ግንቦት 3, 2022
ሩሲያ

ጸሎት ብርታት ሰጥቷቸዋል

በኡድሙርቲያን ሩፑብሊክ የሚገኘው የቮትኪንስኪ አውራጃ ፍርድ ቤት የወንድም ሰርጌ ጎቦዜቭን እና የወንድም ሚካይል ፖታፖቭን ጉዳይ ተመልክቶ በቅርቡ ውሳኔውን ያሳውቃል። አቃቤ ሕጉ እንዲተላለፍባቸው የሚፈልገውን ብይን ገና አላሳወቀም።

የክሱ ሂደት

ጥር 20, 2021

ሰርጌ እና ሚካይል የጽንፈኛ ድርጅትን እንቅስቃሴ አደራጅተዋል በሚል የወንጀል ክስ ተመሠረተባቸው
ጥር 21, 2021

የሰርጌ አፓርታማ ተፈተሸ። ባለሥልጣናቱ የሰርጌን መንጃ ፈቃድ፣ የመኪና ሰነዶች፣ ኤሌክትሮኒክ መሣሪያዎች፣ የፎቶ አልበም እና የተለያዩ የመጽሐፍ ቅዱስ ትርጉሞችን ጨምሮ የተለያዩ የግል ንብረቶቹን ወረሱበት። ባለሥልጣናቱ ሚካይልን በቁጥጥር ሥር በማዋል ቤቱን ፈተሹ
ጥር 22, 2021

ሰርጌ በቁም እስር እንዲቆይ ተደረገ። ሚካይል ወደ ማረፊያ ቤት ተወሰደ
ግንቦት 18, 2021

ሰርጌ ከቁም እስር ተፈታ፤ ሆኖም የጉዞ ገደብ ተጣለበት
ግንቦት 19, 2021

ሚካይል ከማረፊያ ቤት ተለቀቀ፤ ሆኖም የጉዞ ገደብ ተጣለበት
ጥቅምት 7, 2021

ጉዳያቸው በፍርድ ቤት መታየት ጀመረ

አጭር መግለጫ

ሰርጌ ጎቦዜቭ

የትውልድ ዘመን፦ 1957 (ቮርኩታ፣ ኮሚ ሪፑብሊክ)

ግለ ታሪክ፦ ጦር ሠራዊት ውስጥ አገልግሏል። በጠበቃነት ይሠራ ነበር። አሁን ጡረታ ወጥቷል

የመጽሐፍ ቅዱስ ትንቢቶች ፍጻሜያቸውን ማግኘታቸው አስደነቀው። በ2004 ተጠምቆ የይሖዋ ምሥክር ሆነ

የሰጠው ሐሳብ

የተስፋ መቁረጥ ስሜትን ማሸነፍ የቻልከው እንዴት ነው?

ያለማቋረጥ ወደ ይሖዋ በመጸለይ ሐሳቤንና ጭንቀቴን እነግረዋለሁ። መጽሐፍ ቅዱስንና መጽሐፍ ቅዱሳዊ ጽሑፎችንም አነብባለሁ። ለስብሰባዎች እዘጋጃለሁ። ቪዲዮዎችን እመለከታለሁ። . . . ደግሞም ግሩም ሚስት አለችኝ። እሷ ጓደኛዬና ረዳቴ ነች። . . . ታበረታታኛለች እንዲሁም ትደግፈኛለች!

ሚካይል ፖታፖቭ

የትውልድ ዘመን፦ 1978 (ኬፓ፣ ካሬሊያ ሪፑብሊክ)

ግለ ታሪክ፦ የቢሮ ዕቃዎችን ይጠግናል

መጽሐፍ ቅዱስን ለመረዳት የሚያግዘው ሰው ይፈልግ ነበር። በመጨረሻም ከይሖዋ ምሥክሮች ጋር ሲያጠና ለጥያቄዎቹ መልስ አገኘ። በ2003 ተጠመቀ። በ2011 ከታማራ ጋር ትዳር መሠረተ

የሰጠው ሐሳብ

በማረፊያ ቤት በነበርክበት ወቅት ደስታህን መጠበቅ የቻልከው እንዴት ነው?

[በማረፊያ ቤት] በቆየሁበት በመጀመሪያው ወር መጽሐፍ ቅዱስ አልነበረኝም። ስለዚህ በመጀመሪያው ሳምንት በየቀኑ አሥር የመጽሐፍ ቅዱስ ጥቅሶችን ለማስታወስና በእነሱ ላይ ለማሰላሰል ጥረት አደረግኩ። በሁለተኛው ሳምንት፣ በሚደርሱኝ ደብዳቤዎች ላይ ያሉት ጥቅሶች ላይ ማስመር ጀመርኩ። በመጨረሻም መጽሐፍ ቅዱስ ሳገኝ በጣም ተደሰትኩ። በሦስት ወር ውስጥ ከዳር እስከ ዳር አነበብኩት።

ጸሎት የረዳህ እንዴት ነው?

ከመቼውም ጊዜ ይበልጥ ወደ ይሖዋ እጸልይ ነበር። ወደ ይሖዋ እንዲህ ያለ ረጅም ጸሎት አቀርባለሁ ብዬ አስቤ አላውቅም ነበር።

በተለይ በተስፋ መቁረጥ በምዋጥበት ጊዜ ይሖዋ ሁልጊዜ ጸሎቴን መልሶልኛል። ጨርሶ ብርታት ያጣሁባቸውና በከፍተኛ ጭንቀት የተዋጥኩባቸው ጊዜያት ነበሩ። በእነዚያ ወቅቶች አባቴ ብድግ አድርጎ እንዳቆመኝና የሚያስፈልገኝን ብርታት እንደሰጠን ተሰምቶኛል።

ሰርጌና ሚካይል በመጽሐፍ ቅዱስ ጥናትና በጸሎት አማካኝነት እምነታቸውን ለማጠናከር ጥረት ሲያደርጉ ይሖዋ እነሱን መደገፉን እንደሚቀጥል እርግጠኞች ነን።—ቆላስይስ 2:6, 7