በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

ከመጽሐፍ ቅዱስ ታሪኮች ምን ትማራለህ?

 ትምህርት 80

ኢየሱስ አሥራ ሁለት ሐዋርያትን መረጠ

ኢየሱስ አሥራ ሁለት ሐዋርያትን መረጠ

ኢየሱስ ለአንድ ዓመት ተኩል ያህል ከሰበከ በኋላ ትልቅ ውሳኔ ማድረግ የሚጠይቅ ሁኔታ አጋጠመው። የቅርብ ረዳቶቹ ሆነው ከእሱ ጋር እንዲሠሩ የሚመርጠው እነማንን ይሆን? በክርስቲያን ጉባኤ ውስጥ አመራር እንዲሰጡ የሚያሠለጥነውስ እነማንን ነው? ኢየሱስ እነዚህን ውሳኔዎች ለማድረግ የይሖዋ እርዳታ እንደሚያስፈልገው ተሰማው። ስለዚህ ብቻውን ወደ አንድ ተራራ ሄደና ሌሊቱን ሙሉ ሲጸልይ አደረ። ከዚያም ጠዋት ላይ ከደቀ መዛሙርቱ መካከል የተወሰኑትን ጠራና 12 ሐዋርያቱን መረጠ። ከሐዋርያቱ መካከል የእነማንን ስም ታስታውሳለህ? የኢየሱስ 12 ሐዋርያት ጴጥሮስ፣ እንድርያስ፣ ያዕቆብ፣ ዮሐንስ፣ ፊልጶስ፣ በርቶሎሜዎስ፣ ቶማስ፣ ማቴዎስ፣ የእልፍዮስ ልጅ ያዕቆብ፣ ታዴዎስ፣ ስምዖንና የአስቆሮቱ ይሁዳ ነበሩ።

እንድርያስ፣ ጴጥሮስ፣ ፊልጶስ፣ ያዕቆብ

አሥራ ሁለቱ ሐዋርያት ከኢየሱስ ጋር አብረው ይጓዙ ነበር። ኢየሱስ ካሠለጠናቸው በኋላ ደግሞ ብቻቸውን እንዲሰብኩ ላካቸው። ይሖዋም አጋንንትን ለማስወጣትና የታመሙ ሰዎችን ለመፈወስ የሚያስችል ኃይል ሰጣቸው።

ዮሐንስ፣ ማቴዎስ፣ በርቶሎሜዎስ፣ ቶማስ

ኢየሱስ አሥራ ሁለቱን ሐዋርያት ‘ወዳጆቼ’ ብሎ ይጠራቸው ነበር፤ እንዲሁም ያምናቸው ነበር። ፈሪሳውያን የኢየሱስን ሐዋርያት ያልተማሩና ተራ ሰዎች አድርገው ይመለከቷቸው ነበር። ኢየሱስ ግን ለሐዋርያቱ የሚያስፈልጋቸውን  ሥልጠና ሰጥቷቸዋል። በተጨማሪም በኢየሱስ ሕይወት ውስጥ ወሳኝ በሆኑ ጊዜያት ከጎኑ አልተለዩም፤ ለምሳሌ ከመሞቱ በፊትና ከሞት ከተነሳ በኋላ አብረውት ነበሩ። ከአሥራ ሁለቱ ሐዋርያት መካከል አብዛኞቹ ልክ እንደ ኢየሱስ የገሊላ ሰዎች ነበሩ። ከዚህም ሌላ አንዳንዶቹ ሐዋርያት አግብተው ነበር።

የእልፍዮስ ልጅ ያዕቆብ፣ የአስቆሮቱ ይሁዳ፣ ታዴዎስ፣ ስምዖን

ሐዋርያቱ ፍጹም ሰዎች አልነበሩም፤ በመሆኑም ስህተት የሠሩባቸው ጊዜያት አሉ። አልፎ አልፎ ሳያስቡ ይናገሩ እንዲሁም የተሳሳቱ ውሳኔዎችን ያደርጉ ነበር። አንዳንድ ጊዜ ደግሞ የችኩልነት ባሕርይ ይታይባቸው ነበር። ‘ከመካከላችን የሚበልጠው ማን ነው?’ ብለው የተከራከሩበት ጊዜም ነበር። ሆኖም ሐዋርያቱ ይሖዋን የሚወዱ ጥሩ ሰዎች ነበሩ። የክርስቲያን ጉባኤ የመጀመሪያ አባላት ከመሆናቸውም ሌላ ኢየሱስ ከሞተ በኋላ በጉባኤው ውስጥ ትልቅ ሚና ተጫውተዋል።

“ከአባቴ የሰማሁትን ነገር ሁሉ ስላሳወቅኳችሁ ወዳጆች ብዬ ጠርቻችኋለሁ።”—ዮሐንስ 15:15