ራእይ 17:1-18

17  ሰባቱን ሳህኖች ይዘው ከነበሩት ሰባት መላእክት አንዱም መጥቶ እንዲህ ሲል አናገረኝ:- “ና፣ በብዙ ውኃዎች ላይ በምትቀመጠው በታላቂቱ ጋለሞታ ላይ የተበየነውን ፍርድ አሳይሃለሁ፤  የምድር ነገሥታትም ከእሷ ጋር ዝሙት ፈጸሙ፤ የምድር ነዋሪዎች ደግሞ በዝሙቷ ወይን ጠጅ ሰከሩ።”  እሱም በመንፈስ ኃይል ወደ ምድረ በዳ ወሰደኝ። በዚያም አንዲት ሴት አምላክን በሚሰድቡ ስሞች በተሞላ እንዲሁም ሰባት ራሶችና አሥር ቀንዶች ባሉት ደማቅ ቀይ አውሬ ላይ ተቀምጣ አየሁ።  ሴቲቱም ሐምራዊና ደማቅ ቀይ ልብስ ተጎናጽፋ እንዲሁም በወርቅ፣ በከበረ ድንጋይና በዕንቁዎች አጊጣ ነበር፤ በእጇም አስጸያፊ ነገሮችና የዝሙቷ ርኩሰት የሞላበት የወርቅ ጽዋ ይዛ ነበር።  በግምባሯም ላይ ሚስጥር፣ “ታላቂቱ ባቢሎን፣ የጋለሞታዎችና የምድር አስጸያፊ ነገሮች እናት” የሚል ስም ተጽፎ ነበር።  እኔም ሴቲቱ በቅዱሳን ደምና በኢየሱስ ምሥክሮች ደም ሰክራ አየኋት። ባየኋትም ጊዜ እጅግ በጣም ተደነቅኩ።  በዚህ ጊዜ መልአኩ እንዲህ አለኝ:- “የተደነቅከው ለምንድን ነው? የሴቲቱን እንዲሁም እሷን የተሸከመውን ሰባት ራሶችና አሥር ቀንዶች ያሉት አውሬ ሚስጥር እነግርሃለሁ:-  ያየኸው አውሬ ከዚህ በፊት ነበር፤ አሁን ግን የለም፤ ይሁንና ከጥልቁ ሊወጣ ነው፤ ወደ ጥፋትም ይሄዳል። በምድር ላይ የሚኖሩ አውሬው እንዴት ከዚህ በፊት እንደነበረ፣ አሁን ግን እንደሌለና ወደፊት እንደሚኖር ሲያዩ በአድናቆት ይዋጣሉ፤ ሆኖም ስማቸው ዓለም ከተመሠረተበት ጊዜ አንስቶ በሕይወት መጽሐፍ ጥቅልል ላይ አልተጻፈም።  “ጥበብ የታከለበት የማመዛዘን ችሎታ የሚያስፈልገው እንግዲህ እዚህ ላይ ነው:- ሰባቱ ራሶች ሴቲቱ ከላይ የተቀመጠችባቸውን ሰባት ተራሮች ያመለክታሉ። 10  ደግሞም ሰባት ነገሥታት ናቸው:- አምስቱ ወድቀዋል፤ አንዱ አለ፤ ሌላው ደግሞ ገና አልመጣም፤ በሚመጣበት ጊዜ ግን ለአጭር ጊዜ ሊቆይ ይገባዋል። 11  ከዚህ በፊት የነበረው፣ አሁን ግን የሌለው አውሬ ራሱም ስምንተኛ ንጉሥ ነው፤ የሚወጣው ግን ከሰባቱ ነው፤ እሱም ወደ ጥፋት ይሄዳል። 12  “ያየሃቸው አሥሩ ቀንዶችም ገና መንግሥትን ያልተቀበሉ አሥር ነገሥታት ማለት ናቸው፤ ሆኖም ከአውሬው ጋር ለአንድ ሰዓት ነገሥታት እንዲሆኑ ሥልጣን ይቀበላሉ። 13  እነዚህ አንድ ዓይነት ሐሳብ አላቸው፤ በመሆኑም ኃይላቸውንና ሥልጣናቸውን ለአውሬው ይሰጣሉ። 14  እነዚህ ከበጉ ጋር ይዋጋሉ፤ ሆኖም በጉ የጌቶች ጌታና የነገሥታት ንጉሥ ስለሆነ ድል ይነሳቸዋል። ከእሱ ጋር ያሉት የተጠሩት፣ የተመረጡትና የታመኑትም ድል ይነሳሉ።” 15  እሱም እንዲህ አለኝ:- “ጋለሞታይቱ ተቀምጣባቸው ያየሃቸው ውኃዎች ወገኖችን፣ ብዙ ሕዝብን፣ ብሔራትንና ቋንቋዎችን ያመለክታሉ። 16  ያየሃቸው አሥሩ ቀንዶችና አውሬውም ጋለሞታይቱን ይጠሏታል፤ ከዚያም ያወድሟታል፣ እርቃኗንም ያስቀሯታል፤ እንዲሁም ሥጋዋን ይበላሉ፤ ሙሉ በሙሉም በእሳት ያቃጥሏታል። 17  ምክንያቱም አምላክ ቃሉ ፍጻሜውን እስኪያገኝ ድረስ ሐሳቡን ዳር እንዲያደርሱ ይኸውም መንግሥታቸውን ለአውሬው በመስጠት አንድ የሆነውን የራሳቸውን ሐሳብ እንዲፈጽሙ ይህን በልባቸው አኑሯል። 18  ያየሃትም ሴት በምድር ነገሥታት ላይ መንግሥት ያላትን ታላቂቱን ከተማ ታመለክታለች።”

የግርጌ ማስታወሻዎች