በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

ለአምላክ የልቧን አውጥታ ነገረችው

ለአምላክ የልቧን አውጥታ ነገረችው

 በእምነታቸው ምሰሏቸው

ለአምላክ የልቧን አውጥታ ነገረችው

ሐና ለጉዞ በሚደረጉት መሰናዶዎች ራሷን በማስጠመድ ችግሯን ለመርሳት እየሞከረች ነው። በመሠረቱ ወቅቱ የደስታ ጊዜ ሊሆን ይገባ ነበር፤ ባሏ ሕልቃና በሴሎ በሚገኘው የማደሪያ ድንኳን አምልኮ ለማቅረብ በየዓመቱ መላ ቤተሰቡን ይዞ የመሄድ ልማድ ነበረው። ይሖዋ እንዲህ ያሉት ወቅቶች ሕዝቡ የሚደሰትባቸው እንዲሆኑ ይፈልግ ነበር። (ዘዳግም 16:15) ሐናም ከልጅነቷ ጀምሮ በእነዚህ በዓላት ትደሰት እንደነበረ ጥርጥር የለውም። ይሁን እንጂ ከቅርብ ዓመታት ወዲህ ነገሮች እንደ ቀድሞው አልሆኑላትም።

ሐና የሚወዳት ባል በማግኘቷ ተባርካለች። ይሁን እንጂ ሕልቃና ሌላም ሚስት ነበረችው። ፍናና የምትባለው ይህች ሴት የሐናን ሕይወት መበጥበጥን ሥራዬ ብላ የተያያዘችው ትመስላለች። ፍናና በየዓመቱ በሚያደርጉት ጉዞ ወቅትም እንኳ ሳይቀር ሐናን የምታበሳጭበት መንገድ አታጣም ነበር። ለመሆኑ ይህን የምታደርገው እንዴት ነበር? ሐና በይሖዋ ላይ ያላት እምነት ከአቅሟ በላይ የሆነባትን ከባድ ሁኔታ እንድትቋቋም የረዳት እንዴት ነበር? በተለይ የዚህ ጥያቄ መልስ ትኩረታችንን የሚስብ ነው። አንተም ደስታህን የሚያሳጣህ ችግር አጋጥሞህ ከሆነ የሐና ታሪክ ልብህን ይነካው ይሆናል።

“ልብሽስ ለምን ያዝናል?”

ሐና በሕይወቷ ውስጥ ሁለት ከባድ ችግሮች እንደነበሩባት መጽሐፍ ቅዱስ ይገልጻል። የመጀመሪያውን ችግር ለማስተካከል ማድረግ የምትችለው ነገር በጣም ውስን ነው፤ ሁለተኛው ችግር ግን ፈጽሞ ከቁጥጥሯ ውጪ ነበር። የመጀመሪያው ችግሯ ባሏ ሌላ ሚስት ማግባቱ ሲሆን ጣውንቷ ሐናን ትጠላት ነበር። ሁለተኛው ችግሯ ደግሞ መሃን መሆኗ ነበር። መሃንነት፣ ልጅ ወልዳ ማቀፍ ለምትመኝ ለማንኛዋም ሚስት ትልቅ ፈተና ነው፤ በተለይ ሐና በኖረችበት ዘመን ከነበረው ባሕል አንጻር ደግሞ መሃንነት ለከፍተኛ ሐዘን ይዳርግ ነበር። ሁሉም ቤተሰብ ስሙን የሚያስጠራ ልጅ እንዲኖረው ይፈልግ ነበር። በመሆኑም መሃንነት የሚያዋርድና የሚያሳፍር ነገር እንደሆነ ተደርጎ ይታይ ነበር።

ፍናና በእንቅርት ላይ ጆሮ ደግፍ ባትሆንባት ኖሮ ሐና ችግሯን በቻለችው ነበር። ከአንድ በላይ ማግባት ምንጊዜም ቢሆን በትዳር ውስጥ ችግር እንደሚያስከትል የታወቀ ነው። እንዲህ በመሰለው ትዳር ውስጥ ቅናት፣ ፉክክር፣ ግጭትና ሐዘን መታየቱ የተለመደ ነገር ነበር። ከአንድ በላይ ሚስቶች ማግባት ከአምላክ የመጀመሪያ ዓላማ ጋር ፈጽሞ አይስማማም፤ አምላክ በኤደን ገነት ውስጥ ለአንድ ባል የሰጠው አንዲት ሚስት ብቻ ነበር። * (ዘፍጥረት 2:24) መጽሐፍ ቅዱስ ከአንድ በላይ ሚስቶች ማግባት ያለውን መጥፎ ገጽታ የሚያሳዩ ዘገባዎችን ይዟል፤ በሕልቃና ቤተሰብ ውስጥ የተፈጠረው ሁኔታም ለዚህ ሕያው ምሥክር ነው።

ታሪኩ እንደሚገልጸው ሕልቃና ሐናን ከፍናና አብልጦ ይወዳት ነበር። በአይሁድ አፈ ታሪክ መሠረት ሕልቃና መጀመሪያ ያገባው ሐናን ሲሆን ፍናናን ያገባው ከተወሰኑ ዓመታት በኋላ ነው። ያም ሆነ ይህ በሐና በጣም የምትቀናው ፍናና በዚህም በዚያም ብላ ጣውንቷን አበሳዋን ታሳያት ነበር። ፍናና ሐናን የምትበልጥበት አለኝ የምትለው ነገር ልጅ መውለድ መቻሏ ነበር። ፍናና እያከታተለች ትወልድ ነበር፤ የልጆቿ ቁጥር በጨመረ መጠን ከሐና በልጣ ለመታየት የምታደርገው ጥረትም በዚያው ልክ እንደተሳካ ይሰማት ነበር። ለሐና ልታዝንላትና ልታጽናናት ሲገባ ቁስሏን በመነካካት ታበሳጫት ጀመር። ፍናና ሐናን “ታስቈጣት፣ ታበሳጫትም ነበር” በማለት መጽሐፍ ቅዱስ  ይናገራል። (1 ሳሙኤል 1:6) ፍናና ይህን የምታደርገው ሆን ብላ ነበር። ዓላማዋ ሐናን መጉዳት ሲሆን ደግሞም ተሳክቶላታል።

ፍናና ሐናን ለማበሳጨት በጣም ጥሩ አጋጣሚ ሆኖ ያገኘችው ለአምልኮ በየዓመቱ ወደ ሴሎ የሚሄዱበትን ጊዜ ይመስላል። ሕልቃና ቁጥራቸው በርካታ ለሆኑት የፍናና ‘ወንዶችና ሴቶች ልጆች ሁሉ’ ለይሖዋ ከቀረበው መሥዋዕት ላይ ድርሻቸውን ይሰጣቸው ነበር። ልጅ ያልነበራት ሐና ግን የምትወስደው የራሷን ድርሻ ብቻ ነበር። በዚህ ጊዜ ፍናና ሐናን እንደምትበልጣት ለማሳየት ትጥር እንዲሁም የሐና መሃን መሆን የፈጠረላትን አጋጣሚ ተጠቅማ በነገር ትወጋት ነበር፤ በዚህም ምክንያት ይህች ምስኪን ሴት ታለቅስና መብላት እስኪያቅታት ድረስ ትበሳጭ ነበር። ሕልቃና የሚወዳት ሚስቱ ሐና እንዳዘነችና መብላት እንዳቃታት አስተውሎ መሆን አለበት፤ በመሆኑም እንዲህ በማለት ሊያጽናናት ሞከረ፦ “ሐና ሆይ፤ ለምን ታለቅሻለሽ? ለምንስ አትበዪም? ልብሽስ ለምን ያዝናል? ከዐሥር ወንዶች ልጆች እኔ አልበልጥብሽምን?”—1 ሳሙኤል 1:4-8

ሕልቃና፣ ሐና ያዘነችው መሃን በመሆኗ ምክንያት መሆኑን ማስተዋሉ የሚያስመሰግነው ነው። ሐና እንደሚወዳት በደግነት የሰጣትን ማረጋገጫ ከፍ አድርጋ እንደተመለከተችው ጥርጥር የለውም። * ይሁን እንጂ ሕልቃና የፍናናን ክፋት አላነሳም፤ ሐናም ቢሆን ስለ ሁኔታው ትንገረው አትንገረው ዘገባው አይገልጽም። ምናልባት ሐና፣ የፍናናን ክፋት ማጋለጥ ያለችበትን ሁኔታ እንደሚያባብሰው ተገንዝባ ይሆናል። ሕልቃና ሁኔታውን ለመለወጥ ምን ማድረግ ይችላል? ደግሞስ ሐና ስለ ሁኔታው መናገሯ ፍናና በእሷ ላይ የምትፈጽመው የክፋት ድርጊት እንዲብስ ከማድረግ ውጪ ምን የሚፈይደው ነገር ይኖራል? እንዲያውም የዚህች ክፉ ሴት ልጆችና አገልጋዮችም ጭምር ተባብረው እንዲነሱባት ሊያደርግ ይችላል። ሐና በገዛ ቤቷ ውስጥ ይበልጥ ባይተዋርነት እንዲሰማት ከማድረግ በቀር የሚያስገኘው ጥቅም አይኖርም ነበር።

ሕልቃና የፍናና ክፋት እስከ ምን ድረስ እንደሆነ ይወቅም አይወቅ፣ ይሖዋ ሁሉንም ነገር ተመልክቶት ነበር። የይሖዋ ቃል ሁሉንም ነገር ቁልጭ አድርጎ ያስቀመጠው ሲሆን ይህም ትንንሽ የሚመስሉ የቅናትና የጥላቻ ተግባሮችን ለሚፈጽሙ ሰዎች ከባድ ማስጠንቀቂያ የሚሰጥ ነው። በሌላ በኩል ደግሞ እንደ ሐና ንጹሕና ሰላማዊ የሆነ ሰው የፍትሕ አምላክ በራሱ ጊዜና በራሱ መንገድ ነገሮችን እንደሚያስተካክል በማወቁ መጽናኛ ማግኘት ይችላል። (ዘዳግም 32:4) ሐናም ይህን ሳታውቅ አትቀርም፤ ምክንያቱም እርዳታ ለማግኘት ፊቷን ያዞረችው ወደ ይሖዋ ነበር።

“ከዚያም በኋላ በፊቷ ላይ ሐዘን አልታየም”

ገና በማለዳው ቤተሰቡ ሽር ጉድ ይላል። ሁሉም ሰው፣ ልጆችም እንኳ ሳይቀሩ ለጉዞው እየተዘጋጁ ነው። በተራራማው የኤፍሬም ምድር የሚኖረው ይህ ትልቅ ቤተሰብ ወደ ሴሎ ለመድረስ አቀበት ቁልቁለት የሚበዛውን የ30 ኪሎ ሜትር መንገድ መጓዝ ነበረበት። * ጉዞው በእግር አንድ ወይም ሁለት ቀን ይፈጃል። ሐና፣ በዚህ ወቅት ጣውንቷ እሷን ለማናደድ ምን እንደምታደርግ ብታውቅም ጉዞውን ትታ ቤት አልቀረችም። በዚህ መንገድ በዛሬው ጊዜ ላሉት የአምላክ አገልጋዮች ግሩም ምሳሌ ትታለች። ሌሎች የሚፈጽሙት ተገቢ ያልሆነ ድርጊት ለአምላክ የምናቀርበውን አምልኮ እንዲነካብን መፍቀድ ፈጽሞ ጥበብ አይደለም። አለበለዚያ መጽናት እንድንችል እኛን ለማጠንከር የተደረጉት ዝግጅቶች ያመልጡናል።

ቤተሰቡ አቀበታማና ጠመዝማዛ በሆኑት መንገዶች ላይ ሙሉ ቀን ሲጓዝ ከዋለ በኋላ ወደ ሴሎ ተቃረበ። እዚያም ዙሪያውን በጋራዎች በተከበበ አንድ ኮረብታ ላይ አረፍ አለ። ወደ ሴሎ እየተጠጉ ሲሄዱ ሐና ለይሖዋ በጸሎት ምን እንደምትለው ብዙ ሳታስብበት አልቀረችም። እዚያ እንደደረሱም ቤተሰቡ አንድ ላይ ሆኖ ለመብላት ተሰበሰበ። ሐና ሁኔታው አመቺ ሲሆንላት ከቤተሰቡ ተነጥላ ወደ ይሖዋ የማደሪያ ድንኳን አመራች። ሊቀ ካህናቱ ዔሊ በቤተ መቅደሱ መቃን አጠገብ ተቀምጦ ነበር። ይሁን እንጂ ሐና ትኩረቷ አምላኳ ላይ ነበር። በአምላክ የማደሪያ ድንኳን ሆና የምታቀርበው ጸሎት ተሰሚነት እንደሚያገኝ እርግጠኛ ነበረች። ያለችበትን አሳዛኝ ሁኔታ ማንም ሙሉ በሙሉ ባይረዳላትም እንኳ በሰማይ ያለው አባቷ ይረዳላታል። በልቧ ውስጥ አምቃ የያዘችው ምሬት ፈነዳና ስቅስቅ ብላ ማልቀስ ጀመረች።

 ሐና ተንሰቅስቃ እያለቀሰች በልቧ ወደ ይሖዋ ስትጸልይ ሰውነቷ ይንዘፈዘፍ ነበር። በውስጧ ያለውን ሥቃይ ለይሖዋ በምትገልጽበት ጊዜ ከንፈሮቿ ይንቀጠቀጡ ነበር። በሰማይ ላለው አባቷ ልቧን በማፍሰስ ለረጅም ጊዜ ጸለየች። ይሁንና አምላክ በጣም የጓጓችለትን ነገር ይኸውም ልጅ የመውለድ ፍላጎቷን እንዲያሟላላት ከመጠየቅ ያለፈ ነገር አድርጋለች። የሐና ምኞት ከአምላክ በረከት ማግኘት ብቻ ሳይሆን የቻለችውን ሁሉ ለእሱ መስጠት ነበር። ስለዚህ ወንድ ልጅ ብትወልድ ልጁ በሕይወት ዘመኑ ሁሉ ይሖዋን እንዲያገለግል እንደምትሰጠው ተሳለች።—1 ሳሙኤል 1:9-11

በዚህ መንገድ ሐና ጸሎትን በተመለከተ ለአምላክ አገልጋዮች ሁሉ ምሳሌ ትታለች። አንድ ልጅ አፍቃሪ ለሆነው አባቱ እንደሚያደርገው ሁሉ የይሖዋ ሕዝቦችም የሚያሳስባቸውን ነገር ሁሉ ያላንዳች ገደብ ግልጥልጥ አድርገው ለእሱ በመናገር ልባቸውን በፊቱ እንዲያፈሱ ይሖዋ በደግነት ጋብዟቸዋል። (መዝሙር 62:8፤ 1 ተሰሎንቄ 5:17) ሐዋርያው ጴጥሮስ፣ ለይሖዋ የሚቀርብ ጸሎትን በተመለከተ በመንፈስ መሪነት የሚከተለውን አጽናኝ ሐሳብ ጽፏል፦ “የሚያስጨንቃችሁንም ነገር ሁሉ በእሱ ላይ ጣሉ፤ ምክንያቱም እሱ ስለ እናንተ ያስባል።”—1 ጴጥሮስ 5:7

ይሁን እንጂ ሰዎች የይሖዋን ያህል የሌሎችን ስሜትና ችግር አይረዱም። ሐና እያለቀሰች በምትጸልይበት ጊዜ አንድ ድምፅ አስደነገጣት። የተናገራት ስትጸልይ ይመለከታት የነበረው ሊቀ ካህናቱ ኤሊ ነው። እሱም “ስካሩ የማይለቅሽ እስከ መቼ ድረስ ነው? የወይን ጠጅሽን ከአንቺ አስወግጂው” አላት። ኤሊ፣ ሐና ከንፈሯ እየተንቀጠቀጠ ተንሰቅስቃ ስታለቅስ የተመለከተ ከመሆኑም ሌላ ስሜቷ እንደተረበሸ አስተውሎ ነበር። ሆኖም ምን እንዳጋጠማት በመጠየቅ ፈንታ ሰክራለች ከሚል ድምዳሜ ለመድረስ ቸኮለ።—1 ሳሙኤል 1:12-14

ሐና እንደዚያ ባዘነችበት ወቅት እንደዚህ ያለ መሠረተ ቢስ ውንጀላ ሲሰነዘርባት ስሜቷ ምን ያህል ተጎድቶ ይሆን! ሁኔታውን የሚያብሰው ደግሞ ይህን ያደረገው የተከበረ ቦታ የነበረው ሰው መሆኑ ነው። ያም ሆኖ ሐና በዚህ ወቅትም ግሩም የእምነት ምሳሌ ትታለች። የሰው አለፍጽምና ይሖዋን ከማምለክ ወደኋላ እንድትል እንዲያደርጋት አልፈቀደችም። ለኤሊ በአክብሮት መልስ በመስጠት ስለ ሁኔታዋ ነገረችው። እሱም መሳሳቱን እንደተገነዘበ በሚያሳይ የለሰለሰ አንደበት ሳይሆን አይቀርም “በሰላም ሂጂ፤ የእስራኤል አምላክ የለመንሺውን ይስጥሽ” አላት።—1 ሳሙኤል 1:15-17

ሐና ለይሖዋ የልቧን አውጥታ መናገሯና በማደሪያው ድንኳን ለእሱ አምልኮ ማቅረቧ ምን ውጤት አስገኘ? ዘገባው “መንገዷን ሄደች፤ ምግብም በላች፤ ከዚያም በኋላ በፊቷ ላይ ሐዘን አልታየም” ይላል። (1 ሳሙኤል 1:18) ሐና እፎይታ ተሰምቷት ነበር። እንደ ከባድ ሸክም ሆኖ ስሜቷን የደቆሳትን ነገር ኃያል በሆነው ሰማያዊ አባቷ ጫንቃ ላይ የጣለችው ያህል ነበር። (መዝሙር 55:22) ለይሖዋ ከአቅሙ በላይ የሚሆንበት ችግር ሊኖር ይችላል? በጭራሽ! ያኔም አልነበረም፣ አሁንም የለም፣ ምንጊዜም አይኖርም!

እኛም አንድ ነገር ሲከብደን፣ ከአቅማችን በላይ ሲሆንብን ወይም በሐዘን ስንዋጥ የሐናን ምሳሌ በመከተል መጽሐፍ ቅዱስ ‘ጸሎት ሰሚ’ በማለት ለሚጠራው አምላክ የልባችንን አውጥተን ብንነግረው መልካም ነው። (መዝሙር 65:2) በእምነት እንዲህ ካደረግን እኛም ሐዘናችን ተወግዶ ‘ከማሰብ ችሎታ ሁሉ በላይ በሆነው የአምላክ ሰላም’ እንደተተካ እንገነዘብ ይሆናል።—ፊልጵስዩስ 4:6, 7

 “እንደ አምላካችን ያለ ዐለት የለም”

በማግስቱ ጠዋት ሐና ከሕልቃና ጋር ወደ ማደሪያው ድንኳን ተመልሳ ሄደች። ሐና ይሖዋን ልጅ እንደለመነችውና ስዕለት እንደተሳለች ለሕልቃና ሳትነግረው አልቀረችም፤ ምክንያቱም የሙሴ ሕግ አንድ ባል ሚስቱ እሱ ሳያውቅ የተሳለችውን ስዕለት ሊሽረው እንደሚችል ይናገራል። (ዘኍልቍ 30:10-15) ይሁን እንጂ ያ ታማኝ  ሰው ስዕለቷን አልተቃወመም። ከዚህ ይልቅ እሱና ሐና ወደ ቤታቸው ከማቅናታቸው በፊት በማደሪያው ድንኳን አምልኮታቸውን አቀረቡ።

ፍናና እንደ ቀድሞዋ ሐናን ማበሳጨት እንደማትችል የተገነዘበችው መቼ ይሆን? ዘገባው ይህን ባይነግረንም “ከዚያም በኋላ በፊቷ ላይ ሐዘን አልታየም” የሚለው አገላለጽ ከዚያ ጊዜ ጀምሮ ሐና ይበልጥ ደስተኛ እንደሆነች ያመለክታል። ያም ሆነ ይህ ፍናና፣ ሐናን ለማበሳጨት የምትሸርበው ተንኮል እንዳልሰመረ ብዙም ሳይቆይ ተገነዘበች። መጽሐፍ ቅዱስም ከዚያ በኋላ ስሟን ፈጽሞ አይጠቅሰውም።

ወራት እያለፉ ሲሄዱ ሐና የአእምሮ ሰላም ከማግኘት ባለፈ ደስታዋ ወሰን የሌለው እንዲሆን የሚያደርግ ነገር አጋጠማት። ለካስ አርግዛለች! ሐና በጣም ብትደሰትም ይህን በረከት ከየት እንዳገኘችው ለአፍታ እንኳ አልዘነጋችም። ልጁ ሲወለድ ሳሙኤል የሚለውን ስም የመረጠችለት ሲሆን ትርጉሙ “የአምላክ ስም” ማለት ነው፤ ይህም ሐና እንዳደረገችው መለኮታዊውን ስም መጥራትን ያመለክታል። በዚያ ዓመት ሕልቃና ቤተሰቡን ይዞ ወደ ሴሎ ሲሄድ ሐና አብራቸው አልሄደችም። ልጁ ጡት እስኪጥል ድረስ ሦስት ዓመት በቤት አብራው ቆየች። በዚህ ጊዜ ከምትወደው ልጇ የምትለይበት ቀን ስለደረሰ ራሷን አዘጋጀች።

ከልጇ ጋር መለያየቱ ቀላል አልነበረም። እርግጥ ነው፣ ሐና ሴሎ በሚገኘው የማደሪያው ድንኳን ውስጥ የሚያገለግሉት አንዳንድ ሴቶች ለሳሙኤል ጥሩ እንክብካቤ ሊያደርጉለት እንደሚችሉ ታውቅ ነበር። ያም ሆኖ ሳሙኤል ገና ትንሽ ልጅ ነበር፤ ደግሞስ ከልጇ መነጠል የምትፈልግ እናት ማን ናት? የሆነ ሆኖ ሐናና ሕልቃና ልጁን ወደ ማደሪያው ድንኳን ያመጡት ደስ ብሏቸው እንጂ እያዘኑ አልነበረም። በአምላክ ቤት መሥዋዕት ካቀረቡ በኋላ ሐና ከሦስት ዓመት በፊት የገባችውን ስዕለት ለኤሊ በመግለጽ ሳሙኤልን አስረከቡት።

ሐና ከዚያ በኋላ ያቀረበችውን ጸሎት አምላክ በመንፈስ መሪነት ባስጻፈው ቃሉ ውስጥ እንዲካተት አድርጎታል። በ⁠1 ሳሙኤል 2:1-10 ላይ ተመዝግቦ የሚገኘውን የሐና ጸሎት ስታነብ እምነቷ ምን ያህል ጠንካራ እንደነበረ ከእያንዳንዱ ዓረፍተ ነገር መገንዘብ ትችላለህ። ይሖዋ ኃይሉን ድንቅ በሆነ መንገድ ስለሚጠቀምበት ማለትም ትዕቢተኞችን በማዋረድ፣ የተጨቆኑትን በመባረክ እንዲሁም ሕይወትን በማጥፋትም ሆነ ከሞት በማዳን ረገድ ስላለው ችሎታ አወደሰችው። በሰማይ ያለው አባቷን በቅድስናው፣ በፍትሑና በታማኝነቱ አቻ የማይገኝለት በመሆኑ አመሰገነችው። ሐና “እንደ አምላካችን ያለ ዐለት የለም” ብላ ለመናገር የቻለችበት በቂ ምክንያት አላት። ይሖዋ ሙሉ በሙሉ እምነት የሚጣልበት፣ የማይለዋወጥና ለእርዳታ ወደ እሱ ፊታቸውን ለሚያዞሩ ለተጨቆኑና በግፍ ለተደቆሱ ሰዎች መጠጊያ ነው።

ትንሹ ሳሙኤል በይሖዋ ላይ እንደዚህ ያለ እምነት ያላት እናት ስላለው በእርግጥም ታድሏል። እርግጥ ነው፣ እያደገ በሚሄድበት ጊዜ እናቱን መናፈቁ ባይቀርም እንደተረሳ ግን ፈጽሞ ተሰምቶት አያውቅም። ሐና በየዓመቱ ወደ ሴሎ ስትመጣ በማደሪያው ድንኳን ሲያገለግል የሚለብሰው ትንሽ መደረቢያ ታመጣለት ነበር። ሐና ለልጇ የምትሠራለት ይህ ልብስ ለእሱ ያላትን ፍቅርና አሳቢነት የሚያሳይ ማስረጃ ነበር። (1 ሳሙኤል 2:19) ያመጣችለትን አዲስ መደረቢያ ለልጇ ስታለብሰው፣ በእጇ እየደባበሰች ስታስተካክልለትና በደግነትና በፍቅር ዓይን እየተመለከተችው በሚያበረታቱ ቃላት ስታነጋግረው በዓይነ ሕሊናችን መመልከት እንችላለን። ሳሙኤል እንዲህ ያለች እናት ስላለችው ተባርኳል፤ እሱም ካደገ በኋላ ለወላጆቹም ሆነ ለመላው እስራኤል በረከት ሆኗል።

ሐናም ብትሆን አልተረሳችም። ይሖዋ ማህፀኗን በመክፈት የባረካት ሲሆን ለሕልቃና ሌሎች አምስት ልጆች ወለደችለት። (1 ሳሙኤል 2:21) ይሁንና ሐና ያገኘችው ትልቁ በረከት በእሷና በአባቷ በይሖዋ መካከል ያለው ዝምድና ሳይሆን አይቀርም፤ ይህ ወዳጅነት ዓመታት እያለፉ በሄዱ ቁጥር እየተጠናከረ ሄዷል። አንተም የሐናን እምነት ለመኮረጅ ጥረት በምታደርግበት ጊዜ እንዲህ ዓይነት በረከት እንድታገኝ ምኞታችን ነው።

[የግርጌ ማስታወሻ]

^ አን.7 አምላክ በሕዝቦቹ መካከል ከአንድ በላይ የማግባት ልማድ ለተወሰነ ጊዜ እንዲቀጥል የፈቀደበትን ምክንያት ለመረዳት በሐምሌ 1, 2009 መጠበቂያ ግንብ ገጽ 30 ላይ የወጣውን “አምላክ ከአንድ በላይ ማግባትን ይደግፋል?” የሚለውን ርዕስ ተመልከት።

^ አን.10 ምንም እንኳን ታሪኩ ይሖዋ ‘የሐናን ማሕፀን እንደዘጋ’ ቢናገርም አምላክ በዚህች ትሑትና ታማኝ ሴት እንዳልተደሰተባት የሚያሳይ ምንም ማስረጃ የለም። (1 ሳሙኤል 1:5) መጽሐፍ ቅዱስ አምላክ ለተወሰነ ጊዜ እንዲደርሱ የፈቀዳቸውን ነገሮች እሱ እንደፈጸማቸው አድርጎ የሚናገርበት ጊዜ አለ።

^ አን.13 ይህ ርቀት የተሰላው የሕልቃና የትውልድ ከተማ የሆነችው ራማ በኢየሱስ ዘመን አርማትያስ በመባል ትታወቅ የነበረችው ከተማ ሳትሆን እንደማትቀር ታስቦ ነው።

[በገጽ 17 ላይ የሚገኝ ሣጥን]

ሁለት አስደናቂ ጸሎቶች

በ⁠1 ሳሙኤል 1:11 እና 2:1-10 ላይ የተመዘገቡት ሐና ያቀረበቻቸው ሁለት ጸሎቶች በርካታ አስደናቂ ገጽታዎች አሏቸው። እስቲ ጥቂቶቹን እንመልከት፦

▪ ሐና የመጀመሪያውን ጸሎት ያቀረበችው “የሰራዊት ጌታ እግዚአብሔር” በማለት ነው። በመጽሐፍ ቅዱስ ውስጥ ይህን ማዕረግ እንደተጠቀመች የተጠቀሰችው የመጀመሪያ ሰው ሐና ናት። “የሰራዊት ጌታ” ወይም “የሰራዊት አምላክ” የሚለው የማዕረግ ስም በመጽሐፍ ቅዱስ ውስጥ በጠቅላላ ከ200 ጊዜ በላይ ተጠቅሶ የሚገኝ ሲሆን አምላክ ብዛት ባላቸው መንፈሳዊ ልጆቹ ላይ ያለውን ሥልጣን ያመለክታል።

▪ ሐና ሁለተኛውን ጸሎቷን ያቀረበችው ልጇ ሲወለድ ሳይሆን እሷና ሕልቃና በሴሎ አምላክን እንዲያገለግል ልጁን በሰጡበት ወቅት መሆኑን ልብ በል። ይህም ሐናን በጣም ያስደሰታት የጣውንቷን የፍናናን አፍ ማዘጋቷ ሳይሆን የይሖዋን በረከት ማግኘቷ መሆኑን ይጠቁማል።

▪ ሐና “ቀንዴም በእግዚአብሔር ከፍ ከፍ አለ” ብላ ስትናገር ከባድ ጭነት ለመሸከም ይገለገሉበት የነበረውንና ቀንዱን በኃይል የሚጠቀመውን በሬን በአእምሮዋ ይዛ ሊሆን ይችላል። ሐና ‘ይሖዋ ሆይ፣ አንተ ታበረታኛለህ’ ብላ የተናገረች ያህል ነበር።—1 ሳሙኤል 2:1

▪ ሐና የአምላክን ‘መሲሕ’ ወይም ቅቡዕ በተመለከተ የተናገረቻቸው ቃላት ትንቢታዊ እንደሆኑ የሚቆጠሩ ናቸው። በመጽሐፍ ቅዱስ ውስጥ ወደፊት የሚመጣውን የተቀባውን ንጉሥ ለማመልከት በዚህ ቃል የተጠቀመችው የመጀመሪያዋ ሰው ሐና ናት።—1 ሳሙኤል 2:10

▪ የኢየሱስ እናት ማርያም 1,000 ከሚያህሉ ዓመታት በኋላ ለይሖዋ ባቀረበችው ምስጋና ላይ ሐና የተናገረቻቸውን አንዳንድ አባባሎች ተጠቅማለች።—ሉቃስ 1:46-55

[በገጽ 16 ላይ የሚገኝ ሥዕል]

ሐና መሃን በመሆኗ ምክንያት በጣም ታዝን የነበረ ሲሆን ፍናና ደግሞ ሐናን ይበልጥ ለማበሳጨት የማትፈነቅለው ድንጋይ አልነበረም

[በገጽ 16 እና 17 ላይ የሚገኝ ሥዕል]

የልብህን አውጥተህ በመጸለይ ረገድ የሐናን ምሳሌነት መኮረጅ ትችላለህ?

[በገጽ 17 ላይ የሚገኝ ሣጥን]

ኤሊ ሐናን በመጥፎ ቢገምታትም እሷ አልተቀየመችም