ሮም 8:1-39

8  ስለዚህ ከክርስቶስ ኢየሱስ ጋር አንድነት ያላቸው ኩነኔ የለባቸውም።  ምክንያቱም ከክርስቶስ ኢየሱስ ጋር ሕይወት የሚያስገኘው የዚያ መንፈስ ሕግ ከኃጢአትና ከሞት ሕግ ነፃ አውጥቶሃል።  ሕጉ ከሥጋ ባሕርይ የተነሳ ደካማ በመሆኑ ሊፈጽመው ያልቻለውን ነገር አምላክ ኃጢአትን ለማስወገድ የገዛ ራሱን ልጅ በኃጢአተኛ ሥጋ አምሳል በመላክ ፈጽሞታል። እንዲህ በማድረግም የሥጋን ኃጢአት ኮንኗል፤  ይህም የሆነው የሕጉ የጽድቅ መሥፈርት እንደ ሥጋ ፈቃድ ሳይሆን እንደ መንፈስ ፈቃድ በምንመላለስ በእኛ እንዲፈጸም ነው።  እንደ ሥጋ ፈቃድ የሚኖሩ ሰዎች አእምሯቸው ሙሉ በሙሉ በሥጋዊ ነገሮች ላይ ያተኮረ ነው፤ እንደ መንፈስ ፈቃድ የሚኖሩ ግን አእምሯቸው ሙሉ በሙሉ በመንፈሳዊ ነገሮች ላይ ያተኮረ ነው።  በሥጋዊ ነገሮች ላይ ማተኮር ሞት ያስከትላል፤ በመንፈሳዊ ነገሮች ላይ ማተኮር ግን ሕይወትና ሰላም ያስገኛል፤  ምክንያቱም ሥጋ ለአምላክ ሕግ ስለማይገዛና ደግሞም ሊገዛ ስለማይችል በሥጋዊ ነገሮች ላይ ማተኮር የአምላክ ጠላት ያደርጋል።  ስለሆነም ከሥጋ ፈቃድ ጋር ተስማምተው የሚኖሩ አምላክን ማስደሰት አይችሉም።  ይሁን እንጂ የአምላክ መንፈስ በእርግጥ በውስጣችሁ የሚኖር ከሆነ ከሥጋ ጋር ሳይሆን ከመንፈስ ጋር ስምም ናችሁ። ሆኖም አንድ ሰው የክርስቶስ መንፈስ ከሌለው ይህ ሰው የክርስቶስ አይደለም። 10  ይሁንና ክርስቶስ ከእናንተ ጋር አንድነት ያለው ከሆነ ሰውነታችሁ በኃጢአት ምክንያት የሞተ ነው፤ መንፈስ ግን ከጽድቅ የተነሳ ሕይወት ያስገኛል። 11  እንግዲህ ኢየሱስን ከሞት ያስነሳው የእሱ መንፈስ በእናንተ ውስጥ የሚኖር ከሆነ ክርስቶስ ኢየሱስን ከሞት ያስነሳው እሱ በእናንተ ውስጥ በሚኖረው መንፈስ አማካኝነት ሟች ሰውነታችሁንም ሕያው ያደርገዋል። 12  ስለዚህ ወንድሞች ግዴታ አለብን፤ ሆኖም እንደ ሥጋ ፈቃድ እንድንኖር ለሥጋ አይደለም፤ 13  ምክንያቱም እንደ ሥጋ ፈቃድ የምትኖሩ ከሆነ መሞታችሁ የማይቀር ነው፤ ይሁን እንጂ ሰውነታችሁ ዘወትር የሚፈጽመውን ሥራ በመንፈስ ብትገድሉ በሕይወት ትኖራላችሁ። 14  በአምላክ መንፈስ የሚመሩ ሁሉ እነዚህ የአምላክ ልጆች ናቸውና። 15  እንደገና ለፍርሃት የሚዳርጋችሁን የባርነት መንፈስ አልተቀበላችሁም፤ ከዚህ ይልቅ እንደ ልጅ የመቆጠር መብት የሚያስገኝ መንፈስ ተቀብላችኋል፤ ይህም መንፈስ “አባ፣ አባት!” ብለን እንድንጣራ ይገፋፋናል። 16  የአምላክ ልጆች መሆናችንን ይህ መንፈስ ራሱ ከመንፈሳችን ጋር ሆኖ ይመሠክራል። 17  እንግዲህ ልጆች ከሆንን ወራሾች ይኸውም የአምላክ ወራሾች ነን፤ ይሁንና የምንወርሰው ከክርስቶስ ጋር ነው፤ አሁን አብረነው መከራ ከተቀበልን፣ በኋላ ደግሞ አብረነው ክብር እንጎናጸፋለን። 18  በመሆኑም በአሁኑ ጊዜ የሚደርስብን መከራ በእኛ ላይ ከሚገለጠው ክብር ጋር ሲነጻጸር ከምንም ሊቆጠር እንደማይችል አምናለሁ። 19  ፍጥረት የአምላክን ልጆች መገለጥ በከፍተኛ ጉጉት እየተጠባበቀ ነው። 20  ምክንያቱም ፍጥረት ለከንቱነት ተገዝቷል፤ የተገዛው ግን በገዛ ፈቃዱ ሳይሆን በተስፋ እንዲገዛ ባደረገው በእሱ አማካኝነት ነው፤ 21  ተስፋውም ፍጥረት ራሱ ደግሞ ከመበስበስ ባርነት ነፃ ወጥቶ የአምላክን ልጆች ክብራማ ነፃነት ማግኘት ነው። 22  ፍጥረት ሁሉ እስከ አሁን ድረስ በአንድነት ሆኖ በመቃተትና አብሮ በመሠቃየት ላይ እንደሚገኝ እናውቃለን። 23  ይህም ብቻ ሳይሆን የውርሻችንን በኩራት ይኸውም መንፈስን ያገኘን እኛ ራሳችንም በቤዛው አማካኝነት ከሥጋዊ አካላችን ነፃ በመውጣት እንደ ልጆች የመቆጠርን መብት ለማግኘት በጉጉት እየተጠባበቅን በውስጣችን እንቃትታለን። 24  በዚህ ተስፋ ድነናል፤ ነገር ግን ተስፋ የሚደረገው ነገር የሚታይ ከሆነ ተስፋ መሆኑ ይቀራል፤ አንድ ሰው የሚያየውን ነገር ተስፋ ያደርጋል? 25  የማናየውን ነገር ተስፋ የምናደርግ ከሆነ ግን ጸንተን እንጠባበቀዋለን። 26  በተመሳሳይም መንፈስ በድካማችን ይረዳናል፤ ችግሩ መጸለይ በሚያስፈልገን ጊዜ ምን ብለን መጸለይ እንዳለብን አለማወቃችን ነው፤ ሆኖም በቃላት መግለጽ ተስኖን በምንቃትትበት ጊዜ መንፈስ ራሱ ስለ እኛ ይማልዳል። 27  ይሁንና ልብን የሚመረምረው አምላክ የመንፈስን ትርጉም ያውቃል፤ ምክንያቱም መንፈስ ለቅዱሳን የሚማልደው ከአምላክ ፈቃድ ጋር በሚስማማ መንገድ ነው። 28  አምላክ ለሚወዱት ይኸውም ከእሱ ዓላማ ጋር በሚስማማ መንገድ ለተጠሩት ሥራውን ሁሉ አቀናጅቶ ለበጎ እንዲሆንላቸው እንደሚያደርግ እናውቃለን፤ 29  ምክንያቱም መጀመሪያ እውቅና የሰጣቸው ሰዎች የልጁን መልክ እንዲመስሉ አስቀድሞ ወስኗል፤ ይኸውም ልጁ ከብዙ ወንድሞች መካከል በኩር እንዲሆን ነው። 30  ከዚህም በተጨማሪ አስቀድሞ የወሰናቸውን እነዚህን ደግሞ ጠራቸው፤ የጠራቸውን እነዚህን ደግሞ ጻድቃን አላቸው። በመጨረሻም ጻድቃን ያላቸውን እነዚህን ደግሞ አከበራቸው። 31  እንግዲህ ስለነዚህ ነገሮች ምን ማለት እንችላለን? አምላክ ከእኛ ጋር ከሆነ ማን ይቃወመናል? 32  ለገዛ ልጁ እንኳ ያልሳሳው፣ ከዚህ ይልቅ ለእኛ ለሁላችን አሳልፎ የሰጠው አምላክ ከእሱ ጋር አብሮ ሌሎች ነገሮችን ሁሉ እንዴት በደግነት አይሰጠንም? 33  አምላክ በመረጣቸው ላይ ማን ክስ ሊመሠርት ይችላል? ጻድቃን ብሎ የሚጠራቸው አምላክ ራሱ ነው። 34  እነሱን የሚኮንን ማን ነው? ምክንያቱም የሞተው፣ ከሞት የተነሳውና በአምላክ ቀኝ የተቀመጠው እንዲሁም ስለ እኛ የሚማልደው ክርስቶስ ኢየሱስ ነው። 35  ከክርስቶስ ፍቅር ማን ይለየናል? መከራ ወይስ ጭንቀት ወይስ ስደት ወይስ ረሃብ ወይስ ራቁትነት ወይስ አደጋ ወይስ ሰይፍ? 36  ይህም “ስለ አንተ ቀኑን ሙሉ ከሞት ጋር እንጋፈጣለን፤ እንደ እርድ በጎችም ተቆጠርን” ተብሎ እንደተጻፈው ነው። 37  ከዚህ ይልቅ በወደደን በእሱ አማካኝነት እነዚህን ነገሮች ሁሉ ሙሉ በሙሉ በድል አድራጊነት እንወጣለን። 38  ምክንያቱም ሞትም ቢሆን፣ ሕይወትም ቢሆን፣ መላእክትም ቢሆኑ፣ መንግሥታትም ቢሆኑ፣ አሁን ያሉት ነገሮችም ቢሆኑ፣ ወደፊት የሚመጡት ነገሮችም ቢሆኑ፣ ኃይላትም ቢሆኑ፣ 39  ከፍታም ቢሆን፣ ዝቅታም ቢሆን፣ ሌላ ማንኛውም ፍጥረት ቢሆን በጌታችን በክርስቶስ ኢየሱስ አማካኝነት ከተገለጸው የአምላክ ፍቅር ሊለየን እንደማይችል ሙሉ በሙሉ እርግጠኛ ነኝ።

የግርጌ ማስታወሻዎች