በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 22

‘ላይኛይቱን ጥበብ’ በአኗኗርህ እያንጸባረቅህ ነው?

‘ላይኛይቱን ጥበብ’ በአኗኗርህ እያንጸባረቅህ ነው?

1-3. (ሀ) ሰሎሞን በሁለት ሴቶች መካከል የተነሳውን ጭቅጭቅ በዳኘበት ጊዜ አስደናቂ የሆነ ጥበብ እንዳለው ያሳየው እንዴት ነው? (ለ) ይሖዋ ምን ቃል ገብቷል? ምን ጥያቄዎችስ ይነሳሉ?

ሁለት ሴቶች በአንድ ሕፃን እየተጨቃጨቁ ነው። እነዚህ ሴቶች በአንድ ቤት ውስጥ የሚኖሩ ሲሆን ሁለቱም በጥቂት ቀናት ልዩነት ልጅ ወለዱ። ከተወለዱት ሕፃናት መካከል አንደኛው ሲሞት ሁለቱ ሴቶች በሕይወት ያለው ሕፃን የእኔ ነው፣ የእኔ ነው በሚል ጭቅጭቅ ፈጠሩ። * ሁኔታውን ያየ አንድም የዓይን ምስክር አልነበረም። ጉዳዩ ችሎት ፊት ቀርቦ የታየ ሊሆን ቢችልም እንኳ እልባት ሊያገኝ ባለመቻሉ ንጉሥ ሰሎሞን እንዲዳኘው ተደረገ። ሐቁ እንዲወጣ ማድረግ ይችል ይሆን?

2 ሰሎሞን የሴቶቹን ጭቅጭቅ ለተወሰነ ጊዜ ካዳመጠ በኋላ ሰይፍ እንዲያመጡለት አዘዘ። ከዚያም ሕፃኑ ለሁለት ተሰንጥቆ እንዲካፈሉት ትእዛዝ አስተላለፈ። እውነተኛይቱ የሕፃኑ እናት ይህን ስትሰማ በጣም የምትወደው ልጅዋ ከሚቆረጥ ይልቅ ለሌላኛዋ ሴት እንዲሰጥ ንጉሡን ተማጸነች። ሌላይቱ ሴት ግን ሕፃኑ ለሁለት ተቆርጦ እንካፈል አለች። በዚህ ጊዜ ሰሎሞን እውነቱ ተገለጠለት። አንዲት እናት የአብራኳ ክፋይ ለሆነው ልጅዋ ምን ያህል እንደምትራራ ያውቅ ስለነበር ይህን ዘዴ በመጠቀም ጉዳዩ እልባት እንዲያገኝ አደረገ። ሰሎሞን “ይህችኛይቱ እናቱ ናት” በማለት ልጁ እንዲሰጣት ሲወስን እናቲቱ ምን እንደተሰማት ልትገምት ትችላለህ።—1 ነገሥት 3:16-27

3 ይህ የሚያስደንቅ ጥበብ አይደለም? ሕዝቡ ሰሎሞን ጉዳዩ እንዴት እልባት እንዲያገኝ እንዳደረገ ሲሰሙ “የእግዚአብሔር ጥበብ እንደ  ነበረበት አይተዋልና” ለንጉሡ ታላቅ አክብሮትና ፍርሃት አደረባቸው። አዎን፣ ይህ የሰሎሞን ጥበብ መለኮታዊ ስጦታ ነበር። ይሖዋ “ጥበበኛና አስተዋይ ልቡና” ሰጥቶታል። (1 ነገሥት 3:12, 28) እኛስ የአምላክን ጥበብ ማግኘት እንችላለን? አዎን፣ ሰሎሞን “እግዚአብሔር ጥበብን ይሰጣል” ሲል በአምላክ መንፈስ ተነሳስቶ ጽፏል። (ምሳሌ 2:6) ይሖዋ ጥበብን ማለትም እውቀትና ማስተዋልን በአግባቡ የመጠቀም ችሎታን ከልብ ለሚፈልጉ ሰዎች እንደሚሰጥ ቃል ገብቷል። ላይኛይቱን ጥበብ ማግኘት የምንችለው እንዴት ነው? ይህን ጥበብ በአኗኗራችን ማንጸባረቅ የምንችለውስ እንዴት ነው?

“ጥበብን አግኝ”—እንዴት?

4-7. ጥበብ ለማግኘት ምን አራት ነገሮች ያስፈልጋሉ?

የአምላክን ጥበብ ለማግኘት የላቀ የማሰብ ችሎታ ወይም ከፍተኛ የትምህርት ደረጃ ሊኖረን ይገባል? በፍጹም። ዘራችን፣ ያለንበት የኑሮ ሁኔታ ወይም የትምህርት ደረጃችን ምንም ይሁን ምን ይሖዋ ጥበቡን ሊሰጠን ፈቃደኛ ነው። (1 ቆሮንቶስ 1:26-29) ይሁን እንጂ መጽሐፍ ቅዱስ “ጥበብን አግኝ” በማለት ስለሚመክረን ይህን ጥበብ ለማግኘት ጥረት ማድረግ ይኖርብናል። (ምሳሌ 4:7) እንዴት?

5 በመጀመሪያ ደረጃ አምላክን መፍራት አለብን። ምሳሌ 9:10 “የጥበብ መጀመሪያ [“ጥበብን ለማግኘት የመጀመሪያው እርምጃ፣” ዘ ኒው ኢንግሊሽ ባይብል] እግዚአብሔርን መፍራት ነው” በማለት ይናገራል። እግዚአብሔርን መፍራት የእውነተኛ ጥበብ መሠረት ነው። ለምን? ጥበብ እውቀትን ውጤታማ በሆነ መንገድ የመጠቀም ችሎታን እንደሚያካትት አስታውስ። አምላክን መፍራት ሲባል እንዲሁ በፍርሃት መራድ ማለት ሳይሆን በአክብሮትና በፍርሃት መገዛት እንዲሁም በእሱ መታመን ማለት ነው። እንዲህ ዓይነቱ ፍርሃት ተገቢ ከመሆኑም በላይ ለተግባር የሚያነሳሳ ነው። ስለ አምላክ ፈቃድና ዓላማ ካለን እውቀት ጋር በሚስማማ መንገድ እንድንኖር ይገፋፋናል። ይሖዋ ያወጣቸው መሥፈርቶች መመሪያውን ለሚከተሉ ሁሉ ከፍተኛ ጥቅም የሚያስገኙ በመሆናቸው እሱን መፍራታችን ከሁሉ የተሻለ የጥበብ መንገድ ነው።

6 በሁለተኛ ደረጃ ትሑት መሆን አለብን። ትሕትና ከሌለን የአምላክን  ጥበብ ማግኘት አንችልም። (ምሳሌ 11:2) ለምን? ትሑቶች ከሆንን ሁሉን እንደምናውቅና እኛ ያልነው ሁልጊዜ ትክክል እንደሆነ አድርገን አናስብም፤ በተጨማሪም ትሑቶች ከሆንን የይሖዋን አመለካከት ማወቅ እንደሚያስፈልገን እንገነዘባለን። ይሖዋ “ትዕቢተኞችን ይቃወማል፤” ለትሑታን ግን ጥበብን ይሰጣል።—ያዕቆብ 4:6

የአምላክን ጥበብ ለማግኘት ጥልቅ ምርምር ማድረግ ይኖርብናል

7 በሦስተኛ ደረጃ በጽሑፍ የሰፈረውን የአምላክን ቃል ማጥናት አስፈላጊ ነው። የይሖዋ ጥበብ በቃሉ ውስጥ ተገልጿል። ይህን ጥበብ ለማግኘት ጥልቅ ምርምር ማድረግ ይኖርብናል። (ምሳሌ 2:1-5) በአራተኛ ደረጃ ደግሞ መጸለይ ያስፈልገናል። አምላክ ጥበብ እንዲሰጠን ከልብ ከለመንነው በልግስና ይሰጠናል። (ያዕቆብ 1:5) መንፈሱን እንዲሰጠን የምናቀርበውን ጸሎት ይሰማል። መንፈሱ ደግሞ ችግራችንን ለመወጣት፣ ራሳችንን ከአደጋ ለመጠበቅና ጥበብ የተሞላበት ውሳኔ ለማድረግ የሚያስችለንን በቃሉ ውስጥ የሚገኘውን ውድ ሀብት እንድናገኝ ይረዳናል።—ሉቃስ 11:13

8. አምላካዊ ጥበብ እንዳለን የሚታወቀው በምንድን ነው?

8 በምዕራፍ 17 ላይ እንደተመለከትነው የይሖዋ ጥበብ በተግባር የሚገለጽ ነው። ስለሆነም በእርግጥ የአምላክን ጥበብ ካገኘን በአኗኗራችን ይንጸባረቃል። ደቀ መዝሙሩ ያዕቆብ የመለኮታዊ ጥበብ ፍሬዎችን እንደሚከተለው በማለት ገልጿል:- “ላይኛይቱ ጥበብ ግን በመጀመሪያ ንጽሕት ናት፣ በኋላም ታራቂ፣ ገር [“ምክንያታዊ፣” NW]፣ እሺ ባይ፣ ምሕረትና በጎ ፍሬ የሞላባት፣ ጥርጥርና [“አድልዎና፣” አ.መ.ት] ግብዝነት የሌለባት ናት።” (ያዕቆብ 3:17) እነዚህን የመለኮታዊ ጥበብ ገጽታዎች አንድ በአንድ ስንመረምር ‘ላይኛይቱን ጥበብ በአኗኗሬ እያንጸባረቅሁ ነኝ?’ ብለን ራሳችንን መጠየቅ እንችላለን።

‘ንጽሕት፣ በኋላም ታራቂ’

9. ንጽሕት የሚለው አባባል ምን ያመለክታል? ንጽሕና የጥበብ የመጀመሪያ መለያ ባሕርይ ተደርጎ መጠቀሱስ ተገቢ የሆነው ለምንድን ነው?

9 “በመጀመሪያ ንጽሕት ናት።” ንጽሕት የሚለው አባባል ውጫዊ ንጽሕናን ብቻ ሳይሆን ውስጣዊ ንጽሕናንም ያመለክታል። መጽሐፍ ቅዱስ ጥበብን ከልብ ጋር ያዛምደዋል። ይሁን እንጂ ሰማያዊ ጥበብ በክፉ አሳብ፣ ምኞትና ፍላጎት ወደተበከለ ልብ ሊገባ አይችልም። (ምሳሌ  2:10፤ ማቴዎስ 15:19, 20) ሆኖም አለፍጽምናችን በፈቀደልን መጠን ልባችንን ንጹሕ ለማድረግ የምንጥር ከሆነ ‘ከክፉ እንሸሻለን፣ መልካምንም እናደርጋለን።’ (መዝሙር 37:27፤ ምሳሌ 3:7) ንጽሕና የጥበብ የመጀመሪያ መለያ ባሕርይ ተደርጎ መጠቀሱ ተገቢ አይደለም? ደግሞስ በሥነ ምግባርና በመንፈሳዊ ንጹሕ ካልሆንን የላይኛይቱን ጥበብ ሌሎች ገጽታዎች እንዴት ማንጸባረቅ እንችላለን?

10, 11. (ሀ) ሰላም ለመፍጠር መጣራችን አስፈላጊ የሆነው ለምንድን ነው? (ለ) የእምነት ባልንጀራህን እንዳስቀየምክ ከተሰማህ ሰላም ፈጣሪ መሆንህን ልታሳይ የምትችለው እንዴት ነው?

10 “በኋላም ታራቂ።” ሰማያዊ ጥበብ የአምላክ መንፈስ ፍሬ የሆነውን ሰላምን አጥብቀን እንድንሻ ይገፋፋናል። (ገላትያ 5:22) የይሖዋን ሕዝብ ‘አንድ የሚያደርገውን ሰላም’ ከማደፍረስ እንቆጠባለን። (ኤፌሶን 4:3) ሰላም በሚደፈርስበት ጊዜ ደግሞ ዳግመኛ ሰላም እንዲሰፍን የተቻለንን ሁሉ ጥረት እናደርጋለን። ይህ አስፈላጊ የሆነው ለምንድን ነው? መጽሐፍ ቅዱስ “በሰላም ኑሩ፣ የፍቅርና የሰላምም አምላክ ከእናንተ ጋር ይሆናል” በማለት ይገልጻል። (2 ቆሮንቶስ 13:11) ስለዚህ ከሰው ሁሉ ጋር በሰላም እስከኖርን ድረስ የሰላም አምላክ ከእኛ ጋር ይሆናል። ከእምነት ባልንጀሮቻችን ጋር ባለን ግንኙነት የምናሳየው ባሕርይ ከይሖዋ ጋር ያለንን ዝምድና በቀጥታ ይነካል። ሰላም ፈጣሪዎች መሆናችንን ልናሳይ የምንችለው እንዴት ነው? እስቲ አንድ ምሳሌ እንመልከት።

11 የእምነት ባልንጀራህን እንዳስቀየምክ ከተሰማህ ምን ማድረግ ይኖርብሃል? ኢየሱስ እንዲህ ሲል ተናግሯል:- “እንግዲህ መባህን በመሠዊያው ላይ ብታቀርብ፣ በዚያም ወንድምህ አንዳች በአንተ ላይ እንዳለው ብታስብ፣ በዚያ በመሠዊያው ፊት መባህን ትተህ ሂድ፣ አስቀድመህም ከወንድምህ ጋር ታረቅ፣ በኋላም መጥተህ መባህን አቅርብ።” (ማቴዎስ 5:23, 24) ቀዳሚውን እርምጃ ወስደህ ወንድምህን በማነጋገር ይህን ምክር ልትሠራበት ትችላለህ። ይህን የምታደርግበት ዋነኛ ዓላማ ምንድን ነው? ‘ከወንድምህ ጋር መታረቅ ነው።’ ከወንድምህ ጋር ለመታረቅ ደግሞ ስሜቱን እንደጎዳኸው አምነህ መቀበል ይኖርብሃል። ቀደም ሲል የነበራችሁን ሰላማዊ ግንኙነት ለማደስ እንደምትፈልግ በሚያሳይ  መንገድ ካነጋገርከው በመካከላችሁ የነበረው አለመግባባት ተወግዶ ይቅር ልትባባሉ ትችላላችሁ። ቀዳሚውን እርምጃ በመውሰድ ከወንድምህ ጋር እርቅ ለመፍጠር መጣርህ በአምላክ ጥበብ እንደምትመራ ያሳያል።

“ምክንያታዊ፣ እሺ ባይ”

12, 13. (ሀ) በያዕቆብ 3:17 ላይ “ምክንያታዊ” ተብሎ የተተረጎመው ቃል ፍቺ ምንድን ነው? (ለ) ምክንያታዊ መሆናችንን ማሳየት የምንችለው እንዴት ነው?

12 “ምክንያታዊ።” ምክንያታዊ መሆን ሲባል ምን ማለት ነው? ምሑራን እንደሚሉት ከሆነ በያዕቆብ 3:17 ላይ “ምክንያታዊ” የሚል ፍቺ የተሰጠውን የግሪክኛ ቃል መተርጎም አስቸጋሪ ነው። ተርጓሚዎች ይህን ቃል “ገር፣” “ታጋሽ” እና “አሳቢ” የሚል ፍቺ ሰጥተውታል። የግሪክኛው ቃል ጥሬ ትርጉም “ግትር አለመሆን” የሚል ነው። ይህን የላይኛይቱን ጥበብ ገጽታ በአኗኗራችን ማንጸባረቅ የምንችለው እንዴት ነው?

13 ፊልጵስዩስ 4:5 “ገርነታችሁ [“ምክንያታዊነታችሁ፣” NW] ለሰው ሁሉ ይታወቅ” ይላል። ሌላ የመጽሐፍ ቅዱስ ትርጉም ይህን ጥቅስ “ምክንያታዊ ናቸው የሚል ስም አትርፉ” ሲል ተርጉሞታል።  (ዘ ኒው ቴስታመንት ኢን ሞደርን ኢንግሊሽ፣ በጄ ቢ ፊሊፕስ) ትልቅ ግምት ሊሰጠው የሚገባው ነገር እኛ ለራሳችን ያለን አመለካከት ሳይሆን ሌሎች ለእኛ ያላቸው አመለካከት መሆኑን ልብ በል። ምክንያታዊ የሆነ ሰው አንድ ሕግ ይዞ ድርቅ አይልም ወይም እኔ ያልኩት ካልሆነ ብሎ አይሟገትም። ከዚህ ይልቅ የሌሎችን ሐሳብ ለመስማትና አስፈላጊ ሆኖ በሚገኝበት ጊዜ ያሉትን ለመቀበል ፈቃደኛ ይሆናል። በተጨማሪም ገርና የሚመች ባሕርይ ያለው ነው። ይህ ባሕርይ ለሁሉም ክርስቲያኖች የሚያስፈልግ ቢሆንም በይበልጥ ግን ሽማግሌ ሆነው የሚያገለግሉ ወንድሞች ይህን ባሕርይ ማንጸባረቅ ይጠበቅባቸዋል። ሽማግሌዎች የዋህ ወይም ገር ከሆኑ ሌሎች በቀላሉ ሊቀርቧቸው ይችላሉ። (1 ተሰሎንቄ 2:7, 8) ሁላችንም ‘አሳቢ፣ ምክንያታዊና ገር ነው የሚል ስም እያተረፍኩ ነው?’ ብለን ራሳችንን መጠየቅ አለብን።

14. “እሺ ባይ” መሆናችንን ማሳየት የምንችለው እንዴት ነው?

14 “እሺ ባይ።” “እሺ ባይ” ተብሎ የተተረጎመው ግሪክኛ ቃል በክርስቲያን ግሪክኛ ቅዱሳን ጽሑፎች ውስጥ በሌላ ቦታ ላይ አይገኝም። አንድ ምሑር እንደገለጹት ከሆነ ይህ ቃል “አብዛኛውን ጊዜ የሚጠቀሰው ከወታደራዊ ሥነ ሥርዓት ጋር በተያያዘ ነው።” “በቀላሉ እሺ ብሎ የሚቀበል” እና “ታዛዥ” የሚል ሐሳብ ያስተላልፋል። በላይኛይቱ ጥበብ የሚመራ ሰው ቅዱሳን ጽሑፎች የሚሰጡትን መመሪያ ያለ ምንም ማንገራገር ይታዘዛል። አንዴ አንድ ውሳኔ ላይ ከደረሰ ምንም ዓይነት ሐሳብ ቢቀርብለት የማይቀበል ሰው አይደለም። ከዚህ ይልቅ የተሳሳተ እርምጃ እንደወሰደ ወይም የተሳሳተ ውሳኔ እንደወሰነ የሚያሳይ አሳማኝ ቅዱስ ጽሑፋዊ ማስረጃ ሲቀርብለት ወዲያውኑ አቋሙን ይለውጣል። እንዲህ ዓይነት ስም አትርፈሃል?

“ምሕረትና በጎ ፍሬ የሞላባት”

15. ምሕረት ምንድን ነው? በያዕቆብ 3:17 ላይ “ምሕረት” እና “በጎ ፍሬ” አንድ ላይ መጠቀሳቸው ተገቢ የሆነው ለምንድን ነው?

15 “ምሕረትና በጎ ፍሬ የሞላባት።” * ላይኛይቱ ጥበብ ‘ምሕረት የሞላባት’  እንደሆነች ስለተገለጸ ምሕረት የላይኛይቱ ጥበብ ዋና ገጽታ ነው። “ምሕረት” እና “በጎ ፍሬ” አንድ ላይ እንደተጠቀሱ ልብ በል። በመጽሐፍ ቅዱስ ውስጥ አብዛኛውን ጊዜ ምሕረት የሚለው ቃል ለሌሎች ከልብ ማሰብንና በርኅራኄ መልካም ማድረግን የሚያመለክት በመሆኑ ከበጎ ፍሬ ጋር ተያይዞ መገለጹ የተገባ ነው። አንድ የማመሳከሪያ ጽሑፍ ምሕረት የሚለው ቃል “አንድ ሰው በደረሰበት መጥፎ ሁኔታ ማዘንንና ያን ሰው ለመርዳት መሞከርን” እንደሚያመለክት ገልጿል። ስለሆነም የአምላክ ጥበብ ርኅራኄና አዘኔታ የሌለው ወይም እንዲሁ በጽንሰ ሐሳብ ደረጃ ብቻ የሚገለጽ አይደለም። ከዚህ ይልቅ የአምላክ ጥበብ ያለው ሰው አፍቃሪና ርኅሩኅ ከመሆኑም በላይ የሌሎችን ስሜት ይረዳል። ምሕረት የተሞላን መሆናችንን ማሳየት የምንችለው እንዴት ነው?

16, 17. (ሀ) ለአምላክ ካለን ፍቅር በተጨማሪ የስብከቱን ሥራ እንድናከናውን የሚያነሳሳን ሌላው ምክንያት ምንድን ነው? ለምንስ? (ለ) ምሕረት የሞላብን መሆናችንን ልናሳይ የምንችልባቸው አንዳንድ መንገዶች ምንድን ናቸው?

16 ይህን ማድረግ የምንችልበት አንዱ ዋነኛ መንገድ የአምላክን መንግሥት ምሥራች ለሌሎች በመናገር እንደሆነ ግልጽ ነው። ይህን ሥራ እንድናከናውን የሚያነሳሳን ምንድን ነው? ዋነኛው ምክንያት ለአምላክ ያለን ፍቅር ነው። ሆኖም ለሌሎች የምናሳየው ምሕረትና ርኅራኄም እንዲህ እንድናደርግ ያነሳሳናል። (ማቴዎስ 22:37-39) በዛሬው ጊዜ አብዛኞቹ ሰዎች ‘እረኛ እንደ ሌላቸው በጎች ተጨንቀውና ተጥለው’ ይገኛሉ። (ማቴዎስ 9:36) የሐሰት ሃይማኖት መሪዎች እነዚህን ሰዎች ችላ ያሏቸው ከመሆኑም በላይ በመንፈሳዊ እንዲታወሩ አድርገዋል። በዚህም ምክንያት በመጽሐፍ ቅዱስ ውስጥ የሚገኘውን ጥበብ ያዘለ መመሪያም ሆነ በቅርቡ የአምላክ መንግሥት በዚህ ምድር ላይ የሚያመጣቸውን በረከቶች አያውቁም። እነዚህ ሰዎች በመንፈሳዊ የተራቡ በመሆናቸው ለእነሱ ያለን ርኅራኄ ስለ ይሖዋ ዓላማ እንዲያውቁ ለመርዳት የተቻለንን ሁሉ እንድናደርግ ያነሳሳናል።

ለሌሎች ምሕረት ወይም ርኅራኄ በማሳየት ‘ላይኛይቱን ጥበብ’ ማንጸባረቅ እንችላለን

17 ምሕረት የሞላብን መሆናችንን ማሳየት የምንችልባቸው ሌሎች መንገዶች ምንድን ናቸው? ኢየሱስ ስለ ደጉ ሳምራዊ የተናገረውን  ምሳሌ አስታውስ። ይህ ሳምራዊ ተደብድቦና ተዘርፎ በመንገድ ዳር የወደቀ አንድ ሰው ሲያይ ስላዘነለት ቁስሎቹን በማሰርና ተገቢውን እንክብካቤ በማድረግ ‘ምሕረት አሳይቶታል።’ (ሉቃስ 10:29-37) ይህ ምሳሌ ምሕረት ችግር ላይ ለወደቁ ሰዎች ተግባራዊ የሆነ እርዳታ ማድረግን የሚጨምር እንደሆነ የሚያሳይ አይደለም? መጽሐፍ ቅዱስ “ለሰው ሁሉ ይልቁንም ለሃይማኖት ቤተ ሰዎች መልካም” እንድናደርግ ያበረታታናል። (ገላትያ 6:10) ይህን ልናደርግ የምንችልባቸውን አንዳንድ መንገዶች ተመልከት። አንድ አረጋዊ ወንድም በመኪና ወደ ክርስቲያናዊ ስብሰባዎች የሚያመላልሳቸው ሰው ይፈልጉ ይሆናል። የጉባኤ አባል የሆነች አንዲት መበለት እህት ቤቷ ውስጥ አንዳንድ የጥገና ሥራዎች የሚያከናውንላት ሰው ትፈልግ ይሆናል። (ያዕቆብ 1:27) ተስፋ የቆረጠ አንድ ሰው “መልካም ቃል” በመናገር የሚያጽናናው ይፈልግ ይሆናል። (ምሳሌ 12:25) በእነዚህ መንገዶች ምሕረት ማሳየታችን ላይኛይቱን ጥበብ በአኗኗራችን እያንጸባረቅን እንዳለን ያረጋግጣል።

“አድልዎና ግብዝነት የሌለባት”

18. በላይኛይቱ ጥበብ የምንመራ ከሆነ ምን ነገርን ከልባችን ነቅለን ለማስወገድ እንጥራለን? ለምንስ?

18 ‘አድልዎ የሌለባት።’ የአምላክ ጥበብ ያለው ሰው ለዘር መድልዎና ለብሔራዊ ኩራት ቦታ የለውም። በዚህ ጥበብ የምንመራ ከሆነ ማንኛውንም ዓይነት የአድልዎ ስሜት ከልባችን ውስጥ ነቅለን ለማስወገድ እንጥራለን። (ያዕቆብ 2:9) የሰዎችን የትምህርት ደረጃ፣ የኑሮ ሁኔታ ወይም የጉባኤ ኃላፊነት በማየት አናዳላም። በተጨማሪም የእምነት ባልንጀሮቻችን የኑሮ ደረጃቸው የቱንም ያህል ዝቅተኛ ቢሆን አንንቃቸውም። እነዚህን ሰዎች ይሖዋ እስከወደዳቸው ድረስ እኛም ልንወዳቸው ይገባል።

19, 20. (ሀ) “ግብዝ” ተብሎ የተተረጎመው የግሪክኛ ቃል በጥንት ዘመን ምን ለማመልከት ይሠራበት ነበር? (ለ) ‘ግብዝነት የሌለበት የወንድማማች ፍቅር’ ማሳየት የምንችለው እንዴት ነው? ይህስ አስፈላጊ የሆነው ለምንድን ነው?

19 “ግብዝነት የሌለባት።” “ግብዝ” ተብሎ የተተረጎመው የግሪክኛ ቃል “አንድን ገጸ ባሕርይ ወክሎ የሚጫወትን ተዋናይ” ሊያመለክት  ይችላል። በጥንት ዘመን የግሪክና የሮም ተዋናዮች በሚተውኑበት ወቅት ትላልቅ ጭምብሎችን ያጠልቁ ነበር። በመሆኑም “ግብዝ” ተብሎ የተተረጎመው የግሪክኛ ቃል አስመስሎ መጫወትን ለማመልከት ይሠራበት ነበር። ይህ የአምላክ ጥበብ ገጽታ ለሌሎች የምናደርገውን ነገር ብቻ ሳይሆን ለእነሱ ያለንን አመለካከትም ሊነካው ይገባል።

20 ሐዋርያው ጴጥሮስ ‘ለእውነት መታዘዛችን ወንድሞቻችንን ያለ ግብዝነት እንድንወዳቸው’ ሊያደርገን እንደሚገባ ገልጿል። (1 ጴጥሮስ 1:22) አዎን፣ ለወንድሞቻችን ያለን ፍቅር ከአንገት በላይ መሆን የለበትም። ጭንብል በማጥለቅ ወይም በማስመሰል ሌሎችን ማታለል የለብንም። ፍቅራችን ከልብ የመነጨ መሆን አለበት። እንዲህ ከሆነ የእምነት ባልንጀሮቻችን እውነተኛ ማንነታችንን ስለሚያውቁ ያምኑናል። ክርስቲያኖች ግብዞች አለመሆናቸው በሐቀኝነት ላይ የተመሠረተ ግንኙነት እንዲኖራቸው የሚያስችል ከመሆኑም በላይ በጉባኤው ውስጥ የመተማመን መንፈስ እንዲሰፍን ያደርጋል።

 ‘መልካም ጥበብን ጠብቅ’

21, 22. (ሀ) ሰሎሞን የነበረውን ጥበብ ጠብቆ ማቆየት ሳይችል የቀረው ለምንድን ነው? (ለ) ያለንን ጥበብ ጠብቀን ማቆየት የምንችለው እንዴት ነው? እንዲህ በማድረጋችን የምንጠቀመውስ እንዴት ነው?

21 የአምላክ ጥበብ በጥንቃቄ ልንይዘው የሚገባ የይሖዋ ስጦታ ነው። ሰሎሞን “ልጄ ሆይ፣ . . . መልካም ጥበብንና ጥንቃቄን ጠብቅ” ሲል ተናግሯል። (ምሳሌ 3:21) የሚያሳዝነው ግን ሰሎሞን ራሱ ይህን ምክር አልሰራበትም። ይሖዋን በታዘዘባቸው ዘመናት ሁሉ ጠቢብ ነበር። መጨረሻ ላይ ግን ያገባቸው የባዕድ አገር ሴቶች ልቡ ከይሖዋ ንጹሕ አምልኮ እንዲርቅ አደረጉት። (1 ነገሥት 11:1-8) እውቀት በአግባቡ ካልተጠቀምንበት ምንም ፋይዳ እንደሌለው በሰሎሞን ላይ የደረሰው ሁኔታ በግልጽ ያሳያል።

22 ያለንን ጥበብ ጠብቀን ማቆየት የምንችለው እንዴት ነው? መጽሐፍ ቅዱስንና “ታማኝና ልባም ባሪያ” የሚያዘጋጃቸውን በመጽሐፍ ቅዱስ ላይ የተመሠረቱ ጽሑፎች በማንበብ ብቻ ሳይሆን የተማርነውን ሥራ ላይ ለማዋል ጥረት በማድረግ ጭምር ነው። (ማቴዎስ 24:45) መለኮታዊ ጥበብን ተግባራዊ ለማድረግ መጣራችን ተገቢ ነው። በአሁኑ ጊዜ የተሻለ ሕይወት እንድንኖር የሚረዳን ከመሆኑም በላይ አምላክ በሚያመጣው አዲስ ዓለም ውስጥ ‘እውነተኛ ሕይወት እንድናገኝ’ ያስችለናል። (1 ጢሞቴዎስ 6:18, 19) ከሁሉ በላይ ደግሞ ላይኛይቱን ጥበብ ማዳበራችን የጥበብ ሁሉ ምንጭ ወደሆነው ወደ ይሖዋ አምላክ ይበልጥ እንድንቀርብ ይረዳናል።

^ አን.1 1 ነገሥት 3:16 ሁለቱ ሴቶች ጋለሞቶች እንደሆኑ ይገልጻል። ቅዱሳን ጽሑፎችን ጠለቅ ብሎ ማስተዋል የተባለው መጽሐፍ እንዲህ ሲል ያብራራል:- “እነዚህ ሴቶች በዝሙት አዳሪነት የሚተዳደሩ ላይሆኑ ይችላሉ፤ ይሁን እንጂ ዝሙት የፈጸሙ አይሁዳውያን ምናልባትም የሌላ አገር ዝርያ ያላቸው ሴቶች ሊሆኑ ይችላሉ።”—በይሖዋ ምሥክሮች የተዘጋጀ።

^ አን.15 ሌላ የመጽሐፍ ቅዱስ ትርጉም “ርኅራኄና መልካም ተግባር የሞላባት” ይላል።—ኤ ትራንስሌሽን ኢን ዘ ላንግዊጅ ኦቭ ዘ ፒፕል፣ በቻርልስ ቢ ዊልያምስ