በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

 በእምነታቸው ምሰሏቸው

ኖኅ “አካሄዱን ከአምላክ ጋር አደረገ”

ኖኅ “አካሄዱን ከአምላክ ጋር አደረገ”

ኖኅ ከወገቡ ቀና ካለ በኋላ በሥራ የዛሉትን ጡንቻዎቹን አፍታታ። ከሥራው ጥቂት በማረፍ በአንድ ትልቅ ግንድ ላይ ተቀምጦ ግዙፍ የሆነውን የመርከቡን መዋቅር ሲመለከት በዓይነ ሕሊናህ ይታይህ። ትኩስ ከሆነው ቅጥራን የሚወጣው የሚሰነፍጥ ሽታ አካባቢውን አናውጦታል፤ ለእንጨት ሥራ የሚያገለግሉት መሣሪያዎች የሚፈጥሩት ድምፅ ያስተጋባል። ኖኅ አረፍ ካለበት ቦታ ሆኖ ልጆቹ የመርከቡን የተለያዩ እንጨቶች ለማገጣጠም ደፋ ቀና ሲሉ ይመለከታል። ልጆቹ፣ የልጆቹ ሚስቶችና ውድ ባለቤቱ በዚህ የግንባታ ሥራ ለበርካታ አሥርተ ዓመታት ከእሱ ጋር ሲደክሙ ኖረዋል። ምንም እንኳ አብዛኛውን ሥራ ያከናወኑ ቢሆንም ከፊታቸው ገና ብዙ ሥራ ይጠብቃቸዋል!

የአካባቢው ሰዎች ኖኅንና ቤተሰቡን የሚመለከቷቸው እንደ ሞኝ ነው። የመርከቡ ሥራ እየገፋ በሄደ መጠን የአካባቢው ሰዎችም የዚያኑ ያህል ዓለም አቀፍ የጥፋት ውኃ ይመጣል በሚለው ሐሳብ ይሳለቁ ነበር። ኖኅ ጥፋት እንደሚመጣ በተደጋጋሚ ቢነግራቸውም እነሱ ግን ማስጠንቀቂያው ከእውነታው የራቀና ሊታመን የማይችል እንደሆነ ተሰምቷቸዋል! አንድ ሰው እንዲህ ባለ የሞኝነት ድርጊት እንዴት የራሱንም ሆነ የቤተሰቡን ሕይወት በከንቱ ያባክናል ብለው ሳይገረሙ አልቀረም። ይሁን እንጂ የኖኅ አምላክ የሆነው ይሖዋ ይህን ሰው የሚመለከተው ከዚህ ፈጽሞ በተለየ መንገድ ነው።

የአምላክ ቃል “ኖኅ ከእውነተኛው አምላክ ጋር ይሄድ ነበር” ይላል። (ዘፍጥረት 6:9 NW) ይህ ምን ማለት ነው? ይህ አባባል አምላክ በምድር ላይ መሄዱን ወይም ኖኅ በሆነ መልኩ ወደ ሰማይ መውጣቱን የሚያመለክት አይደለም። ከዚህ ይልቅ ኖኅና ይሖዋ እንደ ጓደኛሞች አብረው እንደተጓዙ ተደርጎ የተቆጠረው ኖኅ አምላኩን በጥብቅ ይታዘዝና ከልብ ይወድ ስለነበረ ነው። በሺዎች ከሚቆጠሩ ዓመታት በኋላ መጽሐፍ ቅዱስ ስለ ኖኅ ሲናገር ‘በእምነቱ አማካኝነት ዓለምን ኮነነ’ ብሏል። (ዕብራውያን 11:7) ይህ የሆነው እንዴት ነው? እኛስ ኖኅ ካሳየው እምነት ምን ልንማር እንችላለን?

በጠማማ ዓለም ውስጥ እንከን የለሽ ሆኖ የኖረ ሰው

ኖኅ ያደገው ከዕለት ወደ ዕለት በክፋት እየባሰ በሚሄድ ዓለም ውስጥ ነው። ከአምላክ ጋር እንደሄደ የተነገረለት ሌላው ጻድቅ ሰው ይኸውም የኖኅ ቅድመ አያት የሆነው ሄኖክ በኖረበት ዘመንም ክፋት ተስፋፍቶ ነበር። ሄኖክ በዓለም ባሉት ፈሪሃ አምላክ የሌላቸው ሰዎች ላይ አምላክ እንደሚፈርድባቸው ትንቢት ተናግሮ ነበር። በኖኅ ዘመን ግን ክፋቱ ይበልጥ ተባብሶ ነበር። እንዲያውም ምድር በዓመፅ በመሞላቷ የተነሳ በይሖዋ ፊት ረክሳ ነበር። (ዘፍጥረት 5:22፤ 6:11፤ ይሁዳ 14, 15) ለመሆኑ በምድር ላይ ያለው ሁኔታ እንዲባባስ ያደረገው ምንድን ነው?

የአምላክ መንፈሳዊ ልጆች በሆኑት በመላእክት መካከል በጣም አሳዛኝ የሆነ ነገር ተከስቶ ነበር። ቀድሞውንም ቢሆን ከመካከላቸው አንዱ በይሖዋ ላይ ያመፀ ሲሆን አምላክን በመሳደብና አዳምንና ሔዋንን ኃጢአት እንዲሠሩ በማታለል ሰይጣን ዲያብሎስ ሆኖ ነበር። በኖኅ ዘመን ደግሞ ሌሎች መላእክትም በይሖዋ የጽድቅ አገዛዝ ላይ ማመፅ ጀመሩ። አምላክ በሰማይ የሰጣቸውን ቦታ ትተው ወደ ምድር በመምጣት ሥጋዊ አካል ከለበሱ በኋላ ከሰው ልጆች መካከል ውብ የሆኑ ሴቶችን አገቡ። በዚህም የተነሳ ትዕቢተኛና ራስ ወዳድ የሆኑት እነዚህ ዓመፀኛ መላእክት በሰው ልጆች ላይ መጥፎ ተጽዕኖ አሳድረዋል።—ዘፍጥረት 3:1-5፤ 6:1, 2፤ ይሁዳ 6, 7

በተጨማሪም ሥጋ የለበሱት መላእክትና የሰዎች ሴቶች ልጆች ከተፈጥሮ ውጭ በሆነ ሁኔታ በመጣመራቸው የተነሳ እጅግ ግዙፍና ኃያል የሆኑ ልጆች ተወለዱ። መጽሐፍ ቅዱስ እነዚህን የሰውና የመላእክት ዲቃላዎች ኔፊሊም ብሎ የሚጠራቸው ሲሆን ትርጉሙም “የሚያፈርጡ” ማለት ነው። ጉልበተኛ የሆኑት እነዚህ አረመኔ ኔፊሊሞች በዓለም ላይ ያለው ጭካኔና ክፋት ይበልጥ እንዲባባስ አድርገዋል። በፈጣሪ ዓይን ሲታይ “የሰው ዐመፅ በምድር ላይ የበዛና የልቡም ሐሳብ ዘወትር ወደ ክፋት ብቻ ያዘነበለ መሆኑ” ምንም አያስደንቅም። በመሆኑም ይሖዋ ያንን ክፉ  ኅብረተሰብ በ120 ዓመት ውስጥ ጠራርጎ ለማጥፋት ወሰነ።—ዘፍጥረት 6:3-5

ኖኅና ሚስቱ ልጆቻቸውን ከመጥፎ ተጽዕኖዎች መጠበቅ አስፈልጓቸው ነበር

እንዲህ ባለው ዓለም ውስጥ ልጆችን ማሳደግ ምን ያህል ከባድ ሊሆን እንደሚችል አስብ! ያም ሆኖ ኖኅ በዚህ ረገድ ተሳክቶለታል። ኖኅ ጥሩ ሚስት ነበረችው፤ እሷም ኖኅ 500 ዓመት ሲሆነው ሴም፣ ካም እና ያፌት የተባሉ ሦስት ወንዶች ልጆችን ወለደችለት። * ኖኅና ባለቤቱ ልጆቻቸውን በዙሪያቸው ያለው ዓለም ከሚያሳድረው መጥፎ ተጽዕኖ መጠበቅ ነበረባቸው። ወንዶች ልጆች “በጀግንነታቸው ከፍ ያለ ዝና ያተረፉ” ሰዎችን የማድነቅ ዝንባሌ አላቸው፤ ኔፊሊሞች ደግሞ እንደዚህ ዓይነት ሰዎች ነበሩ። ኖኅና ባለቤቱ ፣ ልጆቻቸው እነዚያ ግዙፍ ሰዎች ስለሚፈጸሙት ጀብዱ ምንም እንዳይሰሙ መከልከል አይችሉም፤ ይሁንና ማንኛውንም ዓይነት ክፋትን ስለሚጠላው ስለ ይሖዋ አምላክ ጥሩ ጥሩ ነገሮችን ማስተማር ይችላሉ። በዓለም ላይ የሚታየው ዓመፅና ግፍ ይሖዋን ምን ያህል እንደሚያሳዝነው ልጆቻቸው እንዲያስተውሉ መርዳት ይጠበቅባቸው ነበር።—ዘፍጥረት 6:6

በዛሬው ጊዜ ያሉ ወላጆች የኖኅንና የባለቤቱን ስሜት በሚገባ እንደሚረዱላቸው ጥርጥር የለውም። ዛሬም ዓለማችን በዓመፅና በግፍ ተሞልቷል። ለልጆች ተብለው የሚዘጋጁ መዝናኛዎች እንኳ በዓመፅ ድርጊቶች የተሞሉ ሊሆኑ ይችላሉ። ጥበበኛ የሆኑ ወላጆች፣ አንድ ቀን ዓመፅን በሙሉ ስለሚያስወግደውና የሰላም አምላክ ስለሆነው ስለ ይሖዋ ልጆቻቸውን በማስተማር እንዲህ ዓይነቱን ተጽዕኖ ለመከላከል የሚችሉትን ሁሉ ያደርጋሉ። (መዝሙር 11:5፤ 37:10, 11) ደግሞም በዚህ ረገድ ሊሳካላቸው ይችላል! ኖኅና ባለቤቱም ተሳክቶላቸዋል። ልጆቻቸው አድገው ጥሩ ሰዎች የሆኑ ሲሆን ልክ እንደነሱ በሕይወታቸው ውስጥ እውነተኛውን አምላክ ይሖዋን ከሚያስቀድሙ ሴቶች ጋር ትዳር መሥርተዋል።

“መርከብ ሥራ”

አንድ ቀን የኖኅን ሕይወት እስከ ወዲያኛው የሚቀይር ሁኔታ ተፈጠረ። ይሖዋ ይህን ውድ አገልጋዩን ያነጋገረው ሲሆን በዘመኑ የነበረውን ዓለም ሊያጠፋው እንዳሰበም ገለጸለት። አምላክም ኖኅን “በጎፈር ዕንጨት መርከብ ሥራ” በማለት አዘዘው።—ዘፍጥረት 6:14

ይህ መርከብ አንዳንዶች እንደሚያስቡት እንደማንኛውም ዓይነት መርከብ አልነበረም። ከፊቱም ሆነ ከኋላው ሲታይ የመርከብ ቅርጽ የለውም፤ አቅጣጫ ማስተካከያ መሪም ቢሆን አልነበረውም። በአጭር አነጋገር ይህ መርከብ ትልቅ ሣጥን ይመስል ነበር። ይሖዋ ለኖኅ የመርከቡን ትክክለኛ መጠን የነገረው ሲሆን ንድፉን በተመለከተም አንዳንድ ዝርዝር ሐሳቦችን ገልጾለታል፤ በተጨማሪም መርከቡን ከውስጥና ከውጭ በቅጥራን እንዲለቀልቀው መመሪያ ሰጥቶታል። ይሖዋ፣ መርከብ እንዲሠራ ያዘዘው ለምን እንደሆነ ለኖኅ ሲነግረው “እነሆ፤ በምድር ላይ የጥፋት ውሃ አወርዳለሁ፤ በምድር ላይ ያለ ሁሉ ይጠፋል” አለው። በሌላ በኩል ግን ይሖዋ “አንተና ወንዶች ልጆችህ፣ ሚስትህና የልጆችህ ሚስቶች ከአንተ ጋር ወደ መርከቧ ትገባላችሁ” የሚል መመሪያ ለኖኅ ሰጥቶታል። በተጨማሪም ኖኅ ሁሉንም ዓይነት የእንስሳ ዝርያ ወደ መርከቡ ማስገባት ነበረበት። ከመጪው የጥፋት ውኃ በሕይወት መትረፍ የሚችሉት ወደ መርከቡ የሚገቡ ብቻ ናቸው!—ዘፍጥረት 6:17-20

ኖኅ ከፊቱ በጣም ከባድ ሥራ ይጠብቀዋል። የሚሠራው መርከብ ርዝመቱ 133 ሜትር፣ ወርዱ 22 ሜትር እንዲሁም ከፍታው 13 ሜትር ስለሆነ በጣም ግዙፍ ነበር። መርከቡ በዘመናችን ካሉ በእንጨት የተሠሩ ግዙፍ የባሕር መርከቦች እንኳ በጣም ይበልጣል። ታዲያ ኖኅ ከሥራው ለመሸሽ ሞክሮ ይሆን? ወይም ሥራው አስቸጋሪ እንደሆነ በመግለጽ አጉረምርሞ ይሆን? አሊያም ሥራውን ለማቅለል ሲል የተሰጠውን ዝርዝር መመሪያ ለመቀየር ሞክሮ ይሆን? በፍጹም፤ ምክንያቱም መጽሐፍ ቅዱስ  “ኖኅም ሁሉን እግዚአብሔር እንዳዘዘው አደረገ” ይላል።—ዘፍጥረት 6:22

የመርከቡ ሥራ በርካታ አሥርተ ዓመታትን ምናልባትም ከ40 እስከ 50 ዓመት የሚፈጅ ነበር። ሥራው ዛፍ መቁረጥን እንዲሁም ግንዱን ማጓጓዝን፣ መሰንጠቅን፣ መጥረብንና ማገጣጠምን ይጠይቃል። መርከቡ ባለ ሁለት ፎቅ ወይም ደርብ ሲሆን በርካታ ክፍሎች እንዲሁም በጎን በኩል በር ያስፈልገው ነበር። ከሁኔታዎች መረዳት እንደሚቻለው መርከቡ ጣሪያው ሥር መስኮቶች ያሉት ሲሆን ውኃ በቀላሉ እንዲወርድ ለማስቻል ጣሪያው አሞራ ክንፍ ተደርጎ የተሠራ ነው።—ዘፍጥረት 6:14-16

ዓመታት እያለፉ ሲሄዱና መርከቡም መልክ እየያዘ ሲመጣ ኖኅ የቤተሰቡን ድጋፍ በማግኘቱ በጣም ተደስቶ መሆን አለበት! የተሰጠው ተልእኮ መርከብ ከመሥራት ይበልጥ ተፈታታኝ ሊሆን የሚችል ሌላም ነገር ማከናወንን የሚጠይቅ ነበር። መጽሐፍ ቅዱስ ኖኅ “የጽድቅ ሰባኪ” እንደነበር ይናገራል። (2 ጴጥሮስ 2:5) በመሆኑም ኖኅ ክፉ የሆነውንና ፈሪሃ አምላክ የሌለውን ኅብረተሰብ ጥፋት እንደተደቀነበት በድፍረት በማስጠንቀቅ ረገድ ግንባር ቀደም ሆኗል። ታዲያ በወቅቱ የነበረው ኅብረተሰብ ምን ምላሽ ሰጠ? ከጊዜ በኋላ ኢየሱስ ያንን ዘመን አስታውሶ ሲናገር ሰዎቹ ‘እንዳላስተዋሉ’ ተናግሯል። እነዚህ ሰዎች በዕለት ተዕለት የሕይወት እንቅስቃሴዎች ማለትም በመብላት፣ በመጠጣትና በማግባት ተጠምደው ስለነበር ኖኅ ለሰጠው ማስጠንቀቂያ ጆሮ ዳባ ልበስ እንዳሉ ኢየሱስ ተናግሯል። (ማቴዎስ 24:37-39) ብዙ ሰዎች ኖኅንና ቤተሰቡን መሳለቂያ እንዳደረጓቸው ጥርጥር የለውም፤ እንዲያውም አንዳንዶቹ ዝተውበትና ከባድ ተቃውሞ አድርሰውበት ይሆናል።

አምላክ ኖኅን እንደባረከው የሚያሳዩ ማስረጃዎችን ቢመለከቱም ብዙ ሰዎች መልእክቱን አልተቀበሉም፤ እንዲያውም በእሱ ላይ አፊዘዋል

ሆኖም ኖኅና ቤተሰቡ ፈጽሞ ተስፋ አልቆረጡም። ምንም እንኳ በዙሪያቸው ያለው ዓለም በሕይወታቸው ውስጥ ትልቅ ቦታ የሰጡትን ሥራ ከንቱ ድካም፣ ትርጉም የለሽና ሞኝነት እንደሆነ አድርጎ ቢቆጥረውም እነሱ ግን ሥራውን በታማኝነት ማከናወናቸውን ቀጥለዋል። በመሆኑም በዛሬው ጊዜ ያሉ ክርስቲያን ቤተሰቦች ኖኅና ቤተሰቡ ካሳዩት እምነት ብዙ የሚማሩት ነገር አለ። ደግሞም የምንኖረው “በመጨረሻዎቹ ቀኖች” ውስጥ እንደሆነ መጽሐፍ ቅዱስ ይናገራል። (2 ጢሞቴዎስ 3:1) ኢየሱስ ዘመናችን ከኖኅ ዘመን ጋር በጣም እንደሚመሳሰል ተናግሯል። ክርስቲያኖች ስለ አምላክ መንግሥት የሚገልጸውን መልእክት ሲሰብኩ ሰዎች ለመልእክቱ ግዴለሽ ቢሆኑ ወይም ቢያፌዙ አልፎ ተርፎም ስደት ቢያስነሱ ኖኅን ማስታወሳቸው ጠቃሚ ነው። ምክንያቱም እንዲህ ዓይነቶቹን ተፈታታኝ ሁኔታዎች ለመጋፈጥ የመጀመሪያዎቹ አይደሉም።

“ወደ መርከቧ ግባ”

አሁን ብዙ አሥርተ ዓመታት አልፈዋል፤ የመርከቡ ሥራም ወደ መጠናቀቁ ተቃርቧል። ኖኅ 600 ዓመት ሊሞላው ሲል ሐዘን ደረሰበት። አባቱ ላሜሕ ሞተ። * ከአምስት ዓመት በኋላ ደግሞ በመጽሐፍ ቅዱስ ታሪክ ውስጥ ከተመዘገቡት ሰዎች ሁሉ ረጅም ዕድሜ የኖረው የላሜሕ አባት፣ የኖኅ አያት ማቱሳላ በ969 ዓመቱ ሞተ። (ዘፍጥረት 5:27) ማቱሳላም ሆነ ላሜሕ የመጀመሪያው ሰው አዳም በኖረበት ዘመን ውስጥ ኖረዋል።

በዚያው ዓመት ኖኅ “ቤተ ሰብህን በሙሉ ይዘህ ወደ መርከቧ ግባ” የሚል አዲስ መመሪያ ከይሖዋ አምላክ ተቀበለ። በተጨማሪም አምላክ ከሁሉም ዓይነት የእንስሳት ዝርያ ይኸውም ለመሥዋዕት ከሚሆኑት ንጹሕ እንስሳት ሰባት ሰባት፣ ከሌሎቹ ደግሞ ሁለት ሁለት እንስሳት ወደ መርከቡ እንዲያስገባ ኖኅን አዘዘው።—ዘፍጥረት 7:1-3

በወቅቱ የነበረው ትዕይንት ፈጽሞ ከአእምሮ ሊጠፋ የማይችል እንደነበር ምንም ጥርጥር የለውም። በመቶዎች የሚቆጠሩ እንስሳት ከየአቅጣጫው እየጎረፉ ነው፤ ከእነዚህ መካከል በእግራቸው የሚሄዱ፣ የሚበርሩ፣ በደረታቸው የሚሳቡ፣ ድክ ድክ የሚሉና እያዘገሙ የሚጓዙ የተለያየ መጠን፣ ቅርጽና ባሕርይ ያላቸው እንስሳት ይገኙበታል። ኖኅ፣ የዱር እንስሳቱን እንደ ልብ መንቀሳቀስ ወደማይችሉበት መርከብ እያስገደደ ወይም እያባበለ ለማስገባት ሲታገል በዓይነ ሕሊናችን ይታየን ይሆናል። ኖኅ ግን እንደዚያ ማድረግ አላስፈለገውም። ምክንያቱም ዘገባው ‘እንስሳቱ ወደ ኖኅ መጡ፤ ወደ መርከቧም ገቡ’ ይላል።—ዘፍጥረት 7:9

አንዳንድ ተቺዎች ‘ይህ እንዴት ሊሆን ይችላል? ደግሞስ እነዚያ ሁሉ እንስሳት በዚያ ጠባብ ቦታ ውስጥ እንዴት በሰላም አብረው መቆየት ይችላሉ?’ ብለው ይጠይቁ ይሆናል። እስቲ አስበው፣  የአጽናፈ ዓለሙ ፈጣሪ የሆነው ይሖዋ የፈጠራቸውን እንስሳት መቆጣጠር አስፈላጊም ከሆነ ለማዳና ገራም እንዲሆኑ ማድረግ ያቅተዋል? ይሖዋ ቀይ ባሕርን የከፈለና ፀሐይ ባለችበት እንድትቆም ያደረገ አምላክ መሆኑን መርሳት አይኖርብህም። ታዲያ በኖኅ ታሪክ ውስጥ የተገለጸውን እያንዳንዱን ክንውን መፈጸም ያቅተዋል? እንደማያቅተው ሳይታለም የተፈታ ነው፤ ደግሞም አድርጎታል!

እርግጥ ነው፣ አምላክ የፈጠራቸውን እንስሳት በሌላ መንገድ ማዳን ይችል ነበር። ይሁን እንጂ ጥበበኛ የሆነው አምላክ ሰዎችን በፈጠረበት ወቅት በምድር ላይ ያሉትን ሕያዋን ፍጥረታት በሙሉ እንዲንከባከቡ የሰጣቸውን ኃላፊነት እንድናስታውስ የሚያደርገንን ዘዴ መጠቀም መርጧል። (ዘፍጥረት 1:28) በዚህም ምክንያት በዛሬው ጊዜ ያሉ ብዙ ወላጆች ይሖዋ የፈጠራቸውን ሰዎችም ሆነ እንስሳት ከፍ አድርጎ እንደሚመለከት ለልጆቻቸው ለማስተማር የኖኅን ታሪክ ይጠቀማሉ።

ይሖዋ የጥፋት ውኃው በአንድ ሳምንት ውስጥ እንደሚመጣ ለኖኅ ነገረው። መቼም ይህ ሳምንት ለኖኅና ለቤተሰቡ ውጥረት የበዛበት እንደሚሆን ግልጽ ነው። እንስሳቱንም ሆነ ለእንስሳቱና ለቤተሰቡ የሚያስፈልገውን ቀለብ ወደ መርከቡ አስገብቶ ቦታ ቦታ ማስያዝ እንዲሁም የቤተሰቡን ንብረት ተሸክሞ ወደ መርከቡ ማስገባት ምን ያህል አድካሚ ሊሆን እንደሚችል ገምት። በተለይ የኖኅ ሚስትና ምራቶቿ መርከቡን ቤት ለማስመሰል ደፋ ቀና ሲሉ ቆይተው መሆን አለበት።

ይህ ሁሉ ሲሆን በዙሪያቸው ያሉት ሰዎች ምን ያደርጉ ነበር? ይሖዋ ኖኅንም ሆነ ሥራውን እየባረከ እንዳለ ቢመለከቱም “ምንም አላስተዋሉም።” እንስሳቱ ወደ መርከቡ እየጎረፉ ሲገቡ ቆመው ከማየት ውጪ ምንም ያደረጉት ነገር የለም። ይሁን እንጂ ግዴለሽ መሆናቸው ሊያስገርመን አይገባም። በዛሬው ጊዜ ያሉ ሰዎች የምንኖረው በዚህ ሥርዓት የመጨረሻ ቀኖች ውስጥ መሆኑን የሚያሳዩትን በርካታ ማስረጃዎች አያስተውሉም። ደግሞም ሐዋርያው ጴጥሮስ በተናገረው ትንቢት መሠረት የአምላክን ማስጠንቀቂያ ሰምተው እርምጃ በሚወስዱ ግለሰቦች ላይ የሚያፌዙ ሰዎች አሉ። (2 ጴጥሮስ 3:3-6) በተመሳሳይም ሰዎች በኖኅና በቤተሰቡ ላይ አፊዘውባቸው እንደነበር ምንም ጥርጥር የለውም።

ታዲያ ፌዙ የቆመው መቼ ነው? ዘገባው ኖኅ ቤተሰቡንና እንስሳቱን ወደ መርከቡ ካስገባ በኋላ ይሖዋ በሩን ‘ከውጭ እንደዘጋበት’ ይነግረናል። በአቅራቢያው ያለ ማንኛውም ፌዘኛ አምላክ የወሰደውን ይህን እርምጃ ሲመለከት ማፌዙን እንደሚያቆም ምንም ጥርጥር የለውም። ይህ እንኳ ባይሆን ዝናቡ መዝነብ መጀመሩ ጸጥ እንደሚያሰኘው ግልጽ ነው! ዝናቡ ያለማቋረጥ መዝነብ ጀመረ፤ በዚህም የተነሳ ልክ ይሖዋ እንደተናገረው ዓለም በውኃ ተጥለቀለቀ።—ዘፍጥረት 7:16-21

የእነዚያ ክፉ ሰዎች ጥፋት ይሖዋን ያስደስተዋል? በፍጹም! (ሕዝቅኤል 33:11) እንዲያውም ይሖዋ አካሄዳቸውን አስተካክለው ትክክለኛውን ነገር ማድረግ የሚችሉበትን አጋጣሚ ሁሉ ሰጥቷቸው ነበር። ታዲያ ይህን ማድረግ ይችሉ ነበር? ይህን ማድረግ ይችሉ እንደነበር የኖኅ ሕይወት ምሥክር ነው። ኖኅ ከይሖዋ ጋር በመሄድ ይኸውም በሁሉም ነገር አምላክን በመታዘዝ ከጥፋት መትረፍ እንደሚቻል አሳይቷል። በዚህ መንገድ ኖኅ በእምነት አማካኝነት በዘመኑ የነበረውን ዓለም ኮንኗል፤ በዚያን ጊዜ የነበረው ትውልድ ምን ያህል ክፉ እንደሆነ አጋልጧል። ኖኅ በእምነት እሱንም ሆነ ቤተሰቡን አድኗል። አንተም እምነት በማሳየት ረገድ የኖኅን ምሳሌ የምትከተል ከሆነ ራስህንም ሆነ የምትወዳቸውን ሰዎች ታድናለህ። ልክ እንደ ኖኅ ይሖዋ አምላክን ወዳጅህ በማድረግ ከእሱ ጋር መሄድ ትችላለህ። ይህ ወዳጅነት ደግሞ ዘላለማዊ ሊሆን ይችላል!

^ စာပိုဒ်၊ 10 በዚያ ዘመን ሰዎች ከእኛ የበለጠ ረጅም ዕድሜ ይኖሩ ነበር። ይህ ሊሆን የቻለው በዚያ ዘመን የነበረው ትውልድ በአንድ ወቅት ጠንካራና ፍጹም ለነበሩት ለአዳምና ለሔዋን ቅርብ በመሆኑ እንደሆነ ከሁኔታው መረዳት ይቻላል።

^ စာပိုဒ်၊ 20 ላሜሕ ለልጁ ኖኅ የሚል ስም ያወጣለት ሲሆን ትርጉሙም “እረፍት፤ ማጽናኛ” ማለት ሳይሆን አይቀርም። በተጨማሪም ላሜሕ፣ ኖኅ የሰው ዘር በተረገመችው ምድር ላይ ከሚደርስበት ድካምና ልፋት እረፍት እንዲያገኝ በማድረግ ከስሙ ትርጉም ጋር የሚስማማ ተግባር እንደሚፈጽም ትንቢት ተናግሯል። (ዘፍጥረት 5:28, 29) ሆኖም ላሜሕ ቀደም ብሎ በመሞቱ ይህ ትንቢት ሲፈጸም ማየት አልቻለም።