በቀጥታ ወደ ዋናው ጉዳይ ግባ

በቀጥታ ወደ ንዑስ መምረጫው ሂድ

በቀጥታ ወደ ርዕስ ማውጫው ሂድ

የይሖዋ ምሥክሮች

አማርኛ

በእምነታቸው ምሰሏቸው

 ምዕራፍ አሥራ ሰባት

“እነሆ፣ እኔ የይሖዋ ባሪያ ነኝ!”

“እነሆ፣ እኔ የይሖዋ ባሪያ ነኝ!”

1, 2. (ሀ) አንድ እንግዳ ሰው ለማርያም ምን ዓይነት ሰላምታ ሰጣት? (ለ) ማርያም ከባድ ውሳኔ ማድረግ የሚጠይቅ ሁኔታ ፊቷ የተደቀነው እንዴት ነው?

ማርያም ወደ ቤቷ የገባውን እንግዳ በድንጋጤ ትኩር ብላ ተመለከተችው። እንግዳው የመጣው አባቷን ወይም እናቷን ፈልጎ አይደለም። ከዚህ ይልቅ ለማነጋገር የፈለገው እሷን ነው! የናዝሬት ነዋሪ እንዳልሆነ እርግጠኛ ነች። እንደ ናዝሬት ባለ ትንሽ ከተማ ውስጥ ፀጉረ ልውጥ የሆነ ሰው በቀላሉ ተለይቶ ይታወቃል። ማንኛውም ግለሰብ፣ እንግዳው ከሌሎች ለየት ያለ መሆኑን በቀላሉ ማወቅ አያዳግተውም። ሰላምታውም ቢሆን ያልተለመደ ዓይነት ነበር፤ እንዲህ አላት፦ “እጅግ የተወደድሽ ሆይ፣ ሰላም ለአንቺ ይሁን፤ ይሖዋ ከአንቺ ጋር ነው።”—ሉቃስ 1:26-28ን አንብብ።

2 መጽሐፍ ቅዱስ ማርያምን የሚያስተዋውቀን በዚህ መንገድ ነው፤ ማርያም በገሊላ በምትገኘው በናዝሬት ከተማ ውስጥ የሚኖረው የሄሊ ልጅ ነች። ዘገባው የሚጀምረው ማርያም አንድ ከባድ ውሳኔ ማድረግ የሚጠይቅ ሁኔታ ከፊቷ እንደተደቀነ በመግለጽ ነው። ማርያም ዮሴፍ ለሚባል በአናጢነት ሙያ ለሚተዳደር ሰው ታጭታ ነበር፤ ይህ ሰው ሀብታም ባይሆንም እንኳ በአምላክ ላይ ጠንካራ እምነት ነበረው። በመሆኑም ማርያም የዮሴፍ ረዳት በመሆን ቀላል ሕይወት ስትመራና ከባለቤቷ ጋር ሆና ልጆችን ስታሳድግ ሳይታያት አይቀርም። ይሁን እንጂ ይህ እንግዳ ከአምላክ የተሰጣትን ኃላፊነት ሊነግራት ድንገት ወደ እሷ መጣ፤ ይህ ኃላፊነት ደግሞ በሕይወቷ ላይ ከፍተኛ ለውጥ የሚያስከትል ነው።

3, 4. ስለ ማርያም ትክክለኛውን ነገር ለማወቅ በየትኞቹ ነገሮች ላይ ማተኮር አያስፈልገንም? ከዚህ ይልቅ በምን ነገር ላይ ትኩረት ማድረግ ይኖርብናል?

3 መጽሐፍ ቅዱስ፣ ስለ ማርያም የሚናገረው ነገር ጥቂት መሆኑ ብዙዎችን ያስገርም ይሆናል። ስለ ቤተሰቧም ሆነ ስለ ባሕርይዋ ብዙም የማይናገር ከመሆኑም ሌላ ስለ መልኳም ምንም የሚገልጸው ነገር የለም። ያም ሆኖ የአምላክ ቃል ስለ እሷ የሚናገረው ነገር ማንነቷን በተመለከተ በቂ ግንዛቤ ይሰጠናል።

4 ስለ ማርያም ትክክለኛውን ነገር ለማወቅ በተለያዩ ሃይማኖቶች ውስጥ ስለ ማንነቷ ከሚነገሩት በርካታ ግምታዊ አመለካከቶች አሻግረን መመልከት ይኖርብናል። በመሆኑም አሁን የማርያምን መልክ ይገልጻሉ ተብለው የሚሠሩትን ስፍር ቁጥር የሌላቸው ሥዕሎችና ቅርጻ ቅርጾች ወይም ደግሞ “ወላዲተ አምላክ” እና “የሰማይ ንግሥት” እንደሚሉት ያሉ ስሞችን በመስጠት ይህችን ትሑት ሴት ከሚገባው በላይ ከፍ ከፍ የሚያደርጉትን ውስብስብ ሃይማኖታዊ ትምህርቶችም ሆነ ቀኖናዎች ወደ ጎን ትተን  መጽሐፍ ቅዱስ ስለ ማርያም በሚነግረን ነገር ላይ ብቻ እናተኩር። መጽሐፍ ቅዱስ ስለ እምነቷና የእሷን ምሳሌ መከተል ስለምንችልበት መንገድ በዋጋ ሊተመን የማይችል ጥልቅ እውቀት ይሰጠናል።

አንድ መልአክ ማርያምን አነጋገራት

5. (ሀ) ማርያም ለገብርኤል ሰላምታ ከሰጠችው ምላሽ ምን ትምህርት ልናገኝ እንችላለን? (ለ) ከማርያም ምን ጠቃሚ ትምህርት እናገኛለን?

5 ማርያምን ሊጎበኛት የመጣው እንግዳ አንድ ተራ ሰው ሳይሆን መልአኩ ገብርኤል ነው። መልአኩ፣ ማርያምን “እጅግ የተወደድሽ ሆይ” ብሎ ሲጠራት “በጣም ደንግጣ” የነበረ ሲሆን ያልተለመደ ሰላምታውም ግራ አጋብቷት ነበር። (ሉቃስ 1:29) ማርያም እጅግ የተወደደችው ወይም የተለየ ሞገስ ያገኘችው በማን ዘንድ ነበር? ማርያም በሰዎች ዘንድ የተለየ ሞገስ አገኛለሁ ብላ እንደማትጠብቅ ግልጽ ነው። መልአኩም ቢሆን እየተናገረ ያለው በይሖዋ አምላክ ዘንድ ሞገስ ስለማግኘቷ ነበር። ይህ ደግሞ ለእሷ ትልቅ ነገር ነው። ያም ሆኖ የአምላክን ሞገስ ማግኘቷ እንድትኮራ አላደረጋትም። በመሆኑም ከማርያም ትልቅ ትምህርት እናገኛለን፤ እኛም ዘወትር የአምላክን ሞገስ ለማግኘት ጥረት ማድረግ ይኖርብናል እንጂ አንዴ የእሱን ሞገስ አግኝቻለሁ በሚል የኩራት መንፈስ ሊያድርብን አይገባም። አምላክ ትዕቢተኞችን ይቃወማል፤ ትሑታንን ግን ይወዳቸዋል እንዲሁም ይረዳቸዋል።—ያዕ. 4:6

ማርያም የአምላክን ሞገስ ማግኘቷ እንድትኮራ አላደረጋትም

6. መልአኩ ለማርያም ምን መብት የማግኘት አጋጣሚ ዘረጋላት?

6 መልአኩ፣ እጅግ ታላቅ መብት የማግኘት አጋጣሚ እንደተዘረጋላት ስላበሰራት ማርያም እንዲህ ዓይነቱን ትሕትና ማሳየቷ በእርግጥም አስፈላጊ ነበር። ገብርኤል፣ የምትወልደው ልጅ ከሰው ልጆች ሁሉ እጅግ ታላቅ እንደሚሆን ለማርያም ነገራት። እንዲህ አላት፦ “ይሖዋ አምላክም የአባቱን የዳዊትን ዙፋን ይሰጠዋል፤ በያዕቆብ ቤትም ላይ ለዘላለም ንጉሥ ሆኖ ይገዛል፤ መንግሥቱም መጨረሻ የለውም።” (ሉቃስ 1:32, 33) አምላክ፣ ከአንድ ሺህ ዓመት በፊት ለዳዊት የገባለትን ቃል ይኸውም ከዘሮቹ አንዱ ለዘላለም እንደሚነግሥ የሚናገረውን ሐሳብ ማርያም እንደምታውቅ ምንም ጥርጥር የለውም። (2 ሳሙ. 7:12, 13) በመሆኑም የምትወልደው ልጅ የአምላክ ሕዝቦች ለዘመናት ሲጠባበቁት የነበረውን መሲሕ ነው!

መልአኩ ገብርኤል ለማርያም እጅግ ታላቅ መብት የማግኘት አጋጣሚ ዘረጋላት

7. (ሀ) ማርያም የጠየቀችው ጥያቄ ስለ እሷ ምን ይጠቁማል? (ለ) በዛሬው ጊዜ ያሉ ወጣቶች ከማርያም ምን ሊማሩ ይችላሉ?

7 በተጨማሪም መልአኩ፣ ልጇ ‘የልዑሉ ልጅ እንደሚባል’ ነገራት። አንዲት ሴት እንዴት የአምላክን ልጅ ልትወልድ ትችላለች? ደግሞስ ማርያም እንዴት ልጅ ልትወልድ ትችላለች? ማርያም ለዮሴፍ ታጭታ የነበረ ቢሆንም ገና አልተጋቡም ነበር። በመሆኑም “እኔ ከወንድ ጋር ግንኙነት አድርጌ ስለማላውቅ ይህ እንዴት ሊሆን ይችላል?” በማለት መልአኩን በግልጽ ጠየቀችው። (ሉቃስ 1:34) እዚህ ላይ ማርያም ድንግል መሆኗን ለመናገር እንዳላፈረች ልብ በል። ከዚህ ይልቅ ንጽሕናዋን በመጠበቋ  ኩራት ተሰምቷት ነበር። በዛሬው ጊዜ ያሉ በርካታ ወጣቶች ድንግልናቸውን ለማስወሰድ የሚቸኩሉ ከመሆኑም ሌላ እንደዚያ ባላደረጉት ላይ ያፌዛሉ። ዓለም በእርግጥም ተለውጧል። ይሖዋ ግን አልተለወጠም። (ሚል. 3:6) በማርያም ዘመን እንደነበረው ሁሉ ዛሬም አምላክ የሥነ ምግባር መሥፈርቶቹን በጥብቅ የሚከተሉ ሰዎችን ከፍ አድርጎ ይመለከታቸዋል።—ዕብራውያን 13:4ን አንብብ።

8. ማርያም ፍጽምና የጎደላት ሆና ሳለ እንዴት ፍጹም የሆነ ልጅ መውለድ ትችላለች?

8 ማርያም የአምላክ ታማኝ አገልጋይ ብትሆንም ፍጹም አልነበረችም። ታዲያ፣ ፍጹም የሆነ ልጅ ያውም የአምላክን ልጅ እንዴት መውለድ ትችላለች? ገብርኤል እንዲህ አላት፦ “መንፈስ ቅዱስ በአንቺ ላይ ይመጣል፤ የልዑሉም ኃይል በአንቺ ላይ ያርፋል። ስለሆነም የሚወለደው ልጅ ቅዱስ፣ የአምላክ ልጅ ይባላል።” (ሉቃስ 1:35) ቅዱስ ሲባል “ንጹሕ” እና “የጠራ” ማለት ነው። ሰዎች ለልጆቻቸው ኃጢአትን እንደሚያስተላልፉ የታወቀ ነው። በዚህ ወቅት ግን ይሖዋ አንድ አስደናቂ ተአምር ሊፈጽም ነው። ይሖዋ በሰማይ የሚኖረውን የልጁን ሕይወት ወደ ማርያም ማህፀን ያዛውራል፤ እንዲሁም ልጁን ከማንኛውም ኃጢአት ለመጠበቅ ቅዱስ መንፈሱ በማርያም ላይ ‘እንዲያርፍ’ ያደርጋል። ታዲያ ማርያም መልአኩ የነገራትን አመነች? ምን ምላሽስ ሰጠች?

ማርያም ለገብርኤል የሰጠችው መልስ

9. (ሀ) አንዳንድ ሰዎች ስለ ማርያም የሚገልጸውን ዘገባ መጠራጠራቸው ስህተት የሆነው ለምንድን ነው? (ለ) ገብርኤል የማርያምን እምነት ያጠናከረላት እንዴት ነው?

9 የሕዝበ ክርስትና ሃይማኖታዊ ምሁራንን ጨምሮ አንዳንድ ሰዎች ድንግል የሆነች አንዲት ሴት ልጅ መውለድ ትችላለች የሚለውን ሐሳብ ማመን ይቸግራቸዋል። እነዚህ ሰዎች ከፍተኛ እውቀት ቢኖራቸውም ለመረዳት ቀላል የሆነውን ይህን ሐቅ ማስተዋል ተስኗቸዋል። ገብርኤል እንደገለጸው “አምላክ የተናገረው ቃል በምንም ዓይነት ሳይፈጸም አይቀርም።” (ሉቃስ 1:37) ማርያም ጠንካራ እምነት ስለነበራት ገብርኤል የነገራትን ሁሉ ሳትጠራጠር አምናለች። ይሁን እንጂ ያመነችው እንዲሁ በጭፍን አልነበረም። ማመዛዘን እንደሚችል እንደ ማንኛውም ሰው እሷም ለእምነቷ መሠረት የሚሆን ማስረጃ ማግኘት አስፈልጓታል። ከዚያም ገብርኤል ተጨማሪ ማስረጃ ሰጣት። አረጋዊት ስለነበረችውና ለብዙ ዘመን መሃን ሆና ስለኖረችው ስለ ዘመዷ ስለ ኤልሳቤጥ ነገራት። አምላክ ይህች ሴት በተአምር እንድትጸንስ አድርጎ ነበር!

10. ማርያም የተሰጣትን መብት መቀበል ለእሷ ቀላል ነበር ብለን ማሰብ የማይኖርብን ለምንድን ነው?

10 ታዲያ አሁን ማርያም ምን ታደርግ ይሆን? ማርያም ትልቅ ኃላፊነት የተጣለባት ሲሆን አምላክ በገብርኤል በኩል የነገራትን ሁሉ እንደሚፈጽም ማስረጃ አግኝታለች። ይሁንና እንዲህ ያለውን መብት መቀበል ለእሷ ቀላል ነበር ብለን ማሰብ አይኖርብንም። በአንድ በኩል ለዮሴፍ ታጭታ ስለነበር ከእሱ ጋር ስላላት ግንኙነት ማሰብ ነበረባት። ዮሴፍ ማርገዟን ሲያውቅ እሷን ለማግባት ፈቃደኛ ይሆናል? በሌላ በኩል ደግሞ የተጣለባት ኃላፊነት ራሱ ከባድ ነው። ማርያም በማህፀኗ የምትሸከመው ከፍጥረታት ሁሉ እጅግ ታላቅ የሆነውን የአምላክን ውድ ልጅ ነው! ይህን ልጅ፣ ራሱን ከጉዳት መከላከል ከማይችልበት ከሕፃንነቱ ጀምራ መንከባከብና ከዚህ ክፉ ዓለም መጠበቅ ነበረባት። ይህ በእርግጥም ከባድ ኃላፊነት ነው!

11, 12. (ሀ) ጠንካራና ታማኝ የሆኑ ሰዎችም እንኳ አምላክ ለሰጣቸው አስቸጋሪ የሚመስል ተልእኮ ምን ምላሽ ሰጥተዋል? (ለ) ማርያም ለገብርኤል የሰጠችው ምላሽ ስለ እሷ ምን ይጠቁማል?

 11 መጽሐፍ ቅዱስ፣ ጠንካራና ታማኝ የሆኑ ሰዎችም እንኳ አምላክ የሰጣቸውን አስቸጋሪ የሚመስል ተልእኮ ለመቀበል ያቅማሙበት ጊዜ እንደነበር ይገልጻል። ለምሳሌ ያህል፣ ሙሴ አንደበተ ርቱዕ እንዳልሆነ በመግለጽ የአምላክ ቃል አቀባይ ሆኖ ለማገልገል አሻፈረኝ ብሎ ነበር። (ዘፀ. 4:10) ኤርምያስም ቢሆን “ገና ሕፃን ልጅ ነኝ” በማለት አምላክ የሰጠውን ተልእኮ ለመቀበል ብቁ እንዳልሆነ ገልጿል። (ኤር. 1:6) ዮናስ ደግሞ አምላክ የሰጠውን ተልእኮ ላለመፈጸም ሲል ሸሽቷል! (ዮናስ 1:3) ማርያምስ ምን ታደርግ ይሆን?

12 ማርያም፣ ለገብርኤል “እነሆ፣ እኔ የይሖዋ ባሪያ ነኝ! እንደ ቃልህ ይሁንልኝ” በማለት የሰጠችውን ትሕትና እና ታዛዥነት የሚንጸባረቅበት መልስ በዛሬው ጊዜ ያሉ ብዙ ሰዎች ያውቁታል። (ሉቃስ 1:38) አንዲት ባሪያ ከአገልጋዮች ሁሉ ያነሰች ተደርጋ ትታይ የነበረ ሲሆን መላ ሕይወቷ በጌታዋ እጅ ነበር። ማርያም ጌታዋ የሆነውን ይሖዋን የምትመለከተው እንዲህ ነበር። ይሖዋ ጥበቃ እንደሚያደርግላት፣ ለታማኝ አገልጋዮቹ ታማኝ እንደሚሆን እንዲሁም ይህንን ከባድ ኃላፊነት ለመወጣት የምታደርገውን ጥረት እንደሚባርክላት ታውቅ ነበር።—መዝ. 18:25

ማርያም ታማኝ የሆነው አምላኳ ይሖዋ ጥበቃ እንደሚያደርግላት ታውቅ ነበር

13. አምላክ እንድናከናውነው የሰጠን ተልእኮ አስቸጋሪ ብሎም ፈጽሞ የማይቻል እንደሆነ ሲሰማን ከማርያም ምሳሌ ጠቃሚ ትምህርት ማግኘት የምንችለው እንዴት ነው?

13 አንዳንድ ጊዜ አምላክ፣ በእኛ አመለካከት አስቸጋሪ ብሎም ፈጽሞ የማይቻል የሚመስል ተግባር እንድናከናውን ይጠይቀን ይሆናል። ይሁንና ማርያም እንዳደረገችው ሁሉ እኛም በአምላክ እንድንታመንና ሕይወታችንን ሙሉ በሙሉ ለእሱ አደራ እንድንሰጥ የሚያነሳሱንን አሳማኝ ምክንያቶች በቃሉ ውስጥ አስፍሮልናል። (ምሳሌ 3:5, 6) ታዲያ እኛስ በአምላክ እንታመናለን? እንዲህ የምናደርግ ከሆነ በእሱ ላይ ያለንን እምነት ይበልጥ የሚያጠናክሩ ማስረጃዎችን በመስጠት ይባርከናል።

ኤልሳቤጥን ለመጠየቅ ሄደች

14, 15. (ሀ) ማርያም ኤልሳቤጥንና ዘካርያስን ለመጠየቅ በሄደች ጊዜ ይሖዋ የባረካት እንዴት ነው? (ለ) በሉቃስ 1:46-55 ላይ ተመዝግቦ የሚገኘው ማርያም የተናገረችው ሐሳብ ስለ እሷ ምን ይጠቁማል?

14 ገብርኤል፣ ስለ ኤልሳቤጥ የተናገረው ነገር ለማርያም ትልቅ ትርጉም ነበረው። ማርያም ያለችበትን ሁኔታ ከኤልሳቤጥ በተሻለ ማን ሊረዳ ይችላል? በመሆኑም ማርያም በፍጥነት በተራራማው አገር ወደምትገኝ አንዲት የይሁዳ ከተማ አቀናች፤ ይህ ጉዞ ምናልባት ሦስት ወይም አራት ቀናት ሊወስድ ይችላል። ማርያም፣ ወደ ኤልሳቤጥና ወደ ካህኑ ዘካርያስ ቤት ስትገባ ይሖዋ እምነቷን የሚያጠናክር ተጨማሪ ማስረጃ ሰጣት። ኤልሳቤጥ የማርያምን ሰላምታ ስትሰማ በማህፀኗ ውስጥ ያለው ጽንስ በደስታ ሲዘል ተሰማት። ከዚያም በመንፈስ ቅዱስ ተሞልታ ማርያምን “የጌታዬ እናት”  አለቻት። አምላክ፣ ማርያም የምትወልደው ልጅ ለኤልሳቤጥ ጌታዋ ማለትም መሲሕ እንደሚሆን ገልጦላት ነበር። ከዚህም በተጨማሪ ኤልሳቤጥ በመንፈስ ቅዱስ ተመርታ “ይህን ያመነች ደስተኛ ነች” በማለት ስላሳየችው ታዛዥነት ማርያምን አመስግናታለች። (ሉቃስ 1:39-45) አዎ፣ ይሖዋ ለማርያም የገባላት ቃል ሙሉ በሙሉ መፈጸሙ አይቀርም!

የማርያምና የኤልሳቤጥ ወዳጅነት ሁለቱንም ጠቅሟቸዋል

15 በመቀጠል ደግሞ ማርያም ተናገረች። ማርያም የተናገረችው ሐሳብ በአምላክ ቃል ውስጥ ተመዝግቦ ይገኛል። (ሉቃስ 1:46-55ን አንብብ።) ይህ ንግግር በመጽሐፍ ቅዱስ ውስጥ ሰፍረው ከሚገኙት ማርያም ከተናገረቻቸው ሐሳቦች ሁሉ ረጅሙ ሲሆን ስለ እሷም ብዙ ነገር ይጠቁመናል። ማርያም፣ የመሲሑ እናት እንድትሆን ለተሰጣት መብት ይሖዋን ለማወደስ የተጠቀመችባቸው ቃላት የአመስጋኝነትና የአድናቆት  መንፈስ እንዳላት ያሳያሉ። ይሖዋ ትዕቢተኞችንና ኃያላንን እንደሚያዋርድ እንዲሁም እሱን ለማገልገል የሚጥሩ የተናቁና ምስኪን ሰዎችን እንደሚረዳ የተናገረችው ሐሳብ የእምነቷን ጥንካሬ ያሳያል። ከዚህም በላይ ምን ያህል እውቀት እንደነበራት ይጠቁማል። እዚህ ላይ ማርያም ከ20 ጊዜ በላይ ከዕብራይስጥ ቅዱሳን መጻሕፍት ጠቅሳ እንደተናገረች ይገመታል! *

16, 17. (ሀ) ማርያምና ልጇ ያሳዩትን የትኛውን መንፈስ ልንኮርጅ ይገባል? (ለ) ማርያም ኤልሳቤጥን ሄዳ ስለመጠየቋ የሚገልጸው ዘገባ ምን ያስገነዝበናል?

16 ማርያም በአምላክ ቃል ላይ በጥልቅ ታሰላስል እንደነበር ግልጽ ነው። ያም ሆኖ ትሑት ስለነበረች የራሷን ሐሳብ ከመናገር ይልቅ ከቅዱሳን መጻሕፍት ለመጥቀስ መርጣለች። በወቅቱ በማህፀኗ ውስጥ የነበረው ልጅም ካደገ በኋላ “የማስተምረው ትምህርት የራሴ ሳይሆን ከላከኝ የመጣ ነው” ብሎ በመናገር የእሷ ዓይነት መንፈስ እንዳለው አሳይቷል። (ዮሐ. 7:16) እኛም ራሳችንን እንደሚከተለው እያልን መጠየቅ ይኖርብናል፦ ‘እኔስ ለአምላክ ቃል እንዲህ ያለ አክብሮት አለኝ? ወይስ የራሴን አመለካከትና ሐሳብ መናገር ይቀናኛል?’ ማርያም በዚህ ረገድ ያላት አቋም ግልጽ ነው።

17 ማርያም ኤልሳቤጥ ጋር ሦስት ወር የቆየች ሲሆን በእነዚህ ጊዜያት እርስ በርስ እንደተበረታቱ ጥርጥር የለውም። (ሉቃስ 1:56) ማርያም ኤልሳቤጥን ሄዳ ስለመጠየቋ የሚገልጸው ይህ አስደሳች ዘገባ ጥሩ ወዳጅነት ያለውን ጠቀሜታ እንድንገነዘብ ይረዳናል። እኛም አምላካችንን ይሖዋን ከልብ የሚወዱ ወዳጆችን ለማፍራት የምንጥር ከሆነ መንፈሳዊ እድገት እንደምናደርግና ይበልጥ ወደ እሱ እንደምንቀርብ እርግጠኞች መሆን እንችላለን። (ምሳሌ 13:20) በመጨረሻም ማርያም ወደ ቤቷ የምትመለስበት ጊዜ ደረሰ። ዮሴፍ ስላለችበት ሁኔታ ሲያውቅ ምን ይል ይሆን?

ማርያምና ዮሴፍ

18. ማርያም ለዮሴፍ ምን ነገረችው? እሱስ ምን ተሰማው?

18 ማርያም እርግዝናዋ እስኪታወቅ ድረስ ለዮሴፍ ሳትነግረው መቆየት አልፈለገችም። ሁኔታውን ለዮሴፍ መንገር እንዳለባት ግልጽ ነው። ይህን ከማድረጓ በፊት ግን ፈሪሃ አምላክ ያለው ይህ ጭምት ሰው ሁኔታውን ሲሰማ ምን ሊል እንደሚችል ሳታስብ አልቀረችም። ያም ሆኖ ጉዳዩን አንድም ሳታስቀር ነገረችው። ዮሴፍ ነገሩን ሲሰማ እጅግ እንደተረበሸ መገመት አያዳግትም። ይህ ሰው እጮኛው የምትነግረውን ነገር አምኖ ቢቀበል ደስ ባለው ነበር፤ ሆኖም ሁኔታው ሲታይ በእሱ ላይ ታማኝነት የጎደለው ድርጊት የፈጸመች ይመስላል። መጽሐፍ ቅዱስ፣ በወቅቱ በዮሴፍ አእምሮ ውስጥ ምን ሐሳብ ይመላለስ እንደነበር አይገልጽም። ይሁን እንጂ በዚያን ዘመን አንድ ወንድና ሴት ከተጫጩ እንደተጋቡ ተደርገው ይታዩ ስለነበር ሊፈታት እንደወሰነ ይናገራል። ሆኖም ዮሴፍ፣ ማርያም በሕዝብ ፊት እንድትጋለጥ ወይም ቅጣት እንዲደርስባት ስላልፈለገ በስውር ሊተዋት ወሰነ። (ማቴ. 1:18, 19) ማርያም ይህ ደግ ሰው፣ ባልጠበቀው በዚህ ሁኔታ እጅግ መጨነቁን ስታይ ታዝንለት ይሆናል እንጂ በእሱ እንደማትበሳጭ ግልጽ ነው።

19. ይሖዋ፣ ዮሴፍ የተሻለ ውሳኔ እንዲያደርግ የረዳው እንዴት ነው?

 19 ይሖዋ፣ ዮሴፍ የተሻለ ውሳኔ እንዲያደርግ በደግነት ረዳው። የአምላክ መልአክ በሕልም ተገልጦለት ማርያም የጸነሰችው በተአምር መሆኑን ነገረው። ዮሴፍ ይህን ሲሰማ እፎይታ አግኝቶ መሆን አለበት! በዚህ ወቅት ዮሴፍ፣ ማርያም እንዳደረገችው ሁሉ ይሖዋ የሚሰጠውን መመሪያ ተግባራዊ ማድረግ ጀመረ። ዮሴፍ፣ ማርያምን ያገባት ሲሆን የይሖዋን ልጅ እንዲንከባከብ የተሰጠውን ልዩ ኃላፊነት ለመወጣትም ራሱን አዘጋጀ።—ማቴ. 1:20-24

20, 21. ያገቡም ሆኑ የማግባት ሐሳብ ያላቸው ሰዎች ከማርያምና ከዮሴፍ ምን ሊማሩ ይችላሉ?

20 ያገቡም ሆኑ የማግባት ሐሳብ ያላቸው ሰዎች ከ2,000 ዓመት በፊት ይኖሩ ከነበሩት ከእነዚህ ባልና ሚስት ጥሩ ትምህርት ማግኘት ይችላሉ። ዮሴፍ፣ ወጣት የሆነችው ባለቤቱ የእናትነት ኃላፊነቷን ለመወጣት የምታደርገውን ጥረት ሲመለከት የይሖዋ መልአክ የሰጠውን መመሪያ መታዘዙ እንዳስደሰተው ግልጽ ነው። ዮሴፍ ከባድ ውሳኔዎችን ሲያደርግ በይሖዋ መታመን ጠቃሚ መሆኑን ተገንዝቦ መሆን አለበት። (መዝ. 37:5፤ ምሳሌ 18:13) የቤተሰብ ራስ እንደመሆኑ መጠን የሚያደርገው ውሳኔ ጥንቃቄ የተሞላበትና ደግነት የሚንጸባረቅበት እንደሚሆን ጥርጥር የለውም።

21 ማርያም፣ ዮሴፍን ለማግባት ፈቃደኛ መሆኗስ ምን ያስተምረናል? ዮሴፍ የነገረችውን ነገር መጀመሪያ ላይ ለማመን ተቸግሮ የነበረ ቢሆንም ወደፊት የቤተሰቡ ራስ የሚሆነው እሱ መሆኑን ግምት ውስጥ በማስገባት ማርያም ማድረግ ያለባቸውን ነገር እስኪወስን ድረስ በትዕግሥት ጠብቃዋለች። ይህ ደግሞ ለእሷ ትልቅ ትምህርት ሰጥቷት እንደሚሆን ጥርጥር የለውም፤ በዛሬው ጊዜ ለሚገኙ ክርስቲያን ሴቶችም ግሩም ትምህርት ይዟል። በተጨማሪም ይህ ገጠመኝ ዮሴፍም ሆነ ማርያም በሐቀኝነትና በግልጽ መነጋገር ያለውን ጠቀሜታ እንዲገነዘቡ ሳያደርጋቸው አልቀረም።—ምሳሌ 15:22ን አንብብ።

22. የዮሴፍና የማርያም ትዳር በምን ላይ የተመሠረተ ነበር? ከፊታቸውስ ምን ይጠብቃቸው ነበር?

22 እነዚህ ወጣት ባልና ሚስት ትዳራቸውን ከሁሉ በተሻለ መሠረት ላይ እንደገነቡ ግልጽ ነው። ይሖዋ አምላክን ከምንም ነገር በላይ ከመውደዳቸውም ሌላ ኃላፊነት የሚሰማቸውና አሳቢ ወላጆች በመሆን እሱን የማስደሰት ፍላጎት ነበራቸው። እርግጥ ነው፣ የተትረፈረፈ በረከት የማግኘት አጋጣሚ የተከፈተላቸው ቢሆንም ከፊታቸው እጅግ ተፈታታኝ የሆኑ ሁኔታዎችም ይጠብቋቸዋል። ዮሴፍና ማርያም እስከ ዛሬ ከኖሩት ሰዎች ሁሉ እጅግ ታላቅ የሆነውን ኢየሱስን የማሳደግ ኃላፊነት ተጥሎባቸዋል።

^ አን.15 ማርያም ጠቅሳ ከተናገረቻቸው ሐሳቦች መካከል ልጅ ከመውለድ ጋር በተያያዘ የይሖዋን በረከት ያገኘችው ሌላዋ ታማኝ የአምላክ አገልጋይ ሐና የተናገረችው ሐሳብ እንደሚገኝበት ከሁኔታው መረዳት ይቻላል።—በምዕራፍ 6 ላይ የሚገኘውን “ሁለት ድንቅ ጸሎቶች” የሚል ርዕስ ያለውን ሣጥን ተመልከት።