በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 31

“ወደ እግዚአብሔር ቅረቡ ወደ እናንተም ይቀርባል”

“ወደ እግዚአብሔር ቅረቡ ወደ እናንተም ይቀርባል”

1-3. (ሀ) አንድ ሕፃን ወላጆቹ ለሚያሳዩት ፍቅር የሚሰጠው ምላሽ ስለ ሰው ልጅ ተፈጥሮ ምን ያስተምረናል? (ለ) ሰዎች ላሳዩን ፍቅር የምንሰጠው ምላሽ እያደገ የሚሄደው እንዴት ነው? ራሳችንን ልንጠይቀው የሚገባ በጣም አስፈላጊ የሆነ ጥያቄ ምንድን ነው?

ወላጆች ሕፃን ልጃቸው ፈገግ ሲል ሲያዩ ደስ ይላቸዋል። ብዙውን ጊዜ ፊታቸውን ወደ ሕፃኑ አስጠግተው ፈገግ በማለትና የተለያዩ ድምፆች በማሰማት ያጫውቱታል። ከዚያም የሕፃኑን ምላሽ ለማየት ይጓጓሉ። ወዲያውኑ ሕፃኑ አፉን ከፈት አድርጎ ፈገግ ሲል ጉንጮቹ ሰርጎድ ይላሉ። ሕፃኑ የሚያሳየው ደስ የሚል ፈገግታ ወላጆቹ ላሳዩት ፍቅር ምላሽ መሆኑ ነው።

2 የሕፃኑ ፈገግታ ስለ ሰው ልጅ ተፈጥሮ አንድ ትልቅ ቁም ነገር ያስተምረናል። ፍቅር ሲያሳዩን መልሰን ፍቅር እናሳያለን። ይህ ተፈጥሯችን ነው። (መዝሙር 22:9) እያደግን ስንሄድ ሌሎች ለሚያሳዩን ፍቅር ምላሽ የምንሰጥበት መንገድም የዚያኑ ያህል እየጨመረና እየተሻሻለ ይሄዳል። በልጅነትህ ወላጆችህ፣ ዘመዶችህ ወይም ጓደኞችህ ያሳዩህ ፍቅር አሁንም ድረስ ትዝ ይልህ ይሆናል። በልብህ ውስጥ የተተከለው ይህ ፍቅር እያደገና እያበበ ሄዶ ከጊዜ በኋላ በተግባር መገለጽ ይጀምራል። ላሳዩህ ፍቅር አንተም አጸፋውን ትመልሳለህ። ከይሖዋ አምላክ ጋር ባለህ ዝምድናስ ተመሳሳይ ሁኔታ እየተንጸባረቀ ነው?

3 መጽሐፍ ቅዱስ “እርሱ አስቀድሞ ወዶናልና እኛ እንወደዋለን” ይላል። (1 ዮሐንስ 4:19) በዚህ መጽሐፍ ሦስት ክፍሎች ላይ የተሰጠው ማብራሪያ ይሖዋ አምላክ ኃይሉን፣ ፍትሑንና ጥበቡን ለአንተ በሚበጅ ሁኔታ እንዴት ፍቅራዊ በሆነ መንገድ እንደተጠቀመበት መለስ ብለህ እንድታስብ አድርጎሃል። በአራተኛው ክፍል ላይ ደግሞ ይሖዋ ለሰው ልጆች በጠቅላላም ሆነ ለአንተ በግልህ ፍቅሩን እንዴት በሚያስደንቅ ሁኔታ እንደገለጸ ተመልክተሃል። አሁን አንድ ጥያቄ ይነሳል። ጥያቄው ‘ይሖዋ ላሳየኝ ፍቅር ምን ምላሽ መስጠት ይኖርብኛል?’ የሚል ሲሆን ይህም ራስህን ልትጠይቀው የሚገባ በጣም አስፈላጊ የሆነ ጥያቄ ነው።

 አምላክን መውደድ ሲባል ምን ማለት ነው?

4. ሰዎች አምላክን መውደድ ማለት ምን ማለት ነው የሚለውን ጉዳይ በተመለከተ ግራ የተጋቡት እንዴት ነው?

4 የፍቅር ምንጭ የሆነው ይሖዋ ፍቅር፣ ሰዎች መልካም ምላሽ እንዲሰጡ በማድረግ ረገድ ከፍተኛ ኃይል እንዳለው አሳምሮ ያውቃል። በመሆኑም ታማኝ ያልሆኑ ሰዎች በዓመጽ ድርጊታቸው ቢገፉበትም እሱ ላሳያቸው ፍቅር ምላሽ የሚሰጡ ሰዎች እንደማይጠፉ ሙሉ እምነት ነበረው። በእርግጥም በሚሊዮን የሚቆጠሩ ሰዎች ምላሽ ሰጥተዋል። የሚያሳዝነው ግን በዚህ ብልሹ ዓለም ውስጥ ያሉት ሃይማኖቶች አምላክን መውደድ ማለት ምን ማለት ነው የሚለውን ጉዳይ በተመለከተ ሰዎች ግራ እንዲጋቡ አድርገዋል። ብዙ ሰዎች አምላክን እንደሚወዱ ቢናገሩም ይህ ለአምላክ ያላቸው ፍቅር በቃል ብቻ የሚገለጽ እንደሆነ አድርገው የሚያስቡ ይመስላሉ። አንድ ሕፃን ወላጆቹ ላሳዩት ፍቅር ያለውን ምላሽ ፈገግ በማለት ብቻ መግለጽ እንደሚጀምር ሁሉ ለአምላክ ያለን ፍቅርም መጀመሪያ ላይ በቃል ሊገለጽ ይችላል። ይሁን እንጂ ሕፃኑ እያደገ ሲሄድ ፍቅሩን በሌሎች መንገዶችም መግለጽ እንደሚጀምር የታወቀ ነው።

5. መጽሐፍ ቅዱስ በሚገልጸው መሠረት አምላክን መውደድ ሲባል ምን ማለት ነው? ይህስ ሊያስደስተን የሚገባው ለምንድን ነው?

5 ይሖዋ እሱን መውደድ ማለት ምን ማለት እንደሆነ ገልጾልናል። መጽሐፍ ቅዱስ “ትእዛዛቱን ልንጠብቅ የእግዚአብሔር ፍቅር ይህ ነው” ይላል። ስለዚህ ለአምላክ ያለን ፍቅር በተግባር የሚገለጽ መሆን አለበት። እርግጥ ነው፣ ብዙ ሰዎች መታዘዝ የሚለው ነገር አያስደስታቸውም። ይሁን እንጂ ይኸው ጥቅስ “ትእዛዛቱም ከባዶች አይደሉም” ሲል አክሎ ይናገራል። (1 ዮሐንስ 5:3) የይሖዋ ሕግጋትና መሠረታዊ ሥርዓቶች እኛን የሚጠቅሙ እንጂ የሚጨቁኑ አይደሉም። (ኢሳይያስ 48:17, 18) የአምላክ ቃል ወደ ይሖዋ እንድንቀርብ የሚረዱ በርካታ መሠረታዊ ሥርዓቶችን ይዟል። እነዚህ መሠረታዊ ሥርዓቶች ወደ ይሖዋ እንድንቀርብ የሚረዱን እንዴት ነው? ከአምላክ ጋር ያለንን ዝምድና ለማጠናከር የሚረዱ ሦስት መንገዶችን እንመርምር። እነዚህ ሦስት መንገዶች ይሖዋን ማነጋገር፣ እሱን ማምለክና ምሳሌውን ለመኮረጅ መጣር ናቸው።

ከይሖዋ ጋር መነጋገር

6-8. (ሀ) ይሖዋን ልንሰማ የምንችለው በምን መንገድ ነው? (ለ) ቅዱሳን ጽሑፎችን በምናነብበት ጊዜ ሕያው ሊሆኑልን የሚችሉት እንዴት ነው?

6 የዚህ መጽሐፍ የመጀመሪያ ምዕራፍ ገና ሲጀምር “ከአምላክ ጋር  ስለመነጋገር አስበህ ታውቃለህ?” የሚል ጥያቄ ያነሳል። ይህ የማይመስል ነገር እንዳልሆነ ተመልክተናል። ሙሴ ከአምላክ ጋር እንደተነጋገረ እናስታውሳለን። እኛስ? ዛሬ ይሖዋ ከሰዎች ጋር ለመነጋገር መላእክቱን መላክ አያስፈልገውም። ከዚህ ይልቅ የሰው ልጆች ከእሱ ጋር መነጋገር የሚችሉበት ሌላ ግሩም መንገድ አለ። ታዲያ ይሖዋ ሲናገር መስማት የምንችለው እንዴት ነው?

7 “ቅዱሳት መጻሕፍት ሁሉ የእግዚአብሔር መንፈስ ያለባቸው” በመሆኑ የአምላክ ቃል የሆነውን መጽሐፍ ቅዱስን በማንበብ ይሖዋን ማዳመጥ እንችላለን። (2 ጢሞቴዎስ 3:16 አ.መ.ት) በዚህም ምክንያት መዝሙራዊው የይሖዋ አገልጋዮች ቃሉን “በቀንና በሌሊት” እንዲያነቡ አጥብቆ ይመክራል። (መዝሙር 1:1, 2) ይህ ትጋት የተሞላበት ጥረት ማድረግ ይጠይቃል። ይሁንና እንዲህ ማድረጋችን መልሶ ይክሰናል። ምዕራፍ 18 ላይ እንደተመለከትነው መጽሐፍ ቅዱስ በሰማይ ከሚገኘው ውድ አባታችን እንደተላከ ደብዳቤ ነው። ስለዚህ መጽሐፍ ቅዱስን ማንበብ አሰልቺ ሥራ ሊሆንብን አይገባም። ቅዱሳን ጽሑፎችን በምናነብበት ጊዜ ሕያው ሊሆኑልን ይገባል። እንዲህ ማድረግ የምንችለው እንዴት ነው?

8 የመጽሐፍ ቅዱስ ታሪኮችን በምታነብበት ጊዜ ሁኔታውን በዓይነ ሕሊናህ ለማየት ሞክር። በመጽሐፍ ቅዱስ ውስጥ የተጠቀሱት ገጸ ባሕርያት በእውን እንዳሉ ሆነው ሊታዩህ ይገባል። አስተዳደጋቸውን፣ የነበሩበትን ሁኔታ እንዲሁም ፍላጎታቸውንና ስሜታቸውን ለማወቅ ጥረት አድርግ። ‘ይህ ታሪክ ስለ ይሖዋ ምን ያስተምረኛል? እዚህ ላይ ጎልቶ የተንጸባረቀው የትኛው የይሖዋ ባሕርይ ነው? ይሖዋ ከዚህ ታሪክ እንድማር የፈለገው መሠረታዊ ሥርዓት ምንድን ነው? ይህንንስ እንዴት ልሠራበት እችላለሁ?’ እንደሚሉት ያሉ ጥያቄዎችን ራስህን በመጠየቅ ስለምታነበው ነገር በተመስጦ አስብ። መጽሐፍ ቅዱስን ካነበብክ፣ ካሰላሰልክበትና በሥራ ላይ ለማዋል ከጣርክ ቃሉ ሕያው ይሆንልሃል።—መዝሙር 77:12 አ.መ.ት፤ ያዕቆብ 1:23-25

9. “ታማኝና ልባም ባሪያ” ማን ነው? ይህን “ባሪያ” በጥሞና ማዳመጣችንስ አስፈላጊ የሆነው ለምንድን ነው?

9 በተጨማሪም ይሖዋ ‘በታማኝና ልባም ባሪያ’ በኩል ያነጋግረናል። ኢየሱስ በተነበየው መሠረት በእነዚህ አስቸጋሪ የመጨረሻ ቀኖች፣ የተቀቡ ወንድሞችን ያቀፈ አንድ ትንሽ ቡድን መንፈሳዊ ‘ምግብ በጊዜው’ እንዲያቀርብ  ተሹሟል። (ማቴዎስ 24:45-47) ይህ ባሪያ የመጽሐፍ ቅዱስን ትክክለኛ እውቀት እንድናገኝ በሚረዱ ጽሑፎች እንዲሁም በጉባኤና በትልልቅ ስብሰባዎች አማካኝነት በመንፈሳዊ ይመግበናል። ይህ ቡድን የክርስቶስ ባሪያ እንደመሆኑ መጠን ኢየሱስ ‘እንዴት እንድትሰሙ ተጠበቁ’ ሲል የሰጠውን ምክር ተግባራዊ ለማድረግ እንጥራለን። (ሉቃስ 8:18) ይህ ታማኝ ባሪያ ይሖዋ እኛን ለማነጋገር የሚጠቀምበት መሣሪያ እንደሆነ ስለምናውቅ ባሪያው የሚሰጠንን ምክር በጥሞና እናዳምጣለን።

10-12. (ሀ) ጸሎት የይሖዋ ድንቅ ስጦታ ነው የምንለው ለምንድን ነው? (ለ) ይሖዋን ደስ የሚያሰኝ ጸሎት ማቅረብ የምንችለው እንዴት ነው? ጸሎታችንን በአድናቆት እንደሚቀበለው እርግጠኞች መሆን የምንችለውስ ለምንድን ነው?

10 እኛስ ይሖዋን ማነጋገር እንችላለን? ይህን ማሰቡ በራሱ ሊያስፈራ ይችላል። የአገርህን መሪ ስለ ግል ጉዳይህ ለማናገር ብትፈልግ ከዚህ ባለ ሥልጣን ጋር ተገናኝተህ ለመነጋገር ያለህ አጋጣሚ ምን ያህል ነው? እንዲያውም መሪውን አግኝተህ ለማነጋገር መሞከርህ በራሱ ሕይወትህን ለአደጋ ሊያጋልጠው ይችላል! አስቴርና መርዶክዮስ ይኖሩ በነበረበት ዘመን አንድ ሰው ሳይጠራ የፋርስን ንጉሠ ነገሥት ለማነጋገር ቢሞክር ሕይወቱን ሊያጣ ይችል ነበር። (አስቴር 4:10, 11) የጽንፈ ዓለሙን ሉዓላዊ ጌታ ለማናገር መሞከር ደግሞ ምን ማለት ሊሆን እንደሚችል አስበው! በጣም ኃያላን የሚባሉት ሰዎችም እንኳ በእሱ ፊት “እንደ አንበጣ ናቸው።” (ኢሳይያስ 40:22) ታዲያ ይህ እንድንሸማቀቅና ወደ እሱ ከመቅረብ ወደኋላ እንድንል ሊያደርገን ይገባል? በፍጹም!

11 ይሖዋ ከእሱ ጋር በቀላሉ መገናኘት የምንችልበት አንድ መንገድ አዘጋጅቷል። ይህም ጸሎት ነው። አንድ ትንሽ ልጅ እንኳ በኢየሱስ ስም በእምነት ወደ ይሖዋ መጸለይ ይችላል። (ዮሐንስ 14:6፤ ዕብራውያን 11:6) ጸሎት ምሥጢር አድርገን በውስጣችን የያዝነውን ብሎም በቃላት ለማስረዳት የሚቸግረንን ሐሳብና ስሜት ሳይቀር ለመግለጽ ያስችለናል። (ሮሜ 8:26) በምንጸልይበት ጊዜ የይሖዋን ትኩረት ለመሳብ የተራቀቁና የተዋቡ ቃላት መጠቀም ወይም ረጅምና የተንዛዛ ጸሎት ማቅረብ አያስፈልገንም። (ማቴዎስ 6:7, 8) በሌላ በኩል ደግሞ ይሖዋ የጸሎታችን ርዝማኔ ምን ያህል መሆን እንዳለበትም ይሁን ምን ያህል ጊዜ ወደ እሱ መጸለይ እንደምንችል የሚገልጽ ገደብ አላስቀመጠም። እንዲያውም መጽሐፍ ቅዱስ “ሳታቋርጡ ጸልዩ” በማለት ያበረታታናል።—1 ተሰሎንቄ 5:17

 12 ‘ጸሎት ሰሚ’ ተብሎ የተጠራው ይሖዋ ብቻ መሆኑን አስታውስ፤ ጸሎታችንን የሚሰማው ደግሞ ከልብ በመነጨ ርኅራኄ ነው። (መዝሙር 65:2) ይሖዋ ታማኝ አገልጋዮቹ በሚያቀርቡት ጸሎት ይሰላች ይሆን? በፍጹም፤ እንዲያውም አገልጋዮቹ የሚያቀርቡት ጸሎት በጣም ያስደስተዋል። መጽሐፍ ቅዱስ እንዲህ ያለውን ጸሎት ጥሩ መዓዛ ካለውና ወደ ላይ ከሚወጣ የዕጣን ጢስ ጋር ያመሳስለዋል። (መዝሙር 141:2፤ ራእይ 5:8፤ 8:4) ከልብ በመነጨ ስሜት የምናቀርባቸው ጸሎቶችም ወደ ላይ የሚወጡና ሉዓላዊውን ጌታ ደስ የሚያሰኙ መሆናቸውን ማወቅ የሚያጽናና አይደለም? እንግዲያው ወደ ይሖዋ መቅረብ የምትፈልግ ከሆነ በትሕትና መንፈስ ራስህን ዝቅ በማድረግ በየዕለቱ ደጋግመህ ጸልይ። በልብህ ውስጥ ያለውን ሁሉ ግልጥልጥ አድርገህ ንገረው። (መዝሙር 62:8) ያሳሰበህንም ሆነ ያስደሰተህን ነገር አካፍለው። በተጨማሪም ሰማያዊ አባትህን በጸሎት አመስግነው እንዲሁም አወድሰው። እንዲህ ካደረግህ በመካከላችሁ ያለው ወዳጅነት በጣም እየጠነከረ ይሄዳል።

ይሖዋን ማምለክ

13, 14. ይሖዋን ማምለክ ሲባል ምን ማለት ነው? እሱን ማምለካችን ተገቢ የሆነውስ ለምንድን ነው?

13 ይሖዋ አምላክን እናነጋግረዋለን ሲባል ከአንድ ወዳጃችን ወይም ዘመዳችን ጋር እንደምናደርገው እንዲሁ ሐሳባችንን እንገልጽለታለን እንዲሁም እናዳምጠዋለን ማለት ብቻ አይደለም። የሚገባውን አክብሮትና ፍርሃት በማሳየት እናመልከዋለን ማለትም ነው። እውነተኛ አምልኮ የሕይወታችን ክፍል ነው። ለይሖዋ ያለንን ፍቅር የምንገልጽበትና ሙሉ በሙሉ ለእሱ ያደርን መሆናችንን የምናሳይበት መንገድ ነው። ይህ አምልኮ በሰማይም ሆነ በምድር ያሉትን ታማኝ የይሖዋ ፍጥረታት በሙሉ ያስተሳስራል። ሐዋርያው ዮሐንስ አንድ መልአክ “ሰማይንና ምድርንም ባሕርንም የውኃንም ምንጮች ለሠራው ስገዱለት” ብሎ ሲያውጅ በራእይ ተመልክቷል።—ራእይ 14:7

14 ይሖዋን ማምለክ ያለብን ለምንድን ነው? በዚህ መጽሐፍ ውስጥ የተመለከትናቸውን እንደ ቅድስና፣ ኃይል፣ ራስን መግዛት፣ ፍትሕ፣ ድፍረት፣ ምሕረት፣ ጥበብ፣ ትሕትና፣ ፍቅር፣ ርኅራኄ፣ ታማኝነትና ቸርነት ያሉትን ባሕርያት መለስ ብለህ ለማሰብ ሞክር። የየትኛውም መልካም  ባሕርይ ከሁሉ የላቀ መሥፈርት ወይም መለኪያ ይሖዋ እንደሆነ ተመልክተናል። ባሕርያቱን አጠቃልለን ለመመልከት ስንሞክር ይሖዋን ለማድነቅ የምንገፋፋ ከመሆኑም በላይ ይህ ነው የማይባል ክብር የተጎናጸፈና ከእኛ ጋር ፈጽሞ ሊወዳደር የማይችል ታላቅ አምላክ እንደሆነ እንገነዘባለን። (ኢሳይያስ 55:9) ይሖዋ ሉዓላዊ ገዥያችን የመሆን መብት እንዳለው ምንም አያጠያይቅም። በእርግጥም ልናመልከው የሚገባ አምላክ ነው። ይሁን እንጂ ይሖዋን ልናመልከው የሚገባን እንዴት ነው?

15. ይሖዋን “በመንፈስና በእውነት” ማምለክ የምንችለው እንዴት ነው? ክርስቲያናዊ ስብሰባዎችስ ምን አጋጣሚ ይሰጡናል?

15 ኢየሱስ “እግዚአብሔር መንፈስ ነው፣ የሚሰግዱለትም በመንፈስና በእውነት ሊሰግዱለት ያስፈልጋቸዋል” ሲል ተናግሯል። (ዮሐንስ 4:24) አምላክን “በመንፈስ” ለማምለክ የእሱን መንፈስ ማግኘት እንዲሁም በመንፈሱ መመራት ያስፈልገናል። በተጨማሪም አምልኳችን ከእውነት ማለትም በአምላክ ቃል ውስጥ ከሚገኘው ትክክለኛ እውቀት ጋር የሚስማማ መሆን አለበት።  ከእምነት ባልንጀሮቻችን ጋር የምናደርገው ስብሰባ ይሖዋን “በመንፈስና በእውነት” ለማምለክ የሚያስችል ግሩም አጋጣሚ ነው። (ዕብራውያን 10:24, 25) የንጹሕ አምልኮ ክፍል በሆኑት ስብሰባዎች ላይ ተገኝተን ይሖዋን በመዝሙር በማወደስ፣ በአንድነት በመጸለይ፣ ቃሉን በመስማትና ሐሳብ በመስጠት ለእርሱ ያለንን ፍቅር እንገልጻለን።

ክርስቲያናዊ ስብሰባዎች ይሖዋን ለማምለክ የሚያስችሉ አስደሳች ዝግጅቶች ናቸው

16. በእውነተኛ ክርስቲያኖች ላይ ምን ትልቅ ኃላፊነት ተጥሏል? ይህን ኃላፊነት ለመወጣት የሚያነሳሳንስ ምንድን ነው?

16 ስለ አምላክ ሌሎችን በማስተማር ለይሖዋ የምናቀርበው ውዳሴም የአምልኳችን ክፍል ነው። (ዕብራውያን 13:15) እንዲያውም ስለ ይሖዋ መንግሥት የሚገልጸውን ምሥራች መስበክ በእውነተኛ ክርስቲያኖች ላይ የተጣለ ትልቅ ኃላፊነት ነው። (ማቴዎስ 24:14) ይሖዋን ስለምንወድ በእኛ ላይ የተጣለውን ይህን ኃላፊነት በትጋት እንወጣለን። “የዚህ ዓለም አምላክ” የሆነው ሰይጣን ዲያብሎስ በይሖዋ ላይ የሐሰት ወሬ በመንዛት ‘የማያምኑትን ሰዎች አሳብ እንዳሳወረ’ ስንመለከት ምሥክሮቹ ሆነን ከአምላካችን ጎን ለመቆምና እንዲህ ያለውን ውሸት ለማጋለጥ አንገፋፋም? (2 ቆሮንቶስ 4:4፤ ኢሳይያስ 43:10-12) በተጨማሪም በይሖዋ ድንቅ ባሕርያት ላይ ስናሰላስል ስለ እሱ ለሌሎች ለመንገር የሚገፋፋ ውስጣዊ ስሜት አያድርብንም? በእርግጥም ሰዎች ሰማያዊ አባታችንን እንዲያውቁትና እንዲወዱት ከመርዳት የላቀ መብት ሊኖር አይችልም።

17. ለይሖዋ የምናቀርበው አምልኮ ምን ነገሮችን ይጨምራል? በታማኝነት ልናመልከው የሚገባንስ ለምንድን ነው?

17 ለይሖዋ የምናቀርበው አምልኮ ሌሎች ነገሮችንም ይጨምራል። እያንዳንዱን የሕይወታችንን ዘርፍ የሚነካ ጉዳይ ነው ሊባል ይችላል። (ቆላስይስ 3:23) ይሖዋን ሉዓላዊ ጌታችን አድርገን የምንመለከተው ከሆነ በሁሉም የኑሮ ዘርፍ ማለትም በቤተሰብ ሕይወታችን፣ በሰብዓዊ ሥራችን፣ ከሌሎች ጋር ባለን ግንኙነትም ሆነ በምንዝናናበት ጊዜ ፈቃዱን ለማድረግ እንጥራለን። ይሖዋን “በፍጹም ልብ” በታማኝነት ለማገልገል የተቻለንን ሁሉ እናደርጋለን። (1 ዜና መዋዕል 28:9) የተከፋፈለ ልብ ይዘን ወይም ሁለት ዓይነት ኑሮ እየኖርን ይሖዋን ልናመልክ አንችልም። በድብቅ ኃጢአት እየሠራን ይሖዋን ለማገልገል ብንሞክር ተቀባይነት የለውም። ለይሖዋ ታማኞች ከሆንና ከልብ የምንወደው ከሆነ እንዲህ ያለውን የግብዝነት ድርጊት ለመፈጸም ጨርሶ አናስብም። ይሖዋን የምንፈራ  መሆናችንም ከእንዲህ ዓይነቱ ድርጊት እንድንርቅ ይረዳናል። መጽሐፍ ቅዱስ እንዲህ ያለውን ከአክብሮት የመነጨ ፍርሃት ከይሖዋ ጋር ካለን ወዳጅነት ጋር በቀጥታ ያዛምደዋል።—መዝሙር 25:14 አ.መ.ት

ይሖዋን መምሰል

18, 19. ፍጽምና የጎደላቸው የሰው ልጆች ይሖዋ አምላክን መምሰል ይችላሉ ብሎ ማሰብ ምክንያታዊ የሆነው ለምንድን ነው?

18 በዚህ መጽሐፍ ውስጥ የሚገኘው የእያንዳንዱ ክፍል የመጨረሻ ምዕራፍ ‘እንደ ተወደዱ ልጆች እግዚአብሔርን መምሰል’ የምንችለው እንዴት እንደሆነ ያብራራል። (ኤፌሶን 5:1 አ.መ.ት) ፍጹማን ባንሆንም እንኳ ይሖዋ ኃይሉን፣ ፍትሑን፣ ጥበቡንና ፍቅሩን ያሳየበትን መንገድ ልንኮርጅ እንደምንችል መዘንጋት የለብንም። ሁሉን ቻይ የሆነውን አምላክ መምሰል እንደምንችል እንዴት እናውቃለን? የስሙ ትርጉም እንደሚያመለክተው ይሖዋ ዓላማውን ዳር ለማድረስ መሆን የሚፈልገውን ሁሉ መሆን እንደሚችል አስታውስ። ይህ ችሎታው እጅግ የሚያስደንቅ ቢሆንም እኛ ፈጽሞ እሱን ልንመስለው አንችልም ማለት ነው? በፍጹም።

19 የተፈጠርነው በአምላክ አምሳል ነው። (ዘፍጥረት 1:26) ይህ የሰው ልጆችን በምድር ላይ ካሉት ፍጥረታት ሁሉ የተለዩ ያደርጋቸዋል። በደመ ነፍስ፣ በዘር ውርስ ወይም በአካባቢያችን ያሉት ሁኔታዎች በሚያሳድሩብን ተጽዕኖ የምንመራ አይደለንም። ይሖዋ ውድ ስጦታ ማለትም የመምረጥ ነፃነት ሰጥቶናል። የአቅም ገደብና አንዳንድ ድክመቶች ያሉብን ብንሆንም የምንፈልገውን የመሆን ምርጫ አለን። ያለውን ኃይል በትክክል የሚጠቀም፣ አፍቃሪ፣ ጥበበኛና ፍትሐዊ ሰው መሆን ትፈልጋለህ? በይሖዋ መንፈስ በመታገዝ እንዲህ ዓይነት ሰው መሆን ትችላለህ። እንዲህ ዓይነት ሰው መሆንህ የሚያስገኘውን መልካም ውጤት አስብ።

20. ይሖዋን ለመምሰል የምናደርገው ጥረት ምን ውጤት ያስገኛል?

20 የሰማያዊ አባትህን ልብ ደስ ታሰኛለህ። (ምሳሌ 27:11) እንዲያውም ይሖዋ ያለብህን የአቅም ገደብ ስለሚረዳ የቻልከውን ያህል ከጣርክ ‘በነገር ሁሉ ደስ ልታሰኘው’ ትችላለህ። (ቆላስይስ 1:12) በተጨማሪም ተወዳጅ የሆነውን አባትህን በመኮረጅ ጥሩ ባሕርያትን ለማዳበር ስትጥር ልዩ መብትና በረከት ታገኛለህ። ከአምላክ በራቀውና በጨለማ በተዋጠው በዚህ ዓለም ውስጥ ብርሃን ማብራት ትችላለህ። (ማቴዎስ 5:1, 2, 14) ዕጹብ  ድንቅ የሆኑትን የይሖዋ ባሕርያት በመላው ምድር ላይ በማንጸባረቅ ረገድ የበኩልህን ድርሻ ታበረክታለህ። እንዴት ያለ መብት ነው!

“ወደ እግዚአብሔር ቅረቡ ወደ እናንተም ይቀርባል”

ወደ ይሖዋ ይበልጥ እንድትቀርብ እንመኛለን

21, 22. ይሖዋን የሚወዱ ሁሉ ከፊታቸው ምን ይጠብቃቸዋል?

21 በያዕቆብ 4:8 ላይ የሚገኘው ይህ ምክር አንድ ግብ ላይ ደርሰን እንድናቆም የሚያበረታታ አይደለም። ቀጣይ የሆነ ሂደት ነው። ታማኝ ሆነን እስከቀጠልን ድረስ ይህ ሂደት ማብቂያ አይኖረውም። ወደ ይሖዋ ይበልጥ ለመቅረብ የምናደርገውን ጥረት መቼም ቢሆን አናቆምም። ደግሞም ስለ እሱ የምንቀስመው ትምህርት ማለቂያ የለውም። ይህ መጽሐፍ ስለ ይሖዋ ልናውቀው የሚገባንን ነገር ሁሉ አሳውቆናል ብለን ማሰብ አይኖርብንም። እንዲያውም መጽሐፍ ቅዱስ ስለ አምላክ ከሚያስተምረው ትምህርት ውስጥ ለመዳሰስ የሞከርነው ጥቂቱን ብቻ ነው ለማለት ይቻላል! መጽሐፍ ቅዱስም ቢሆን ስለ ይሖዋ ልንማረው የምንችለውን ነገር ሁሉ ይዟል ማለት አይደለም። ሐዋርያው ዮሐንስ ኢየሱስ በምድራዊ አገልግሎቱ ያከናወነው ነገር ሁሉ ይጻፍ ቢባል “ለተጻፉት መጻሕፍት ዓለም ራሱ ባልበቃቸውም ይመስለኛል” ሲል ተናግሯል። (ዮሐንስ 21:25) ስለ ልጁ እንዲህ ከተባለ ስለ አባቱማ ምን ሊባል እንደሚችል ገምት!

 22 የዘላለም ሕይወት ቢሰጠንም እንኳ ስለ ይሖዋ ተምረን አንዘልቀውም። (መክብብ 3:11) እንግዲያው ወደፊት ምን እንደሚጠብቀን አስብ። በመቶ፣ በሺህ፣ በሚሊዮን አልፎ ተርፎም በቢሊዮን ለሚቆጠሩ ዓመታት ስንኖር ስለ ይሖዋ አምላክ የምናገኘው ትምህርት አሁን ካለን እውቀት ብዙ ጊዜ እጥፍ እየጨመረ እንደሚሄድ የታወቀ ነው። እንዲያም ሆኖ ግን ስፍር ቁጥር የሌላቸውን ሌሎች ድንቅ ነገሮች ገና መማር እንደሚቀረን እንገነዘባለን። “ለእኔ ግን ወደ እግዚአብሔር መቅረብ ይሻለኛል” ሲል እንደዘመረው መዝሙራዊ ስለሚሰማን ብዙ ለመማር እንጓጓለን። (መዝሙር 73:28) የዘላለም ሕይወት ልንገምተው ከምንችለው በላይ አርኪና አስደሳች ነው፤ ከሁሉ ይበልጥ የሚያስደስተው ደግሞ ይህ ሕይወት ከጊዜ ወደ ጊዜ ይበልጥ ወደ ይሖዋ እየቀረብን ለመሄድ የሚያስችል አጋጣሚ የሚሰጠን መሆኑ ነው።

23. ምን እንድታደርግ የሚያነሳሳ ማበረታቻ ተሰጥቶሃል?

23 እንግዲያው ይሖዋን በሙሉ ልብህ፣ ነፍስህ፣ አሳብህና ኃይልህ በመውደድ ላሳየህ ፍቅር ምላሽ ለመስጠት የተቻለህን ሁሉ ጥረት አድርግ። (ማርቆስ 12:29, 30) ለይሖዋ ያለህ ፍቅር ምንጊዜም የማይናወጥ ይሁን። ትንሽም ይሁን ትልቅ በየዕለቱ የምታደርገው ማንኛውም ውሳኔ ከሰማያዊ አባትህ ጋር ያለህን ዝምድና ለማጠናከር ቆርጠህ እንደተነሳህ በግልጽ የሚያንጸባርቅ ይሁን። ከሁሉ በላይ ደግሞ ለዘላለም ዓለም አንተም ወደ ይሖዋ ይበልጥ እየቀረብክ እንድትሄድ እሱም ወደ አንተ ይበልጥ እንዲቀርብ እንመኛለን!