2 ቆሮንቶስ 7:1-16

7  ስለዚህ የተወደዳችሁ ወንድሞች፣ እነዚህ ተስፋዎች ስላሉን ሥጋንና መንፈስን ከሚያረክስ ነገር ሁሉ ራሳችንን እናንጻ፤ እንዲሁም አምላካዊ ፍርሃት በማሳየት ቅድስናችንን ፍጹም እናድርግ።  በልባችሁ ውስጥ ስፍራ ስጡን። እኛ ማንንም አልበደልንም፤ ማንንም አላበላሸንም፤ ማንንም መጠቀሚያ አላደረግንም።  ይህን የምለው ልኮንናችሁ አይደለም። ምክንያቱም ከዚህ በፊት እንደነገርኳችሁ ብንኖርም ሆነ ብንሞት ምንጊዜም በልባችን ውስጥ ናችሁ።  እናንተን በግልጽ ለማናገር ከፍተኛ ነፃነት ይሰማኛል። በእናንተ በጣም እኮራለሁ። እንዲሁም እጅግ ተጽናንቻለሁ፤ በመከራችንም ሁሉ ደስታዬ ወሰን የለውም።  መቄዶንያ በደረስን ጊዜም እንኳ በሁሉም አቅጣጫ መከራ ደረሰብን እንጂ ሥጋችን ምንም እረፍት አላገኘም፤ በውጭ ጠብ በውስጥም ፍርሃት ነበረብን።  ይሁንና ሐዘንተኞችን የሚያጽናናው አምላክ፣ ቲቶ በመካከላችን በመገኘቱ እንድንጽናና አደረገን፤  የተጽናናነውም በመካከላችን በመገኘቱ ብቻ ሳይሆን እሱ በእናንተ በተጽናናበት መጽናኛ ጭምር ነው፤ ስለ ናፍቆታችሁ፣ ስለ ሐዘናችሁና ለእኔ ስላላችሁ ቅንዓት የሚገልጽ ወሬ ይዞልን መጥቷል፤ ስለዚህ ይበልጥ ደስ ብሎኛል።  በመሆኑም በደብዳቤዬ አሳዝኛችሁ ቢሆን እንኳ በዚህ አልጸጸትም። መጀመሪያ ላይ ብጸጸት እንኳ (ደብዳቤው እንድታዝኑ ያደረጋችሁ ለአጭር ጊዜ እንደሆነ ተረድቻለሁ፤)  አሁን የምደሰተው እንዲያው በማዘናችሁ ሳይሆን ሐዘናችሁ ለንስሐ ስላበቃችሁ ነው፤ ምክንያቱም ያዘናችሁት አምላካዊ በሆነ መንገድ ነው፤ ይህም በእኛ የተነሳ ምንም ጉዳት እንዳይደርስባችሁ አድርጓል። 10  ምክንያቱም አምላካዊ በሆነ መንገድ ማዘን ለመዳን የሚያበቃ ንስሐ ያስገኛል፤ ይህ ደግሞ ለጸጸት አይዳርግም፤ የዚህ ዓለም ሐዘን ግን ሞት ያስከትላል። 11  እነሆ፣ አምላካዊ በሆነ መንገድ ማዘን በእናንተ መካከል እንዴት ያለ ትጋት፣ እንዴት ያለ ከክስ ነፃ የሚያደርግ እርምጃ፣ እንዴት ያለ ቁጣ፣ እንዴት ያለ ፍርሃት፣ እንዴት ያለ ጉጉት፣ እንዴት ያለ ቅንዓት፣ እንዴት ያለ ስህተትን የማረም እርምጃ እንዳስገኘ ተመልከቱ! በዚህ ጉዳይ ንጹሕ መሆናችሁን በሁሉም ረገድ አሳይታችኋል። 12  ስለዚህ ምንም እንኳ ለእናንተ ብጽፍም የጻፍኩት ለእኛ ያላችሁን ቀና አመለካከት በአምላክ ፊት በመካከላችሁ እንድታሳዩ እንጂ በደል ስለሠራው ወይም በደል ስለተፈጸመበት ሰው ብዬ አይደለም። 13  እኛም የተጽናናነው ለዚህ ነው። ይሁን እንጂ ከመጽናናታችንም በተጨማሪ የቲቶ መንፈስ በእናንተ በሁላችሁ ስለታደሰ በእሱ ደስታ ይበልጥ ተደስተናል። 14  ምክንያቱም በእሱ ፊት ስለ እናንተ በኩራት ተናግሬም ከሆነ አላሳፈራችሁኝም፤ ለእናንተ የተናገርነው ነገር በሙሉ እውነት እንደሆነ ሁሉ በቲቶ ፊት በኩራት የተናገርነውም ነገር እውነት እንደሆነ ተረጋግጧል። 15  በተጨማሪም ሁላችሁም ያሳያችሁትን ታዛዥነት እንዲሁም በፍርሃትና በመንቀጥቀጥ እንዴት እንደተቀበላችሁት ሲያስታውስ ለእናንተ ያለው ጥልቅ ፍቅር እየጨመረ ሄዷል። 16  እኔም በሁሉም መንገድ በእናንተ ለመበረታታት በመቻሌ እጅግ ደስ ብሎኛል።

የግርጌ ማስታወሻዎች