ማቴዎስ 10:1-42

10  ከዚያም ኢየሱስ አሥራ ሁለቱን ደቀ መዛሙርት ጠርቶ በርኩሳን መናፍስት ላይ ሥልጣን ሰጣቸው፤ ይህንንም ያደረገው ርኩሳን መናፍስትን እንዲያስወጡ እንዲሁም ማንኛውንም ዓይነት በሽታና ማንኛውንም ዓይነት ሕመም እንዲፈውሱ ነው።  የአሥራ ሁለቱ ሐዋርያት ስም የሚከተለው ነው:- በመጀመሪያ፣ ጴጥሮስ የተባለው ስምዖንና ወንድሙ እንድርያስ እንዲሁም የዘብዴዎስ ልጅ ያዕቆብና ወንድሙ ዮሐንስ፣  ፊልጶስና በርቶሎሜዎስ፣ ቶማስና ቀረጥ ሰብሳቢው ማቴዎስ፣ የእልፍዮስ ልጅ ያዕቆብና ታዴዎስ፣  ቀናተኛው ስምዖንና በኋላ ኢየሱስን የከዳው የአስቆሮቱ ይሁዳ።  ኢየሱስ እነዚህን አሥራ ሁለቱን የሚከተለውን መመሪያ በመስጠት ላካቸው:- “ወደ አሕዛብ በሚወስደው መንገድ አትሂዱ፤ ወደ ሳምራውያን ከተማም አትግቡ፤  ከዚህ ይልቅ ከእስራኤል ቤት ወደጠፉት በጎች ብቻ ሂዱ።  ሄዳችሁም ‘መንግሥተ ሰማያት ቀርቧል’ ብላችሁ ስበኩ።  የታመሙትን ፈውሱ፣ የሞቱትን አስነሱ፣ የሥጋ ደዌ ያለባቸውን አንጹ፣ አጋንንትንም አስወጡ። በነፃ እንደተቀበላችሁ በነፃ ስጡ።  በመቀነታችሁ ወርቅ ወይም ብር ወይም መዳብ አትያዙ፤ 10  ወይም ለጉዞ የምግብ ከረጢት ወይም ሁለት ልብስ ወይም ትርፍ ጫማ ወይም በትር አትያዙ፤ ምክንያቱም ለሠራተኛ ምግቡ ይገባዋል። 11  “በምትገቡበት ማንኛውም ከተማ ወይም መንደር የሚገባው ማን እንደሆነ ፈልጉ፤ እስክትወጡም ድረስ እዚያው ቆዩ። 12  ወደ ቤትም ስትገቡ ቤተሰቡን ሰላም በሉ፤ 13  ቤቱ የሚገባው ሆኖ ከተገኘ የተመኛችሁለት ሰላም ይድረሰው፤ የማይገባው ከሆነ ግን ሰላማችሁ ወደ እናንተ ይመለስ። 14  የሚቀበላችሁ ወይም ቃላችሁን የሚሰማ ሰው ካጣችሁበት ቤት ወይም ከተማ ሁሉ ስትወጡ የእግራችሁን አቧራ አራግፉ። 15  እውነት እላችኋለሁ፣ በፍርድ ቀን በዚያች ከተማ ከሚደርሰው ቅጣት ይልቅ በሰዶምና በገሞራ ላይ የሚደርሰው ይቀላል። 16  “እነሆ፣ በተኩላዎች መካከል እንዳሉ በጎች እልካችኋለሁ፤ ስለዚህ እንደ እባብ ጠንቃቆች ሆኖም እንደ ርግብ የዋሆች ሁኑ። 17  ሰዎች ለፍርድ ሸንጎ አሳልፈው ይሰጧችኋል፣ በምኩራቦቻቸውም ይገርፏችኋል፤ ስለዚህ ከእነሱ ራሳችሁን ጠብቁ። 18  በተጨማሪም በእኔ ምክንያት በገዥዎችና በነገሥታት ፊት ያቆሟችኋል፤ ይህም ለእነሱም ሆነ ለአሕዛብ ምሥክር ይሆናል። 19  ይሁን እንጂ አሳልፈው ሲሰጧችሁ እንዴት ብለን እንናገራለን? ምንስ ብለን እንመልሳለን? ብላችሁ አትጨነቁ፤ ምክንያቱም የምትናገሩት ነገር በዚያኑ ሰዓት ይሰጣችኋል፤ 20  የምትናገሩት እናንተ ብቻ አይደላችሁም፤ የአባታችሁ መንፈስም በእናንተ ይናገራል። 21  በተጨማሪም ወንድም ወንድሙን አባትም ልጁን ለሞት አሳልፎ ይሰጣል፤ ልጆችም በወላጆቻቸው ላይ ይነሳሉ፣ ያስገድሏቸዋልም። 22  በስሜ የተነሳም ሰዎች ሁሉ ይጠሏችኋል፤ እስከ መጨረሻው የጸና ግን እሱ ይድናል። 23  በአንድ ከተማ ስደት ሲያደርሱባችሁ ወደ ሌላ ከተማ ሽሹ፤ እውነት እላችኋለሁ፣ የሰው ልጅ እስከሚመጣ ድረስ የእስራኤልን ከተሞች ክልል ፈጽሞ አታዳርሱም። 24  “ደቀ መዝሙር ከአስተማሪው፣ ባሪያም ከጌታው አይበልጥም። 25  ደቀ መዝሙር እንደ አስተማሪው፣ ባሪያም እንደ ጌታው ከሆነ በቂ ነው። ሰዎች የቤቱን ባለቤት ብዔልዜቡል ካሉት ቤተሰቦቹንማ እንዴት ከዚህ የከፋ አይሏቸውም? 26  ስለዚህ አትፍሯቸው፤ የተሸፈነ መገለጡ፣ ሚስጥር የሆነም መታወቁ አይቀርም። 27  በጨለማ የነገርኳችሁን በብርሃን ተናገሩ፤ በሹክሹክታ የሰማችሁትንም በአደባባይ ስበኩ። 28  ሥጋን የሚገድሉትን ነፍስን ግን መግደል የማይችሉትን አትፍሩ፤ ከዚህ ይልቅ ነፍስንም ሆነ ሥጋን በገሃነም* ሊያጠፋ የሚችለውን ፍሩ። 29  ሁለት ድንቢጦች የሚሸጡት አነስተኛ ዋጋ ባላት ሳንቲም አይደለም? ሆኖም ከእነሱ አንዷም እንኳ አባታችሁ ሳያውቅ መሬት ላይ አትወድቅም። 30  የእናንተ ግን የራሳችሁ ፀጉር እንኳ አንድ ሳይቀር ተቆጥሯል። 31  ስለዚህ አትፍሩ፤ እናንተ ከብዙ ድንቢጦች የላቀ ዋጋ አላችሁ። 32  “እንግዲያው በሰዎች ፊት ለሚመሠክርልኝ ሁሉ እኔም በሰማያት ባለው አባቴ ፊት እመሠክርለታለሁ፤ 33  ሆኖም በሰዎች ፊት የሚክደኝን ሁሉ እኔም በሰማያት ባለው አባቴ ፊት እክደዋለሁ። 34  በምድር ላይ ሰላም ለማስፈን የመጣሁ አይምሰላችሁ፤ የመጣሁት ሰይፍን እንጂ ሰላምን ለማምጣት አይደለም። 35  እኔ የመጣሁት ወንድ ልጅን ከአባቱ፣ ሴት ልጅን ከእናቷ እንዲሁም ሙሽሪትን ከአማቷ ለመለያየት ነው። 36  በእርግጥም የሰው ጠላቶቹ የገዛ ቤተሰቦቹ ይሆናሉ። 37  ከእኔ ይልቅ አባቱን ወይም እናቱን የሚወድ ለእኔ ሊሆን አይገባም፤ ከእኔ ይልቅ ወንድ ልጁን ወይም ሴት ልጁን የሚወድ ለእኔ ሊሆን አይገባም። 38  የመከራውን እንጨት* ተቀብሎ የማይከተለኝ ሁሉ ለእኔ ሊሆን አይገባውም። 39  ነፍሱን ሊያድን የሚፈልግ ያጣታል፤ ነፍሱን ስለ እኔ አሳልፎ የሚሰጥ ግን ያገኛታል። 40  “እናንተን የሚቀበል እኔን ይቀበላል፤ እኔን የሚቀበል ደግሞ የላከኝን ይቀበላል። 41  ነቢይን ስለ ነቢይነቱ የሚቀበል የነቢይን ዋጋ ያገኛል፤ ጻድቅን ስለ ጻድቅነቱ የሚቀበል የጻድቅን ዋጋ ያገኛል። 42  እውነት እላችኋለሁ፣ የእኔ ደቀ መዝሙር በመሆኑ ምክንያት ከእነዚህ ከታናናሾቹ ለአንዱ አንድ ብርጭቆ ቀዝቃዛ ውኃ የሚሰጥ ሁሉ በምንም ዓይነት ዋጋውን አያጣም።”

የግርጌ ማስታወሻዎች

ማቴ 10:28 * ከተጨማሪው መረጃ ላይ 9ኛውን ርዕስ ተመልከት።
ማቴ 10:38 * ከተጨማሪው መረጃ ላይ 6ኛውን ርዕስ ተመልከት።