በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 2

በእርግጥ ‘ወደ አምላክ መቅረብ’ ትችላለህ?

በእርግጥ ‘ወደ አምላክ መቅረብ’ ትችላለህ?

1, 2. (ሀ) ብዙዎች የአምላክ ወዳጅ መሆንን በተመለከተ ምን ሊሰማቸው ይችላል? ሆኖም መጽሐፍ ቅዱስ ምን ይላል? (ለ) አብርሃም ምን መብት አግኝቷል? ለምንስ?

የሰማይና የምድር ፈጣሪ “ወዳጄ” ብሎ ቢጠራህ ምን ይሰማሃል? ብዙዎች ይህ ጨርሶ የማይታሰብ ነገር እንደሆነ ሊሰማቸው ይችላል። ደግሞስ ሰው እንደ ይሖዋ ካለ ታላቅ አምላክ ጋር እንዴት ወዳጅነት ሊመሠርት ይችላል? ይሁንና መጽሐፍ ቅዱስ ወደ አምላክ መቅረብ እንደምንችል ይገልጻል።

2 በጥንት ዘመን የኖረው አብርሃም ከአምላክ ጋር የጠበቀ ወዳጅነት ነበረው። ይሖዋ ይህን የዕብራውያን አባት “ወዳጄ” ሲል ጠርቶታል። (ኢሳይያስ 41:8) አዎን፣ ይሖዋ አብርሃምን የግል ወዳጁ አድርጎ ተመልክቶታል። አብርሃም የአምላክ የቅርብ ወዳጅ የመሆን መብት ሊያገኝ የቻለው ‘በእግዚአብሔር ስላመነ’ ነው። (ያዕቆብ 2:23) በዛሬው ጊዜም ይሖዋ በፍቅር ተነሳስተው ከሚያገለግሉት ሰዎች ጋር ‘መወዳጀት’ ይፈልጋል። (ዘዳግም 10:15) የአምላክ ቃል “ወደ እግዚአብሔር ቅረቡ ወደ እናንተም ይቀርባል” የሚል ማበረታቻ ይሰጠናል። (ያዕቆብ 4:8) ይህ ጥቅስ ይሖዋ ግብዣ እንዳቀረበልንና ቃል እንደገባልን የሚያሳይ ነው።

3. ይሖዋ ምን ግብዣ አቅርቦልናል? ከዚህስ ጋር በተያያዘ ምን ቃል ገብቷል?

3 ይሖዋ ወደ እሱ እንድንቀርብ ይጋብዘናል። ከእኛ ጋር ወዳጅነት ለመመሥረት ፈቃደኛና ዝግጁ ነው። ከዚህም በተጨማሪ ወደ እሱ ከቀረብን እሱም ተመሳሳይ እርምጃ በመውሰድ ወደ እኛ እንደሚቀርብ ቃል ገብቷል። በዚህ መንገድ ከይሖዋ ጋር ‘የጠበቀ ወዳጅነት’ የመመሥረት ውድ መብት ልናገኝ እንችላለን። * (መዝሙር 25:14 አ.መ.ት)  ‘የጠበቀ ወዳጅነት’ የሚለው ሐረግ የልብ ወዳጅ ለሆነ ሰው ምሥጢር ማካፈልን ያመለክታል።

4. የልብ ወዳጅ የሚባለው እንዴት ያለ ሰው ነው? ይሖዋ ወደ እሱ ለሚቀርቡት ሰዎች እንዲህ ያለ ወዳጅ የሚሆነው በምን መንገድ ነው?

4 ምሥጢርህን የምታካፍለው የልብ ወዳጅ አለህ? የቅርብ ወዳጅህ አድርገህ የምትመለከተው ከልብ የሚያስብልህን ሰው ነው። ታማኝነቱን በተግባር ያስመሰከረ በመሆኑ ታምነዋለህ። ደስታህን ለእሱ ለማካፈል ትጓጓለህ። ሐዘንህን ስታካፍለው ቀለል ይልሃል። ስሜትህን ማንም ሰው ባይረዳልህ እንኳ እሱ ይረዳልሃል። በተመሳሳይም ወደ አምላክ ስትቀርብ የልብ ወዳጅ ይሆንልሃል፣ ከልብ ያስብልሃል እንዲሁም ስሜትህን ይረዳልሃል። (መዝሙር 103:14፤ 1 ጴጥሮስ 5:7) ይሖዋ ታማኝ ለሆኑ አገልጋዮቹ ታማኝ እንደሆነ ስለምታውቅ ከልብህ ታምነዋለህ። (መዝሙር 18:25 አ.መ.ት) ይሁን እንጂ ከአምላክ ጋር እንዲህ ያለ የጠበቀ ወዳጅነት የመመሥረት መብት ያገኘነው ይሖዋ ራሱ አጋጣሚውን ስለከፈተልን ብቻ ነው።

ይሖዋ አጋጣሚውን ከፍቶልናል

5. ይሖዋ ወደ እሱ መቅረብ እንድንችል ምን አድርጓል?

5 ኃጢአተኞች ስለሆንን በራሳችን ጥረት ብቻ ወደ አምላክ ልንቀርብ አንችልም። (መዝሙር 5:4) ሐዋርያው ጳውሎስ “ነገር ግን ገና ኃጢአተኞች ሳለን ክርስቶስ ስለ እኛ ሞቶአልና እግዚአብሔር ለእኛ ያለውን የራሱን ፍቅር ያስረዳል” ሲል ጽፏል። (ሮሜ 5:8) አዎን፣ ይሖዋ ልጁን ወደ ምድር በመላክ ‘ነፍሱን ለብዙዎች ቤዛ እንዲሰጥ’ አድርጓል። (ማቴዎስ 20:28) በዚህ ቤዛዊ መሥዋዕት ካመንን ወደ አምላክ መቅረብ እንችላለን። አምላክ ‘አስቀድሞ ስለወደደን’ ከእሱ ጋር መወዳጀት የምንችልበትን መሠረት ጥሎልናል።—1 ዮሐንስ 4:19

6, 7. (ሀ) ይሖዋ ምሥጢር የሆነ አምላክ እንዳልሆነ እንዴት እናውቃለን? (ለ) ይሖዋ ራሱን የገለጠው በምን መንገዶች ነው?

6 ይሖዋ ራሱን ለእኛ በመግለጥ ወደ እሱ መቅረብ የምንችልበትን ሌላም ዝግጅት አድርጓል። ከአንድ ሰው ጋር የጠበቀ ወዳጅነት መመሥረት የምንችለው ግለሰቡን በሚገባ ስናውቀውና ባሕርያቱን ስናደንቅ ነው። በመሆኑም ይሖዋ ፈጽሞ ሊታወቅ የማይችል ምሥጢር የሆነ  አምላክ ቢሆን ኖሮ ወደ እሱ ልንቀርብ አንችልም ነበር። ይሁንና አምላክ ራሱን ከመሰወር ይልቅ እንድናውቀው ይፈልጋል። (ኢሳይያስ 45:19) ከዚህም በተጨማሪ ይሖዋ ራሱን የገለጠው ለሁሉም ሰው ማለትም ዓለም እንደ ተራ ለሚመለከታቸው ሰዎች ጭምር ነው።—ማቴዎስ 11:25

ይሖዋ በፍጥረት ሥራዎቹና በቃሉ አማካኝነት ራሱን ገልጿል

7 ይሖዋ ራሱን የገለጠልን እንዴት ነው? የፍጥረት ሥራዎቹ አንዳንድ ባሕርያቱን ይኸውም የኃይሉን ታላቅነት፣ የጥበቡን ጥልቀትና የፍቅሩን ስፋት ያንጸባርቃሉ። (ሮሜ 1:20) ይሁን እንጂ ይሖዋ ራሱን የገለጠልን በፈጠራቸው ነገሮች ብቻ አይደለም። ለሌሎች እንዴት እውቀት መስጠት እንደሚቻል ከማንም በላይ የሚያውቅ አምላክ ስለሆነ በቃሉ ማለትም በመጽሐፍ ቅዱስ አማካኝነት ራሱን ገልጦልናል።

‘የይሖዋን ውበት’ ማየት

8. መጽሐፍ ቅዱስ ራሱ፣ ይሖዋ እንደሚወደን የሚያሳይ ጥሩ ማስረጃ ነው ሊባል የሚችለው ለምንድን ነው?

8 መጽሐፍ ቅዱስ ራሱ፣ ይሖዋ እንደሚወደን የሚያሳይ ጥሩ ማስረጃ ነው። ቃሉን በቀላሉ ልንረዳው በምንችለው መንገድ ማስጻፉ እንደሚወደን ብቻ ሳይሆን እንድናውቀውና እንድንወደው እንደሚፈልግ የሚያሳይ ነው። በዚህ ድንቅ መጽሐፍ ውስጥ የሰፈረው ሐሳብ ‘የይሖዋን ውበት’ እንድናይ የሚያስችለን ከመሆኑም በላይ ወደ እሱ እንድንቀርብ ያነሳሳናል። (መዝሙር 90:17 አዲሱ መደበኛ ትርጉም የግርጌ ማስታወሻ) ይሖዋ በቃሉ ውስጥ ራሱን የገለጸባቸውን አንዳንድ አስደሳች መንገዶች እስቲ እንመልከት።

9. የአምላክን ባሕርያት በቀጥታ የሚገልጹ በመጽሐፍ ቅዱስ ውስጥ የሚገኙ አንዳንድ ጥቅሶች የትኞቹ ናቸው?

9 የአምላክ ባሕርያት በመጽሐፍ ቅዱስ ውስጥ በብዙ ቦታዎች ላይ በቀጥታ ተጠቅሰው እናገኛለን። አንዳንድ ምሳሌዎችን ተመልከት። “እግዚአብሔር ፍትሕን ይወዳል።” (መዝሙር 37:28 አ.መ.ት) አምላክ “በኃይል ታላቅ ነው።” (ኢዮብ 37:23) ይሖዋ “ታማኝ አምላክ ነው።” (ዘዳግም 7:9 አ.መ.ት) “ልቡ ጠቢብ” ነው። (ኢዮብ 9:4) “መሐሪ፣ ሞገስ ያለው፣ ታጋሽም፣ ባለ ብዙ ቸርነትና እውነት” ነው። (ዘጸአት 34:6) “አቤቱ፣ አንተ መሓሪና ይቅር ባይ ነህ።”  (መዝሙር 86:5) ከዚህም በተጨማሪ በመጀመሪያው ምዕራፍ ላይ እንደተገለጸው ይሖዋ ከሁሉ ይበልጥ ጎልቶ የሚታይ አንድ ባሕርይ አለው። በመሆኑም መጽሐፍ ቅዱስ “እግዚአብሔር ፍቅር ነው” ይላል። (1 ዮሐንስ 4:8) በእነዚህ ግሩም ባሕርያት ላይ ስታሰላስል አቻ ወደማይገኝለት ወደዚህ አምላክ ለመቅረብ አትገፋፋም?

መጽሐፍ ቅዱስ ወደ ይሖዋ እንድንቀርብ ይረዳናል

10, 11. (ሀ) ይሖዋ ባሕርያቱ ይበልጥ ግልጽ ሆነው እንዲታዩን በቃሉ ውስጥ ምን አስፍሮልናል? (ለ) የአምላክን ኃይል በዓይነ ሕሊናችን ለማየት የሚረዳን የትኛው የመጽሐፍ ቅዱስ ዘገባ ነው?

10 ይሖዋ ባሕርያቱን ከመግለጹም በተጨማሪ እነዚህን ባሕርያት እንዴት እንዳንጸባረቀ የሚያሳዩ ሕያው የሆኑ ምሳሌዎችን በቃሉ ውስጥ አስፍሮልናል። እነዚህ ዘገባዎች የይሖዋ ባሕርያት ይበልጥ ግልጽ ሆነው እንዲታዩን ያደርጋሉ። ይህ ደግሞ ወደ እርሱ እንድንቀርብ ያነሳሳናል። እስቲ አንድ ምሳሌ ተመልከት።

11 አምላክ ‘ታላቅ ኃይል’ እንዳለው ማንበብ አንድ ነገር ነው። (ኢሳይያስ 40:26) ሆኖም እስራኤላውያንን ነፃ በማውጣት ቀይ ባሕርን እንዴት እንዳሻገራቸውና ለ40 ዓመታት በምድረ በዳ ምን ያህል እንደተንከባከባቸው ማንበብ ፈጽሞ የተለየ ነገር ነው። ባሕሩ ለሁለት ከተከፈለ በኋላ እንደ ግድግዳ በቆመው ውኃ መካከል 3,000,000 የሚሆነው የእስራኤል ሕዝብ በደረቅ ምድር ሲሻገር በዓይነ ሕሊናህ ልትመለከት ትችላለህ። (ዘጸአት 14:21፤ 15:8) አምላክ እስራኤላውያንን በምድረ በዳ ምን ያህል እንደተንከባከባቸው ተመልከት። ከዐለት ውስጥ ውኃ ሲያፈልቅላቸውና ከሰማይ መና ሲያወርድላቸው በምናብህ ለማየት ሞክር። (ዘጸአት 16:31፤ ዘኍልቁ 20:11) ይህ ዘገባ ይሖዋ ኃይል እንዳለው ብቻ ሳይሆን ኃይሉን ሕዝቦቹን ለመንከባከብና ለመጠበቅ  እንደሚጠቀምበት ያሳያል። የምንጸልየው “መጠጊያችንና ኃይላችን፣ ባገኘን በታላቅ መከራም ረዳታችን” ወደሆነ ኃያል አምላክ መሆኑን ማወቃችን የሚያጽናና አይደለም?—መዝሙር 46:1

12. ይሖዋ እኛ በቀላሉ ልንረዳው በምንችል መንገድ ራሱን የገለጸልን እንዴት ነው?

12 መንፈስ የሆነው ይሖዋ እሱን ማወቅ እንድንችል ሌላም ያደረገው ነገር አለ። ሰዎች እንደመሆናችን መጠን ማየት የምንችለው በሰብዓዊ ዓይን ሊታይ የሚችለውን ነገር ብቻ ነው። በመንፈሳዊው ዓለም ያለውን ነገር የማየት ችሎታ የለንም። አምላክ ራሱን በመንፈሳዊ ሁኔታ ብቻ ቢገልጽልን ኖሮ ሲወለድ ጀምሮ ማየት ለተሳነው ሰው መልካችንን ለማስረዳት እንደመሞከር ያህል ይሆን ነበር። ከዚህ ይልቅ ይሖዋ በቀላሉ ሊገባን በሚችል መንገድ ራሱን ገልጾልናል። አንዳንድ ጊዜ ራሱን እኛ ከምናውቃቸው ነገሮች ጋር እያመሳሰለ ይገልጻል። ሌላው ቀርቶ አንዳንድ ሰብዓዊ ገጽታዎች እንዳሉት አድርጎ የገለጸባቸው ጊዜያትም አሉ። *

13. ኢሳይያስ 40:11 ይሖዋን እንዴት አድርጎ ይገልጸዋል? ይህስ ምን እንዲሰማህ ያደርጋል?

13 በኢሳይያስ 40:11 ላይ ስለ ይሖዋ የተሰጠውን መግለጫ ተመልከት:- “መንጋውን እንደ እረኛ ያሰማራል፣ ጠቦቶቹን በክንዱ ሰብስቦ በብብቱ ይሸከማል [“በዕቅፉም ይይዛቸዋል፣” አ.መ.ት]።” እዚህ ላይ ይሖዋ ጠቦቶቹን “በክንዱ” እንደሚያነሳ እረኛ ተደርጎ ተገልጿል። ይህም አምላክ አቅም የሌላቸውን ጨምሮ ሕዝቦቹን ሁሉ የመጠበቅና የመደገፍ ችሎታ እንዳለው ያመለክታል። ለእሱ ታማኞች እስከሆንን ድረስ ፈጽሞ ስለማይተወን ኃያል በሆኑት ክንዶቹ ሥር ያለስጋት ተረጋግተን መኖር እንችላለን። (ሮሜ 8:38, 39) ታላቁ እረኛ ጠቦቶቹን “በዕቅፉ” እንደሚይዛቸው የሚገልጸው አነጋገር አንድ እረኛ መጎናጸፊያውን ወደ ላይ አጥፎ ገና የተወለደን ግልገል በዕቅፉ እንደሚይዝ የሚያመለክት ነው። ይህም ይሖዋ እንደሚንከባከበንና በጣም እንደሚያስብልን  እርግጠኞች እንድንሆን ያደርገናል። ወደ እሱ ለመቅረብ መፈለጋችን ምንም አያስደንቅም።

‘ወልድ አብን ሊገልጥ ፈቃደኛ ነው’

14. ይሖዋ ከሁሉ በተሻለ መንገድ ራሱን የገለጸው በኢየሱስ በኩል ነው ሊባል የሚችለው ለምንድን ነው?

14 ይሖዋ ራሱን ከሁሉ በተሻለ መንገድ የገለጸው በተወዳጅ ልጁ በኢየሱስ በኩል ነው። ከኢየሱስ በተሻለ ሁኔታ የአምላክን አስተሳሰብና ስሜት ሊያንጸባርቅ ወይም አምላክን ቁልጭ ባለ መንገድ ሊገልጽ የሚችል አንድም አካል የለም። ደግሞም የአምላክ የበኩር ልጅ የሆነው ኢየሱስ ከአባቱ ጋር መኖር የጀመረው ሌሎች መንፈሳዊ ፍጥረታት ከመፈጠራቸውም ሆነ ግዑዙ ጽንፈ ዓለም ወደ ሕልውና ከመምጣቱ በፊት ነው። (ቆላስይስ 1:15) ኢየሱስ ይሖዋን በቅርብ ያውቀዋል። “ወልድንም ማን እንደ ሆነ ከአብ በቀር የሚያውቅ የለም፣ አብንም ማን እንደ ሆነ ከወልድ በቀር ወልድም ሊገልጥለት ከሚፈቅድ በቀር የሚያውቅ የለም” ብሎ ሊናገር የቻለው ለዚህ ነው። (ሉቃስ 10:22) ኢየሱስ ሰው ሆኖ በምድር ላይ በኖረበት ዘመን አባቱን በሁለት ዋና ዋና መንገዶች ገልጾታል።

15, 16. ኢየሱስ አባቱን የገለጠው በየትኞቹ ሁለት መንገዶች ነው?

 15 በመጀመሪያ ደረጃ ኢየሱስ ያስተማራቸው ትምህርቶች አባቱን እንድናውቅ ይረዱናል። ኢየሱስ ይሖዋን የገለጸበት መንገድ ልብ የሚነካ ነው። ለምሳሌ ያህል ኢየሱስ ንስሐ የሚገቡ ኃጢአተኞችን እጁን ዘርግቶ የሚቀበለውን መሐሪ አምላክ፣ በአንድ ይቅር ባይ አባት መስሎታል። በምሳሌው ላይ የተጠቀሰው አባት አባካኝ የነበረው ልጁ ከሄደበት ሲመለስ ሮጦ አንገቱ ላይ በመጠምጠም አቅፎ እንደሳመው ተገልጿል። (ሉቃስ 15:11-24) በተጨማሪም ይሖዋ ቅን ልብ ያላቸውን ሰዎች በግለሰብ ደረጃ ስለሚወዳቸው ወደ ራሱ ‘እንደሚስባቸው’ ኢየሱስ ገልጿል። (ዮሐንስ 6:44) ሌላው ቀርቶ ይሖዋ የእያንዳንዷን ድንቢጥ ሁኔታ እንኳ ይከታተላል። ኢየሱስ “አትፍሩ፤ ከብዙ ድንቢጦች እናንተ ትበልጣላችሁ” ሲል ተናግሯል። (ማቴዎስ 10:29, 31) እንዲህ ወዳለው አምላክ ለመቅረብ እንደምንገፋፋ ምንም ጥርጥር የለውም።

16 በሁለተኛ ደረጃ የኢየሱስ መላ ሕይወት ይሖዋ ምን ዓይነት አምላክ እንደሆነ እንድንገነዘብ ያደርገናል። ኢየሱስ የአባቱ ፍጹም ነጸብራቅ በመሆኑ “እኔን ያየ አብን አይቶአል” ለማለት ችሏል። (ዮሐንስ 14:9) በመሆኑም ኢየሱስ ያንጸባረቀውን ስሜትና ለሰዎች ያደረገውን ነገር በተመለከተ በወንጌሎች ውስጥ የሰፈረውን ዘገባ ስናነብ አባቱን የማየት ያህል ይሆንልናል። ይሖዋ ባሕርያቱን ከዚህ በተሻለ መንገድ ሊገልጥልን አይችልም። እንዲህ የምንለው ለምንድን ነው?

17. ይሖዋ ምን ዓይነት አምላክ እንደሆነ ግልጽ ለማድረግ ምን ዘዴ እንደተጠቀመ በምሳሌ አስረዳ።

17 ለምሳሌ ያህል ደግነት ምን ማለት እንደሆነ ለማስረዳት ፈለግህ እንበል። ትርጉሙን እንዲሁ በቃልህ ታስረዳ ይሆናል። ይሁን እንጂ አንድ ሰው ያከናወነውን የደግነት ድርጊት ምሳሌ አድርገህ ብትጠቅስ “ደግነት” የሚለው ቃል ይበልጥ ግልጽ ሊሆን ይችላል። ይሖዋም ምን ዓይነት አምላክ እንደሆነ ለመግለጽ ተመሳሳይ የሆነ ዘዴ ተጠቅሟል። ባሕርያቱን እንዲሁ በቃላት ከመግለጽ በተጨማሪ ልጁን ሕያው ምሳሌ አድርጎ ተጠቅሞበታል። ኢየሱስ ያደረጋቸው ነገሮች የአምላክን ባሕርያት ቁልጭ አድርገው የሚያሳዩ ናቸው። ይሖዋ ስለ ኢየሱስ በሚተርኩት የወንጌል ዘገባዎች አማካኝነት ምን ዓይነት አምላክ እንደሆነ እየገለጸልን  እንዳለ አድርገን ልናስብ እንችላለን። በመንፈስ አነሳሽነት የተጻፈው ዘገባ ስለ ኢየሱስ ምድራዊ ሕይወት ምን ይላል?

18. ኢየሱስ ኃይልን፣ ፍትሕንና ጥበብን ያንጸባረቀው እንዴት ነው?

18 አራቱ የአምላክ ዋና ዋና ባሕርያት በኢየሱስ ምድራዊ ሕይወት ላይ ግሩም በሆነ መንገድ ተንጸባርቀዋል። ኢየሱስ በበሽታ፣ በረሃብና አልፎ ተርፎም በሞት ላይ የነበረው ሥልጣን ኃይሉን የሚያሳይ ነው። ሆኖም ኢየሱስ ሥልጣናቸውን አላግባብ እንደሚጠቀሙ ራስ ወዳድ ሰዎች ኃይሉን የግል ጥቅሙን ለማራመድ ወይም ደግሞ ሌሎችን ለመጉዳት አልተጠቀመበትም። (ማቴዎስ 4:2-4) ፍትሕን ይወድ ነበር። ስግብግብ የሆኑ ነጋዴዎች ሕዝቡን አላግባብ ሲበዘብዙ ሲያይ ልቡ በጽድቅ ቁጣ ተሞልቶ ነበር። (ማቴዎስ 21:12, 13) ድሆችንና የተጨቆኑትን ከአድልዎ ነፃ በሆነ መንገድ በመመልከት ለነፍሳቸው “ዕረፍት” እንዲያገኙ ረድቷቸዋል። (ማቴዎስ 11:4, 5, 28-30) ‘ከሰሎሞን የሚበልጠው’ ኢየሱስ ያስተማራቸው ትምህርቶች ወደር የለሽ ጥበብ የተንጸባረቀባቸው ናቸው። (ማቴዎስ 12:42) ይሁን እንጂ ኢየሱስ ጥበቡን በሌሎች ዘንድ አድናቆት ለማትረፍ አልተጠቀመበትም። ትምህርቶቹ ግልጽ፣ ቀላልና በተግባር ሊተረጎሙ የሚችሉ ስለነበሩ የተናገራቸው ቃላት የተራውን ሕዝብ ልብ በእጅጉ ነክተዋል።

19, 20. (ሀ) ኢየሱስ የላቀ የፍቅር ምሳሌ የሆነው በምን መንገድ ነው? (ለ) የኢየሱስን ታሪክ ስናነብና ስናሰላስልበት ልንዘነጋው የማይገባ ነገር ምንድን ነው?

19 ኢየሱስ የላቀ የፍቅር ምሳሌ ነው። አገልግሎቱን ባከናወነበት ወቅት የሌሎችን ችግር መረዳትንና ርኅራኄ ማሳየትን ጨምሮ በርካታ የፍቅር ገጽታዎችን አንጸባርቋል። ሰዎች መከራ ሲደርስባቸው ሲያይ አያስችለውም። በተደጋጋሚ ጊዜያት እንዲህ ያሉ ሰዎችን ለመርዳት አስፈላጊውን እርምጃ ወስዷል። (ማቴዎስ 14:14) ኢየሱስ የታመሙትን በመፈወስና የተራቡትን በመመገብ ብቻ ሳይሆን ይበልጥ አስፈላጊ በሆነ ሌላ መንገድም ርኅሩኅ መሆኑን አሳይቷል። ሰዎች ዘላቂ በረከት ስለሚያመጣው የአምላክ መንግሥት የሚናገረውን እውነት እንዲያውቁና እንዲቀበሉ እንዲሁም ለዚህ እውነት ከፍተኛ አድናቆት እንዲያድርባቸው ረድቷል። (ማርቆስ 6:34፤ ሉቃስ 4:43) ከሁሉ በላይ ደግሞ ነፍሱን በፈቃደኝነት ለሌሎች አሳልፎ በመስጠት የራስን ጥቅም መሥዋዕት  የማድረግ መንፈስ የተንጸባረቀበት ፍቅር አሳይቷል።—ዮሐንስ 15:13

20 ታዲያ በሁሉም የኑሮ ደረጃና ዕድሜ ላይ የሚገኙ ሰዎች ወደዚህ አፍቃሪና አሳቢ ሰው መቅረባቸው ሊያስደንቀን ይገባል? (ማርቆስ 10:13-16) ይሁን እንጂ የኢየሱስን ታሪክ ስናነብና ስናሰላስልበት የአባቱን ጥርት ያለ ነጸብራቅ በልጁ ላይ እየተመለከትን መሆኑን ፈጽሞ መዘንጋት አይኖርብንም።—ዕብራውያን 1:3

እኛን ለመርዳት የተዘጋጀ መጽሐፍ

21, 22. ይሖዋን መፈለግ ምን ማድረግ ይጠይቃል? ይህ መጽሐፍ በዚህ ረገድ እኛን ሊረዳ የሚችል ምን ነገር ይዟል?

21 ይሖዋ ራሱን በቃሉ ውስጥ ቁልጭ ባለ መንገድ በመግለጽ ወደ እሱ እንድንቀርብ እንደሚፈልግ በማያሻማ መንገድ አሳይቷል። ይሁንና ወደ እርሱ እንድንቀርብ አያስገድደንም። ይሖዋን ‘በሚገኝበት ጊዜ መፈለግ’ የእያንዳንዳችን ኃላፊነት ነው። (ኢሳይያስ 55:6) ይሖዋን መፈለግ በመጽሐፍ ቅዱስ ውስጥ የተገለጹትን ባሕርያቱንና የተለያዩ ነገሮችን የሚያከናውንበትን መንገድ ማወቅ ይጠይቃል። ይህ የምታነበው መጽሐፍ በዚህ ረገድ አንተን ለመርዳት ታስቦ የተዘጋጀ ነው።

22 ይህ መጽሐፍ በይሖዋ ዋና ዋና ባሕርያት ማለትም በኃይሉ፣ በፍትሑ፣ በጥበቡና በፍቅሩ ላይ የተመሠረቱ አራት ክፍሎችን የያዘ ነው። እያንዳንዱ ክፍል ስለሚብራራው የይሖዋ ባሕርይ ጠቅለል ያለ ሐሳብ የያዘ መግቢያ አለው። በእያንዳንዱ ክፍል ውስጥ ያሉት የተወሰኑ ምዕራፎች  ይሖዋ የተጠቀሰውን ባሕርይ በተለያዩ መንገዶች እንዴት እንዳንጸባረቀ ይገልጻሉ። ከዚህም በተጨማሪ እያንዳንዱ ክፍል ኢየሱስ ያንን ባሕርይ እንዴት እንዳንጸባረቀ የሚገልጽ ምዕራፍ ያለው ከመሆኑም በላይ እኛም ያንኑ ባሕርይ በሕይወታችን ውስጥ እንዴት ማንጸባረቅ እንደምንችል የሚያብራራ ምዕራፍም ይዟል።

23, 24. (ሀ) “ለማሰላሰል የሚረዱ ጥያቄዎች” በሚል ርዕስ የቀረበው ሣጥን ምን ጥቅም እንዳለው ግለጽ። (ለ) ማሰላሰል ወደ አምላክ ይበልጥ እንድንቀርብ የሚረዳን እንዴት ነው?

23 በተጨማሪም “ለማሰላሰል የሚረዱ ጥያቄዎች” የሚል ርዕስ ያለው ሣጥን በእያንዳንዱ ምዕራፍ ውስጥ ይገኛል። ለምሳሌ ያህል ገጽ 24 ላይ የሚገኘውን ሣጥን ተመልከት። ጥቅሶቹም ሆኑ ጥያቄዎቹ የተዘጋጁት ምዕራፉን ለመከለስ ሳይሆን ከርዕሰ ጉዳዩ ጋር ግንኙነት ባላቸው ሌሎች አስፈላጊ ነጥቦች ላይ ማሰላሰል እንድትችል ነው። ይህን ሣጥን ጥሩ አድርገህ ልትጠቀምበት የምትችለው እንዴት ነው? እያንዳንዱን ጥቅስ አውጥተህ በጥሞና አንብበው። ከዚያም ከጥቅሱ ጋር ተያይዞ የቀረበውን ጥያቄ ተመልከት። መልሱን ቆም ብለህ አስብ። ካስፈለገም ምርምር ልታደርግ ትችላለህ። በተጨማሪም ‘ይህ ሐሳብ ስለ ይሖዋ ምን ያስተምረኛል? ሕይወቴን ሊነካ የሚችለው እንዴት ነው? ሌሎችን ለመርዳት እንዴት ልጠቀምበት እችላለሁ?’ እያልክ ራስህን ጠይቅ።

24 በዚህ መንገድ ማሰላሰላችን ወደ ይሖዋ ይበልጥ እንድንቀርብ ሊረዳን ይችላል። ለምን? መጽሐፍ ቅዱስ፣ ማሰላሰልን ከልብ ጋር አዛምዶ ይገልጸዋል። (መዝሙር 19:14 NW) ስለ አምላክ በተማርነው ነገር ላይ ከልብ በመነጨ የአድናቆት ስሜት ስናሰላስል ትምህርቱ ወደ ምሳሌያዊው ልባችን ዘልቆ በመግባት አስተሳሰባችንን ይለውጣል፣ ብሎም ለተግባር ያነሳሳናል። ከዚህም በተጨማሪ ለአምላክ ያለን ፍቅር ይጠነክራል። ይህ ፍቅር ደግሞ ይሖዋን ከማንም የበለጠ የቅርብ ወዳጃችን እንደሆነ አድርገን በማየት እሱን ለማስደሰት እንድንጥር ይገፋፋናል። (1 ዮሐንስ 5:3) እንዲህ ያለ ዝምድና ለመመሥረት የይሖዋን ባሕርያትና የተለያዩ ነገሮችን የሚያከናውንበትን መንገድ ማወቅ ያስፈልጋል። በቅድሚያ ግን ወደ አምላክ እንድንቀርብ የሚገፋፋንን አንድ የይሖዋ ባሕርይ ይኸውም ቅድስናውን እንመርምር።

^ አን.3 ‘የጠበቀ ወዳጅነት’ ተብሎ የተተረጎመው የዕብራይስጥ ቃል በአሞጽ 3:7 ላይም የተጠቀሰ ሲሆን ጥቅሱ ሉዓላዊው ጌታ ይሖዋ “ምሥጢሩን” ለአገልጋዮቹ በመግለጥ ዓላማውን አስቀድሞ እንደሚያስታውቃቸው ያመለክታል።

^ አን.12 ለምሳሌ ያህል መጽሐፍ ቅዱስ ስለ አምላክ ፊት፣ ዓይን፣ ጆሮ፣ አፍንጫ፣ አፍ፣ ክንድና እግር ይናገራል። (መዝሙር 18:15 አ.መ.ት፤ 27:8፤ 44:3፤ ኢሳይያስ 60:13፤ ማቴዎስ 4:4፤ 1 ጴጥሮስ 3:12) እርግጥ “ዐለት” ወይም “ጋሻ” እንደሚሉት ያሉ መግለጫዎችን ቃል በቃል እንደማንረዳቸው ሁሉ እነዚህ ምሳሌያዊ አገላለጾችም ቃል በቃል ሊወሰዱ አይገባም።—ዘዳግም 32:4 አ.መ.ት፤ መዝሙር 84:11 አ.መ.ት