በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 18

‘በአምላክ ቃል’ ላይ የተንጸባረቀ ጥበብ

‘በአምላክ ቃል’ ላይ የተንጸባረቀ ጥበብ

1, 2. ይሖዋ የጻፈልን “ደብዳቤ” ምንድን ነው? ለምንስ?

በቅርቡ በጣም ከምትወደው ሰው ደብዳቤ ደርሶሃል? ከምንወደው ሰው የተላከ ደብዳቤ ማግኘት በሕይወታችን ውስጥ በጣም ከሚያስደስቱን ነገሮች አንዱ ነው። ስለ ጤንነቱ፣ ስላጋጠሙት ሁኔታዎችና ስላቀዳቸው ነገሮች ስንሰማ እንደሰታለን። የምንወደው ሰው ምንም እንኳ በአካል ከእኛ የራቀ ቢሆንም እንዲህ ዓይነቱ የደብዳቤ ልውውጥ እንደሚያቀራርበን የታወቀ ነው።

2 ታዲያ ከምንወደው አምላክ የተላከ መልእክት ከመቀበል ይበልጥ ሊያስደስተን የሚችል ነገር ይኖራል? ይሖዋ “ደብዳቤ” ጽፎልናል ማለት ይቻላል። ይህ ደብዳቤ ቃሉ መጽሐፍ ቅዱስ ነው። በዚህ መጽሐፍ አማካኝነት ስለ ራሱ ማንነት፣ ስላከናወናቸው ነገሮች፣ ስለ ዓላማዎቹና ስለ ሌሎችም ነገሮች ገልጾልናል። ይሖዋ ቃሉን የሰጠን ወደ እሱ እንድንቀርብ ስለሚፈልግ ነው። ፍጹም ጥበበኛ የሆነው አምላክ ከሁሉ የተሻለውን መንገድ በመጠቀም ሐሳቡን ገልጾልናል። መጽሐፍ ቅዱስ የተጻፈበት መንገድም ሆነ የያዘው መልእክት የአምላክን ወደር የለሽ ጥበብ የሚያሳይ ነው።

ቃሉን በጽሑፍ ማስፈር ለምን አስፈለገ?

3. ይሖዋ ሕጉን ለሙሴ ያስተላለፈው በምን መንገድ ነው?

3 አንዳንዶች ‘ይሖዋ ለሰዎች ሐሳቡን ለመግለጽ ከዚህ ይበልጥ አስደናቂ የሆነ ሌላ መንገድ መጠቀም፣ ለምሳሌ ያህል በቀጥታ ከሰማይ ሆኖ መናገር አይችልም ነበር?’ የሚል ጥያቄ ሊያነሱ ይችላሉ። እርግጥ ነው በመላእክት አማካኝነት ከሰማይ ሆኖ የተናገረባቸው ጊዜያት አሉ። ለምሳሌ ያህል ለእስራኤላውያን ሕጉን የሰጠው በዚህ መንገድ ነበር። (ገላትያ 3:19) ከሰማይ የተሰማው ድምፅ በጣም ያስፈራ ስለነበር እስራኤላውያን ይሖዋ በቀጥታ ከሚያነጋግራቸው ይልቅ በሙሴ አማካኝነት ቢያነጋግራቸው እንደሚመርጡ ገልጸዋል። (ዘጸአት 20:18-20) በመሆኑም ይሖዋ 600 ደንቦችን የያዘውን ሕግ ለሙሴ በቃል ነግሮታል።

4. የአምላክ ሕግ ከአንድ ትውልድ ወደ ሌላ ትውልድ በቃል ቢተላለፍ ኖሮ ምን ችግር ሊፈጠር እንደሚችል አስረዳ።

 4 ይሁንና ሕጉ በጽሑፍ ባይሰፍር ኖሮ ምን ሁኔታ ይፈጠር ነበር? ሙሴ እያንዳንዱን ዝርዝር ደንብ በማስታወስ ምንም ሳያጓድል ለሕዝቡ ማስተላለፍ ይችል ነበር? ሕጉ ሲተላለፍ የኖረው በቃል ቢሆን ኖሮ ቀጣዩ ትውልድ እምነት ሊጥልበት ይችል ነበር? ይህ የአምላክን ሕግ ከአንድ ትውልድ ወደ ሌላ ትውልድ ለማስተላለፍ የሚያስችል አስተማማኝ መንገድ አይደለም። በረድፍ የተቀመጡ በርካታ ሰዎች አንድን ታሪክ አንዳቸው ለሌላው እየተናገሩ ታሪኩን እንዲያስተላልፉ ብታደርግ በመጨረሻ ላይ ምን ሁኔታ ሊፈጠር እንደሚችል ገምት። በረድፉ መጨረሻ ላይ ያለው ሰው ምን እንደሰማ ብትጠይቀው የታሪኩ ይዘት በእጅጉ ተለውጦ ታገኘዋለህ። የአምላክ ሕግ ግን በዚህ መንገድ እንዲተላለፍ ስላልተደረገ እንዲህ ዓይነት ችግር አላጋጠመውም።

5, 6. ይሖዋ ሙሴን ምን እንዲያደርግ አዝዞታል? የይሖዋ ቃል በጽሑፍ በመስፈሩ በእጅጉ ተጠቅመናል የምንለው ለምንድን ነው?

5 ይሖዋ ቃሉ በጽሑፍ እንዲሰፍር ማድረጉ ጥበብ ነበር። ሙሴን “በእነዚህ ቃሎች መጠን ከአንተና ከእስራኤል ጋር ቃል ኪዳን አድርጌአለሁና እነዚህን ቃሎች ጻፍ” ሲል አዝዞታል። (ዘጸአት 34:27) በመሆኑም የአምላክን ቃል በጽሑፍ ማስፈር የተጀመረው በ1513 ከክርስቶስ ልደት በፊት ነው። በቀጣዮቹ 1,610 ዓመታት ወደ 40 ለሚጠጉ ሰዎች “በተለያየ ጊዜና በልዩ ልዩ መንገድ” ቃሉን በመናገር በጽሑፍ እንዲያሰፍሩ አድርጓል። (ዕብራውያን 1:1 አ.መ.ት) በእነዚህ ጊዜያት ታማኝና ትጉህ የሆኑ ጸሐፊዎች ቅዱሳን ጽሑፎች እንዳሉ ተጠብቀው እንዲቆዩ ለማድረግ በጥንቃቄ ይገለብጡ ነበር።—ዕዝራ 7:6፤ መዝሙር 45:1

ይሖዋ በጽሑፍ በሰፈረው ቃሉ አማካኝነት ሐሳቡን ለእኛ በመግለጡ በእጅጉ ተጠቅመናል። አንብበህ የማትጠግበው በጣም የሚያጽናና ደብዳቤ ደርሶህ ያውቃል? የይሖዋ “ደብዳቤም” እንዲሁ ነው። ይሖዋ ቃሉን በጽሑፍ ስላሰፈረልን አዘውትረን ማንበብና በያዘው መልእክት ላይ ማሰላሰል እንችላለን። (መዝሙር 1:2) ቅዱሳን ጽሑፎች ማጽናኛ በሚያስፈልገን ጊዜ ሁሉ ‘ሊያጽናኑን’ ይችላሉ።—ሮሜ 15:4

 በሰዎች ማስጻፍ ለምን አስፈለገ?

7. ይሖዋ ቃሉን ለማስጻፍ ሰዎችን መሣሪያ አድርጎ በመጠቀም ጥበቡን ያሳየው እንዴት ነው?

7 ይሖዋ ቃሉን ለማስጻፍ ሰዎችን መሣሪያ አድርጎ በመጠቀም ጥበቡን አሳይቷል። ይሖዋ መጽሐፍ ቅዱስን ለማስጻፍ መላእክትን ቢጠቀም ኖሮ አሁን ያለው ዓይነት ጣዕም ይኖረው ነበር? እርግጥ ነው መላእክት ይሖዋን እነሱ ካላቸው የላቀ ግንዛቤ አንጻር ሊገልጹት፣ ለእሱ ያላቸውን ታማኝነትና ፍቅር በሚጽፉት መልእክት ሊያንጸባርቁ እንዲሁም ታማኝ ስለሆኑ የአምላክ አገልጋዮች ጥሩ የሆነ ዘገባ ሊያቀርቡ ይችሉ ነበር። ሆኖም ከእኛ የበለጠ እውቀት፣ ተሞክሮና ኃይል ያላቸው ፍጹም መንፈሳዊ ፍጥረታት ያሰፈሩትን ሐሳብ መረዳት እንችል ነበር?—ዕብራውያን 2:6, 7

‘ቅዱሳን ጽሑፎች ሁሉ በአምላክ መንፈስ አመራር የተጻፉ ናቸው’

8. ይሖዋ የመጽሐፍ ቅዱስ ጸሐፊዎች የራሳቸውን ችሎታ እንዲጠቀሙ ነፃነት የሰጣቸው በምን መንገድ ነው? (የግርጌ ማስታወሻውንም ተመልከት።)

8 ይሖዋ ሰዎችን መሣሪያ አድርጎ በመጠቀም ቃሉን ለእኛ ተስማሚ በሆነ መንገድ አጽፎልናል፤ ይህ ዘገባ ‘በአምላክ መንፈስ’ እርዳታ የተጻፈ ቢሆንም ሰብዓዊ ስሜት የተንጸባረቀበት ነው። (2 ጢሞቴዎስ 3:16) ይህ ሊሆን የቻለው እንዴት ነው? ይሖዋ የመጽሐፍ ቅዱስ ጸሐፊዎች የራሳቸውን ችሎታ በመጠቀም “ያማረውን በቅንም የተጻፈውን እውነተኛውን ቃል” መርጠው እንዲጽፉ ነፃነት ሰጥቷቸዋል። (መክብብ 12:10, 11) መጽሐፍ ቅዱስ የተለያየ የአጻጻፍ ስልት ሊኖረው የቻለው በዚህ ምክንያት ነው። እያንዳንዱ የመጽሐፍ ቅዱስ ክፍል የእያንዳንዱን ጸሐፊ አስተዳደግና ሙያ እንዲሁም ባሕርይ ያንጸባርቃል። * ሆኖም እነዚህ ሰዎች የጻፉት ‘በእግዚአብሔር ተልከውና በመንፈስ ቅዱስ ተነድተው’ ነው። (2 ጴጥሮስ 1:21) በመሆኑም መጽሐፍ ቅዱስ ሙሉ በሙሉ “የእግዚአብሔር ቃል” ነው።—1 ተሰሎንቄ 2:13

9, 10. መጽሐፍ ቅዱስ በሰዎች መጻፉ የሰዎችን ስሜት የሚስብና የሚማርክ እንዲሆን ያስቻለው ለምንድን ነው?

9 መጽሐፍ ቅዱስ በሰዎች መጻፉ የሰዎችን ስሜት የሚስብና የሚማርክ  እንዲሆን አድርጎታል። ጸሐፊዎቹ የእኛው ዓይነት ስሜት ያላቸው ነበሩ። ፍጽምና የሌላቸው እንደመሆናቸው መጠን እንደኛው የተለያዩ ፈተናዎችንና ተጽዕኖዎችን መቋቋም አስፈልጓቸዋል። እንዲያውም የአምላክ መንፈስ በአንዳንድ ቦታዎች ላይ ስለ ራሳቸው ስሜትና ከገጠሟቸው ችግሮች ጋር ስላደረጉት ትግል እንዲጽፉ አድርጓቸዋል። (2 ቆሮንቶስ 12:7-10) በመሆኑም መላእክት ቢሆኑ ኖሮ ሊገልጹት የማይችሉትን ሰብዓዊ ስሜት ከራሳቸው የሕይወት ተሞክሮ በመነሳት ጽፈዋል።

10 የእስራኤል ንጉሥ የነበረውን ዳዊትን እንደ ምሳሌ እንውሰድ። ዳዊት ከባድ ኃጢአቶችን ከፈጸመ በኋላ የተሰማውን ጥልቅ ሐዘን የሚገልጽ አንድ መዝሙር በማቀናበር አምላክ ይቅር እንዲለው ተማጽኗል። እንዲህ ሲል ጽፏል:- “ከኃጢአቴም አንጻኝ፤ እኔ መተላለፌን አውቃለሁና፣ ኃጢአቴም ሁልጊዜ በፊቴ ነውና። እነሆ፣ በዓመፃ ተፀነስሁ፣ እናቴም በኃጢአት ወለደችኝ። ከፊትህ አትጣለኝ፣ ቅዱስ መንፈስህንም ከእኔ ላይ አትውሰድብኝ። የእግዚአብሔር መሥዋዕት የተሰበረ መንፈስ ነው፣ የተሰበርውንና የተዋረደውን ልብ እግዚአብሔር አይንቅም።” (መዝሙር 51:2, 3, 5, 11, 17) ይህን ስታነብ ጸሐፊው ምን ያህል ልቡ በሐዘን እንደተደቆሰ አልተሰማህም? ፍጽምና ከጎደለው ሰው ሌላ እንዲህ ያለውን ጥልቅ ስሜት ማን ሊገልጸው ይችላል?

ስለ ሰዎች የሚናገረው ለምንድን ነው?

11. መጽሐፍ ቅዱስ “ለትምህርታችን” የሚሆኑ ምን እውነተኛ የሕይወት ታሪኮችን ይዟል?

11 መጽሐፍ ቅዱስ ለሰዎች ማራኪ እንዲሆን አስተዋጽኦ ያደረገ ሌላም ነገር አለ። በአብዛኛው የሚናገረው አምላክን ስላገለገሉ እንዲሁም በእሱ ላይ ስላመፁ ሰዎች ነው። ስላጋጠሟቸው ነገሮች፣ ስለደረሱባቸው መከራዎችና ስላገኙት ደስታ የሚገልጹ ዘገባዎችን እናነባለን። በሕይወታቸው ውስጥ ያደረጉት ምርጫ ምን ውጤት እንዳስከተለባቸው የሚገልጹ ዘገባዎችንም እናገኛለን። እንዲህ ያሉት ታሪኮች በመጽሐፍ ቅዱስ ውስጥ የሰፈሩት “ለትምህርታችን” ነው። (ሮሜ 15:4) ይሖዋ እነዚህን እውነተኛ የሕይወት ታሪኮች እንደ ምሳሌ በመጠቀም ልብ በሚነካ መንገድ ያስተምረናል። አንዳንድ ምሳሌዎችን ተመልከት።

12. ከሃዲ ስለሆኑ ሰዎች የሚገልጹ የመጽሐፍ ቅዱስ ዘገባዎች ምን ጥቅም አላቸው?

 12 መጽሐፍ ቅዱስ ከሃዲ አልፎ ተርፎም ክፉ ስለሆኑ ሰዎችና ስለደረሰባቸው ነገር ይገልጻል። እነዚህ ሰዎች ስለፈጸሟቸው ድርጊቶች የሚገልጹት ዘገባዎች መጥፎ ባሕርያትን በቀላሉ ለይተን እንድናውቅ ይረዱናል። ለምሳሌ ያህል አንድ ሰው ከክህደት ድርጊት እንዲታቀብ ለማድረግ ኢየሱስን አሳልፎ የሰጠውን ይሁዳን እንደ ምሳሌ አድርጎ ከመጥቀስ ይበልጥ የጠነከረ ትእዛዝ መስጠት ይቻላል? (ማቴዎስ 26:14-16, 46-50፤ 27:3-10) እንዲህ ያሉ ዘገባዎች መጥፎ ባሕርያትን ለይተን እንድናውቅና እንድንጠላ በማድረግ ረገድ ይበልጥ ኃይል አላቸው።

13. መጽሐፍ ቅዱስ ጥሩ ባሕርያትን ለይተን እንድናውቅ የሚረዳን እንዴት ነው?

13 መጽሐፍ ቅዱስ ታማኝ ስለሆኑ በርካታ የአምላክ አገልጋዮችም ይገልጻል። እነዚህ ሰዎች ምን ያህል ለአምላክ ያደሩ እንደነበሩ የሚገልጹ ዘገባዎችን እናገኛለን። እኛም ወደ አምላክ ለመቅረብ ምን ዓይነት ባሕርያትን ማዳበር እንዳለብን ከእነዚህ ሰዎች ሕያው ምሳሌ ልንማር እንችላለን። እነዚህ ሰዎች የነበራቸውን እምነት እንደ ምሳሌ ልንወስድ እንችላለን። መጽሐፍ ቅዱስ እምነት ምን ማለት እንደሆነና አምላክን ለማስደሰት ይህን ባሕርይ ማሳየታችን ምን ያህል አስፈላጊ እንደሆነ ይገልጽልናል። (ዕብራውያን 11:1, 6) ይሁን እንጂ መጽሐፍ ቅዱስ እምነትን በተግባር ያሳዩ ሰዎችን ሕያው ምሳሌም ይዟል። አብርሃም ልጁን ይስሐቅን መሥዋዕት አድርጎ ሊያቀርብ በነበረበት ወቅት ያሳየውን እምነት አስብ። (ዘፍጥረት ምዕራፍ 22፤ ዕብራውያን 11:17-19) እንዲህ ያሉት ዘገባዎች “እምነት” ሲባል ምን ማለት እንደሆነ ሰፋ ባለ መንገድ እንድንገነዘብ ያስችሉናል። ይሖዋ ጥሩ ባሕርያትን እንድናዳብር ከማሳሰብ በተጨማሪ እንዲህ ያሉ ሕያው ምሳሌዎችን በቃሉ ውስጥ ማካተቱ ምንኛ ጥበብ ነው!

14, 15. መጽሐፍ ቅዱስ ወደ ቤተ መቅደሱ ስለመጣች አንዲት ሴት ምን ይገልጻል? ይህስ ታሪክ ስለ ይሖዋ ምን ያስተምረናል?

14 በመጽሐፍ ቅዱስ ውስጥ የሚገኙት እውነተኛ የሕይወት ታሪኮች ይሖዋ ምን ዓይነት ባሕርያት ያሉት አምላክ እንደሆነ እንድንገነዘብ ይረዱናል። ኢየሱስ በአንድ ወቅት በቤተ መቅደሱ ውስጥ ስላያት ሴት የሚገልጸውን ታሪክ ተመልከት። ኢየሱስ መዋጮ በሚደረግበት ሣጥን አቅራቢያ ተቀምጦ መዋጮ የሚያደርጉትን ሰዎች ይመለከት ነበር። ብዙ ባለጠጎች “ከትርፋቸው” መዋጮ ያደርጉ ነበር። ሆኖም ኢየሱስ አንዲት ድሀ መበለት  ያደረገችው መዋጮ ትኩረቱን ሳበው። ይህች ሴት “አንድ ሳንቲም የሚያህሉ ሁለት ናስ” መዋጮ አደረገች። * ያለቻት ገንዘብ ይህችው ነበረች። የይሖዋ ዓይነት አስተሳሰብና ስሜት የነበረው ኢየሱስ “በመዝገብ ውስጥ ከሚጥሉት ሁሉ ይልቅ ይህች ድሀ መበለት አብልጣ ጣለች” ሲል ተናግሯል። ከኢየሱስ አነጋገር መረዳት እንደሚቻለው ሌሎች ሁሉ ያደረጉት መዋጮ አንድ ላይ ቢደመር እንኳ ይህች ሴት ካደረገችው መዋጮ ጋር አይተካከልም።—ማርቆስ 12:41-44፤ ሉቃስ 21:1-4፤ ዮሐንስ 8:28

15 በዚያን ዕለት ወደ ቤተ መቅደሱ ከመጡት ሰዎች ሁሉ ይህች መበለት ተለይታ በመጽሐፍ ቅዱስ ውስጥ መጠቀሷ የሚያስገርም አይደለም? ይህ ምሳሌ ይሖዋ የምናደርገውን ነገር የሚያደንቅ አምላክ መሆኑን እንድንገነዘብ ያደርገናል። የምናቀርበው ስጦታ ከሌሎች ጋር ሲነጻጸር አነስተኛ ሊሆን ቢችልም እንኳ በሙሉ ነፍሳችን እስካደረግነው ድረስ ይሖዋ በደስታ ይቀበለዋል። ይሖዋ ይህን አስደሳች ሐቅ ለማስገንዘብ ሊጠቀምበት የሚችል ከዚህ የተሻለ መንገድ የለም!

መጽሐፍ ቅዱስ የማይገልጻቸው ነገሮች

16, 17. ይሖዋ አንዳንድ ነገሮችን በቃሉ ውስጥ አለማካተቱ ጥበቡን የሚያሳየው እንዴት ነው?

16 ለምትወደው ሰው ደብዳቤ በምትጽፍበት ጊዜ ልትገልጽለት የምትችለው ብዙ ነገር ቢኖርም ሁሉንም በዝርዝር መጻፍ እንደማትችል የታወቀ ነው። ስለዚህ ይበልጥ አስፈላጊ የሆኑትን ነገሮች መርጠህ መጻፍ ይኖርብሃል። በተመሳሳይም ይሖዋ በቃሉ ውስጥ የተወሰኑ ግለሰቦችንና ክንውኖችን ብቻ መርጦ አስፍሮልናል። እነዚህ ዘገባዎችም ቢሆኑ ሁልጊዜ እያንዳንዱን ዝርዝር ጉዳይ ይገልጻሉ ማለት አይደለም። (ዮሐንስ 21:25) ለምሳሌ ያህል መጽሐፍ ቅዱስ አምላክ ስለሚወስደው የፍርድ እርምጃ የሚሰጠው መግለጫ በአእምሯችን ውስጥ ለሚነሳው ለእያንዳንዱ ጥያቄ መልስ ይሰጠናል ብለን መጠበቅ አንችልም። ይሖዋ አንዳንድ ነገሮችን በቃሉ ውስጥ አለማካተቱ ራሱ ጥበቡን የሚያሳይ ነው። እንዴት?

 17 መጽሐፍ ቅዱስ የተጻፈበት መንገድ በልባችን ውስጥ ያለውን ለመመርመር የሚያስችል ነው። ዕብራውያን 4:12 “የእግዚአብሔር ቃል ሕያው ነውና፣ የሚሠራም፣ ሁለትም አፍ ካለው ሰይፍ ሁሉ ይልቅ የተሳለ ነው፣ ነፍስንና መንፈስንም . . . እስኪለይ ድረስ ይወጋል፣ የልብንም ስሜትና አሳብ ይመረምራል” በማለት ይገልጻል። የመጽሐፍ ቅዱስ መልእክት ወደ ልባችን ዘልቆ በመግባት ትክክለኛው አስተሳሰባችንና ዝንባሌያችን ምን እንደሆነ እንዲታወቅ ያደርጋል። አፍራሽ አስተሳሰብ ይዘው ቃሉን የሚያነቡ ሰዎች ዝርዝር መረጃዎችን ያልያዙ የመጽሐፍ ቅዱስ ዘገባዎችን ሲያነቡ መጠራጠርና መተቸት ሊጀምሩ ይችላሉ። እንደነዚህ ዓይነት ሰዎች ይሖዋ አፍቃሪ፣ ጥበበኛና ፍትሐዊ አምላክ መሆኑን እስከመጠራጠር ይደርሳሉ።

18, 19. (ሀ) አንድ የመጽሐፍ ቅዱስ ዘገባ ወዲያው መልስ ልናገኝላቸው ያልቻልናቸው ጥያቄዎች በአእምሯችን ውስጥ እንዲፈጠሩ ቢያደርግ መረበሽ የማይኖርብን ለምንድን ነው? (ለ) የአምላክን ቃል ለመረዳት አስፈላጊ የሆነው ነገር ምንድን ነው? ይህስ የይሖዋን ታላቅ ጥበብ የሚያሳየው እንዴት ነው?

18 በአንጻሩ ግን ቃሉን በቅን ልቦና ተነሳስተን የምናነብ ከሆነ ስለ ይሖዋ የሚኖረን ግንዛቤ በአጠቃላዩ የመጽሐፍ ቅዱስ መልእክት ላይ የተመሠረተ ይሆናል። በመሆኑም አንድ የመጽሐፍ ቅዱስ ዘገባ ወዲያው መልስ ልናገኝላቸው ያልቻልናቸውን ጥያቄዎች ቢያስነሳብን አንረበሽም። መጽሐፍ ቅዱስን ባነበብን መጠን ስለ ይሖዋ ያለን እውቀት ደረጃ በደረጃ እያደገና እየሰፋ እንደሚሄድ እንገነዘባለን። ያጠናነው የመጽሐፍ ቅዱስ እውነት ይሖዋ አፍቃሪና ፍትሐዊ አምላክ እንደሆነ በአጥጋቢ ሁኔታ እንድንገነዘብ ያደረገን በመሆኑ አንድን የመጽሐፍ ቅዱስ ዘገባ መረዳት ቢያዳግተን ወይም ከአምላክ ባሕርይ ጋር እንዴት እንደሚጣጣም ባይገባን ብዙም አንጨነቅም።

19 እንግዲያው የአምላክን ቃል ለመረዳት አዎንታዊ አመለካከት ይዘን በቅን ልቦና ልናነበውና ልናጠናው ይገባል። ይህ የይሖዋን ታላቅ ጥበብ የሚያሳይ አይደለም? አንዳንድ ምሑራን የሚጽፏቸውን መጻሕፍት አንብበው የሚረዱት ‘ጥበበኞችና የተማሩ’ ሰዎች ብቻ ሊሆኑ ይችላሉ። ይሁን እንጂ ትክክለኛ የልብ ዝንባሌ ያላቸው ሰዎች ብቻ ሊረዱት የሚችሉትን መጽሐፍ መጻፍ የሚችለው ጥበበኛ የሆነው አምላክ ነው!—ማቴዎስ 11:25

 “ጥበብ” የያዘ መጽሐፍ

20. የተሻለውን የሕይወት ጎዳና ሊነግረን የሚችለው ይሖዋ ብቻ ነው የምንለው ለምንድን ነው? መጽሐፍ ቅዱስ እኛን ሊረዳ የሚችል ምን ነገር ይዟል?

20 ይሖዋ የተሻለው የሕይወት ጎዳና የቱ እንደሆነ በቃሉ አማካኝነት ገልጾልናል። ፈጣሪያችን እንደመሆኑ መጠን ምን እንደሚያስፈልገን ከእኛ በላይ ያውቃል። የመወደድ፣ ደስታ የማግኘትና ዘላቂ ወዳጅነት የመመሥረት ፍላጎትን ጨምሮ የሰው ልጅ መሠረታዊ ፍላጎቶች አሁንም አልተለወጡም። መጽሐፍ ቅዱስ ሕይወታችን ዓላማ ያለው እንዲሆን የሚረዳ “ጥበብ” የሞላበት መጽሐፍ ነው። (ምሳሌ 2:6) በዚህ መጽሐፍ ውስጥ የሚገኙት አራት ክፍሎች እያንዳንዳቸው ጥበብ ያዘለውን የመጽሐፍ ቅዱስ ምክር እንዴት ሥራ ላይ ልናውል እንደምንችል የሚገልጽ ምዕራፍ የያዙ ቢሆንም ለአብነት ያህል አንድ ምሳሌ እንመልከት።

21-23. ቁጣንና ቂምን በውስጣችን አምቀን እንዳንይዝ የሚረዳን የትኛው ጥበብ ያዘለ ምክር ነው?

21 ቂም የሚይዙ ሰዎች ብዙውን ጊዜ ራሳቸውን እንደሚጎዱ አስተውለሃል? ቂም ከባድ ሸክም ነው። ቂም ከያዝን እሱን ብቻ የምናብሰለስል ከመሆኑም በላይ ሰላም ይነሳናል እንዲሁም ደስታ ያሳጣናል። ቁጣን አምቆ መያዝ በልብ በሽታም ሆነ በሌሎች ከባድ በሽታዎች የመጠቃት ዕድልን ከፍ ሊያደርግ እንደሚችል አንዳንድ ሳይንሳዊ ጥናቶች ያመለክታሉ። እነዚህ ሳይንሳዊ ጥናቶች ከመካሄዳቸው ከረጅም ጊዜ በፊት መጽሐፍ ቅዱስ “ከንዴት ተቈጠብ፤ ቍጣንም ተወው” የሚል ጥበብ ያዘለ ምክር ሰጥቷል። (መዝሙር 37:8 አ.መ.ት) ይሁን እንጂ ይህን ማድረግ የምንችለው እንዴት ነው?

22 የአምላክ ቃል የሚከተለውን ጥበብ ያዘለ ምክር ይሰጣል:- “ሰውን ጠቢብ አእምሮው [“የማስተዋል ችሎታው፣” NW] ከቍጣ ያዘገየዋል፣ ለበደለኛውም ይቅር ይል ዘንድ ክብር ይሆንለታል።” (ምሳሌ 19:11) ማስተዋል አንድን ነገር እንዲሁ ላይ ላዩን ብቻ ሳይሆን ጠለቅ ብሎ የማየትና የመመርመር ችሎታ ነው። አንድ ሰው አንድን ነገር የተናገረበትን ወይም ያደረገበትን ምክንያት እንድንረዳ ያስችለናል። ፍላጎቱን፣ ስሜቱንና ያለበትን ሁኔታ በትክክል ለመረዳት መጣራችን ስለ እሱ አፍራሽ አመለካከት እንዳንይዝ ሊረዳን ይችላል።

23 በተጨማሪም መጽሐፍ ቅዱስ “እርስ በርሳችሁ ትዕግሥትን አድርጉ  . . . ይቅር ተባባሉ” የሚል ምክር ይሰጣል። (ቆላስይስ 3:13) “እርስ በርሳችሁ ትዕግሥትን አድርጉ” የሚለው አባባል ሊያበሳጨን የሚችለውን ባሕርይ ጭምር በመቻል ሌሎችን መታገሥ እንዳለብን የሚጠቁም ነው። እንዲህ ያለው ትዕግሥት በትንሽ በትልቁ ቂም እንዳንይዝ ሊረዳን ይችላል። “ይቅር ተባባሉ” የሚለው አነጋገር ደግሞ ቅር የተሰኘንበትን ነገር እርግፍ አድርጎ መተውን ያመለክታል። ጥበበኛ የሆነው አምላካችን ይቅር ለማለት የሚያስችል ምክንያት እስካለ ድረስ ሌሎችን ይቅር ማለት እንደሚኖርብን ያውቃል። ይህን የምናደርገው ለእነሱ ጥቅም ብለን ብቻ ሳይሆን ለእኛም የአእምሮ ሰላም ስለሚሰጠን ነው። (ሉቃስ 17:3, 4) የአምላክ ቃል በእርግጥም ጥበብ ያዘለ ነው!

24. መለኮታዊውን ጥበብ የሕይወታችን መመሪያ የምናደርገው ከሆነ ምን ጥቅም እናገኛለን?

24 ይሖዋ ያለው ከፍተኛ ፍቅር ሐሳቡን ለሰው ልጆች እንዲገልጽ ገፋፍቶታል። ይህንንም ለማድረግ ከሁሉ የተሻለውን መንገድ የተጠቀመ ሲሆን ሰዎች በመንፈስ ቅዱስ እየተመሩ መልእክቱን እንዲጽፉ አድርጓል። በመሆኑም የይሖዋ ጥበብ በጽሑፍ በሰፈረው ቃሉ ላይ ይገኛል። ይህ ጥበብ “እጅግ የታመነ ነው።” (መዝሙር 93:5) ይህን ጥበብ የሕይወታችን መመሪያ አድርገን የምንጠቀምበትና ለሌሎች የምናስተምር ከሆነ ፍጹም ጥበበኛ ወደሆነው አምላካችን ይበልጥ እንቀርባለን። በሚቀጥለው ምዕራፍ ላይ ይሖዋ ስለወደፊቱ ጊዜ በመተንበይና ዓላማውን በመፈጸም ረገድ ያለውን የላቀ ጥበብ እንመለከታለን።

^ አን.8 ለምሳሌ ያህል እረኛ የነበረው ዳዊት በእረኝነት ባሳለፈው ሕይወት የተመለከታቸውን ነገሮች እንደ ምሳሌ አድርጎ ተጠቅሟል። (መዝሙር 23) ቀረጥ ሰብሳቢ የነበረው ማቴዎስ ገንዘብንና የተለያዩ አሐዞችን በተደጋጋሚ ጊዜ ጠቅሷል። (ማቴዎስ 17:27፤ 26:15፤ 27:3) ሐኪም የነበረው ሉቃስ ደግሞ የሕክምና እውቀት እንዳለው የሚያሳዩ አገላለጾችን ተጠቅሟል።—ሉቃስ 4:38፤ 14:2፤ 16:20

^ አን.14 በመጀመሪያው መቶ ዘመን እነዚህ ሁለት የናስ ሳንቲሞች የአንድ ሰው የቀን ደሞዝ 1/64 ነበሩ። እነዚህ ሁለት ሳንቲሞች በዘመኑ የነበሩት ድሆች ይመገቧት የነበረችውን በጣም ርካሽ የሆነች ወፍ ማለትም አንዲት ድንቢጥ እንኳ መግዛት አይችሉም ነበር።