በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ወደ ይሖዋ ቅረብ

 ምዕራፍ 3

‘ቅዱስ፣ ቅዱስ፣ ቅዱስ ይሖዋ’

‘ቅዱስ፣ ቅዱስ፣ ቅዱስ ይሖዋ’

1, 2. ነቢዩ ኢሳይያስ ምን ራእይ ተመለከተ? ይህስ ራእይ ስለ ይሖዋ ምን ያስተምረናል?

ኢሳይያስ ከአምላክ የመጣ አንድ ራእይ በተመለከተ ጊዜ ከፍተኛ አድናቆትና አምላካዊ ፍርሃት አድሮበት ነበር። ራእዩ በእውን ያለ ነገር ይመስል ስለነበር ኢሳይያስ ይሖዋን ከፍ ባለ ዙፋን ላይ ተቀምጦ ‘እንዳየው’ አድርጎ ጽፏል። የልብሱም ዘርፍ በኢየሩሳሌም ያለውን ሰፊ ቤተ መቅደስ ሞልቶት ነበር።—ኢሳይያስ 6:1, 2

2 በተጨማሪም የቤተ መቅደሱ መሠረት እስኪናጋ ድረስ በከፍተኛ ድምፅ ያስተጋባው መዝሙር ኢሳይያስን በአድናቆትና በፍርሃት እንዲዋጥ አድርጎታል። ይህን መዝሙር ያሰሙት ሱራፌል የተባሉት ከፍተኛ ማዕረግ ያላቸው መላእክት ናቸው። እነዚህ ሱራፌል “ቅዱስ፣ ቅዱስ፣ ቅዱስ፣ የሠራዊት ጌታ እግዚአብሔር፤ ምድር ሁሉ ከክብሩ ተሞልታለች” በማለት የይሖዋን ታላቅ ግርማ አስደሳች በሆነ ዜማ አስተጋብተዋል። (ኢሳይያስ 6:3, 4) ይሖዋ በቅድስናው አቻ የማይገኝለት በመሆኑ አጽንኦት ለመስጠት ሲባል “ቅዱስ” የሚለው ቃል በመዝሙሩ ውስጥ ሦስት ጊዜ መጠቀሱ የተገባ ነው። (ራእይ 4:8) የይሖዋ ቅድስና በመጽሐፍ ቅዱስ ውስጥ በተደጋጋሚ ጎላ ተደርጎ ተጠቅሷል። ብዙ ጥቅሶች የይሖዋን ስም ‘ከቅድስናው’ ጋር አያይዘው ይገልጹታል።

3. ብዙዎች ስለ ይሖዋ ቅድስና ያላቸው የተሳሳተ አመለካከት ወደ እርሱ ከመቅረብ ይልቅ እንዲርቁት ያደረጋቸው እንዴት ነው?

3 ከዚህ መረዳት እንደሚቻለው ይሖዋ ስለ ቅድስናው እንድናውቅ ይፈልጋል። ይሁንና ይሖዋ ቅዱስ መሆኑ ብዙዎች ጨርሶ ወደ እርሱ መቅረብ እንደማይችሉ እንዲሰማቸው ሊያደርግ ይችላል። አንዳንዶች ቅድስናን ራስን ከማመጻደቅ ጋር ያያይዙታል። ስለ ራሳቸው አፍራሽ አመለካከት ያላቸው ሰዎች አምላክ ቅዱስ መሆኑ ወደ እርሱ እንዲቀርቡ ከመጋበዝ ይልቅ ጭራሽ እንዲሸሹት ያደርጋቸዋል። ቅዱስ ወደ ሆነው አምላክ ለመቅረብ ብቁ እንዳልሆኑ ይሰማቸዋል። ስለሆነም ቅድስናውን በመፍራት ብዙዎች ከአምላክ ይርቃሉ። ይሁንና የአምላክ ቅድስና ወደ እርሱ እንድንቀርብ የሚጋብዝ አቢይ ምክንያት ሆኖ ሳለ ሰዎች እንዲህ  ዓይነት ስሜት የሚሰማቸው መሆኑ የሚያሳዝን ነው። ለምን? ለዚህ ጥያቄ መልስ ከመስጠታችን በፊት እውነተኛ ቅድስና ምን ማለት እንደሆነ እንመርምር።

ቅድስና ምንድን ነው?

4, 5. (ሀ) ቅድስና ምን ማለት ነው? ምን ማለትስ አይደለም? (ለ) ይሖዋ “የተለየ” ነው ሊባል የሚችለው በምን ሁለት መንገዶች ነው?

4 አምላክ ቅዱስ ነው ሲባል ራሱን ከፍ አድርጎ የሚመለከት፣ ኩሩ ወይም ሌሎችን የሚንቅ ነው ማለት አይደለም። እንዲያውም እነዚህን ባሕርያት ይጠላል። (ምሳሌ 16:5፤ ያዕቆብ 4:6) ታዲያ “ቅዱስ” የሚለው ቃል ምን ማለት ነው? መጽሐፍ ቅዱስ በተጻፈበት የዕብራይስጥ ቋንቋ ይህ ቃል “መለየት” የሚል ትርጉም ካለው ቃል የመጣ ነው። ከአምልኮ ጋር በተያያዘ “ቅዱስ” የሚለው ቃል ለአንድ ዓላማ ተለይቶ የተቀመጠን ወይም የተቀደሰን ነገር ያመለክታል። በተጨማሪም ቅድስና ንጹሕ መሆን የሚል መልእክት ያስተላልፋል። ታዲያ ይሖዋ ቅዱስ ነው ሲባል ምን ማለት ነው? ራሱን ፍጽምና ከጎደላቸው ሰዎች ‘ይለያል’ ወይም ያገልላል ማለት ነው?

5 በፍጹም። “የእስራኤል ቅዱስ” ይሖዋ ሕዝቡ ኃጢአተኛ ቢሆንም እንኳ ‘በመካከላቸው’ እንደሚኖር ገልጿል። (ኢሳይያስ 12:6፤ ሆሴዕ 11:9) ስለዚህ ይሖዋ ቅዱስ መሆኑ ከሰዎች እንዲርቅ አያደርገውም። ታዲያ ይሖዋ “የተለየ” ነው ሊባል የሚችለው እንዴት ነው? በሁለት ዋና ዋና መንገዶች ነው። በመጀመሪያ ደረጃ ይሖዋ እሱ ብቻ ሉዓላዊ ጌታ በመሆኑ ከሌሎች ፍጥረታት የተለየ ነው። ንጽሕናው እንከን የማይወጣለትና ወደር የማይገኝለት ነው። (መዝሙር 40:5፤ 83:18) በሁለተኛ ደረጃ ደግሞ ይሖዋ ከየትኛውም የኃጢአት ድርጊት ጋር ንክኪ የሌለው መሆኑ እምነት እንድንጥልበት የሚያደርግ ነው። ለምን?

6. ይሖዋ ከየትኛውም የኃጢአት ድርጊት ጋር ንክኪ የሌለው መሆኑ እምነት እንድንጥልበት ሊያደርገን የሚችለው ለምንድን ነው?

6 ዛሬ የምንኖረው እውነተኛ ቅድስና በጠፋበት ዓለም ውስጥ ነው። ከአምላክ የራቀው ሰብዓዊ ኅብረተሰብ በኃጢአት የተበከለና ፍጽምና የጎደለው ነው። ሁላችንም በውስጣችን ካለው የኃጢአት ዝንባሌ ጋር መዋጋት አለብን። በተጨማሪም ማንኛችንም ብንሆን ከተዘናጋን በኃጢአት  ልንሸነፍ እንችላለን። (ሮሜ 7:15-25፤ 1 ቆሮንቶስ 10:12) ይሖዋ ግን ከየትኛውም የኃጢአት ዝንባሌ ሙሉ በሙሉ ነፃ በመሆኑ ፈጽሞ በኃጢአት ሊሸነፍ አይችልም። ይህም ይሖዋን ሙሉ እምነት የሚጣልበት ከሁሉ የተሻለ አባት አድርገን እንድንመለከተው ይገፋፋናል። ይሖዋ ቅዱስ ስለሆነ እንደ አንድ ኃጢአተኛ ሰብዓዊ አባት የሥነ ምግባር አቋሙ ሊበላሽ ወይም ሊለወጥ ይችላል ብሎ ማሰብ ፈጽሞ የማይመስል ነው። ቅድስናው ከምንም ነገር በላይ አስተማማኝ በመሆኑ ለሕዝቡ ዋስትና ለመስጠት በቅድስናው የማለባቸው ጊዜያት አሉ። (አሞጽ 4:2) ይህ በአምላክ እንድንታመን የሚያደርግ አይደለም?

7. ቅድስናን ከይሖዋ ነጥሎ ማየት አይቻልም ሊባል የሚችለው ለምንድን ነው?

7 ቅድስናን ከይሖዋ ነጥሎ ማየት አይቻልም። ይህ ምን ማለት ነው? ለምሳሌ ያህል “ሰው” እና “አለፍጽምና” የሚሉት ቃላት የማይነጣጠሉ ናቸው። ስለ ሰው ስናስብ አለፍጽምና የሚለው ቃል አብሮ ይታወሰናል። አለፍጽምና አብሮን ያለ በመሆኑ በምናደርገው ነገር ሁሉ ላይ ተጽዕኖ ያሳድርብናል። “ይሖዋ” እና “ቅዱስ” የሚሉት ቃላትም ተመሳሳይ የሆነ ትስስር አላቸው። ይሖዋ ቅድስናን የተላበሰ አምላክ ነው። ሁለንተናው ንጹሕና የጠራ ነው። “ቅዱስ” የሚለውን ቃል ጥልቅ ትርጉም ሳንረዳ ይሖዋን ልናውቀው አንችልም።

‘ቅድስና ለይሖዋ’

8, 9. ይሖዋ ፍጹም ያልሆኑ ሰዎችን በአንጻራዊ ሁኔታም ቢሆን ቅዱስ እንዲሆኑ እንደሚረዳቸው የሚያሳየው ምንድን ነው?

8 ይሖዋ ቅድስናን የተላበሰ አምላክ በመሆኑ የቅድስና ምንጭ ነው ሊባል ይችላል። ይሁን እንጂ ይህን ባሕርይ ሳይሰስት ለሌሎች በልግስና ሰጥቷል። ሌላው ቀርቶ በቁጥቋጦው መካከል በአንድ መልአክ አማካኝነት ሙሴን ባነጋገረ ጊዜ በቁጥቋጦው ዙሪያ ያለው መሬት ጭምር ቅዱስ ሆኖ ነበር።—ዘጸአት 3:5

9 ፍጽምና የሌላቸው ሰዎች ቅዱስ ሊሆኑ ይችላሉ? አዎን፣ በይሖዋ እርዳታ በአንጻራዊ ሁኔታም ቢሆን ቅዱስ ሊሆኑ ይችላሉ። አምላክ ለእስራኤላውያን ‘የተቀደሰ ሕዝብ’ ትሆኑልኛላችሁ ሲል ቃል ገብቶላቸው ነበር። (ዘጸአት 19:6) ቅዱስና ንጹሕ የሆነ የአምልኮ ሥርዓት ሰጥቷቸዋል። ቅድስና በሙሴ ሕግ ውስጥ በተደጋጋሚ ጊዜያት ጎላ ብሎ ተጠቅሷል።  እንዲያውም ሊቀ ካህናቱ “ቅድስና ለይሖዋ” የሚል ጽሑፍ የተቀረጸበት የሚያንጸባርቅ ወርቅ በጥምጣሙ ላይ ፊት ለፊት ያስር ነበር። (ዘጸአት 28:36 NW) ስለዚህ በአምልኳቸውም ሆነ በአኗኗራቸው ከፍተኛ የሆነ የንጽሕናና የቅድስና መሥፈርት አሟልተው መገኘት ይጠበቅባቸው ነበር። ይሖዋ “እኔ እግዚአብሔር አምላካችሁ ቅዱስ ነኝና እናንተ ቅዱሳን ሁኑ” ብሏቸዋል። (ዘሌዋውያን 19:2) እስራኤላውያን ፍጹም ባይሆኑም አቅማቸው በፈቀደ መጠን የአምላክን ምክር ተግባራዊ ለማድረግ እስከጣሩ ድረስ በአንጻራዊ ሁኔታ ቅዱስ ተደርገው ሊቆጠሩ ይችሉ ነበር።

10. በጥንት እስራኤላውያንና በዙሪያቸው በነበሩት አሕዛብ መካከል ቅድስናን በተመለከተ ምን ልዩነት ነበር?

10 የእስራኤላውያንን አምልኮ በዙሪያቸው ከነበሩት አሕዛብ አምልኮ ጋር በማነጻጸር ቅድስና በእስራኤል አምልኮ ውስጥ ምን ያህል የጎላ ሥፍራ እንደነበረው መረዳት ይቻላል። እነዚህ አረማዊ ብሔራት የሚያመልኳቸው ጣዖታት የሐሰት አማልክት ከመሆናቸውም በላይ በጨካኝነታቸው፣ በስግብግብነታቸውና በሴሰኝነታቸው የሚታወቁ ነበሩ። በተጨማሪም በማንኛውም ሁኔታ ረገድ ርኩስ ነበሩ። አምላኪዎቻቸውም እንዲሁ የረከሱ ናቸው። በዚህም ምክንያት ይሖዋ አገልጋዮቹን ጣዖታትን ከሚያመልኩ ከእነዚህ አሕዛብና ከረከሰ አምልኳቸው እንዲርቁ አስጠንቅቋቸዋል።—ዘሌዋውያን 18:24-28፤ 1 ነገሥት 11:1, 2

11. የይሖዋ ሰማያዊ ድርጅት ቅድስና (ሀ) በመላእክት (ለ) በሱራፌል (ሐ) በኢየሱስ ላይ እንደተንጸባረቀ የሚያሳየው ምንድን ነው?

11 ይሁንና የይሖዋ ምርጥ ሕዝብ የነበሩት የጥንቶቹ እስራኤላውያን ምንም ያህል ቢጥሩ የአምላክን ሰማያዊ ድርጅት ቅድስና በሚገባ ሊያንጸባርቁ አይችሉም። አምላክን በታማኝነት የሚያገለግሉ በሚሊዮን የሚቆጠሩ መላእክት ‘አእላፋት ቅዱሳን’ ተብለው ተጠርተዋል። (ዘዳግም 33:2፤ ይሁዳ 14) እነዚህ መንፈሳዊ ፍጥረታት ጥርት ያለና ብሩህ የሆነውን የአምላክ ቅድስና በሚገባ ያንጸባርቃሉ። ከዚህም በተጨማሪ ኢሳይያስ በራእይ የተመለከታቸውን ሱራፌል አስታውስ። እነዚህ ኃያል መንፈሳዊ ፍጥረታት ያሰሙት መዝሙር የይሖዋን ቅድስና በመላው አጽናፈ ዓለም በማስተጋባት ረገድ ትልቅ ሚና እንደሚጫወቱ ያሳያል። ይሁን  እንጂ ከእነዚህ መንፈሳዊ ፍጥረታት ሁሉ በላቀ ደረጃ የይሖዋን ቅድስና የሚያንጸባርቀው የአምላክ አንድያ ልጅ የሆነው ኢየሱስ ነው። ስለሆነም “የእግዚአብሔር ቅዱስ” ተብሎ መጠራቱ የተገባ ነው።—ዮሐንስ 6:68, 69 አ.መ.ት

ቅዱስ ስም፣ ቅዱስ መንፈስ

12, 13. (ሀ) የአምላክ ስም ቅዱስ መባሉ ተገቢ የሆነው ለምንድን ነው? (ለ) የአምላክ ስም መቀደስ ያስፈለገው ለምንድን ነው?

12 ከቅድስና ጋር በተያያዘ ስለ አምላክ ስምስ ምን ለማለት ይቻላል? በምዕራፍ 1 ላይ እንዳየነው ይህ ስም ተራ መጠሪያ ወይም ስያሜ አይደለም። ይሖዋን ከነሙሉ ባሕርያቱ የሚወክል ስም ነው። በመሆኑም መጽሐፍ ቅዱስ የአምላክ ‘ስም ቅዱስ’ እንደሆነ ይናገራል። (ኢሳይያስ 57:15) የሙሴ ሕግ የአምላክን ስም የሰደበ ሰው እንዲገደል ያዝ ነበር። (ዘሌዋውያን 24:16) እንዲሁም ኢየሱስ ባስተማረው ጸሎት ላይ “በሰማያት የምትኖር አባታችን ሆይ፣ ስምህ ይቀደስ” በማለት በመጀመሪያ የጠቀሰው የአምላክን ስም ቅድስና እንደሆነ ልብ በል። (ማቴዎስ 6:9) አንድን ነገር መቀደስ ማለት ለአንድ ዓላማ መለየትና ልዩ ክብር መስጠት ማለት ነው። ይሁንና ንጹሕ የሆነው የአምላክ ስም መቀደስ ያስፈለገው ለምንድን ነው?

13 በአምላክ ላይ የተነዛው የሐሰት ወሬ ቅዱስ ስሙን አጉድፎታል። ሰይጣን በኤደን ውስጥ የተናገረው ውሸት ይሖዋ ጨቋኝ ገዢ ነው የሚል መልእክት የሚያስተላልፍ ነው። (ዘፍጥረት 3:1-5) የዚህ የረከሰ ዓለም ገዢ የሆነው ሰይጣን ከዚያን ጊዜ ጀምሮ አምላክን በተመለከተ ብዙ የሐሰት ወሬ እንዲነዛ አድርጓል። (ዮሐንስ 8:44፤ 12:31፤ ራእይ 12:9) የተለያዩ ሃይማኖቶች አምላክን አምባገነን፣ የማይቀረብ ወይም ጨካኝ እንደሆነ አድርገው ይገልጹታል። በሚያካሂዷቸው ደም አፋሳሽ ጦርነቶች አምላክ እንደሚደግፋቸው ይናገራሉ። የአምላክ ድንቅ የፍጥረት ሥራዎች በአጋጣሚ የተገኙ ወይም በዝግመተ ለውጥ የመጡ ናቸው ይላሉ። የይሖዋ ስም አላግባብ ክፉኛ ጎድፏል። ስሙ መቀደስና የቀድሞ ክብሩን መጎናጸፍ አለበት። ስሙ የሚቀደስበትንና ሉዓላዊነቱ የሚረጋገጥበትን ጊዜ በጉጉት የምንጠባበቅ ከመሆኑም በላይ በዚህ ታላቅ የይሖዋ ዓላማ ውስጥ የበኩላችንን ድርሻ ማበርከት እንፈልጋለን።

14. የአምላክ መንፈስ፣ ቅዱስ ተብሎ የተጠራው ለምንድን ነው? መንፈስ ቅዱስን መሳደብ ይህን ያህል ከባድ ኃጢአት የሆነውስ ለምንድን ነው?

 14 ከዚህም በተጨማሪ በተደጋጋሚ ጊዜያት ቅዱስ እየተባለ የሚጠራ ከይሖዋ ተነጥሎ የማይታይ አንድ ሌላም ነገር አለ። ይህም የይሖዋ መንፈስ ወይም ኃይል ነው። (ዘፍጥረት 1:2) ይሖዋ በማንም ወይም በምንም የማይበገረውን ይህን ኃይሉን ዓላማውን ለማስፈጸም ይጠቀምበታል። አምላክ ማንኛውንም ነገር የሚያደርገው ቅዱስና ንጹሕ በሆነ መንገድ ስለሆነ ኃይሉ፣ መንፈስ ቅዱስ ወይም የቅድስና መንፈስ ተብሎ መጠራቱ የተገባ ነው። (ሉቃስ 11:13፤ ሮሜ 1:4) መንፈስ ቅዱስን መሳደብ የይሖዋን ዓላማ ሆን ብሎ እንደመጻረር ስለሚቆጠር እንዲህ ያለው ኃጢአት ሥርየት የለውም።—ማርቆስ 3:29

የይሖዋ ቅድስና ወደ እርሱ እንድንቀርብ የሚገፋፋን ለምንድን ነው?

15. የይሖዋ ቅድስና እርሱን እንድንፈራው ሊያደርገን የሚገባው ለምንድን ነው? ይህ ፍርሃት ከምን የሚመነጭ ነው?

15 እንግዲያው መጽሐፍ ቅዱስ የአምላክን ቅድስና አምላክን ከመፍራት ጋር አያይዞ የሚገልጸው ለምን እንደሆነ መረዳት አያዳግተንም። ለምሳሌ ያህል መዝሙር 99:3 [አ.መ.ት] “ታላቁንና አስፈሪውን ስምህን ይወድሱ፤ እርሱ ቅዱስ ነው” ይላል። ይሁን እንጂ ይህ ፍርሃት የሚያሸብር ነው ማለት አይደለም። ከዚህ ይልቅ ከጥልቅ አክብሮትና አድናቆት የሚመነጭ ነው። የይሖዋ ቅድስና ከእኛ እጅግ የላቀ በመሆኑ እንዲህ ዓይነት ፍርሃት ሊሰማን ይገባል። ይህ ቅድስና በጣም የጠራና ታላቅ ክብር የተላበሰ ቢሆንም ይሖዋን ፈርተን እንድንርቀው ሊያደርገን አይገባም። ከዚህ ይልቅ ስለ አምላክ ቅድስና ትክክለኛ ግንዛቤ ማግኘታችን ወደ እሱ እንድንቀርብ ይገፋፋናል። ለምን?

እንደ ውበት ሁሉ ቅድስናም ሰውን የመማረክ ኃይል አለው

16. (ሀ) ቅድስና ከውበት ጋር የሚዛመደው እንዴት ነው? በምሳሌ አስረዳ። (ለ) ስለ ይሖዋ የሚገልጹ ራእዮች ንጽሕናንና ብርሃንን ጎላ አድርገው የሚገልጹት እንዴት ነው?

16 በመጀመሪያ ደረጃ መጽሐፍ ቅዱስ ቅድስናን ከውበት ጋር ያዛምደዋል። (ኢሳይያስ 64:11) ውበት ሰውን የመማረክ ኃይል አለው። ለምሳሌ ያህል በገጽ 33 ላይ የሚገኘውን ሥዕል ተመልከት። ይህ ቦታ አያምርም? እንዲህ እንዲያምር ያደረገው ነገር ምንድን ነው? ውኃው እንዴት ኩልል ያለ እንደሆነ ተመልከት። ሰማዩ ጥርት ያለና ብሩህ ስለሆነ  አየሩም ንጹሕ መሆን አለበት። ጅረቱ የተበከለ፣ አካባቢው በቆሻሻ የተሞላና አየሩ በጭስ የተመረዘ ቢሆን ኖሮ ይህ ቦታ እንደማይማርከንና ጭራሽ እዚያ አካባቢ መድረስ እንደሚቀፈን የታወቀ ነው። ንጽሕናና የብርሃን ድምቀት የውበት መገለጫዎች ናቸው። እነዚሁ ነገሮች የይሖዋን ቅድስናም ለመግለጽ ሊያገለግሉ ይችላሉ። ስለ ይሖዋ የሚገልጹ ራእዮች እጅግ የሚመስጡ መሆናቸው ምንም አያስደንቅም። የቅዱሱ አምላካችን ውበት ብርሃን የሚፈነጥቅ፣ እንደ ከበሩ ድንጋዮች የሚያብለጨልጭ፣ እንደ ውድ ማዕድናት የሚያንጸባርቅና እንደ እሳት ፀዳል የደመቀ ነው።—ሕዝቅኤል 1:25-28፤ ራእይ 4:2, 3

17, 18. (ሀ) ኢሳይያስ ያየው ራእይ መጀመሪያ ላይ ምን ስሜት አሳደረበት? (ለ) ይሖዋ በአንድ መልአክ አማካኝነት ኢሳይያስን ያጽናናው እንዴት ነው? መልአኩ ካደረገውስ ነገር ምን እንገነዘባለን?

17 ይሁን እንጂ አምላክ ቅዱስ መሆኑ ራሳችንን ዝቅ አድርገን እንድንመለከት ሊያደርገን ይገባል? አዎን፣ ከይሖዋ አንጻር ስንታይ እዚህ ግቡ የምንባል አይደለንም። ታዲያ ይህን መገንዘባችን ከእርሱ እንድንርቅ ያደርገናል? ሱራፌል የይሖዋን ቅድስና ባወጁበት ጊዜ ኢሳይያስ ምን ተሰምቶት እንደነበር ተመልከት። “እኔም:- ከንፈሮቼ የረከሱብኝ ሰው በመሆኔ፣ ከንፈሮቻቸውም በረከሱባቸው ሕዝብ መካከል በመቀመጤ ዓይኖቼ የሠራዊትን ጌታ ንጉሡን እግዚአብሔርን ስለ አዩ ጠፍቻለሁና ወዮልኝ! አልሁ።” (ኢሳይያስ 6:5) አዎን፣ ወደር የሌለው የይሖዋ ቅድስና ኢሳይያስ ምን ያህል ኃጢአተኛና ፍጽምና የጎደለው እንደሆነ እንዲሰማው አድርጎታል። ይህ ታማኝ የአምላክ አገልጋይ መጀመሪያ ላይ የተስፋ መቁረጥ ስሜት አድሮበት ነበር። ይሁንና ይሖዋ ዝም ብሎ አልተመለከተውም።

18 ከሱራፌልም አንዱ እየበረረ መጥቶ ነቢዩን አጽናናው። እንዴት? መልአኩ ከመሠዊያው ላይ ፍም ወስዶ የኢሳይያስን ከንፈር በፍሙ ዳሰሰው። ታዲያ ይህ ያቃጥለዋል እንጂ እንዴት ያጽናናዋል ብለህ ታስብ ይሆናል። ይሁን እንጂ ይህ ምሳሌያዊ ትርጉም ያለው ራእይ መሆኑን ማስታወስ ይኖርብሃል። ታማኝ አይሁዳዊ የነበረው ኢሳይያስ የኃጢአት ስርየት ለማግኘት በቤተ መቅደሱ መሠዊያ ላይ በየዕለቱ መሥዋዕቶች እንደሚቀርቡ ያውቃል። በተጨማሪም ነቢዩ ፍጽምና የጎደለውና ‘ከንፈሮቹ የረከሱ’ ቢሆንም ከኃጢአቱ መንጻትና በአምላክ ፊት ሞገስ ማግኘት  እንደሚችል መልአኩ ፍቅራዊ በሆነ መንገድ ገልጾለታል። * ይሖዋ ፍጽምና የጎደለውን ኃጢአተኛ ሰው ቢያንስ በአንጻራዊ ሁኔታ እንደ ቅዱስ አድርጎ ለመመልከት ፈቃደኛ እንደነበር መረዳት ይቻላል።—ኢሳይያስ 6:6, 7

19. ምንም እንኳ ፍጹማን ባንሆንም በአንጻራዊ ሁኔታ ቅዱስ መሆን የምንችለው እንዴት ነው?

19 ዛሬም ሁኔታው ተመሳሳይ ነው። በኢየሩሳሌም ቤተ መቅደስ ይቀርቡ የነበሩት መሥዋዕቶች በሙሉ ኢየሱስ በ33 ከክርስቶስ ልደት በኋላ ላቀረበው ከሁሉ የላቀ ፍጹም መሥዋዕት ጥላ ነበሩ። (ዕብራውያን 9:11-14) ከልብ ንስሐ ገብተን ከተሳሳተ ጎዳና ከተመለስንና በዚህ መሥዋዕት ካመንን ምሕረት እናገኛለን። (1 ዮሐንስ 2:2) እንዲህ በማድረግ እኛም በአምላክ ፊት ሞገስ የሚያስገኝ ንጹሕ አቋም መያዝ እንችላለን። በመሆኑም ሐዋርያው ጴጥሮስ “‘እኔ ቅዱስ ነኝና እናንተም ቅዱሳን ሁኑ’ ተብሎ ተጽፎአል” ሲል አሳስቦናል። (1 ጴጥሮስ 1:16 አ.መ.ት) ይሁን እንጂ ይሖዋ የእኔን ያህል ቅዱስ መሆን አለባችሁ እንዳላለ ልብ በል። ከአቅማችን በላይ የሆነ ነገር እንድናደርግ አይጠብቅብንም። (መዝሙር 103:13, 14) ከዚህ ይልቅ እሱ ቅዱስ በመሆኑ እኛም ቅዱስ  እንድንሆን ይፈልጋል። ምንም እንኳ ፍጹማን ባንሆንም አቅማችን የሚፈቅደውን ያህል “እንደ ተወደዱ ልጆች” እርሱን ለመምሰል እንጥራለን። (ኤፌሶን 5:1) ስለዚህ ቅድስና በአንድ ጀንበር የሚገኝ ሳይሆን ቀስ በቀስ የምናዳብረው ባሕርይ ነው። በመንፈሳዊ እድገት የምናደርግ ከሆነ ከዕለት ወደ ዕለት “ቅድስናን ፍጹም እያደረግን” እንሄዳለን።—2 ቆሮንቶስ 7:1

20. (ሀ) በቅዱሱ አምላካችን ፊት ንጹሕ መሆን እንደምንችል ማወቃችን ጠቃሚ የሆነው ለምንድን ነው? (ለ) ኢሳይያስ ኃጢአቱ እንደተሠረየለት ማወቁ አመለካከቱን እንዲለውጥ ያደረገው እንዴት ነው?

20 ይሖዋ ንጹሕና ጽድቅ የሆነውን ነገር ይወድዳል። በአንጻሩ ደግሞ ኃጢአትን ይጠላል። (ዕንባቆም 1:13) ይሁን እንጂ እኛን አይጠላንም። ይሖዋ ለኃጢአት ያለውን አመለካከት በመኮረጅ ክፉውን የምንጠላና መልካሙን የምንወድድ እንዲሁም የክርስቶስ ኢየሱስን ፈለግ ለመከተል የምንጥር ከሆነ ይሖዋ ኃጢአታችንን ይቅር ይለናል። (አሞጽ 5:15፤ 1 ጴጥሮስ 2:21) በቅዱሱ አምላካችን ፊት ንጹሕ መሆን እንደምንችል መገንዘባችን በአመለካከታችን ላይ ትልቅ ለውጥ ያመጣል። ኢሳይያስ የይሖዋን ቅድስና ሲያይ የእሱ ኃጢአት ጎልቶ እንደታየው አስታውስ። “ወዮልኝ” በማለት የተሰማውን ስሜት ገልጿል። ይሁንና ኃጢአቱ እንደተሠረየለት ሲያውቅ አመለካከቱ ተለወጠ። ይሖዋ አንድ ተልእኮ የሚያከናውንለት ፈቃደኛ ሰው በፈለገ ጊዜ ኢሳይያስ ተልእኮው ምን እንደሆነ ባያውቅም እንኳ “እነሆኝ፣ እኔን ላከኝ” በማለት ለዚህ ሥራ ዝግጁ መሆኑን ወዲያውኑ ገልጿል።—ኢሳይያስ 6:5-8

21. የቅድስናን ባሕርይ የማዳበር ችሎታ እንዳለን እርግጠኞች መሆን የምንችለው ለምንድን ነው?

21 ቅዱስ በሆነው አምላክ አምሳያ የተፈጠርን እንደመሆናችን መጠን በሥነ ምግባር መስፈርቶች የመመራትና መንፈሳዊ ነገሮችን የማስተዋል ችሎታ ተሰጥቶናል። (ዘፍጥረት 1:26) በመሆኑም ሁላችንም ቅድስናን የማንጸባረቅ ችሎታ አለን። የቅድስናን ባሕርይ ለማዳበር በምናደርገው ጥረት ይሖዋ እኛን ለመርዳት ምንጊዜም ዝግጁ ነው። እንዲህ ስናደርግ ወደ ቅዱሱ አምላካችን ይበልጥ እየቀረብን እንሄዳለን። ከዚህም በተጨማሪ በሚቀጥሉት ምዕራፎች ላይ የይሖዋን ባሕርያት በምንመረምርበት ጊዜ ወደ እርሱ እንድንቀርብ የሚገፋፉ በርካታ አሳማኝ ምክንያቶች እናገኛለን!

^ አን.18 ብዙውን ጊዜ በመጽሐፍ ቅዱስ ውስጥ ከንፈር በምሳሌያዊ ሁኔታ ንግግርን ወይም ቋንቋን ለማመልከት ስለሚሠራበት ‘ከንፈሮቼ ረከሱ’ የሚለው አገላለጽ ተስማሚ ነው። ፍጽምና የጎደላቸው ሰዎች አብዛኛውን ጊዜ ለኃጢአት የሚዳረጉት በአንደበት አጠቃቀማቸው ነው።—ምሳሌ 10:19፤ ያዕቆብ 3:2, 6