ሚያዝያ 23, 2024 | የታደሰው፦ የካቲት 7, 2025
ሩሲያ

ወቅታዊ መረጃ—ወንድሞች ይግባኛቸው ከታየ በኋላ ታሰሩ | ይሖዋን ማገልገል ትልቅ መብት ነው

አጫውት

የካቲት 4, 2025 የኡድሙርቲያን ሪፑብሊክ ጠቅላይ ፍርድ ቤት፣ ወንድም ዬቭጌኒ ስቴፋኒዲን እና ወንድም አሌክሳንደር ቮትያኮቭ ያቀረቡትን ይግባኝ ከተመለከተ በኋላ ቀደም ሲል የተበየነባቸውን ፍርድ ለውጦታል። ዬቭጌኒ የስድስት ዓመት፣ አሌክሳንደር ደግሞ የስድስት ዓመት ተኩል እስራት ተበይኖባቸዋል። ወንድሞች ከችሎት ወዲያውኑ ወደ ወህኒ ተወስደዋል።

ጥቅምት 25, 2024 በኡድሙርቲያን ሪፑብሊክ፣ በኢዢፍስክ ከተማ የሚገኘው የፐርቮማይስኪ አውራጃ ፍርድ ቤት፣ ወንድም ዬቭጌኒ ስቴፋኒዲን እና ወንድም አሌክሳንደር ቮትያኮቭ ጥፋተኛ ናቸው የሚል ብይን አስተላልፏል። ዬቭጌኒ የስድስት ዓመት፣ አሌክሳንደር ደግሞ የስድስት ዓመት ተኩል የገደብ እስራት ተፈርዶባቸዋል። አሁን ወህኒ አይወርዱም።

አጭር መግለጫ

ዬቭጌኒ ስቴፋኒዲን

ትውልድ፦ 1989 (ኢዢፍስክ)

ግለ ታሪክ፦ በሪል ስቴት ድርጅት ውስጥ ይሠራል

ዬቭጌኒ ያደገው በይሖዋ ምሥክር ቤተሰብ ውስጥ ነው። አሥር ዓመት ሲሆነው አያቱ ሞተች። የትንሣኤ ተስፋ ከአምላክ ጋር አቀራረበው። በ2006 ተጠመቀ

በ2011 ከማሪና ጋር ተጋቡ። አንዲት ሴት ልጅ አለቻቸው

በ2022 ዬቭጌኒ የካንሰር ሕመም እንዳለበት ተነገረው

የሰጠው ሐሳብ

ስደት ቢደርስብህም አዎንታዊ ሆነህ እንድትቀጥል የረዳህ ምንድን ነው?

ጊዜ መድቤ በየቀኑ የማገኛቸውን በረከቶች መቁጠሬ ደስታዬን ጨምሮልኛል። አንድ ነገር ለማስታወስም ጥረት አደርጋለሁ፤ ይኸውም ይሖዋ ስደት እንዲደርስብኝ ቢፈቅድም ተጠያቂው እሱ አይደለም። በታማኝ አገልጋዮቹ ላይ የደረሰውን በደል በቅርቡ ሙሉ በሙሉ ያስተካክላል። ይሖዋንም ሆነ ወንድሞቼንና እህቶቼን የሙጥኝ ማለቴም አስፈላጊ ነው። አንዲት እህት እንዲህ ብላኝ ነበር፦ “ፈገግታህ በጣም ያበረታታኛል። በእነዚህ ሁኔታዎች ሥር አዎንታዊ አመለካከት መያዝህ እኔም ልበ ሙሉና ደፋር እንድሆን ረድቶኛል።” የይሖዋ ቤተሰብ ክፍል በመሆኔ በጣም አመስጋኝ ነኝ።

አሌክሳንደር ቮትያኮቭ

ትውልድ፦ 1973 (ኢዢፍስክ)

ግለ ታሪክ፦ በግንባታ ሙያ ላይ የተሰማራ ነው

በ1995 ከሊሊያ ጋር ተጋቡ

ባለቤቱ የይሖዋ ምሥክር ስትሆን ያደረገችውን በጎ ለውጥ ሲያይ ተገረመ። በ2006 ተጠመቀ

የሰጠው ሐሳብ

ይህ ገጠመኝ ምን ቁም ነገር አስተምሮሃል?

በይሖዋ መታመንና እሱ እንደሚደግፈኝ ፈጽሞ አለመጠራጠር ምን ያህል አስፈላጊ እንደሆነ ተምሬያለሁ። ወደ ስድስት ወር ገደማ የቁም እስር ላይ ስለነበርኩ መሥራት አልቻልኩም። በዚያው ጊዜ ላይ ደግሞ ባለቤቴ በጠና ታመመች። ሆኖም የይሖዋን እጅ በግልጽ አይተናል። ወንድሞችና እህቶች በጣም ተንከባክበውናል፤ የሚያስፈልገንን ነገርም አሟልተውልናል። የይሖዋ ምሥክር ያልሆኑ ዘመዶቻችን የተደረገልንን እንክብካቤ ሲያዩ በጣም ተገርመዋል። ይሖዋ ምን ያህል እንደሚወደን በራሴ ተሞክሮ ስላየሁ የእሱ አገልጋይ በመሆኔ ይበልጥ አመስጋኝ ነኝ።

እንደ አሌክሳንደር እና ዬቭጌኒ ሁሉ እኛም በሕይወት ዘመናችን ሁሉ ለይሖዋ ‘ያለፍርሃት ቅዱስ አገልግሎት ማቅረብ’ መቻል ትልቅ መብት እንደሆነ ይሰማናል።—ሉቃስ 1:74, 75

የክሱ ሂደት

ሚያዝያ 14, 2021

የደህንነት ሰዎች የዬቭጌኒን ቤት ፈተሹ
ታኅሣሥ 13, 2022

አሌክሳንደር እና ዬቭጌኒ የወንጀል ክስ ተመሠረተባቸው
ታኅሣሥ 14, 2022

ፖሊሶች የሁለቱንም ቤቶች ፈተሹ። አሌክሳንደር ጣቢያ እንዲያድር ተደረገ። ዬቭጌኒ የጉዞ ገደቦች ተጣሉበት
ታኅሣሥ 15, 2022

አሌክሳንደር ከጣቢያ ተለቀቀ፤ የቁም እስረኛ ተደረገ
ሰኔ 9, 2023

አሌክሳንደር ከቁም እስር ተፈታ፤ የጉዞ ገደቦች ተጣሉበት
ነሐሴ 17, 2023

ክሳቸው በፍርድ ቤት መታየት ጀመረ

እነዚህንስ አይተሃቸዋል?

ዓለም አቀፋዊ ዜና

በእምነታቸው ምክንያት የታሰሩ የይሖዋ ምሥክሮች—በአገር

የይሖዋ ምሥክሮች መሠረታዊ የሚባሉ ሰብዓዊ መብቶችን ተነፍገው በሃይማኖታቸው ምክንያት ብቻ የታሰሩባቸውን አገራት ዝርዝር ተመልከት።