስለ ርኅራኄ ምን እንማራለን?

11 ይሖዋ ለእስራኤል ሕዝብ ያደረገው ነገር ስለ ርኅራኄ ምን ያስተምረናል? በመጀመሪያ ደረጃ ይሖዋ ይራራል ሲባል በሕዝቦቹ ላይ የሚደርሰውን ሥቃይ ሲያይ ያዝናል ማለት ብቻ እንዳልሆነ ማስተዋል  እንችላለን። አንዲት እናት ልጅዋ ሲያለቅስ በርኅራኄ ተገፋፍታ የሚያስፈልገውን እንደምታደርግለት የሚገልጸውን ምሳሌ አስታውስ። በተመሳሳይም ይሖዋ የሕዝቦቹን ጩኸት እየሰማ ዝም አይልም። ከዚህ ይልቅ በርኅራኄው ተገፋፍቶ ሕዝቦቹ እየደረሰባቸው ካለው ሥቃይ እፎይታ የሚያገኙበትን እርምጃ ይወስዳል። በተጨማሪም ይሖዋ ለእስራኤላውያን ያደረገው ነገር ርኅራኄ የደካማነት ምልክት አለመሆኑን ያሳያል። ምክንያቱም ይሖዋ ሕዝቦቹን ለማዳን ሲል ቆራጥ እርምጃ እንዲወስድ የገፋፋው ይህ ባሕርይ ነው። ይሁን እንጂ ይሖዋ ለአገልጋዮቹ ርኅራኄ የሚያሳየው በቡድን ደረጃ ብቻ ነው?

ይሖዋ በግለሰብ ደረጃ የሚያሳየው ርኅራኄ

12. ለእስራኤላውያን የተሰጠው ሕግ ይሖዋ በግለሰብ ደረጃ ለሰዎች ያለውን ርኅራኄ የሚያሳየው እንዴት ነው?

12 ይሖዋ ለእስራኤላውያን የሰጠው ሕግ በግለሰብ ደረጃ ለሰዎች እንደሚራራ የሚያሳይ ነው። ለምሳሌ ለድሆች የነበረውን አሳቢነት እንመልከት። ይሖዋ የትኛውም እስራኤላዊ አጋጣሚዎች በሚፈጥሩት ሁኔታ ሳቢያ ለድህነት ሊዳረግ እንደሚችል ያውቅ ነበር። እስራኤላውያን ለድሆች ምን ማድረግ ይጠበቅባቸው ነበር? ይሖዋ የሚከተለውን ጥብቅ ትእዛዝ ሰጥቷቸዋል:- “ልብህን አታጽና፣ በድሀው ወንድምህ ላይ እጅህን አትጨብጥ። እጅህን በምትጥልበት ሁሉ አምላክህ እግዚአብሔር ስለዚህ በሥራህ ሁሉ ይባርክሃልና ፈጽመህ ስጠው፣ በሰጠኸውም ጊዜ በልብህ አትጸጸት።” (ዘዳግም 15:7, 10) በተጨማሪም እስራኤላውያን የእርሻቸውን ድንበር ሙልጭ አድርገው እንዳያጭዱ ወይም ቃርሚያውን እንዳይለቅሙ ትእዛዝ ተሰጥቷቸዋል። ማሳውን የሚቃርሙት ችግረኞች ናቸው። (ዘሌዋውያን 23:22፤ ሩት 2:2-7) ሕዝቡ በመካከላቸው ላሉት ድሆች የወጣውን ይህን አሳቢነት የተንጸባረቀበት ሕግ ከታዘዙ ችግረኛ የሆኑ ግለሰቦች ለልመና አይዳረጉም። ይህ የይሖዋን ርኅራኄ የሚያሳይ አይደለም?

13, 14. (ሀ) ዳዊት የተናገራቸው ቃላት ይሖዋ በግለሰብ ደረጃ ከልብ እንደሚያስብልን የሚያረጋግጡት እንዴት ነው? (ለ) ይሖዋ ‘ልባቸውና መንፈሳቸው ለተሰበረ’ ቅርብ መሆኑን በምሳሌ ማስረዳት የሚቻለው እንዴት ነው?

 13 አፍቃሪ የሆነው አምላካችን ዛሬም ለእኛ በግለሰብ ደረጃ ያስብልናል። የሚደርስብንን መከራና ሥቃይ ሁሉ እንደሚያውቅ እርግጠኞች መሆን እንችላለን። መዝሙራዊው ዳዊት እንዲህ ሲል ጽፏል:- “የእግዚአብሔር ዓይኖች ወደ ጻድቃን ጆሮቹም ወደ ጩኸታቸው ናቸውና። እግዚአብሔር ልባቸው ለተሰበረ ቅርብ ነው፣ መንፈሳቸው የተሰበረውንም ያድናቸዋል።” (መዝሙር 34:15, 18) እነዚህን ቃላት በተመለከተ አንድ የመጽሐፍ ቅዱስ ተንታኝ የሚከተለውን አስተያየት ሰጥተዋል:- “እነዚህ ሰዎች በኃጢአት ምክንያት ልባቸው የተሰበረ ከመሆኑም በላይ መንፈሳቸው የተደቆሰ ነው። ራሳቸውን ዝቅ አድርገው ይመለከታሉ፤ እንዲሁም ምንም እንደማይረቡና ከንቱ እንደሆኑ ይሰማቸዋል።” እንዲህ ያሉ ሰዎች ይሖዋ ከእነሱ የራቀ እንደሆነ አድርገው የሚያስቡ ከመሆኑም በላይ በፊቱ ከቁብ የማይቆጠሩ በመሆናቸው ስለ እነሱ ሊያስብ እንደማይችል ሆኖ ይሰማቸዋል። ሐቁ ግን ይህ አይደለም። የዳዊት ቃላት ይሖዋ ‘ምንም እንደማይረቡ የሚሰማቸውን’ ሰዎች በፍጹም እንደማይተዋቸው ያረጋግጡልናል። ርኅሩኅ የሆነው አምላካችን ከምንጊዜውም ይበልጥ የእሱ ድጋፍ የሚያስፈልገን በዚህ ወቅት እንደሆነ ያውቃል፤ ስለሆነም ከእኛ አይርቅም።

14 እስቲ የሚከተለውን ሁኔታ ተመልከት። በዩናይትድ ስቴትስ የምትገኝ አንዲት እናት የሁለት ዓመት ልጅዋ በመተንፈሻ አካል ላይ በሚከሰት ከባድ ሕመም እየተሰቃየ ስለነበረ በአስቸኳይ ወደ ሆስፒታል ይዛው ሄደች። ዶክተሮቹ ልጁን ከመረመሩ በኋላ እዚያው ሆስፒታል ማደር እንዳለበት ነገሯት። በዚህ ጊዜ እናቲቱ ልጅዋን ጥላ ከመሄድ ይልቅ በሆስፒታሉ መኝታ ክፍል ውስጥ ባለ አንድ ወንበር ላይ ልጅዋ አጠገብ ኩርምት ብላ አደረች! ልጅዋ ስለታመመ ከአጠገቡ መራቅ አልፈለገችም። አፍቃሪው አባታችን ይሖዋ ከዚህ የበለጠ  እንደሚያደርግልን እርግጠኞች መሆን እንችላለን! ደግሞም የተፈጠርነው በእሱ አምሳል ነው። (ዘፍጥረት 1:26) ‘ልባችንና መንፈሳችን በሚሰበርበት ጊዜ’ ይሖዋ እንደ አንድ አፍቃሪ ወላጅ ከአጠገባችን እንደማይርቅ በ⁠መዝሙር 34:18 ላይ የሚገኙት ልብ የሚነኩ ቃላት ይገልጹልናል። በዚህ ወቅት ከመቼውም ጊዜ ይበልጥ የሚራራልን ከመሆኑም በላይ በሚያስፈልገን ሁሉ ይረዳናል።

15. ይሖዋ በግለሰብ ደረጃ የሚረዳን እንዴት ነው?

15 ታዲያ ይሖዋ በግለሰብ ደረጃ የሚረዳን እንዴት ነው? የግድ የችግሩን መንስኤ ያስወግድልናል ማለት ላይሆን ይችላል። ይሁን እንጂ ይሖዋ ወደ እሱ የሚጮኹትን ሰዎች የሚረዳባቸው ብዙ ዝግጅቶች አሉት። ቃሉ መጽሐፍ ቅዱስ ሊረዳን የሚችል እጅግ ጠቃሚ ምክር ይዟል። በጉባኤ ደግሞ የእምነት ባልንጀሮቻቸውን በሚረዱበት ጊዜ የእሱን ርኅራኄ ለማንጸባረቅ የሚጥሩ በመንፈሳዊ የጎለመሱ የበላይ ተመልካቾችን አዘጋጅቷል። (ያዕቆብ 5:14, 15) ‘ጸሎትን የሚሰማ’ አምላክ እንደመሆኑ መጠን ‘ለሚለምኑት መንፈስ ቅዱስን’ ይሰጣል። (መዝሙር 65:2፤ ሉቃስ 11:13) መንፈስ ቅዱስ ደግሞ የአምላክ መንግሥት መጥቶ ችግሮችን ሁሉ እስኪያስወግድልን ድረስ መጽናት የሚያስችለንን ‘ታላቅ ኃይል’ ይሰጠናል። (2 ቆሮንቶስ 4:7) ለእነዚህ ሁሉ ዝግጅቶች አመስጋኞች አይደለንም? እነዚህ የይሖዋ ርኅራኄ መግለጫዎች መሆናቸውን መዘንጋት የለብንም።

16. ይሖዋ ርኅራኄውን ያሳየበት ከሁሉ የላቀ መንገድ ምንድን ነው? ይህስ በግለሰብ ደረጃ ለእያንዳንዳችን ምን ትርጉም አለው?

16 እርግጥ ነው፣ ይሖዋ ርኅራኄውን ከሁሉ በላቀ መንገድ ያሳየው ከማንም በላይ የሚወደውን ልጁን ለሰው ዘር ቤዛ አድርጎ በመስጠት ነው። ይህ መሥዋዕት የይሖዋን ፍቅር የሚያሳይ ከመሆኑም በላይ መዳን የምናገኝበትን በር ከፍቶልናል። ይሖዋ የቤዛውን ዝግጅት ያደረገው ለእያንዳንዳችን መሆኑን አስታውስ። የአጥማቂው ዮሐንስ አባት የሆነው ዘካርያስ ይህ ስጦታ ‘የአምላካችንን ምሕረትና ርኅራኄ’ ጎላ አድርጎ የሚያሳይ እንደሆነ አስቀድሞ መናገሩ የተገባ ነው።—ሉቃስ 1:78

 ይሖዋ ርኅራኄ ከማሳየት የሚቆጠብበት ጊዜ

17-19. (ሀ) መጽሐፍ ቅዱስ የይሖዋ ርኅራኄ ገደብ እንዳለው የሚያሳየው እንዴት ነው? (ለ) ይሖዋ ለሕዝቡ ያለው ርኅራኄ እንዲሟጠጥ ያደረገው ምንድን ነው?

17 የይሖዋ ርኅራኄ ገደብ እንደሌለው አድርገን ልናስብ ይገባል? በፍጹም፤ ይሖዋ የጽድቅ ጎዳናውን ለሚቃወሙ ሰዎች በምንም ዓይነት ርኅራኄ አያሳይም። (ዕብራውያን 10:28) እንዲህ ላሉ ሰዎች ርኅራኄ የማያሳየው ለምን እንደሆነ ለመረዳት የእስራኤልን ሕዝብ ታሪክ መለስ ብለን እንመልከት።

18 ምንም እንኳ ይሖዋ እስራኤላውያንን በተደጋጋሚ ጊዜ ከጠላቶቻቸው ያዳናቸው ቢሆንም የኋላ ኋላ ርኅራኄው ተሟጥጦ ነበር። እነዚህ አንገተ ደንዳና ሰዎች ጣዖት ያመልኩ የነበረ ከመሆኑም በላይ አስጸያፊ የሆኑ ጣዖቶቻቸውን ቤተ መቅደሱ ውስጥ እስከ ማስገባት ደርሰዋል! (ሕዝቅኤል 5:11፤ 8:17, 18) በተጨማሪም እንዲህ የሚል እናነባለን:- “የእግዚአብሔር ቁጣ በሕዝቡ ላይ እስኪወጣ ድረስ፣ ፈውስም እስከማይገኝላቸው ድረስ፣ በእግዚአብሔር መልእክተኞች ይሳለቁ፣ ቃሉንም ያቃልሉ፣ በነቢያቱም ላይ ያፌዙ ነበር።” (2 ዜና መዋዕል 36:16) እስራኤላውያን ይፈጽሙት ከነበረው ድርጊት አንጻር ይሖዋ ለእነሱ ርኅራኄ ሊያሳይ የሚችልበት ምንም ዓይነት ሁኔታ አልነበረም፤ በተጨማሪም የእስራኤላውያን ድርጊት የይሖዋን የጽድቅ ቁጣ ቀስቅሶ ነበር። ታዲያ ይህ ምን ውጤት አስከተለ?

19 ይሖዋ ለሕዝቡ ርኅራኄ ከማሳየት ለመታቀብ ተገድዷል። “አጠፋቸዋለሁ እንጂ አልራራም፣ አላዝንም፣ አልምርም” ሲል ተናግሯል። (ኤርምያስ 13:14) በመሆኑም ኢየሩሳሌምና ቤተ መቅደሷ የጠፉ ሲሆን እስራኤላውያን በምርኮ ወደ ባቢሎን ተወስደዋል። ኃጢአተኛ የሆኑ የሰው ልጆች የአምላክ ርኅራኄ እስኪሟጠጥ ድረስ እንዲህ ማመጻቸው ምንኛ የሚያሳዝን ነው!—ሰቆቃወ ኤርምያስ 2:21

20, 21. (ሀ) በዛሬው ጊዜስ ይሖዋ ርኅራኄው ሲሟጠጥ ምን እርምጃ ይወስዳል? (ለ) በሚቀጥለው ምዕራፍ ላይ የይሖዋ ርኅራኄ የተንጸባረቀበትን የትኛውን ዝግጅት እንመረምራለን?

20 ዛሬስ ሁኔታው እንዴት ነው? ይሖዋ አልተለወጠም። ይሖዋ  ለሰው ልጆች ካለው ርኅራኄ በመነሳት ምሥክሮቹ ‘የመንግሥቱን ወንጌል’ በዓለም ዙሪያ እንዲሰብኩ አዝዟል። (ማቴዎስ 24:14) አዎንታዊ ምላሽ የሚሰጡትን ቅን ልብ ያላቸው ሰዎች ደግሞ የመንግሥቱን መልእክት እንዲያስተውሉ ይረዳቸዋል። (የሐዋርያት ሥራ 16:14) ሆኖም ይህ የስብከት ሥራ ለዘላለም አይቀጥልም። ይሖዋ በመከራና በሥቃይ የተሞላው ይህ ክፉ ዓለም ለዘላለም እንዲቀጥል ቢፈቅድ በምንም ዓይነት የርኅራኄ መግለጫ ነው ሊባል አይችልም። ይሖዋ ርኅራኄው ሲሟጠጥ በዚህ ሥርዓት ላይ እርምጃ ይወስዳል። ይሁንና ይህንንም እርምጃ የሚወስደው ‘ለቅዱስ ስሙና’ ለታማኝ አገልጋዮቹ በመራራት ነው። (ሕዝቅኤል 36:20-23) ይሖዋ ክፋትን ጠራርጎ በማጥፋት ጽድቅ የሰፈነበት አዲስ ዓለም ያመጣል። ክፉዎችን አስመልክቶ ሲናገር “በዓይኔ አልራራም አላዝንምም፣ መንገዳቸውንም በራሳቸው ላይ እመልሳለሁ” ብሏል።—ሕዝቅኤል 9:10

21 እስከዚያው ጊዜ ድረስ ግን ይሖዋ ጥፋት ለሚጠብቃቸው ሰዎችም እንኳ ሳይቀር ርኅራኄ ያሳያል። ከልብ ንስሐ የሚገቡ ኃጢአተኛ ሰዎች ይሖዋ በርኅራኄ ተገፋፍቶ ካደረገው የምሕረት ዝግጅት መጠቀም ይችላሉ። በሚቀጥለው ምዕራፍ ላይ ፍጹም የሆነውን የይሖዋን ምሕረት የሚያሳዩ አንዳንድ ግሩም መግለጫዎችን እንመለከታለን።

^ አን.3 ይሁንና ራኻም የተባለው የዕብራይስጥ ግስ በ⁠መዝሙር 103:13 ላይ አባት ለልጆቹ የሚያሳየውን ምሕረት ወይም ርኅራኄ ለማመልከት ተሠርቶበታል።