“የተስፋ መቁረጥ ዋናው ማርከሻ ጸሎት ነው”

አጫውት

ሰኔ 19, 2026 በኻንቲ ማንሲ (ዩግራ) ራስ ገዝ ክልል የሚገኘው የሱርጉት ከተማ ፍርድ ቤት፣ በሦስት ወንድሞች ላይ ጥፋተኛ ናቸው የሚል ብይን አስተላልፏል። ሦስቱም የተበየነባቸው ቅጣት የገደብ እስራት ነው፤ ወንድም ሮማን ኾሪኮቭ ስድስት ዓመት ከአራት ወር፣ ወንድም ዩሪ ኾሪኮቭ ስድስት ዓመት ከስድስት ወር፣ ወንድም ኪሪል ስዬቭዬሪንቺክ ደግሞ አራት ዓመት ተፈርዶባቸዋል።

አጭር መግለጫ

ሮማን ኾሪኮቭ

ትውልድ፦ 1988 (ሱርጉት)

ጥምቀት፦ 2009

ግለ ታሪክ፦ መካኒክ ነበር። በ2020 ከፊሊያ ጋር ትዳር መሠረቱ። አባቱ ዩሪ በዚሁ የክስ መዝገብ ተፈርዶበታል

ክሱ፦ የጽንፈኛ ድርጅትን እንቅስቃሴዎች ማስተባበርና ተቋሙን በገንዘብ መደገፍ

ብይን፦ የስድስት ዓመት ከአራት ወር የገደብ እስራት

የሰጠው ሐሳብ

ይህን አስቸጋሪ ሁኔታ ለመቋቋም የረዳህ ምንድን ነው?

ባለሥልጣናቱ ምን ያደርጉ ወይም ምን ይወስኑ ይሆን የሚለውን በመጠበቅ ያሳለፍኩት ጊዜ ከባድ ነበር። መጀመሪያ ላይ ‘ከአሁን ከአሁን ቤታችን ተፈተሸ’ በሚል ስጋት ስጠባበቅ ነበር። ከዚያ ደግሞ ክስ እስኪመሠረትብኝ፣ ችሎት ፊት እስክቀርብ፣ በመጨረሻም ብይን እስኪሰጠኝ ድረስ በመጠበቅ ያሳለፍኳቸው ጊዜያት አስጨናቂ ነበሩ። ማነቆ ውስጥ እንደገባሁ ሆኖ ይሰማኝ ነበር። በዚህ ሁሉ ውስጥ ግን አንድ ነገር ተምሬያለሁ፦ የተስፋ መቁረጥ ዋናው ማርከሻ ጸሎት ነው። ለይሖዋ፣ የማስበውንና የሚሰማኝን ሁሉ ምንም ሳላስቀር አውጥቼ እነግረዋለሁ። ከዚያም የሰጠኝን መልካም ነገሮች፣ ትናንሾቹንም ጭምር ለማስተዋል የተለየ ጥረት አደርጋለሁ። ይህ ሁሌም በይሖዋ ላይ እንዳተኩር ረድቶኛል። በይሖዋ ላይ ሳተኩር ደግሞ ማንም ሊነጥቀኝ የማይችለው ዓይነት ውስጣዊ ሰላም ይሰማኛል።

ዩሪ ኾሪኮቭ

ትውልድ፦ 1967 (ሶቪየት ኅብረት)

ጥምቀት፦ 2004

ግለ ታሪክ፦ ባንክ ውስጥ ይሠራ ነበር። በ1987 ከኢራዳ ጋር ትዳር መሠረቱ። አንድ ወንድና አንዲት ሴት ልጅ አሏቸው። ወንዱ ልጃቸው ሮማን በዚሁ የክስ መዝገብ ተፈርዶበታል

ክሱ፦ የጽንፈኛ ድርጅትን እንቅስቃሴዎች ማስተባበርና ተቋሙን በገንዘብ መደገፍ

ብይን፦ የስድስት ዓመት ከስድስት ወር የገደብ እስራት

የሰጠው ሐሳብ

በአሉታዊ ሐሳቦችና ስሜቶች ላለመሸነፍ የረዳህ ምንድን ነው?

ምሳሌ 24:10 “በመከራ ቀን ተስፋ የምትቆርጥ ከሆነ ጉልበትህ እጅግ ይዳከማል” ይላል። ጉልበቴ እንዲዳከም ስለማልፈልግ ሁሌም አዎንታዊ አመለካከት ለመያዝ እጥራለሁ። አምላክ በሰጠን ተስፋ ላይ ማተኮሬ በጣም ረድቶኛል። የምንኖረው በመጨረሻዎቹ ቀናት መጨረሻ ላይ እንደሆነና ይህ መከራ በቅርቡ እንደሚያበቃ ዘወትር ለማስታወስ እሞክራለሁ። በየዕለቱ ወደ ይሖዋ እጸልያለሁ፤ የሚያሳስቡኝን ነገሮች ሁሉ እነግረዋለሁ። እንዲህ ሳደርግ ውስጤ ይረጋጋል። እንድበረታ የረዳኝ ሌላው ነገር ባለቤቴና ሴቷ ልጄ የሚሰጡኝ ድጋፍ ነው። በቃልም ሆነ በተግባር ሁሌም ያበረታቱኛል፤ ይንከባከቡኛል። ለሚያደርጉልኝ ነገር ሁሉ በጣም አመሰግናቸዋለሁ።

ኪሪል ስዬቭዬሪንቺክ

ትውልድ፦ 1997 (ሱርጉት)

ግለ ታሪክ፦ የአሳንሰር የኤሌክትሪክ ባለሙያ ሆኖ ይሠራ ነበር። ከዚህ ቀደም አባቱ፣ ወንድም አርተር ስዬቭዬሪንቺክ ጥፋተኛ ነህ ተብሎ የስድስት ዓመት ከሦስት ወር የገደብ እስራት ተፈርዶበት ነበር

ክሱ፦ በይሖዋ ምሥክሮች ሃይማኖታዊ ስብሰባዎች ላይ ተሳትፎ ማድረግ

ብይን፦ የአራት ዓመት የገደብ እስራት

የሰጠው ሐሳብ

የደረሰብህ ስደት ያስተማረህ ነገር አለ?

በአሁኑ ወቅት ከእኔ ቁጥጥር ውጭ የሆኑ ብዙ ነገሮች አሉ። ግን እኔ ልቆጣጠረው የምችለው ነገርም አለ፤ ለምን ነገር ቅድሚያ እንደምሰጥ መምረጥ እችላለሁ። የዓለም ሁኔታ ከበፊቱ ይበልጥ አስጨናቂ እየሆነ ሲመጣ እኔም ከበፊቱ ይበልጥ በመንፈሳዊ በደንብ ለመመገብ ጥረት አደርጋለሁ። የአምላክን ቃል ለማንበብና ባነበብኩት ላይ ለማሰላሰል በቂ ጊዜ እመድባለሁ። ይህን ማድረጌን እስከቀጠልኩ ድረስ ይሖዋ ፈጽሞ እንደማይተወኝ እተማመናለሁ።

ይሖዋ ሕዝቦቹ የሚያስፈልጋቸውን ነገር ለማሟላት ምንጊዜም በንቃት ይመለከታል፤ እነሱን ለማበርታትና ለመርዳት ሁሌም ዝግጁ ነው፤ ይህን ማሰባችን ያጽናናናል።—መዝሙር 121:3, 4

በተጨማሪም ይህን ተመልከት

ዓለም አቀፋዊ ዜና

በእምነታቸው ምክንያት የታሰሩ የይሖዋ ምሥክሮች—በአገር

የይሖዋ ምሥክሮች መሠረታዊ የሚባሉ ሰብዓዊ መብቶችን ተነፍገው በሃይማኖታቸው ምክንያት ብቻ የታሰሩባቸውን አገራት ዝርዝር ተመልከት።