በቀጥታ ወደ ዋናው ጉዳይ ግባ

በቀጥታ ወደ ርዕስ ማውጫው ሂድ

 ምዕራፍ አሥራ ስምንት

“በልቧ ታሰላስል ነበር”

“በልቧ ታሰላስል ነበር”

1, 2. ማርያም ያደረገችው ጉዞ ምን ይመስል እንደነበርና ጉዞውን አስቸጋሪ ያደረገባት ምን እንደሆነ ግለጽ።

ማርያም በተቀመጠችባት አህያ ላይ ይበልጥ ለመመቻቸት እየሞከረች ነው። በዚህ ሁኔታ ለሰዓታት ስትጓዝ ቆይታለች። ዮሴፍ ደግሞ ርቃ ወደምትገኘው ወደ ቤተልሔም የሚወስደውን መንገድ ይዞ በቀስታ ፊት ፊቷ ያዘግማል። ማርያም በማህፀኗ ውስጥ ያለው ጽንስ አሁንም ሲንቀሳቀስ ተሰማት።

2 በዚህ ወቅት ማርያም “የመውለጃዋ ጊዜ ተቃርቦ” እንደነበር መጽሐፍ ቅዱስ ይናገራል። (ሉቃስ 2:5) ምናልባት ባልና ሚስቱ ማሳዎችን እያቆራረጡ ሲያልፉ የሚያዩአቸው የሚያርሱ ወይም የሚዘሩ ገበሬዎች በእንዲህ ያለ ሁኔታ ላይ ያለች ሴት ስትጓዝ መመልከታቸው ሳያስገርማቸው አይቀርም። ማርያም ከምትኖርበት ከናዝሬት ተነስታ ሩቅ ወደሆነ አካባቢ መጓዝ ያስፈለጋት ለምን ነበር?

3. ማርያም ምን ዓይነት ኃላፊነት ተቀብላ ነበር? ከእሷ ጋር በተያያዘስ ምን ነገር እንመረምራለን?

3 ታሪኩ የሚጀምረው ከጥቂት ወራት ቀደም ብሎ ይህች ወጣት አይሁዳዊት ከዚያ በፊት ተሰምቶ የማያውቅ አንድ ኃላፊነት በተቀበለችበት ጊዜ ነበር። ማርያም የምትወልደው ወደፊት መሲሕ የሚሆነውን የአምላክን ልጅ ነበር! (ሉቃስ 1:35) የመውለጃዋ ጊዜ ሲቃረብ ይህን ጉዞ እንድታደርግ የሚያስገድድ ሁኔታ ተፈጠረ። በእነዚህ ጊዜያት ሁሉ ማርያም እምነቷን የሚፈታተኑ ብዙ ችግሮች አጋጥመዋታል። ማርያም መንፈሳዊ ጥንካሬዋን ይዛ እንድትቀጥል የረዳት ምን እንደሆነ እስቲ እንመልከት።

ወደ ቤተልሔም የተደረገ ጉዞ

4, 5. (ሀ) ዮሴፍና ማርያም ወደ ቤተልሔም ያቀኑት ለምን ነበር? (ለ) ቄሳር ያወጣው አዋጅ የትኛው ትንቢት እንዲፈጸም አስችሏል?

4 እንዲህ ያለ ጉዞ በማድረግ ላይ ያሉት ዮሴፍና ማርያም ብቻ አልነበሩም። በወቅቱ አውግስጦስ ቄሳር በአገሪቱ ያለው ሕዝብ ሁሉ እንዲመዘገብ የሚያዝዝ አዋጅ አውጥቶ ስለነበር ሁሉም ሰው ይህን ትእዛዝ ለመፈጸም ወደየትውልድ ከተማው መሄድ ነበረበት። ታዲያ ዮሴፍ ለዚህ አዋጅ ምን ምላሽ ሰጠ? ዘገባው እንዲህ ይላል፦ “ዮሴፍም ከዳዊት ቤትና ወገን ስለነበር በገሊላ ከምትገኘው ከናዝሬት ከተማ ተነስቶ በይሁዳ ወዳለች ቤተልሔም ተብላ ወደምትጠራ የዳዊት ከተማ ሄደ።”—ሉቃስ 2:1-4

 5 ቄሳር በዚህ ጊዜ ይህን አዋጅ ማውጣቱ የአጋጣሚ ጉዳይ አልነበረም። ከሰባት መቶ ዓመታት ገደማ በፊት የተነገረ አንድ ትንቢት መሲሑ በቤተልሔም እንደሚወለድ ይገልጻል። በወቅቱ ከናዝሬት 11 ኪሎ ሜትር ብቻ ርቃ የምትገኝ ቤተልሔም የተባለች ከተማ ነበረች። ይሁን እንጂ ትንቢቱ መሲሑ የሚወለደው ‘በቤተልሔም ኤፍራታ’ መሆኑን ለይቶ ይጠቅሳል። (ሚክያስ 5:2ን አንብብ።) አንድ መንገደኛ ከናዝሬት ተነስቶ ወደዚህች ትንሽ መንደር ለመድረስ ሰማርያን አቋርጦ የሚያልፈውን አቀበታማ መንገድ ይዞ 130 ኪሎ ሜትር መጓዝ ይጠይቅበታል። ዮሴፍ መሄድ የሚጠበቅበት ደግሞ ወደዚህችኛዋ ቤተልሔም ነበር፤ ይህች መንደር የንጉሥ ዳዊት ዘሮች የትውልድ ስፍራ ስትሆን ዮሴፍም ሆነ ሚስቱ ከዳዊት ወገን ነበሩ።

6, 7. (ሀ) ወደ ቤተልሔም የሚደረገው ጉዞ ለማርያም አስቸጋሪ ሊሆንባት የሚችለው ለምንድን ነው? (ለ) ማርያም ያገባች መሆኗ በምታደርጋቸው ውሳኔዎች ላይ ምን ለውጥ ያመጣል? (የግርጌ ማስታወሻውንም ተመልከት።)

6 ታዲያ ማርያም፣ ዮሴፍ ይህን አዋጅ ለማክበር ያደረገውን ውሳኔ ትደግፍ ይሆን? ጉዞው በጣም አስቸጋሪ እንደሚሆንባት ምንም ጥርጥር የለውም። ወቅቱ የበጋው ወራት አብቅቶ ክረምት ሊገባ አካባቢ ሳይሆን አይቀርም፤ በዚህ ጊዜ ደግሞ ዝናብ ማካፋቱ የሚጠበቅ ነገር ነው። በተጨማሪም ቤተልሔም ከ760 ሜትር ከፍታ በላይ የምትገኝ ስለሆነች እዚያ እስኪደርሱ ድረስ አድካሚ በሆነው አቀበታማ መንገድ ለበርካታ ቀናት መጓዝ ነበረባቸው፤ ደግሞም ዮሴፍ ‘ከገሊላ ተነስቶ ወደ ይሁዳ ወጣ’ (አዲሱ መደበኛ ትርጉም) መባሉ ትክክል ነው። ማርያም የነበረችበት ሁኔታ ብዙ ጊዜ እንድታርፍ ስለሚያስገድዳት ጉዞው ከተለመደው ቀን በላይ ፈጅቶባቸው ሊሆን ይችላል።  ነፍሰ ጡር የሆነች አንዲት ወጣት በተለይ የምትወልድበት ወቅት ሲቃረብ፣ ምጥ በሚጀምራት ጊዜ በፍጥነት ሊደርሱላት ከሚችሉ ወዳጅ ዘመዶቿ መራቅ እንደማትፈልግ የታወቀ ነው። በመሆኑም ማርያም ይህንን ጉዞ ለማድረግ መንፈሰ ጠንካራ መሆን እንዳስፈለጋት ምንም ጥርጥር የለውም።

ወደ ቤተልሔም የሚደረገው ጉዞ ቀላል አልነበረም

7 ያም ሆኖ ዮሴፍ ለመመዝገብ የሄደው ‘ከማርያም ጋር እንደነበር’ ሉቃስ ዘግቧል። ከዚህም በተጨማሪ ‘በታጨችለት መሠረት [ዮሴፍ] ማርያምን እንዳገባት’ ገልጿል። (ሉቃስ 2:4, 5) ማርያም ያገባች መሆኗ በምታደርጋቸው ውሳኔዎች ላይ ትልቅ ለውጥ ያመጣል። አምላክ የሰጣትን ረዳት የመሆን ኃላፊነት በመወጣትና ዮሴፍ የሚያደርገውን ውሳኔ በመደገፍ ባሏን የቤተሰቡ ራስ አድርጋ እንደምትመለከተው ታሳያለች። * ታዛዥ መሆኗ እምነቷን ሊፈትን ይችል የነበረውን ይህን ሁኔታ በቀላሉ እንድትወጣ አስችሏታል።

8. (ሀ) ማርያም ከዮሴፍ ጋር ወደ ቤተልሔም እንድትሄድ ያነሳሳት ሌላው ምክንያት ምን ሊሆን ይችላል? (ለ) ማርያም ታማኝ ለሆኑ ሰዎች መልካም አርዓያ የምትሆነው በምን መንገድ ነው?

8 ማርያም፣ ታዛዥ እንድትሆን ያነሳሳት ሌላው ምክንያት ምን ሊሆን ይችላል? መሲሑ በቤተልሔም እንደሚወለድ የሚናገረውን ትንቢት ታውቅ ነበር? መጽሐፍ ቅዱስ ስለዚህ ጉዳይ የሚናገረው ነገር የለም። ይህ ትንቢት፣ በሃይማኖት መሪዎች ሌላው ቀርቶ በሕዝቡ ዘንድ እንኳ በስፋት ይታወቅ ስለነበር ማርያም ስለ ሁኔታው  ሳታውቅ አትቀርም። (ማቴ. 2:1-7፤ ዮሐ. 7:40-42) ከዚህም በተጨማሪ ማርያም ቅዱሳን መጻሕፍትን ጠንቅቃ ታውቅ ነበር። (ሉቃስ 1:46-55) ማርያም ለመሄድ የወሰነችው ይሖዋ ያስነገረውን ትንቢት በማወቋም ይሁን የባሏን ወይም የመንግሥትን ትእዛዝ ለማክበር በመፈለጓ ለእኛ ግሩም ምሳሌ ትሆነናለች። ይሖዋ፣ ትሑትና ታዛዥ የሆኑ ወንዶችንና ሴቶችን ከፍ አድርጎ ይመለከታቸዋል። ብዙዎች ታዛዥነትን አቅልለው በሚመለከቱበት በዛሬው ጊዜ ማርያም በየትም ቦታ ለሚኖሩ ታማኝ ሰዎች መልካም አርዓያ ትሆናለች።

የክርስቶስ መወለድ

9, 10. (ሀ) ማርያምና ዮሴፍ ወደ ቤተልሔም ሲቃረቡ ስለ ምን ነገር አስበው ሊሆን ይችላል? (ለ) ዮሴፍና ማርያም ያረፉት የት ነበር? ለምንስ?

9 ማርያም የቤተልሔምን መንደር በሩቁ ስታይ እፎይታ ሳይሰማት አልቀረም። ማርያምና ዮሴፍ፣ በመከሩ ወራት መጨረሻ ላይ የሚለቀመውን የወይራ ፍሬ እየተመለከቱ አቀበቱን ሲወጡ ስለዚህች ትንሽ መንደር ታሪክ ሳያስቡ አይቀሩም። ነቢዩ ሚክያስ እንደተናገረው ቤተልሔም ከሌሎች የይሁዳ ከተሞች እጅግ አነስተኛ ብትሆንም ከአንድ ሺህ ዓመታት በፊት ይኖሩ የነበሩት ቦዔዝ፣ ኑኃሚንና ዳዊት የተወለዱባት ከተማ ናት።

10 ማርያምና ዮሴፍ እዚያ ሲደርሱ መንደሯ በሰው ተጥለቅልቃ ነበር። ሌሎች ሰዎች ለመመዝገብ ከእነሱ ቀደም ብለው ወደ ከተማዋ መጥተው ስለነበር ለማረፊያ የሚሆን ቦታ አልነበረም። * በመሆኑም ጋጣ ውስጥ ከማደር በስተቀር ሌላ አማራጭ አልነበራቸውም። ዮሴፍ፣ ሚስቱ ከዚህ በፊት ተሰምቷት የማያውቅ ሥቃይ እየበረታባት ሲሄድ መመልከቱ ምን ያህል አስጨንቆት ሊሆን እንደሚችል መገመት አያዳግትም። ካልጠፋ ቦታ ማርያም በዚህ ስፍራ ምጥ ጀመራት!

11. (ሀ) ማንኛዋም እናት ማርያም የነበረችበትን ሁኔታ መረዳት የማይከብዳት ለምንድን ነው? (ለ) ኢየሱስ “የበኩር” ልጅ የሆነው በየትኞቹ መንገዶች ነው?

11 ማንኛዋም እናት ማርያም የነበረችበትን ሁኔታ መረዳት አይከብዳትም። ይህ ከመሆኑ ከ4,000 ዓመታት ገደማ በፊት ይሖዋ፣ ሴቶች በሚወልዱበት ጊዜ በወረሱት ኃጢአት ምክንያት እንደሚሠቃዩ ተናግሯል። (ዘፍ. 3:16) ማርያም እንዲህ ካለው ሥቃይ ነፃ እንደነበረች የሚጠቁም ማስረጃ የለም። የሉቃስ ዘገባም ቢሆን “የበኩር ልጇ የሆነውን ወንድ ልጅም ወለደች” ከማለት ውጭ ስለተሰማት ሥቃይ የሚናገረው ነገር የለም። (ሉቃስ 2:7) አዎ፣ ‘የበኩር ልጇን’ ይኸውም ከወለደቻቸው ቢያንስ ሰባት ልጆች መካከል የመጀመሪያውን ወለደች። (ማር. 6:3) ይህ ልጅ ግን ከሌሎቹ ፈጽሞ የተለየ ነበር። ይህ ልጅ የማርያም የበኩር ልጅ ብቻ ሳይሆን ከይሖዋ “ፍጥረት ሁሉ በኩር” የሆነ የአምላክ አንድያ ልጅ ነው!—ቆላ. 1:15

12. ማርያም ልጁን ያስተኛችው የት ነበር? የክርስቶስን ልደት አስመልክቶ የሚቀርቡ ድራማዎች፣ ሥዕሎችና ሌሎች ትዕይንቶች ከእውነታው የራቁ ናቸው ሊባል የሚችለው ለምንድን ነው?

12 የሉቃስ ዘገባ በመቀጠል በብዙ ሰዎች ዘንድ የሚታወቀውን ማርያም ያደረገችውን  አንድ ክንውን ሲገልጽ “ልጁን በመጠቅለያ ጠቅልላ በግርግም ውስጥ አስተኛችው” ይላል። (ሉቃስ 2:7) የክርስቶስን ልደት አስመልክቶ የሚቀርቡ ድራማዎች፣ ሥዕሎችና ሌሎች ትዕይንቶች ይህን ክንውን ከመጠን በላይ ማራኪ በማድረግ ከእውነታው በራቀ መንገድ ሲያቀርቡት ይስተዋላል። ይሁን እንጂ በወቅቱ የነበረው ሁኔታ በእርግጥ ምን እንደሚመስል እስቲ ተመልከት። ግርግም፣ ከብቶች የሚመገቡበት ገንዳ ነው። ዮሴፍና ማርያም ያረፉት ንጹሕ አየር እንደልብ በማይገኝበት ወይም ንጽሕና በሌለው ጋጣ ውስጥ ነበር፤ በዛሬው ጊዜ ያሉ ጋጣዎችም ከዚህ የተለዩ አይደሉም። ማንም ወላጅ ቢሆን አማራጭ ካላጣ በስተቀር እንዲህ ባለው ስፍራ ልጅ መውለድ እንደማይፈልግ ግልጽ ነው። አብዛኞቹ ወላጆች ለልጆቻቸው ከሁሉ የተሻለውን ነገር ማድረግ ይፈልጋሉ። ማርያምና ዮሴፍም ለአምላክ ልጅ ይበልጥ የተሻለውን ለማድረግ የቻሉትን ሁሉ ጥረው እንደነበር ምንም ጥርጥር የለውም!

13. (ሀ) ማርያምና ዮሴፍ ሁኔታው በፈቀደላቸው መጠን የተሻለውን ነገር ለማድረግ የጣሩት እንዴት ነው? (ለ) ዮሴፍና ማርያም እንዳደረጉት ሁሉ በዛሬው ጊዜ ያሉ ጥበበኛ ወላጆችም ይበልጥ አስፈላጊ ለሆነው ነገር ቅድሚያ የሚሰጡት እንዴት ነው?

13 ይሁን እንጂ ዮሴፍና ማርያም በገጠማቸው ሁኔታ አልተማረሩም፤ ከዚህ ይልቅ አቅማቸው በሚፈቅደው መጠን የተሻለውን ነገር አድርገዋል። ለምሳሌ ያህል፣ ማርያም ሕፃኑን እንዲሞቀውና ጉዳት እንዳይደርስበት በጨርቅ ጠቅልላ በጥንቃቄ ግርግም ውስጥ በማስተኛት እንደተንከባከበችው ልብ በል። ማርያም በወቅቱ በነበረው ሁኔታ ከልክ በላይ በመጨነቅ ለልጇ የቻለችውን ሁሉ ከማድረግ ወደኋላ አላለችም። ማርያምና ዮሴፍ ለልጃቸው ሊያደርጉለት የሚችሉት ከሁሉ የላቀ ነገር እሱን በመንፈሳዊ መንከባከብ መሆኑን ተገንዝበው ነበር። (ዘዳግም 6:6-8ን አንብብ።) በዛሬው ጊዜም ጥበበኛ የሆኑ ወላጆች ለመንፈሳዊ ነገሮች ቦታ በማይሰጠው በዚህ ዓለም ውስጥ ልጆቻቸውን ሲያሳድጉ ይበልጥ አስፈላጊ ለሆነው ነገር ቅድሚያ ይሰጣሉ።

ሊጠይቋት ከመጡ ሰዎች ማበረታቻ አገኘች

14, 15. (ሀ) እረኞቹ ሕፃኑን ለማየት የጓጉት ለምንድን ነው? (ለ) እረኞቹ በጋጣው ውስጥ የነበረውን ሁኔታ ካዩ በኋላ ምን አደረጉ?

14 በአካባቢው የሰፈነው ጸጥታ ድንገት በሰዎች ጫጫታ ታወከ። ቤተሰቡን በተለይም ደግሞ ሕፃኑን ለማየት የጓጉት እረኞች ወደ ጋጣው እየተጣደፉ ገቡ። በአድናቆት የተዋጡት እነዚህ ሰዎች ፊታቸው በደስታ ያበራ ነበር። እረኞቹ መንጎቻቸውን ይጠብቁበት ከነበረው ተራራማ አካባቢ የመጡት በፍጥነት ነበር። * ከዚያም በመገረም ይመለከቷቸው ለነበሩት ባልና ሚስት ያጋጠማቸውን አስደናቂ ነገር ተረኩላቸው። እረኞቹ በሌሊት መንጎቻቸውን እየጠበቁ ሳሉ አንድ መልአክ ድንገት አጠገባቸው ቆመ። የይሖዋ ክብር በዙሪያቸው አበራ፤ መልአኩ፣ ክርስቶስ ወይም መሲሕ በቤተልሔም መወለዱንና ሕፃኑንም በጨርቅ ተጠቅልሎ በግርግም ውስጥ ተኝቶ እንደሚያገኙት  ነገራቸው። ከዚያም አንድ አስደናቂ ነገር ተፈጸመ! የመላእክት ሠራዊት ይሖዋን ሲያወድስ ታየ።—ሉቃስ 2:8-14

15 እነዚህ ትሑት ሰዎች በፍጥነት ወደ ቤተልሔም መሄዳቸው አያስገርምም! መልአኩ በነገራቸው መሠረት በግርግም የተኛውን ገና የተወለደ ሕፃን ሲያዩ ተደስተው መሆን አለበት። ይህንን የምሥራች ሰምተው ዝም ከማለት ይልቅ “ስለ እሱ የተነገራቸውን አወሩ። ይህንንም የሰሙ ሰዎች ሁሉ እረኞቹ በነገሯቸው ነገር ተደነቁ።” (ሉቃስ 2:17, 18) በዘመኑ የነበሩት የሃይማኖት መሪዎች እረኞችን ይንቋቸው እንደነበር ጥርጥር የለውም። ይሖዋ ግን እነዚህን ትሑትና ታማኝ ሰዎች ከፍ አድርጎ ተመልክቷቸዋል። ይሁንና የእረኞቹ መምጣት በማርያም ላይ በጎ ተጽዕኖ ያሳደረው እንዴት ነው?

ይሖዋ ትሑትና ታማኝ የሆኑትን እረኞች ከፍ አድርጎ ተመልክቷቸዋል

16. ማርያም ሁኔታዎችን በጥልቅ ታስተውል እንደነበር ያሳየችው እንዴት ነው? አስደናቂ እምነት እንዲኖራት የረዳት ቁልፍ ነገር ምንድን ነው?

16 ማርያም ገና መገላገሏ ስለነበር ደክሟት እንደሚሆን ግልጽ ነው፤ ያም ሆኖ እረኞቹ የተናገሩትን እያንዳንዱን ነገር በጥሞና አዳምጣለች። ከዚህም በተጨማሪ “የሰማቻቸውን ነገሮች በውስጧ ይዛ በልቧ ታሰላስል ነበር።” (ሉቃስ 2:19) በእርግጥም ይህች ወጣት ሁኔታዎቹን በጥልቅ ታስተውል ነበር። መልአኩ የተናገረው ይህ መልእክት በጣም አስፈላጊ እንደሆነ ታውቃለች። አምላኳ ይሖዋ፣ የልጇን ማንነት እንድታውቅና ምን ያህል ከፍ ተደርጎ ሊታይ እንደሚገባው እንድትገነዘብ ፈልጎ ነበር። በመሆኑም ከመስማት ያለፈ ነገር አድርጋለች። በቀጣዮቹ ወራትና ዓመታት በእነዚህ ቃላት ላይ ማሰላሰል እንድትችል ሁሉንም በልቧ መዝግባ ይዛለች። ማርያም በሕይወት ዘመኗ ሁሉ አስደናቂ እምነት እንዲኖራት የረዳት ቁልፍ ነገር ይህ ነው።—ዕብራውያን 11:1ን አንብብ።

ማርያም እረኞቹ የተናገሩትን ነገር በጥሞና ያዳመጠች ሲሆን በልቧም ይዛዋለች

17. ከመንፈሳዊ እውነቶች ጋር በተያያዘ ማርያም የተወችውን ምሳሌ መከተል የምንችለው እንዴት ነው?

17 አንተስ የማርያምን ምሳሌ ትከተላለህ? ይሖዋ በቃሉ ውስጥ ጠቃሚ የሆኑ መንፈሳዊ እውነቶች እንዲሰፍሩልን አድርጓል። ያም ሆኖ ለእነዚህ እውነቶች ትኩረት የማንሰጥ ከሆነ ምንም ጥቅም አያስገኙልንም። መጽሐፍ ቅዱስን እንደ አንድ የሥነ ጽሑፍ ሥራ ሳይሆን በአምላክ መንፈስ መሪነት እንደተጻፈ መጽሐፍ አድርገን የምንመለከተውና በየጊዜው የምናነበው ከሆነ ለእነዚህ እውነቶች ትኩረት እንደሰጠን እናሳያለን። (2 ጢሞ. 3:16) ከዚያም ልክ እንደ ማርያም እነዚህን መንፈሳዊ እውነቶች በልባችን ለመያዝና ለማሰላሰል መጣር ይኖርብናል። የይሖዋን ምክር ይበልጥ በተሟላ ሁኔታ ተግባራዊ ማድረግ የምንችለው እንዴት እንደሆነ በአእምሯችን በመያዝ ከመጽሐፍ ቅዱስ ባነበብናቸው ነገሮች ላይ የምናሰላስል ከሆነ እምነታችን እየጠነከረ ይሄዳል።

 በልቧ የምትይዛቸው ተጨማሪ ነገሮች

18. (ሀ) ማርያምና ዮሴፍ ኢየሱስ ሕፃን በነበረበት ወቅት የሙሴን ሕግ የታዘዙት እንዴት ነው? (ለ) ዮሴፍና ማርያም በቤተ መቅደሱ ውስጥ ያቀረቡት መባ ስለኑሯቸው ሁኔታ ምን ይጠቁማል?

18 ሕፃኑ ስምንት ቀን ሲሆነው ማርያምና ዮሴፍ በሙሴ ሕግ መሠረት ገረዙት፤ እንደታዘዙትም ስሙን ኢየሱስ አሉት። (ሉቃስ 1:31) በ40ኛውም ቀን ከቤተልሔም ጥቂት ኪሎ ሜትር ርቆ ወደሚገኘው የኢየሩሳሌም ቤተ መቅደስ ወሰዱት፤ ከዚያም የሙሴ ሕግ፣ ድሆች ሁለት ዋኖሶች ወይም ርግቦች እንዲያቀርቡ በሚያዘው መሠረት የመንጻት መባ አቀረቡ። ማርያምና ዮሴፍ፣ አቅሙ እንዳላቸው እንደ ሌሎች ወላጆች ጠቦትና ዋኖስ ማቅረብ ባለመቻላቸው ኀፍረት ተሰምቷቸው ከነበረ ይህን ስሜታቸውን ማሸነፍ ነበረባቸው። ያም ሆነ ይህ እዚያ በነበሩበት ወቅት ከመቼውም ጊዜ ይበልጥ ግሩም ማበረታቻ አግኝተው እንደነበር ግልጽ ነው።—ሉቃስ 2:21-24

19. (ሀ) ስምዖን ለማርያም በልቧ ልትይዘው የሚገባ ምን ተጨማሪ ነገር ነገራት? (ለ) ሐና ኢየሱስን ካየችው በኋላ ምን አደረገች?

19 በዚህ ጊዜ ስምዖን የሚባል አንድ አረጋዊ ወደ እነሱ በመቅረብ ለማርያም በልቧ ልትይዘው የሚገባ ተጨማሪ ነገር ነገራት። ስምዖን፣ ከመሞቱ በፊት መሲሑን እንደሚያየው ቃል ተገብቶለት የነበረ ሲሆን የይሖዋ ቅዱስ መንፈስም ሕፃኑ ኢየሱስ አስቀድሞ የተነገረለት አዳኝ መሆኑን ጠቁሞታል። ከዚህም በተጨማሪ ስምዖን፣ ወደፊት ጽናቷን የሚፈትን ሥቃይ እንደሚደርስባት በመንገር ማርያምን አስጠነቀቃት። እንዲያውም በነፍሷ ትልቅ ሰይፍ ያለፈ ያህል ሆኖ እንደሚሰማት ነገራት። (ሉቃስ 2:25-35) እነዚህ አስደንጋጭ ቃላት ከሦስት አሥርተ ዓመታት በኋላ የገጠማትን አስቸጋሪ ሁኔታ በጽናት እንድትቋቋም ሳይረዷት አልቀሩም። ከስምዖን በኋላ ደግሞ ሐና  የተባለች ነቢይት ሕፃኑን ኢየሱስን በተመለከተችው ጊዜ የኢየሩሳሌምን መዳን ለሚጠባበቁ ሰዎች ሁሉ ስለ እሱ መናገር ጀመረች።—ሉቃስ 2:36-38ን አንብብ።

ማርያምና ዮሴፍ ኢየሩሳሌም ወደሚገኘው የይሖዋ ቤተ መቅደስ በሄዱበት ጊዜ ከፍተኛ ማበረታቻ አግኝተዋል

20. ዮሴፍና ማርያም ልጃቸውን ኢየሩሳሌም ወደሚገኘው የይሖዋ ቤተ መቅደስ ማምጣታቸው ተገቢ ነበር የምንለው ለምንድን ነው?

20 ዮሴፍና ማርያም ልጃቸውን ኢየሩሳሌም ወደሚገኘው የይሖዋ ቤተ መቅደስ ማምጣታቸው በእርግጥም ተገቢ ነበር! ልጃቸው በሕይወት ዘመኑ በሙሉ በይሖዋ ቤተ መቅደስ በታማኝነት መገኘት የጀመረው በዚህ መንገድ ነበር። ማርያምና ዮሴፍ፣ በቤተ መቅደሱ በነበሩበት ጊዜ የይሖዋን አምልኮ ለመደገፍ የቻሉትን ሁሉ ያደረጉ ሲሆን መመሪያና ማበረታቻም አግኝተዋል። ማርያም ከቤተ መቅደሱ ስትመለስ እምነቷ ተጠናክሮ ብሎም ልቧ ለማሰላሰል በሚረዷትና ለሌሎች ልታካፍላቸው በምትችላቸው ጠቃሚ ነገሮች ተሞልቶ ሊሆን እንደሚችል ጥርጥር የለውም።

21. እንደ ማርያም ሁሉ የእኛም እምነት ይበልጥ እየተጠናከረ እንዲሄድ ማድረግ የምንችለው እንዴት ነው?

21 በዛሬው ጊዜ ያሉ ወላጆች ይህን ምሳሌ ሲከተሉ ማየት እጅግ ያስደስታል። የይሖዋ ምሥክር የሆኑ ወላጆች ልጆቻቸውን አዘውትረው ወደ ክርስቲያናዊ ስብሰባዎች ይዘዋቸው ይሄዳሉ። እነዚህ ወላጆች የእምነት አጋሮቻቸውን የሚያበረታታ ሐሳብ በመናገር የይሖዋን አምልኮ ለመደገፍ የተቻላቸውን ሁሉ ያደርጋሉ። እነዚህ ወላጆች ከስብሰባዎች የሚመለሱት እምነታቸው ተጠናክሮ፣ ተደስተውና ልባቸው ለሌሎች በሚያካፍሉት መልካም ነገር ተሞልቶ ነው። እንዲህ ካሉ ወላጆች ጋር ወዳጅነት መመሥረት እጅግ አስደሳች ነው! ይህን የምናደርግ ከሆነ ልክ እንደ ማርያም የእኛም እምነት ይበልጥ እየተጠናከረ ይሄዳል።

^ አን.7 በዚህ ዘገባና ማርያም ኤልሳቤጥን ለመጠየቅ ‘ተነስታ እንደሄደች’ በሚገልጸው ታሪክ መካከል ያለውን ልዩነት ልብ በል። (ሉቃስ 1:39) በዚያን ወቅት ማርያም የታጨች ብትሆንም ከዮሴፍ ጋር ገና ስላልተጋቡ እሱን ሳታማክር ሄዳ ሊሆን ይችላል። ከተጋቡ በኋላ ግን ማርያምና ዮሴፍ አብረው የተጓዙ ቢሆንም እንኳ ጉዞውን እንዳደረገ ተደርጎ የተገለጸው ዮሴፍ እንጂ ማርያም አይደለችም።

^ አን.10 በወቅቱ በተለያዩ ከተሞች የሚገኙ ነዋሪዎች ለመንገደኞች የማረፊያ ቦታ ማዘጋጀታቸው የተለመደ ነበር።

^ አን.14 እረኞቹ በዚያ ሌሊት በጎቻቸውን በሜዳ ላይ ሲጠብቁ እንደነበር መገለጹ በመጽሐፍ ቅዱስ የዘመናት ስሌት መሠረት ክርስቶስ የተወለደው በጎች በረት ውስጥ በሚያድሩበት በታኅሣሥ ወር ላይ ሳይሆን በጥቅምት ወር መጀመሪያ አካባቢ መሆኑን ያረጋግጣል።