ቪክቶር ስታሺቭስኪ ከመጋቢት 2021 አንስቶ ክራይሚያ ውስጥ ታስሯል

በእምነታቸው ምክንያት የታሰሩ የይሖዋ ምሥክሮች—በአገር

አጫውት

እስከ ሚያዝያ 2026 ባለን መረጃ መሠረት በዓለም ዙሪያ ከ279 በላይ የይሖዋ ምሥክሮች በእምነታቸው ምክንያት ታስረዋል።

በዓለም አቀፍ የሲቪልና የፖለቲካ መብቶች ስምምነት ላይ አንቀጽ 18 የማሰብ፣ የሕሊና እና የሃይማኖት ነፃነትን ይደነግጋል። ይሁንና በአንዳንድ አገሮች ውስጥ የይሖዋ ምሥክሮች ይህን መብት ተነፍገዋል፤ በሃይማኖታዊ እንቅስቃሴዎች በመሳተፋቸው ወይም በሕሊናቸው ምክንያት ወታደራዊ አገልግሎት ለመስጠት ፈቃደኛ ባለመሆናቸው የተነሳ ያለአግባብ እየታሰሩና እንግልት እየደረሰባቸው ነው።

ክራይሚያ

ሚያዝያ 2017 የሩሲያ መንግሥት የይሖዋ ምሥክሮች የሚጠቀሙባቸውን ሕጋዊ ተቋማት በሙሉ አገደ፤ ዓላማውም ሰላማዊ በሆነ መንገድ የሚያከናውኑትን አምልኮ ማስቆም ነው። ፍርደ ገምድል የሆነው ይህ እገዳ ለክራይሚያም ተረፈ፤ ፖሊሶች ቤቶችን እየበረበሩ የይሖዋ ምሥክሮችን በቁጥጥር ሥር ማዋል ጀመሩ። በአሁኑ ወቅት 15 የይሖዋ ምሥክሮች በጽንፈኛ እንቅስቃሴዎች ተሳትፈዋል በሚል ተከስሰው እስር ቤት ገብተዋል።

ክራይሚያ ውስጥ በእምነታቸው ምክንያት እስር ላይ ያሉትን የይሖዋ ምሥክሮች ስም ዝርዝር ለማውረድ ይህን ሊንክ ተጫን።

ኤርትራ

የይሖዋ ምሥክሮች በ1993ቱ ሕዝበ ውሳኔ ላይ ለመሳተፍና ወታደራዊ አገልግሎት ለመስጠት ፈቃደኛ ባለመሆናቸው የኤርትራ ፕሬዚዳንት ኢሳይያስ ኣፈወርቂ በ1994 የይሖዋ ምሥክሮች ዜግነት እንዲሰረዝ ወሰኑ። ከዚያ ወዲህ መንግሥት የይሖዋ ምሥክሮችን ያለፍርድ ሲያስር፣ ሲያሠቃይና ሲያንገላታ ቆይቷል፤ ከታሰሩት መካከል ሴቶች፣ አረጋውያንና ለአካለ መጠን ያልደረሱ ልጆችም ጭምር ይገኙበታል። በአሁኑ ወቅት 64 የይሖዋ ምሥክሮች እስር ላይ ናቸው። አንዳቸውም ቢሆኑ ፍርድ ቤት ቀርበው የጥፋተኝነት ብይንም ሆነ ቅጣት አልተላለፈባቸውም።

ኤርትራ ውስጥ በእምነታቸው ምክንያት እስር ላይ ያሉትን የይሖዋ ምሥክሮች ስም ዝርዝር ለማውረድ ይህን ሊንክ ተጫን።

ሩሲያ

ሚያዝያ 2017 የሩሲያ ጠቅላይ ፍርድ ቤት ጽንፈኝነትን ምክንያት በማድረግ በይሖዋ ምሥክሮች ድርጅት ላይ እገዳ ጣለ፤ በድርጅቱ ስም የተመዘገቡት ተቋማት በሙሉ ፈቃዳቸው እንዲሰረዝም ወሰነ። ይህን ተከትሎ የአምልኮ ቦታዎቻቸው የተዘጉና የተወረሱ ከመሆኑም ሌላ ጽሑፎቻቸው ታገዱ። ቆየት ብሎም ባለሥልጣናቱ የይሖዋ ምሥክሮችን በግለሰብ ደረጃ ዒላማ ማድረግ ጀመሩ፤ በግል የሚያደርጉትን የአምልኮ እንቅስቃሴ እገዳ የተጣለበትን ድርጅት እንደ መደገፍ በመቁጠር ክስ ይመሠርቱባቸው ጀመር። ይህን ምክንያት በማድረግ ፖሊሶች የይሖዋ ምሥክሮችን መኖሪያ ቤቶች ይበረብራሉ፤ በእነዚህ ወቅቶች ደግሞ የይሖዋ ምሥክሮችን እንደሚያንገላቱ፣ ጠንከር ያለ የወንጀል ምርመራ እንደሚያደርጉባቸውና ጣቢያ እንደሚወስዷቸው በተደጋጋሚ ታይቷል። በአሁኑ ወቅት ቢያንስ 172 የይሖዋ ምሥክሮች ማረፊያ ቤት፣ የግዳጅ አገልግሎት የሚሰጥባቸው ማረሚያ ቤቶች ወይም ወህኒ ቤቶች ውስጥ ታስረው ይገኛሉ።

ሩሲያ ውስጥ በእምነታቸው ምክንያት እስር ላይ ያሉትን የይሖዋ ምሥክሮች ስም ዝርዝር ለማውረድ ይህን ሊንክ ተጫን።

ሲንጋፖር

ሲንጋፖር ውስጥ ዜጎች ወታደራዊ አገልግሎት የመስጠት ግዴታ አለባቸው፤ በሕሊናቸው ምክንያት ፈቃደኛ ላልሆኑ ሰዎች የተመቻቸ አማራጭ ፕሮግራምም የለም። በመሆኑም ወታደራዊ አገልግሎት ለመስጠት ፈቃደኛ ያልሆነ ሰው እስከ ሁለት ዓመት ተኩል እስራት ሊፈረድበት ይችላል። የሲንጋፖር መንግሥት ከዓለም አቀፍ የሰብዓዊ መብት ድንጋጌዎች አንጻር ማስተካከያ እንዲያደርግ ከተባበሩት መንግሥታት ድርጅት በተደጋጋሚ ጥያቄ ቢቀርብለትም እስካሁን ፈቃደኛ አልሆነም። በአሁኑ ወቅት በሕሊናቸው ምክንያት ወታደራዊ አገልግሎት ለመስጠት ፈቃደኛ ባለመሆናቸው ዘጠኝ ወጣት የይሖዋ ምሥክሮች እስር ላይ ናቸው፤ ከእነዚህ መካከል ሦስቱ የታሰሩት ለሁለተኛ ጊዜ ነው።

ሲንጋፖር ውስጥ በእምነታቸው ምክንያት እስር ላይ ያሉትን የይሖዋ ምሥክሮች ስም ዝርዝር ለማውረድ ይህን ሊንክ ተጫን።

ደቡብ ኮሪያ

ጥቅምት 26, 2020 የደቡብ ኮሪያ መንግሥት በሕሊና ምክንያት ወታደራዊ አገልግሎት የማይሰጡ ሰዎች አማራጭ የሲቪል አገልግሎት መስጠት የሚችሉበትን ሥርዓት ዘረጋ። ሆኖም የሲቪል አገልግሎቱ የቅጣት እርምጃ እንደሆነ የሚናገሩ አሉ፤ ምክንያቱም የሦስት ዓመት ርዝማኔ ያለው ይህ አገልግሎት፣ ወታደራዊ ግዳጁ ከሚቆይበት ጊዜ በእጥፍ ይበልጣል። የደቡብ ኮሪያ የሕገ መንግሥት ፍርድ ቤት ይህን ጉዳይ በተመለከተ አቤቱታዎች ቢቀርቡለትም በ2024 አሠራሩ በዚያው እንዲቀጥል ወሰነ። የሲቪል አገልግሎቱን ከባድ የሚያደርጉ ሁኔታዎች ቢኖሩም አብዛኞቹ የይሖዋ ምሥክሮች በዝግጅቱ ለመጠቀም መርጠዋል። ይህ በእንዲህ እንዳለ ግን 15 ወጣት ወንድሞች አሁን ባለው አያያዝ በሲቪል አገልግሎቱ ለመሳተፍ ፈቃደኛ አለመሆናቸውን አሳውቀዋል። ከእነሱ መካከል አንዱ እስር ቤት ሲሆን ሌሎች ደግሞ የፍርድ ቤት ውሳኔ እየተጠባበቁ ነው፤ እስራት ሊበየንባቸው የሚችልበት አጋጣሚ እንዳለም ያውቃሉ።

ደቡብ ኮሪያ ውስጥ በእምነታቸው ምክንያት እስር ላይ ያሉትን የይሖዋ ምሥክሮች ስም ዝርዝር ለማውረድ ይህን ሊንክ ተጫን።

ዩክሬን

የዩክሬን መንግሥት በሕሊናቸው ምክንያት ወታደራዊ አገልግሎት ለማይሰጡ ሰዎች ያዘጋጀው አማራጭ የሲቪል አገልግሎት ላለፉት ሠላሳ ዓመታት ገደማ የይሖዋ ምሥክሮችን ተጠቃሚ ሲያደርግ ቆይቷል። የካቲት 24, 2022 ጦርነቱ ከጀመረ በኋላ ግን አንድ ክፍተት ተፈጠረ፤ ብሔራዊ ክተት በሚታወጅበት ወቅት የሲቪል አገልግሎት መስጠት የሚቻልበት ግልጽ የሆነ ሕጋዊ ማዕቀፍ አልተዘጋጀም። በዚህም የተነሳ የይሖዋ ምሥክሮች ክስ ተመሥርቶባቸዋል። በአሁኑ ወቅት ዘጠኝ የይሖዋ ምሥክሮች እስራት ተፈርዶባቸው ወህኒ ቤት የሚገኙ ሲሆን ሌሎች ዘጠኝ ደግሞ ማረፊያ ቤት ናቸው። አማራጭ የሲቪል አገልግሎት መስጠት የሚቻልበት ሕጋዊ ማዕቀፍ መዘርጋቱ አንገብጋቢ እንደሆነ ሦስት የተባበሩት መንግሥታት ድርጅት ገለልተኛ አጣሪዎች ስጋታቸውን ገልጸዋል።

ዩክሬን ውስጥ በእምነታቸው ምክንያት እስር ላይ ያሉትን የይሖዋ ምሥክሮች ስም ዝርዝር ለማውረድ ይህን ሊንክ ተጫን።

“በእስር ላይ ያሉትን ከእነሱ ጋር ታስራችሁ እንዳላችሁ አድርጋችሁ በማሰብ ሁልጊዜ አስታውሷቸው።”—ዕብራውያን 13:3