ሮም 5:1-21

5  ስለዚህ በእምነት አማካኝነት ጻድቃን ተብለን ስለተጠራን በጌታችን በኢየሱስ ክርስቶስ በኩል ከአምላክ ጋር ያለንን ሰላም ጠብቀን እንኑር፤  በኢየሱስ አማካኝነት አሁን ወደቆምንበት ወደዚህ ጸጋ በእምነት መቅረብም ችለናል፤ የአምላክንም ክብር እንደምናገኝ ተስፋ በማድረግ ሐሴት እናድርግ።  በዚህ ብቻ ሳይሆን በመከራ ውስጥ እያለንም ሐሴት እናድርግ፤ ምክንያቱም መከራ ጽናትን እንደሚያስገኝ እናውቃለን፤  ጽናትም የተፈተነ አቋምን፣ የተፈተነ አቋም ደግሞ ተስፋን ያስገኛል፤  ተስፋውም ሳይፈጸም ቀርቶ ለሐዘን የሚዳርግ አይደለም፤ ምክንያቱም የአምላክ ፍቅር፣ በተሰጠን መንፈስ ቅዱስ አማካኝነት በልባችን ውስጥ ፈስሷል።  በእርግጥም ክርስቶስ ገና ደካሞች ሳለን አስቀድሞ የተወሰነው ጊዜ ሲደርስ አምላክን ለማይታዘዙ ሰዎች ሞቷል።  ምክንያቱም ለጻድቅ ሰው የሚሞት ማግኘት በጣም አዳጋች ነው፤ እርግጥ ለጥሩ ሰው ለመሞት የሚደፍር ምናልባት ይገኝ ይሆናል።  ሆኖም አምላክ ገና ኃጢአተኞች ሳለን ክርስቶስ ለእኛ እንዲሞት በማድረግ ለእኛ ያለውን የራሱን ፍቅር አሳይቷል።  ስለዚህ በደሙ ጻድቃን ተብለን ስለተጠራን በእሱ አማካኝነት ከአምላክ ቁጣ እንደምንድን ይበልጥ እርግጠኞች መሆን እንችላለን። 10  ጠላቶች ሆነን ሳለን በልጁ ሞት አማካኝነት ከአምላክ ጋር ከታረቅን አሁን ታርቀን ሳለንማ በእሱ ሕይወት እንደምንድን የተረጋገጠ ነው። 11  ይህም ብቻ ሳይሆን አሁን እርቅ ባገኘንበት በጌታችን በኢየሱስ ክርስቶስ አማካኝነት በአምላክ ሐሴት እያደረግን ነው። 12  ከዚህም የተነሳ በአንድ ሰው አማካኝነት ኃጢአት ወደ ዓለም ገባ፤ በኃጢአትም ምክንያት ሞት መጣ፤ ሁሉም ኃጢአት ስለሠሩም ሞት ለሰው ሁሉ ተዳረሰ። 13  ሕጉ ከመሰጠቱ በፊትም ኃጢአት በዓለም ላይ ነበረ፤ ሆኖም ሕግ በሌለበት ማንም በኃጢአት አይጠየቅም። 14  ይሁንና አዳም ትእዛዝ በመተላለፍ የሠራውን ዓይነት ኃጢአት ባልሠሩት ላይም እንኳ ሳይቀር ከአዳም ጀምሮ እስከ ሙሴ ድረስ ሞት በሁሉ ላይ ነገሠ፤ አዳም በኋላ ለሚመጣው አምሳያ ነበር። 15  ሆኖም ስጦታው ያስገኘው ነገር በደሉ ካስከተለው ነገር የተለየ ነው። ምክንያቱም በአንድ ሰው በደል ብዙዎች ሞተዋል፤ ይሁንና የአምላክ ጸጋና ነፃ ስጦታው በአንዱ ሰው በኢየሱስ ክርስቶስ አማካኝነት ከተሰጠው ጸጋ ጋር ለብዙ ሰዎች ወደር የሌለው ጥቅም አስገኝቷል። 16  በተጨማሪም ነፃ ስጦታው ያስገኘው ውጤት የአንዱ ሰው ኃጢአት ካመጣው ውጤት የተለየ ነው። ምክንያቱም አንድን በደል ተከትሎ የመጣው ፍርድ ኩነኔን አስከትሏል፤ የብዙዎችን በደል ተከትሎ የመጣው ስጦታ ግን ብዙዎች ጻድቃን ተብለው እንዲጠሩ አስችሏል። 17  ምክንያቱም በአንድ ሰው በደል የተነሳ ሞት በዚህ ሰው በኩል ከነገሠ የአምላክን የተትረፈረፈ ጸጋና የጽድቅን ነፃ ስጦታ የሚቀበሉትማ በአንዱ ሰው በኢየሱስ ክርስቶስ አማካኝነት ሕይወት አግኝተው ነገሥታት ሆነው እንደሚገዙ ይበልጥ የተረጋገጠ ነው። 18  ስለዚህ አንድ በደል ሁሉም ዓይነት ሰዎች እንዲኮነኑ እንዳደረገ ሁሉ ከበደል ነፃ የሚያደርግ አንድ ድርጊትም ሁሉም ዓይነት ሰዎች ጻድቃን ተብለው በመጠራት ለሕይወት እንዲበቁ ያስችላል። 19  ምክንያቱም በአንዱ ሰው አለመታዘዝ ብዙዎች ኃጢአተኞች እንደሆኑ ሁሉ በአንዱ ሰው መታዘዝም ብዙዎች ጻድቃን ይሆናሉ። 20  ሕጉ በኋላ የመጣው በደል እንዲበዛ ነው። ይሁን እንጂ ኃጢአት ሲበዛ ጸጋ ደግሞ ይበልጥ ተትረፈረፈ። 21  ይህ የሆነው ለምንድን ነው? ኃጢአት ከሞት ጋር እንደ ነገሠ ሁሉ በተመሳሳይም በጌታችን ኢየሱስ ክርስቶስ በኩል የዘላለም ሕይወት ይገኝ ዘንድ ጸጋ በጽድቅ አማካኝነት እንዲነግሥ ነው።

የግርጌ ማስታወሻዎች