የሐዋርያት ሥራ 28:1-31

28  በደህና ወደ የብስ ከደረስን በኋላ ደሴቲቱ ማልታ ተብላ እንደምትጠራ አወቅን።  በዚያም የሚኖሩት ባዕድ ቋንቋ የሚናገሩ ሰዎች በሰብዓዊነት ተነሳስተው ልዩ ደግነት አሳዩን፤ ዝናብ መዝነብ ጀምሮ ስለነበረና ብርድ ስለነበረ እሳት በማቀጣጠል ሁላችንንም በጥሩ ሁኔታ ተቀበሉን።  ይሁን እንጂ ጳውሎስ ጭራሮ ሰብስቦ እሳቱ ውስጥ ሲጨምር ከሙቀቱ የተነሳ እፉኝት ወጥታ እጁ ላይ ተጣበቀች።  ባዕድ ቋንቋ የሚናገሩትም ሰዎች እፉኝቷ እጁ ላይ ተንጠልጥላ ባዩ ጊዜ እርስ በርሳቸው “ይህ ሰው ነፍሰ ገዳይ መሆን አለበት፤ ከባሕሩ ተርፎ በደህና ቢወጣም እንኳ ከቅጣት ፍርድ አምልጦ በሕይወት መኖር አልቻለም” ይባባሉ ጀመር።  እሱ ግን እፉኝቷን እሳቱ ላይ አራገፋት፤ አንዳች ጉዳትም አልደረሰበትም።  ሆኖም ሰዎቹ ከአሁን አሁን ሰውነቱ ያብጣል ወይም ድንገት ወድቆ ይሞታል ብለው ይጠባበቁ ነበር። ብዙ ጠብቀው ምንም ጉዳት እንዳልደረሰበት ባዩ ጊዜ ሐሳባቸውን ለውጠው ይህ ሰው አምላክ ነው ይሉ ጀመር።  በዚያም አካባቢ ፑፕልዮስ የተባለ የደሴቲቱ አስተዳዳሪ ርስት ነበረው፤ እሱም በእንግድነት ተቀብሎን ሦስት ቀን በደግነት አስተናገደን።  ሆኖም የፑፕልዮስ አባት ትኩሳትና ተቅማጥ ይዞት ተኝቶ ነበር፤ ጳውሎስም ወደ እሱ ገብቶ ጸለየለት፤ እጁንም ጫነበትና ፈወሰው።  ይህ ከሆነም በኋላ በደሴቲቱ የሚኖሩ ታመው የነበሩ ሌሎች ሰዎችም ወደ እሱ እየመጡ ይፈወሱ ጀመር። 10  በተጨማሪም ብዙ ስጦታ በመስጠት አክብሮታቸውን ገለጹልን፤ በመርከብም ለመሄድ በተዘጋጀን ጊዜ የሚያስፈልጉንን ነገሮች ሁሉ ጫኑልን። 11  ከሦስት ወር በኋላም ክረምቱን በደሴቲቱ ባሳለፈ ከእስክንድርያ በመጣ መርከብ ጉዞ ጀመርን፤ መርከቡ “የዙስ ልጆች” የሚል ዓርማ ነበረበት። 12  በስራኩስ ወደሚገኘው ወደብ ከደረስን በኋላ በዚያ ሦስት ቀን ቆየን፤ 13  ከዚያም ተነስተን ዞረን በመሄድ ሬጊዩም ደረስን። ከአንድ ቀን በኋላም የደቡብ ነፋስ ስለተነሳ በሁለተኛው ቀን ፑቲዮሉስ ደረስን። 14  በዚያም ወንድሞችን አገኘን፤ እነሱም ሰባት ቀን አብረናቸው እንድንቆይ ለመኑን፤ እንዲህ እያልን ወደ ሮም ሄድን። 15  በዚያ የነበሩ ወንድሞችም ስለ እኛ በሰሙ ጊዜ እስከ አፍዩስ የገበያ ስፍራና ሦስት ማደሪያ እስከሚባለው ቦታ ድረስ ሊቀበሉን መጡ፤ ጳውሎስም ባያቸው ጊዜ አምላክን አመሰገነ፤ እንዲሁም ተበረታታ። 16  በመጨረሻም ሮም በደረስን ጊዜ ጳውሎስ አንድ ወታደር እየጠበቀው ብቻውን እንዲኖር ተፈቀደለት። 17  ይሁን እንጂ ከሦስት ቀን በኋላ የአይሁዳውያንን ታላላቅ ሰዎች አንድ ላይ ጠራ። ሰዎቹም በተሰበሰቡ ጊዜ እንዲህ ይላቸው ጀመር:- “ወንድሞች፣ ምንም እንኳ ሕዝቡን ወይም የአባቶቻችንን ልማድ የሚጻረር ምንም ነገር ያልፈጸምኩ ቢሆንም በኢየሩሳሌም አስረው ለሮማውያን አሳልፈው ሰጥተውኛል። 18  እነሱም ከመረመሩኝ በኋላ ለሞት የሚያበቃ ምንም ጥፋት ስላላገኙብኝ ሊፈቱኝ ፈልገው ነበር። 19  ሆኖም አይሁዳውያን ይህን መቃወማቸውን በቀጠሉ ጊዜ ለቄሳር ይግባኝ ለማለት ተገደድኩ፤ ይህን ያደረግኩት ግን ሕዝቤን የምከስበት ነገር ኖሮኝ አይደለም። 20  እናንተንም ለማየትና ለማነጋገር ጥያቄ ያቀረብኩት ለዚህ ነው፤ በዚህ ሰንሰለት የታሰርኩትም ለእስራኤል በተሰጠው ተስፋ ምክንያት ነው።” 21  እነሱም እንዲህ አሉት:- “ስለ አንተ የተጻፈ ከይሁዳ የመጣ ምንም ደብዳቤ አልደረሰንም፤ ከዚያ ከመጡት ወንድሞች መካከልም ስለ አንተ ክፉ ነገር የተናገረ ወይም ያወራ አንድም ሰው የለም። 22  ሆኖም ስለዚህ ኑፋቄ በየቦታው መጥፎ ነገር እንደሚወራ ስለምናውቅ የአንተን ሐሳብ ደግሞ መስማት ተገቢ ይመስለናል።” 23  በጉዳዩ ላይ ለመነጋገር ቀን ከወሰኑ በኋላ ብዙ ሆነው ወደ መኖሪያ ስፍራው መጡ። እሱም ከጠዋት ጀምሮ እስከ ማታ ድረስ ስለ አምላክ መንግሥት የተሟላ ምሥክርነት በመስጠትና ስለ ኢየሱስ ከሙሴ ሕግና ከነቢያት እየጠቀሰ አሳማኝ ማስረጃ በማቅረብ ጉዳዩን አብራራላቸው። 24  አንዳንዶቹ የተናገረውን ነገር ሲያምኑ ሌሎቹ ግን አላመኑም። 25  ስለዚህ እርስ በርስ ሊስማሙ ስላልቻሉ ለመሄድ ተነሱ፤ በዚህ ጊዜ ጳውሎስ የሚከተለውን የመጨረሻ ሐሳብ ተናገረ:- “መንፈስ ቅዱስ በነቢዩ ኢሳይያስ በኩል ለአባቶቻችሁ የተናገረው ቃል ትክክል ነበር፤ 26  የተናገረውም ቃል ይህ ነው:- ‘ወደዚህ ሕዝብ ሄደህ እንዲህ በላቸው:- “መስማቱን ትሰማላችሁ፤ ሆኖም ፈጽሞ አታስተውሉም፤ ማየቱን ታያላችሁ፤ ሆኖም ፈጽሞ አትመለከቱም። 27  ምክንያቱም በዓይናቸው አይተው፣ በጆሯቸው ሰምተው እንዲሁም በልባቸው አስተውለው ወደ እኔ እንዳይመለሱና እንዳልፈውሳቸው የዚህ ሕዝብ ልብ ደንድኗል፤ በጆሯቸው ሰምተው ምላሽ አልሰጡም፣ ዓይናቸውንም ጨፍነዋል።”’ 28  ስለዚህ አምላክ ሰዎችን ስለሚያድንበት መንገድ የሚናገረው ይህ ምሥራች ለአሕዛብ እንደተላከ እንድታውቁ እፈልጋለሁ፤ እነሱም በእርግጥ ይሰሙታል።” 29*  —— 30  ጳውሎስም በተከራየው ቤት ሁለት ዓመት ሙሉ ኖረ፤ ወደ እሱ የሚመጡትንም ሁሉ በደግነት ይቀበላቸው ነበር፤ 31  ያለምንም እንቅፋት በታላቅ የመናገር ነፃነት ስለ አምላክ መንግሥት ይሰብክላቸው የነበረ ከመሆኑም በላይ ስለ ጌታ ኢየሱስ ክርስቶስ ያስተምራቸው ነበር።

የግርጌ ማስታወሻዎች

ሥራ 28:29 ማቴዎስ 17:21 ላይ የሚገኘውን የግርጌ ማስታወሻ ተመልከት።