የሐዋርያት ሥራ 21:1-40

21  ከእነሱ በግድ ከተለያየን በኋላ በመርከብ ተሳፍረን በቀጥታ በመጓዝ ቆስ ደረስን፤ በማግስቱ ደግሞ ወደ ሮድስ አመራን፤ ከዚያም ወደ ጳጥራ ሄድን።  ወደ ፊንቄ የምትሻገር ጀልባ ባገኘን ጊዜ ተሳፍረን ጉዟችንን ቀጠልን።  የቆጵሮስ ደሴት በታየችን ጊዜ በስተግራ ትተናት ወደ ሶርያ አመራን፤ ጀልባዋ ጭነቷን በጢሮስ ማራገፍ ስለነበረባት እኛም እዚያ ወረድን።  ደቀ መዛሙርቱን ፈልገን ካገኘን በኋላ በዚያ ሰባት ቀን ቆየን። እነሱም በመንፈስ ተመርተው ጳውሎስ ወደ ኢየሩሳሌም እንዳይሄድ ደጋግመው ነገሩት።  የቆይታ ጊዜያችን ባለቀ ጊዜ ከዚያ ተነስተን ጉዟችንን ጀመርን፤ ሴቶችንና ልጆችን ጨምሮ ደቀ መዛሙርቱ ሁሉ እስከ ከተማው ውጭ ድረስ ሸኙን። ከዚያም በባሕሩ ዳርቻ ተንበርክከን ጸለይን፤  ከተሰነባበትንም በኋላ እኛ ወደ ጀልባዋ ገባን፤ እነሱም ወደ ቤታቸው ተመለሱ።  ከጢሮስ ተነስተን በጀልባ በመጓዝ ጴጤሌማይስ ደረስን፤ እዚያም ወንድሞችን ሰላም ካልን በኋላ አብረናቸው አንድ ቀን ቆየን።  በማግስቱ ጉዟችንን በመቀጠል ቂሳርያ ደረስን፤ በዚያም ከሰባቱ ወንዶች አንዱ ወደሆነው ወደ ወንጌላዊው ፊልጶስ ቤት ገብተን እሱ ጋር አረፍን።  ይህ ሰው ትንቢት የሚናገሩ አራት ደናግል ሴቶች ልጆች ነበሩት። 10  ለብዙ ቀናት እዚያ ከተቀመጥን በኋላ አጋቦስ የሚባል አንድ ነቢይ ከይሁዳ ወረደ፤ 11  ወደ እኛም መጥቶ የጳውሎስን መታጠቂያ በመውሰድ የራሱን እግርና እጅ ካሰረ በኋላ እንዲህ አለ:- “መንፈስ ቅዱስ እንዲህ ይላል:- ‘አይሁዳውያን የዚህን መታጠቂያ ባለቤት በኢየሩሳሌም እንዲህ አድርገው ያስሩታል፤ ለአሕዛብም አሳልፈው ይሰጡታል።’” 12  ይህን ስንሰማ እኛም ሆንን በዚያ የሚኖሩት ደቀ መዛሙርት ጳውሎስ ወደ ኢየሩሳሌም እንዳይወጣ እንለምነው ጀመር። 13  በዚህ ጊዜ ጳውሎስ “እያለቀሳችሁ ለምን ልቤን ታባቡታላችሁ? እኔ ስለ ጌታ ኢየሱስ ስም በኢየሩሳሌም ለመታሰር ብቻ ሳይሆን ለመሞትም እንኳ ዝግጁ መሆኔን ላረጋግጥላችሁ እወዳለሁ” ሲል መለሰ። 14  ምክራችንን ለመቀበል ፈቃደኛ ሳይሆን በመቅረቱ “እንግዲህ የይሖዋ ፈቃድ ይሁን” ብለን ተውነው። 15  ከዚህ በኋላ ለጉዞው ተዘጋጅተን ወደ ኢየሩሳሌም መውጣት ጀመርን። 16  ሆኖም በቂሳርያ ከሚኖሩት ደቀ መዛሙርት አንዳንዶቹ ወደምናርፍበት ሰው ቤት እኛን ለመውሰድ አብረውን ሄዱ፤ ይህ ሰው ምናሶን የተባለ የቆጵሮስ ሰው ሲሆን ከቀድሞዎቹ ደቀ መዛሙርት አንዱ ነበር። 17  ኢየሩሳሌም በደረስን ጊዜ ወንድሞች በደስታ ተቀበሉን። 18  በማግስቱም ጳውሎስ ከእኛ ጋር ወደ ያዕቆብ ሄደ፤ ሽማግሌዎቹም ሁሉ በዚያ ነበሩ። 19  ሰላም ካላቸውም በኋላ አምላክ በእሱ አገልግሎት አማካኝነት በአሕዛብ መካከል ያከናወናቸውን ነገሮች በዝርዝር ይተርክላቸው ጀመር። 20  እነሱም ይህን ከሰሙ በኋላ አምላክን ያመሰግኑ ጀመር፤ እሱንም እንዲህ አሉት:- “ወንድም፣ ከአይሁዳውያን መካከል በብዙ ሺህ የሚቆጠሩ አማኞች እንዳሉ ታውቃለህ፤ ደግሞም ሁሉም ለሕጉ ቀናተኞች ናቸው። 21  እነሱም አንተ በአሕዛብ መካከል ያሉት አይሁዳውያን ሁሉ ልጆቻቸውን እንዳይገርዙም ሆነ የቆየውን ልማድ እንዳይከተሉ በመንገር የሙሴን ሕግ እንዲክዱ ስታስተምር እንደቆየህ ስለ አንተ የሚወራውን ወሬ ሰምተዋል። 22  እንግዲህ ምን ማድረግ ይሻላል? መምጣትህን እንደሆነ መስማታቸው አይቀርም። 23  ስለዚህ አሁን የምንነግርህን ነገር አድርግ:- ስእለት ያለባቸው አራት ሰዎች በእኛ ዘንድ አሉ። 24  እነዚህን ሰዎች ይዘህ በመሄድ ከእነሱ ጋር የመንጻት ሥርዓት ፈጽም፤ ራሳቸውንም እንዲላጩ የሚያስፈልገውን ገንዘብ ክፈልላቸው። ይህን ብታደርግ በአንተ ላይ የተወራው ሁሉ ከንቱ መሆኑንና አንተም ራስህ ሕጉን እያከበርክ በሥርዓት እንደምትኖር ሁሉም ሰው ያውቃል። 25  አማኝ የሆኑትን አሕዛብ በተመለከተ ግን ለጣዖት ከተሠዋና ከደም እንዲሁም ታንቆ ከሞተ እንስሳ ሥጋና ከዝሙት እንዲርቁ ወስነን ጽፈንላቸዋል።” 26  ከዚያም ጳውሎስ በማግስቱ ሰዎቹን ይዞ በመሄድ አብሯቸው የመንጻት ሥርዓቱን ፈጸመ፤ የመንጻት ሥርዓቱ የሚያበቃበትን ቀንና ለእያንዳንዳቸው መባ የሚቀርብበትን ጊዜ ለማሳወቅም ወደ ቤተ መቅደሱ ገባ። 27  ሰባቱ ቀናት ሊጠናቀቁ በተቃረቡበት ጊዜ ከእስያ የመጡ አይሁዳውያን ጳውሎስን በቤተ መቅደሱ ውስጥ ሲያዩት ሕዝቡን ሁሉ ለሁከት በማነሳሳት ያዙት፤ 28  እንዲህ እያሉም ጮኹ:- “የእስራኤል ሰዎች ሆይ፣ እርዱን! በሄደበት ቦታ ሁሉ ለሚያገኛቸው ሰዎች ሕዝባችንን፣ ሕጉንና ይህን ስፍራ የሚቃወም ትምህርት የሚያስተምረው ይህ ሰው ነው፤ በዚህ ላይ ደግሞ የግሪክ ሰዎችን ወደ ቤተ መቅደሱ ይዞ በመምጣት ይህን ቅዱስ ስፍራ አርክሷል።” 29  ይህንም ያሉት ቀደም ሲል የኤፌሶኑን ሰው ጥሮፊሞስን ከእሱ ጋር ከተማው ውስጥ አይተውት ስለነበር ነው፤ ጳውሎስ ይህን ሰው ወደ ቤተ መቅደሱ ይዞት የገባ መስሏቸው ነበር። 30  በመሆኑም ከተማዋ በሙሉ ታወከች፤ ሕዝቡም ግር ብሎ እየሮጠ መጣ፤ ጳውሎስንም ይዘው እየጎተቱ ከቤተ መቅደሱ አወጡት። በሮቹም ወዲያው ተዘጉ። 31  ሊገድሉትም አስበው ሳለ መላዋ ኢየሩሳሌም እንደታወከች የሚገልጽ ወሬ ለሠራዊቱ ሻለቃ ደረሰው፤ 32  እሱም ወዲያውኑ ወታደሮችንና የጦር መኮንኖችን ይዞ እየሮጠ ወደ እነሱ ወረደ። እነሱም ሻለቃውንና ወታደሮቹን ሲያዩ ጳውሎስን መደብደባቸውን ተዉ። 33  ከዚያም የሠራዊቱ ሻለቃ ቀርቦ ያዘውና በሁለት ሰንሰለት እንዲታሰር አዘዘ፤ ማን እንደሆነና ምን እንዳደረገም ይጠይቅ ጀመር። 34  ከሕዝቡም መካከል አንዳንዶች አንድ ነገር ሲናገሩ ሌሎቹ ደግሞ ሌላ ነገር ይናገሩ ነበር። ስለዚህ ሻለቃው ከጫጫታው የተነሳ ምንም የተጨበጠ ነገር ማግኘት ስላልቻለ ወደ ጦር ሰፈሩ እንዲወሰድ አዘዘ። 35  ሆኖም ጳውሎስ ወደ ደረጃው በደረሰ ጊዜ የሕዝቡ ዓመፅ በጣም በማየሉ ወታደሮቹ ተሸክመውት ለመሄድ ተገደዱ፤ 36  ብዙ ሕዝብም እየተከተለ “ይገደል!” እያለ ይጮኽ ነበር። 37  ጳውሎስ ወደ ጦር ሰፈሩ ሊያስገቡት በተቃረቡ ጊዜ ሻለቃውን “አንድ ነገር እንድነግርህ ትፈቅድልኛለህ?” አለው። ሻለቃውም እንዲህ አለው:- “ግሪክኛ መናገር ትችላለህ እንዴ? 38  አንተ ከዚህ ቀደም ዓመፅ አነሳስተህ አራት ሺህ ነፍሰ ገዳዮችን ወደ ምድረ በዳ ያሸፈትከው ግብፃዊ አይደለህም?” 39  በዚህ ጊዜ ጳውሎስ “እኔ እንኳን በኪልቅያ የምትገኘው የታወቀችው የጠርሴስ ከተማ ዜጋ የሆንኩ አይሁዳዊ ነኝ። ስለዚህ ለሕዝቡ እናገር ዘንድ እንድትፈቅድልኝ እለምንሃለሁ” አለ። 40  ከፈቀደለት በኋላ ጳውሎስ ደረጃው ላይ ቆሞ ለሕዝቡ በእጁ ምልክት ሰጠ። ታላቅ ጸጥታ በሰፈነ ጊዜ በዕብራይስጥ ቋንቋ እንዲህ ሲል ለሕዝቡ መናገር ጀመረ:-

የግርጌ ማስታወሻዎች