በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 21

ኢየሱስ ‘የአምላክን ጥበብ’ ገልጧል

ኢየሱስ ‘የአምላክን ጥበብ’ ገልጧል

1-3. ኢየሱስን በቅርብ የሚያውቁት የአገሩ ሰዎች ላስተማረው ትምህርት ምን ምላሽ ሰጡ? ያልተገነዘቡትስ ነገር ምን ነበር?

አድማጮቹ በትምህርቱ በጣም ከመገረማቸው የተነሳ ፈዘው ያዳምጡታል። ወጣቱ ኢየሱስ በምኩራብ ውስጥ ቆሞ እያስተማረ ነው። ኢየሱስ እዚያው ከተማ ውስጥ ያደገና በአናጺነት ሲሠራ የቆየ በመሆኑ ለአድማጮቹ እንግዳ ሰው አልነበረም። እንዲያውም አንዳንዶቹ እሱ ባነጻቸው ቤቶች ውስጥ የሚኖሩ ወይም እሱ በሠራው ሞፈርና ቀንበር የሚገለገሉ ሊሆኑ ይችላሉ። * ይሁንና አናጺ የነበረው ይህ ሰው ፊታቸው ቆሞ ሲያስተምር ምን ተሰምቷቸው ይሆን?

2 ሲያዳምጡት ከነበሩት ሰዎች መካከል አብዛኞቹ በጣም ከመገረማቸው የተነሳ “ይህን ጥበብ . . . ከወዴት አገኘው?” ሲሉ ጠይቀዋል። ይሁን እንጂ “ይህስ ጸራቢው የማርያም ልጅ . . . አይደለምን?” ሲሉ አክለውም ተናግረዋል። (ማቴዎስ 13:54-58፤ ማርቆስ 6:1-3) ኢየሱስን በቅርብ የሚያውቁት የአገሩ ሰዎች ‘ይህ ሰው የምናውቀው ተራ አናጺ አይደል እንዴ’ ሲሉ ንቀውታል። በጥበቡ ቢገረሙም አልተቀበሉትም። ይህ ጥበብ ከራሱ የመነጨ እንዳልሆነ አልተገነዘቡም ነበር።

3 ኢየሱስ ይህን ጥበብ ያገኘው ከየት ነው? “ትምህርቴስ ከላከኝ ነው እንጂ ከእኔ አይደለም” ሲል ተናግሯል። (ዮሐንስ 7:16) ሐዋርያው ጳውሎስ ስለ ኢየሱስ ሲናገር ‘እርሱ ከእግዚአብሔር ዘንድ ጥበብ ሆኖልናል’ ብሏል። (1 ቆሮንቶስ 1:30) የይሖዋ ጥበብ በልጁ በኢየሱስ አማካኝነት ተገልጧል። በመሆኑም ኢየሱስ “እኔና አብ አንድ ነን” ብሎ ለመናገር ችሏል። (ዮሐንስ 10:30) ኢየሱስ ‘የአምላክን ጥበብ’ የገለጠባቸውን ሦስት መንገዶች እስቲ እንመርምር።

 ያስተማረው ትምህርት

4. (ሀ) የኢየሱስ መልእክት ዋነኛ ጭብጥ ምን ነበር? ይህስ ተገቢ የሆነው ለምንድን ነው? (ለ) የኢየሱስ ምክር ምንጊዜም ተግባራዊና አድማጮቹን የሚጠቅም የሆነው ለምንድን ነው?

4 በመጀመሪያ ኢየሱስ ምን እንዳስተማረ እንመርምር። የመልእክቱ ዋና ጭብጥ ‘የእግዚአብሔር መንግሥት ምሥራች’ ነበር። (ሉቃስ 4:43) ይህ መንግሥት የይሖዋን ሉዓላዊነት በማረጋገጥና ለሰው ዘር ዘላቂ በረከት በማስገኘት ረገድ ትልቅ ሚና ስለሚጫወት የመልእክቱ ዋነኛ ጭብጥ መሆኑ ተገቢ ነው። በተጨማሪም ኢየሱስ ያስተማረው ትምህርት ለዕለታዊ ሕይወት የሚጠቅሙ ምክሮችን ያዘለ ነው። በትንቢት በተነገረለት መሠረት “ድንቅ መካር” መሆኑን አስመስክሯል። (ኢሳይያስ 9:6) ደግሞስ ምክሩ ድንቅ መሆኑ ምን ያስገርማል! ስለ አምላክ ቃልና ፈቃድ ጥልቅ እውቀት ያለው ከመሆኑም በላይ የሰዎችን ተፈጥሮ ጠንቅቆ ያውቃል። ከዚህም በተጨማሪ ለሰዎች ከፍተኛ ፍቅር አለው። በመሆኑም ምክሩ ምንጊዜም ተግባራዊና አድማጮቹን የሚጠቅም ነው። ኢየሱስ ያስተማረው “የዘላለም ሕይወት ቃል” ነው። አዎን፣ ምክሩን ተግባራዊ ማድረግ መዳን ያስገኛል።—ዮሐንስ 6:68

5. ኢየሱስ በተራራ ስብከቱ ከጠቀሳቸው ርዕሰ ጉዳዮች መካከል አንዳንዶቹ ምንድን ናቸው?

5 የተራራው ስብከት፣ ኢየሱስ ያስተማረው ትምህርት ወደር የለሽ ጥበብ የተንጸባረቀበት መሆኑን የሚያሳይ ግሩም ምሳሌ ነው። በማቴዎስ 5:3–7:27 ላይ ተመዝግቦ የሚገኘው ይህ የተራራ ስብከት ከ20 ደቂቃ ባልበለጠ ጊዜ ሊቀርብ ይችላል። ይሁን እንጂ በዚህ የተራራ ስብከት ውስጥ የሚገኘው ምክር ጊዜ የማይሽረው በመሆኑ በዚያን ጊዜ ጠቃሚ የነበረውን ያህል ዛሬም ጠቃሚ ነው። ኢየሱስ እንዴት ከሌሎች ጋር ተስማምቶ መኖር እንደሚቻል (5:23-26, 38-427:1-512)፣ እንዴት ንጹሕ ሥነ ምግባር ጠብቆ መኖር እንደሚቻል (5:27-32) እንዲሁም እንዴት ዓላማ ያለው ሕይወት መኖር እንደሚቻል (6:19-247:24-27) የሚገልጹ ሐሳቦችን ጨምሮ በርካታ ርዕሰ ጉዳዮችን ጠቅሷል። ሆኖም ኢየሱስ ትክክለኛና ጥበብ የሆነው ነገር ምን እንደሆነ  በመናገር ብቻ አልተወሰነም፤ ከዚህ ይልቅ ማስረጃ በማቅረብ አሳማኝ በሆነ መንገድ አብራርቶላቸዋል።

6-8. (ሀ) ኢየሱስ ጭንቀትን ማስወገድ እንደሚገባ ለማስገንዘብ ምን አሳማኝ ምክንያቶችን ጠቅሷል? (ለ) የኢየሱስ ምክር አምላካዊ ጥበብ ያዘለ እንደሆነ የሚያሳየው ምንድን ነው?

6 ለምሳሌ ያህል በማቴዎስ ምዕራፍ 6 ላይ የሚገኘውን ኢየሱስ ስለ ቁሳዊ ነገሮች መጨነቅን አስመልክቶ የሰጠውን ጥበብ ያዘለ ምክር እንመልከት። ኢየሱስ “ስለ ነፍሳችሁ በምትበሉትና በምትጠጡት፣ ወይም ስለ ሰውነታችሁ በምትለብሱት አትጨነቁ” ሲል ምክር ሰጥቷል። (ቁጥር 25) ምግብና ልብስ የሰው ልጅ መሠረታዊ ፍላጎቶች ስለሆኑ እነዚህን ነገሮች ለማግኘት ማሰብ ያለ ነገር ነው። ይሁን እንጂ ኢየሱስ ስለእነዚህ ነገሮች ‘መጨነቅ እንደሌለብን’ ተናግሯል። * ለምን?

7 ኢየሱስ ይህን ጉዳይ እንዴት አሳማኝ በሆነ መንገድ እንዳስረዳ ተመልከት። ሕይወትና አካል የሰጠን ይሖዋ ሕይወታችንን ለማቆየት የሚያስችል ምግብና ሰውነታችንን ለመሸፈን የሚያስችል ልብስ መስጠት ይሳነዋል? (ቁጥር 25) አምላክ ወፎችን የሚመግብና አበቦችን ውበት የሚያለብስ ከሆነ ለሚያመልኩት ሰዎች ይበልጥ አያስብም? (ቁጥር 26, 28-30) በእርግጥም ከልክ በላይ መጨነቅ ዋጋ የለውም። ምንም ያህል ብንጨነቅ በሕይወታችን ላይ ቅንጣት ታክል ዕድሜ መጨመር አንችልም። * (ቁጥር 27 አ.መ.ት) ታዲያ እንዲህ ያለውን ጭንቀት እንዴት ማስወገድ ይቻላል? ኢየሱስ በሕይወታችን ውስጥ ምንጊዜም ለይሖዋ አምልኮ ቅድሚያ እንድንሰጥ መክሮናል። ይህን የሚያደርጉ ሰዎች በየዕለቱ የሚያስፈልጓቸውን ነገሮች ሰማያዊ አባታቸው ‘እንደሚጨምርላቸው’ እርግጠኞች መሆን ይችላሉ። (ቁጥር 33) በመጨረሻም ኢየሱስ ከዛሬ አልፈን ነገ ስለሚሆነው ነገር እያሰብን መጨነቅ እንደማይገባ በመግለጽ በጣም ጠቃሚ የሆነ ምክር ሰጥቷል። (ቁጥር 34) ደግሞስ ገና ይሁን አይሁን ለማናውቀው ነገር ከልክ በላይ የምንጨነቅበት ምን ምክንያት አለ? እንዲህ ያለውን ጥበብ ያዘለ ምክር ሥራ ላይ ማዋላችን አስጨናቂ  በሆኑ ነገሮች በተሞላው በዚህ ዓለም ውስጥ ያለብንን ውጥረት ይቀንስልናል።

8 በእርግጥም ኢየሱስ የሰጠው ምክር ከ2,000 ዓመት ገደማ በፊት ጠቃሚ እንደነበረ ሁሉ ዛሬም ጠቃሚ ነው። ይህ ሁኔታ የኢየሱስ ምክር አምላካዊ ጥበብ ያዘለ እንደሆነ አያሳይም? ሰዎች የሚሰጡት በጣም የተሻለ ነው የሚባለው ምክር እንኳ ጊዜ ሊያልፍበትና በሌላ ሊተካ ይችላል። ይሁን እንጂ የኢየሱስ ትምህርቶች ፈጽሞ ጊዜ የማይሽራቸው ናቸው። ይህ ድንቅ መካሪ ያስተማረው “የእግዚአብሔርን ቃል” በመሆኑ በዚህ ልንገረም አይገባም።—ዮሐንስ 3:34

ያስተማረበት መንገድ

9. ኢየሱስን እንዲይዙ የተላኩት ወታደሮች ስለ ኢየሱስ ትምህርት ምን አሉ? ይህስ የተጋነነ አይደለም የምንለው ለምንድን ነው?

በሁለተኛ ደረጃ ደግሞ ኢየሱስ ያስተማረበት መንገድ የአምላክን ጥበብ እንዴት እንደሚያንጸባርቅ እንመልከት። በአንድ ወቅት ኢየሱስን እንዲይዙ ተልከው የነበሩ ወታደሮች ባዶ እጃቸውን በመመለስ “እንደዚህ ሰው ማንም እንዲሁ ከቶ አልተናገረም” ሲሉ ተናግረዋል። (ዮሐንስ 7:45, 46) ይህ ምንም ማጋነን አይደለም። “ከላይ” ማለትም ከሰማይ የመጣው ኢየሱስ በምድር ላይ ከኖሩት ሰዎች ሁሉ የላቀ እውቀትና ተሞክሮ አለው። (ዮሐንስ 8:23) ማንም ሰው እንደ እሱ ሊያስተምር አይችልም። ይህ ጥበበኛ አስተማሪ ከተጠቀመባቸው የማስተማሪያ ዘዴዎች መካከል እስቲ ሁለቱን ብቻ እንመልከት።

“ሕዝቡ በትምህርቱ ተገረሙ”

10, 11. (ሀ) ኢየሱስ ምሳሌዎችን የተጠቀመበት መንገድ አስደናቂ ነው የምንለው ለምንድን ነው? (ለ) ኢየሱስ ብዙውን ጊዜ ምን ዓይነት ታሪኮችን ይጠቀም ነበር? ኢየሱስ የተጠቀመባቸው ታሪኮች ውጤታማ እንደሆኑ የሚያሳየው የትኛው ምሳሌ ነው?

10 ምሳሌዎችን ውጤታማ በሆነ መንገድ መጠቀም። መጽሐፍ ቅዱስ “ኢየሱስም ለሕዝቡ ይህን ሁሉ በምሳሌ ተናገረ . . . ያለ ምሳሌ አልተናገራቸውም” ሲል ይገልጻል። (ማቴዎስ 13:34) በዕለት ተዕለት ሕይወት የሚያጋጥሙ ነገሮችን እየጠቀሰ ጥልቅ የሆኑ እውነቶችን በማስተማር ረገድ የነበረው ወደር የለሽ ችሎታ እጅግ የሚያስደንቅ ነው። ዘር የሚዘሩ ገበሬዎችን፣ ዳቦ የሚጋግሩ ሴቶችን፣ በገበያ ቦታ የሚጫወቱ ልጆችን፣ መረባቸውን የሚጥሉ ዓሣ አጥማጆችንና የጠፋባቸውን በግ የሚፈልጉ  እረኞችን ማየት ለኢየሱስ አድማጮች እንግዳ ነገር አልነበረም። አንድን እውነት በየዕለቱ ከሚያጋጥሙ ሁኔታዎች ጋር አዛምዶ መግለጽ ትምህርቱ በአድማጮች አእምሮና ልብ ውስጥ በቀላሉ እንዲቀረጽ ለማድረግ ይረዳል።—ማቴዎስ 11:16-19፤ 13:3-8, 33, 47-50፤ 18:12-14

11 ብዙውን ጊዜ ኢየሱስ ጥሩ ሥነ ምግባርን ወይም መንፈሳዊ እውነትን ለማስተማር አጫጭር ታሪኮችን ይጠቀም ነበር። ከማይጨበጡ ሐሳቦች ይልቅ አጫጭር ታሪኮችን መረዳትም ሆነ ማስታወስ ቀላል በመሆኑ ኢየሱስ የተጠቀመባቸው ታሪኮች ትምህርቱ በአድማጮቹ አእምሮ ውስጥ እንዲቀረጽ በማድረግ ረገድ ትልቅ አስተዋጽኦ አበርክተዋል። ኢየሱስ በተጠቀመባቸው በብዙዎቹ ታሪኮች ላይ አባቱን ሊረሱ በማይችሉ ሕያው ምሳሌዎች ጥሩ አድርጎ ገልጾታል። ለምሳሌ ያህል አንድ ሰው ስለ አባካኙ ልጅ የሚናገረውን ታሪክ ሲያነብ ይሖዋ የእውነትን መንገድ ትቶ የነበረ ሰው ከልብ ንስሐ ሲገባና ሲመለስ እንደሚያዝንለትና በርኅራኄ እንደሚቀበለው መገንዘቡ እንደማይቀር የታወቀ ነው።—ሉቃስ 15:11-32

12. (ሀ) ኢየሱስ በሚያስተምርበት ጊዜ ጥያቄዎችን ለምን ዓላማ ይጠቀም ነበር? (ለ) ኢየሱስ ሥልጣኑን በተመለከተ ጥያቄ ያነሱትን የሃይማኖት መሪዎች አፍ ያስያዘው እንዴት ነው?

12 ጥያቄዎችን ውጤታማ በሆነ መንገድ መጠቀም። ኢየሱስ አድማጮቹ አንድ መደምደሚያ ላይ እንዲደርሱ፣ ራሳቸውን እንዲመረምሩ ወይም አንድ ውሳኔ ላይ እንዲደርሱ ለማድረግ ጥያቄዎችን ይጠቀም ነበር። (ማቴዎስ 12:24-30፤ 17:24-27፤ 22:41-46) ኢየሱስ የሃይማኖት መሪዎቹ ማን ሥልጣን እንደሰጠው በጠየቁት ጊዜ “የዮሐንስ ጥምቀት ከሰማይ ነበረችን ወይስ ከሰው?” በማለት ጥያቄያቸውን በጥያቄ መለሰላቸው። የሃይማኖት መሪዎቹ በጥያቄው ግራ በመጋባት እርስ በርሳቸው “ከሰማይ ብንል:- እንኪያስ ስለ ምን አላመናችሁበትም? ይለናል፤ ከሰው ግን ብንል፣ ዮሐንስን ሁሉም እንደ ነቢይ ያዩታልና ሕዝቡን እንፈራለን” ተባባሉ። ስለዚህም “አናውቅም” ብለው መለሱለት። (ማርቆስ 11:27-33፤ ማቴዎስ 21:23-27) ኢየሱስ ይህን ቀላል ጥያቄ በመጠቀም አፋቸውን ያስያዛቸው ከመሆኑም በላይ ተንኮላቸው እንዲጋለጥ አድርጓል።

13-15. ስለ ደጉ ሳምራዊ የሚናገረው ታሪክ የኢየሱስን ጥበብ የሚያሳየው እንዴት ነው?

 13 ኢየሱስ በሚጠቅሳቸው ምሳሌዎች መካከል አንዳንድ የሚያመራምሩ ጥያቄዎችን ይጠቀም ነበር። አንድ አይሁዳዊ ሕግ አዋቂ የዘላለም ሕይወት እንዳገኝ ምን ላድርግ ብሎ በጠየቀው ጊዜ አምላክንና ባልንጀራህን ውደድ የሚለውን በሙሴ ሕግ ውስጥ የሚገኘውን ትእዛዝ ጠቀሰለት። ሰውየው ጻድቅ መሆኑን ለማሳየት ስለፈለገ “ባልንጀራዬስ ማን ነው?” ሲል ጠየቀው። በዚህ ጊዜ ኢየሱስ አንድ ታሪክ ነገረው። አንድ አይሁዳዊ ሰው ብቻውን እየተጓዘ ሳለ ዘራፊዎች ደብድበው በሕይወትና በሞት መካከል ጥለውት ሄዱ። በመጀመሪያ አንድ ካህን ከዚያም አንድ ሌዋዊ በዚያ ሲጓዙ እንዳላዩ ሆነው አልፈውት ሄዱ። በኋላም አንድ ሳምራዊ በዚያ በኩል መጣ። ሲያየው በጣም ስላዘነለት ቁስሎቹን በመጠራረግ ካሰረለት በኋላ ወደ እንግዶች ማደሪያ በመውሰድ በዚያ እንዲያርፍና እንዲያገግም አደረገ። ኢየሱስ ታሪኩን ሲደመድም “ከነዚህ ከሦስቱ በወንበዴዎች እጅ ለወደቀው ባልንጀራ የሆነው ማንኛው ይመስልሃል?” ሲል ጠየቀው። ሰውየውም “ምሕረት ያደረገለት” በማለት መለሰለት።—ሉቃስ 10:25-37

14 ይህ ታሪክ የኢየሱስን ጥበብ የሚያሳየው እንዴት ነው? በኢየሱስ ዘመን አይሁዳውያን የእነሱን ወግ የሚከተሉትን ካልሆነ በቀር ሳምራውያንን “ባልንጀራ” ብለው አይጠሩም ነበር። (ዮሐንስ 4:9) ኢየሱስ፣ የተደበደበው ሰው ሳምራዊ፣ የረዳው ደግሞ አይሁዳዊ እንደሆነ አድርጎ ታሪኩን ቢያቀርብ ኖሮ አይሁዳውያን ለሳምራውያን የነበራቸውን መጥፎ አመለካከት እንዲለውጡ ለማድረግ ይረዳ ነበር? ኢየሱስ ሳምራዊው አይሁዳዊውን እንደረዳው አድርጎ ታሪኩን ያቀረበው ሆን ብሎ ነው። ኢየሱስ በታሪኩ መደምደሚያ ላይ ያቀረበውን ጥያቄም ልብ በል። ኢየሱስ ሰውየው ጉዳዩን ከሌላ አንጻር እንዲመለከተው አድርጓል። ሕግ አዋቂው ‘ባልንጀራዬ ማን ነው?’ ብሎ ሲጠይቅ ‘መውደድ ያለብኝ ማንን ነው?’ ብሎ የጠየቀ ያህል ነበር። ይሁን እንጂ ኢየሱስ “ከነዚህ ከሦስቱ . . . ባልንጀራ የሆነው ማንኛው ይመስልሃል?” ሲል ጠየቀው። ኢየሱስ ያተኮረው መልካም በተደረገለት ማለትም በተደበደበው ሰው ላይ ሳይሆን መልካም ባደረገው ማለትም በሳምራዊው ሰው ላይ ነው። እውነተኛ ባልንጀራ የትኛውንም ዘር ሳይለይ በራሱ ተነሳስቶ ለሌሎች ፍቅር ያሳያል። ኢየሱስ ይህን ነጥብ  ለማስገንዘብ ከዚህ የተሻለ ሌላ የማስተማሪያ ዘዴ ሊጠቀም አይችልም።

15 ታዲያ ሰዎች “በትምህርቱ” ቢገረሙና ወደ እሱ ለመቅረብ ቢገፋፉ ያስደንቃል? (ማቴዎስ 7:28, 29) እንዲያውም በአንድ ወቅት “ብዙ ሕዝብ” የሚበሉት እንኳ ሳይኖራቸው ከእሱ ጋር ሦስት ቀን ቆይተዋል!—ማርቆስ 8:1, 2

አኗኗሩ

16. ኢየሱስ በመለኮታዊ ጥበብ እንደሚመራ በተግባር ‘ያሳየው’ እንዴት ነው?

16 በሦስተኛ ደረጃ ደግሞ ኢየሱስ በአኗኗሩ የይሖዋን ጥበብ እንዴት እንዳንጸባረቀ እንመርምር። ጥበብ በተግባር የሚገለጽና የተፈለገውን ውጤት የሚያስገኝ ነው። ደቀ መዝሙሩ ያዕቆብ “ከእናንተ ጥበበኛ . . . ማን ነው?” ሲል ከጠየቀ በኋላ ‘በመልካም አኗኗሩ ሥራውን ያሳይ’ በማለት መልስ ሰጥቷል። (ያዕቆብ 3:13) የኢየሱስ አኗኗር በመለኮታዊ ጥበብ እንደሚመራ ‘የሚያሳይ’ ነበር። በአኗኗሩም ሆነ ከሌሎች ጋር በነበረው ግንኙነት ጥሩ የማመዛዘን ችሎታ እንደነበረው ያሳየው እንዴት እንደሆነ እስቲ እንመልከት።

17. ኢየሱስ አኗኗሩ ፍጹም ሚዛናዊ እንደነበረ የሚጠቁሙት ሁኔታዎች የትኞቹ ናቸው?

17 ጥሩ የማመዛዘን ችሎታ የሌላቸው ሰዎች በአብዛኛው ወደ አንድ ጽንፍ የመሄድ ዝንባሌ እንደሚታይባቸው አስተውለሃል? አዎን፣ ሚዛናዊ መሆን ጥበብ ይጠይቃል። ኢየሱስ በመለኮታዊ ጥበብ ስለሚመራ ፍጹም ሚዛናዊ ነበር። በሕይወቱ ውስጥ ከሁሉ በፊት ቅድሚያ የሚሰጠው ለመንፈሳዊ ነገሮች ነበር። ምሥራቹን በማወጁ ሥራ ተጠምዶ ነበር። “ስለዚህ ወጥቻለሁና” ሲል ተናግሯል። (ማርቆስ 1:38) ለቁሳዊ ነገሮች ቅድሚያ ይሰጥ እንዳልነበር የታወቀ ነው፤ በመሆኑም ቁሳዊ ንብረት አልነበረውም። (ማቴዎስ 8:20) ይሁን እንጂ እንዲህ ሲባል ባሕታዊ ነበር ማለት አይደለም። “ደስተኛ አምላክ” እንደሆነው አባቱ ኢየሱስም ደስተኛ የነበረ ሲሆን ሌሎችም እንዲደሰቱ ያደርግ ነበር። (1 ጢሞቴዎስ 1:11 NW፤ 6:15) በሙዚቃ፣ በዘፈንና በጭፈራ በሚደምቀው የሠርግ ሥነ ሥርዓት ላይ በተገኘ ጊዜ የሠርጉን የደስታ መንፈስ የሚያጠፋ ነገር አላደረገም። እንዲያውም ወይን ጠጁ ባለቀ ጊዜ ውኃውን ወደ ወይን ጠጅ ለውጦታል፤ እንደሚታወቀው ደግሞ “ወይን የሰውን ልብ ደስ ያሰኛል።” (መዝሙር 104:15፤ ዮሐንስ 2:1-11) ኢየሱስ በተለያዩ ጊዜያት በሰዎች  ቤት የተጋበዘ ሲሆን እነዚህንም አጋጣሚዎች ለማስተማር ተጠቅሞባቸዋል።—ሉቃስ 10:38-42፤ 14:1-6

18. ኢየሱስ ለደቀ መዛሙርቱ ሚዛናዊ የሆነ አመለካከት እንደነበረው ያሳየው እንዴት ነው?

18 ኢየሱስ ለሰዎች የነበረው አመለካከትም ፍጹም ሚዛናዊ ነበር። የሰዎችን አፈጣጠር ማወቁ ስለ ደቀ መዛሙርቱ ትክክለኛ ግንዛቤ እንዲኖረው ረድቶታል። ፍጹም እንዳልሆኑ በሚገባ ያውቅ የነበረ ቢሆንም ያሏቸውን መልካም ባሕርያትም ተገንዝቧል። ይሖዋ ወደ ራሱ የሳባቸው እነዚህ ሰዎች ብዙ ለውጥና እድገት ሊያደርጉ እንደሚችሉ አስተውሏል። (ዮሐንስ 6:44) አንዳንድ ድክመቶች ቢኖሩባቸውም እምነት ጥሎባቸዋል። ለደቀ መዛሙርቱ ከባድ ኃላፊነት መስጠቱ እምነት እንደጣለባቸው የሚያሳይ ነው። ምሥራቹን የመስበክ ተልእኮ የሰጣቸው ሲሆን ይህን ተልእኮ እንደሚወጡም እርግጠኛ ነበር። (ማቴዎስ 28:19, 20) የሐዋርያት ሥራ መጽሐፍ ደቀ መዛሙርቱ የተሰጣቸውን ሥራ በታማኝነት እንዳከናወኑ ይመሰክራል። (የሐዋርያት ሥራ 2:41, 42፤ 4:33፤ 5:27-32) በእርግጥም ኢየሱስ በእነሱ ላይ እምነት መጣሉ ትክክል ነበር።

19. ኢየሱስ ‘የዋህ በልቡም ትሑት’ መሆኑን ያሳየው እንዴት ነው?

19 በምዕራፍ 20 ላይ እንደተመለከትነው መጽሐፍ ቅዱስ ትሕትናና ገርነት ከጥበብ ጋር የሚዛመዱ ባሕርያት እንደሆኑ ይገልጻል። በዚህ ረገድ ይሖዋ ከሁሉ የላቀ ምሳሌ ነው። ኢየሱስስ? ከደቀ መዛሙርቱ ጋር በነበረው ግንኙነት ያሳየው ትሕትና የሚያስደንቅ ነው። ፍጹም እንደመሆኑ መጠን ከእነሱ የላቀ ስብዕና ነበረው። ይሁን እንጂ  ደቀ መዛሙርቱን አልናቃቸውም። የበታች እንደሆኑ ወይም ብቃት እንደሌላቸው ሆኖ እንዲሰማቸው አላደረገም። ከዚህ ይልቅ ያለባቸውን የአቅም ገደብ ግምት ውስጥ ያስገባ የነበረ ሲሆን ድክመቶቻቸውንም በትዕግሥት ያልፍ ነበር። (ማርቆስ 14:34-38፤ ዮሐንስ 16:12) ሕፃናት እንኳ ሳይፈሩ ወይም ሳይሸማቀቁ ይቀርቡት የነበረ መሆኑ አስደናቂ አይደለም? በነፃነት ሊቀርቡት የቻሉት ‘የዋህ በልቡም ትሑት’ መሆኑን ስለተገነዘቡ ነው።—ማቴዎስ 11:29፤ ማርቆስ 10:13-16

20. ኢየሱስ ከአሕዛብ ወገን የሆነች አንዲት ሴት ካቀረበችለት ልመና ጋር በተያያዘ ምክንያታዊ መሆኑን ያሳየው እንዴት ነው?

20 ኢየሱስ የይሖዋን የትሕትና ባሕርይ ያንጸባረቀበት ሌላም መንገድ አለ። ግትር ከመሆን ይልቅ ምክንያታዊ በመሆን እንደ አስፈላጊነቱ ሐሳቡን እንደሚለውጥ በተግባር አሳይቷል። ለምሳሌ አንዲት ከአሕዛብ ወገን የሆነች ሴት ጋኔን የያዛትን ልጅዋን እንዲፈውስላት ጠይቃው እንደነበር አስታውስ። ኢየሱስ ልጅዋን ሊፈውስላት እንደማይችል በሦስት የተለያዩ መንገዶች ገልጾላት ነበር። በመጀመሪያ ምንም መልስ ሳይሰጣት ቀረ፤ ቀጥሎ ደግሞ የተላከው ለአይሁድ እንጂ ለአሕዛብ አለመሆኑን በቀጥታ ነገራት፤ በመጨረሻም ይህንኑ ነጥብ የሚያስገነዝብ ምሳሌ ነገራት። ሆኖም ሴትየዋ ውትወታዋን በመቀጠል ከፍተኛ እምነት እንዳላት አሳየች። ኢየሱስ ይህን ለየት ያለ ሁኔታ ግምት ውስጥ በማስገባት ምን ምላሽ ሰጠ? ሐሳቡን በመለወጥ አላደርግም ብሎ የነበረውን ነገር አደረገ። የሴትየዋን ልጅ ፈወሰላት። (ማቴዎስ 15:21-28) ይህ እጅግ የሚያስደንቅ ትሕትና አይደለም? ትሕትና ደግሞ የእውነተኛ ጥበብ ዋና መሠረት ነው።

21. የኢየሱስን ባሕርይ፣ ያስተማረውን ትምህርትና ያደረጋቸውን ነገሮች ለመኮረጅ ጥረት ማድረግ ያለብን ለምንድን ነው?

21 በምድር ላይ ከኖሩት ሰዎች ሁሉ ይበልጥ ጥበበኛ የሆነው ሰው ያስተማረው ትምህርትና ያደረገው ነገር በወንጌሎች ውስጥ ሰፍሮ የሚገኝ በመሆኑ እጅግ አመስጋኞች ነን! ኢየሱስ የአባቱ ፍጹም ነጸብራቅ መሆኑን እናስታውስ። የኢየሱስን ባሕርይ፣ ያስተማረውን ትምህርትና ያደረጋቸውን ነገሮች በመኮረጅ የአምላክን ጥበብ ማዳበር እንችላለን። በሚቀጥለው ምዕራፍ የአምላክን ጥበብ እንዴት በሕይወታችን ልንሠራበት እንደምንችል እንመለከታለን።

^ አን.1 በመጽሐፍ ቅዱስ ዘመን አናጺዎች ቤቶችን ያንጹ፣ የተለያዩ የቤት ቁሳቁሶችንና የእርሻ መገልገያ መሣሪያዎችን ይሠሩ ነበር። በሁለተኛው መቶ ዘመን ከክርስቶስ ልደት በኋላ ይኖር የነበረው ሰማዕቱ ጀስቲን “ኢየሱስ ሞፈርና ቀንበር በመሥራት የሚታወቅ አናጺ ነበር” ሲል ጽፏል።

^ አን.6 “መጨነቅ” ተብሎ የተተረጎመው የግሪክኛ ቃል አንድ ሰው ሐሳቡ መከፋፈሉን ወይም ትኩረቱ መሰረቁን ያመለክታል። በመሆኑም በማቴዎስ 6:25 ላይ የተጠቀሰው ይህ ቃል ሐሳብን የሚከፋፍልንና ደስታን የሚያሳጣን ጭንቀትና ፍርሃት ያመለክታል።

^ አን.7 እንዲያውም ከልክ ያለፈ ጭንቀትና ውጥረት ለልብ በሽታና ለሌሎች በርካታ በሽታዎች በማጋለጥ ዕድሜን ሊያሳጥር እንደሚችል አንዳንድ ሳይንሳዊ ጥናቶች ይጠቁማሉ።