Nen video ma nwang'ere

Jumulembe pa Yehova

Ng'ii Dhok Alur

Telowic pi coko mi Kwo man tic mwa mi Jukristu

Telowic pi coko mi Kwo man tic mwa mi Jukristu

Lembe ma nwang’ere i ie

 

Udukuwec

Wec mi caku program

 2

Lonyo ma nwang’ere i Lembe pa Mungu

 3

Miiri zoo i tic mi rweyo lembanyong’a

 4

Kwo mi Jukristu

 5

Wec mi dolo dhu program

 6

Miiri zoo i somo piny man i ponji

 7

Juk

 8

Saa

 9

Liew pa jaliew mi twodiri

 10

Yenga mi coko ma dongo

 11

Yenga mi Poi pi tho pa Yesu

 12

Janen wi coko mi Kwo man tic

 13

Jawikom mi coko mi Kwo man tic

 14

Jatel wi tic mi guriri mi judong cokiri

 15

Jamii juk ma jakony

 16

Ot somo m’ameda

 17

Video

 18

1. Pi nitimo coko mi Kwo man tic mwa mi Jukristu, jubilubo lembe ma junyutho i Buku mi coko mi Kwo man tic mwa mi Jukristu, man telowic ma nwang’ere iwi karatasi maeni. Jubikwayu i bang’ jurwei lembanyong’a ceke nia gibed ayika nitimo thengponji ma jumio ni awiya mi somo. Jumange ma gibedikiri cuu ku cokiri man ma giyio ponji mi Biblia gicopo bende nidikiri i somo maeno, ka gibekwo nimakere ku cik mir ukungu ma Jukristu gibelubo.​—be-SW mba. 282.

 2. Wec mi caku program: Kud ekadh dakika 3. Kubang’ yenga, coko bibecaku ku wer man rwo. I ng’eye, jawikom mi coko mi Kwo man tic, biyero wec ma bimio ava mi lubo program i kum dhanu; ebiketho bende peko iwi penji ma nwang’ere i Karatasi mi dwokowang’ penji i coko mi Kwo man tic.

 3. Lonyo ma nwang’ere i Lembe pa Mungu:

  • Korolembe: Dakika 10. Thiwiwec man bende paru ario kunoke adek ma dongo dongo ma jubiweco i wigi, nwang’ere i Buku mi coko mi Kwo man tic. Jadit cokiri kunoke jakony tic m’uromo re ma bimio korolembe maeni. Ka jupangu nia i thenge mi som mi Biblia ma kubang’ yenga, jubicaku ku som mi buku ma nyen mi Biblia, jubilar neno video mi wec mir acaki iwi bukune. Jakorlembe binyutho kite ma lembe mi videone urombo ko ku thiwiwec mi korolembe pare. Re, ecikere nitimo kero niweco iwi lembe ceke ma dongo dongo ma junyutho i buku mi coko. Bende, ka saa nuti, ebiweco iwi cal man lembe ma dongo dongo mi giragora, ma juketho pi nikoro cuu lembe ma jubeweco i wie.

  •   Wagol lonyo mi tipo i Lembagora: Dakika 8. Thenge maeni bibedo penji ku dwokowang’e m’umbe wec mir acaki man mi dolo dhoge. Jadit cokiri kunoke jakony tic m’uromo re ma bitime. Ecopo neno en nia jutim dakika adi adi iwi penjiman nimakere ku yeny mi cokiri. Ento ebipenjo juwinj ku penji ang’wen ceke. Bende, ecopo ng’io nia kubang’ verse ma juketho i acaki mi penji ario ma kwong’a, jusomgi zoo kunoke jusom moko kende. Dwokowang’ penji pa ng’atuman ucikere ngo nikadhu segond 30.

  • Som mi Biblia: Kud ekadh dakika 4. Umego re ma bitimo thenge maeni. Ecikere kende kende nisomo giragora ma jumio ire, m’umbe niroyo wec moko i wang’ somne kunoke i ng’eye. Jawikom mi coko bitimo kero nikonyo awiya mi somo ma jubimio igi thenge maeni, gibed gisom piny tap tap, i kite ma junyang’ i ie terere, i kite m’ubemol ma ber, giketh peko iwi wec ma dongo dongo, giwoth beloko dwandgi, giyom i ayi m’ubekwayere man gisom piny i ayi ma giweco ko nja.

  4. Miiri zoo i tic mi rweyo lembanyong’a: Kud ekadh dakika 15. Juyiko thengcoko maeni pi nikonyo jurwei ceke kara ging’ii ma ber i tic mi lembanyong’a, gimed bodho migi i tije man i ponji. Awiya mi somo ma jumio igi thengponji mi rombo ma kwong’a man liew, gibiyikiri nimakere ku kite ma waromo weco ko ku dhanu, ma nwang’ere i mbaya mi 1 mi Buku mi coko mi Kwo man tic. Jurwei gicopo ng’io ka nyo gibitio ku girasoma kunoke video moko mi sanduku mi jamtic mi ponjo Biblia ku dhanu kunoke ngo. Buku mi coko mi Kwo man tic bibenyutho nia thengponji pa nyathin mi somo utim dakika adi, man i saa moko, ebibemio telowic mange m’ukwayu julubi. Awiya mi somo gicikiri ngo nimedo paru mange kende kende pi nipong’o saa migi m’udong’. Lanyuth ma juyiko ma ber copo thum tap i saane kunoke i wang’e nyanok. Kan ukwayere, judong cokiri bende copo timo thengponji mir awiya mi somo.

  • Video iwi kite ma waromo weco ko ku dhanu: I dwiman kubang’ yenga, jubibenyutho video iwi kite ma waromo weco ko ku dhanu man jubibeweco i wigi. Videone bibenyutho rombo ma kwong’a, liew ma kwong’a, man liew mir ario. Jawikom mi coko mi Kwo man tic re ma bibetelo thenge maeni.

  • Rombo ma kwong’a: Jucopo mio thenge maeni ni umego kunoke ni nyamego. Ka jumio thengene ni umego, jawinj pare bibedo umego kunoke wat pare, ka jumie ni nyamego ke, jawinj pare bibedo nyamego kunoke wat pare. Nyathin mi somo ku jawinj pare gicopo ng’io nicungo acunga kunoke nibedo abeda. Gibitio kud ayi moth ma dhanu ng’iyo ko i beng’wu. Jubitimo thengponji maeni nimakere ku kite ma waromo weco ko ku dhanu.

  • Liew ma kwong’a: Jucopo mio thenge maeni ni umego kunoke ni nyamego. Jawinj p’umego ucikere ngo nibedo nyamego, man jawinj pa nyamego de ucikere ngo nibedo umego. (km-F 5/97 mba. 2) Nyathin mi somo ku jawinj pare gicopo ng’io nicungo acunga kunoke nibedo abeda. Nyathin mi somo binyutho lembe ma jucopo yero kinde ma judok liewo ng’atu moko m’ufoyo ku lemandha i rombo ma kwong’a. Jubitimo thengponji maeni nimakere ku kite ma waromo weco ko ku dhanu, ma nwang’ere i Buku mi coko mi Kwo man tic.

  • Liew mir ario: Jucopo mio thenge maeni ni umego kunoke ni nyamego. Jawinj p’umego ucikere ngo nibedo nyamego, man jawinj pa nyamego de ucikere ngo nibedo umego. (km-F 5/97 mba. 2) Nyathin mi somo ku jawinj pare gicopo ng’io nicungo acunga kunoke nibedo abeda. Nyathin mi somo binyutho lembe ma jucopo yero kinde ma judok liewo ng’atu moko m’ufoyo ku lemandha i liew ma kwong’a. Jubitimo thengponji maeni nimakere ku kite ma waromo weco ko ku dhanu.

  •   Ponji mi Biblia: Jucopo mio thenge maeni ni umego kunoke ni nyamego. Jawinj p’umego ucikere ngo nibedo nyamego, man jawinj pa nyamego de ucikere ngo nibedo umego. (km-F 5/97 mba. 2) Nyathin mi somo ku jawinj pare gicopo cungo acunga kunoke gicopo bedo abeda. Thenge maeni binyutho ponji mi Biblia ma dong’ ubemedere. Pire tie tek ungo nia nyathin mi somo ucak ku wec mi mondo i ponji man edar ku wec mi dolo dhu ponji, ento ecopo timo kumeno tekene jumio nia etii ku bodho maeno mi ponji. Pire tek ungo nisomo ku dwal ma tek udukuwec ceke ma junyutho, re ka jung’io nisome de rac ungo. Jucikiri niketho peko iwi bodho mi ponji.

  • Korolembe: Jubimio thengponji maeni ni umego man ebitime ni korolembe i wang’ cokiri.

  5. Kwo mi Jukristu: Thenge maeni bicaku ku wer. I ng’eye dakika 15 m’ulubo bibedo ku thiwiwec acel kunoke ario ma bikonyo juwinj nitio ku Lembe pa Mungu i kwo migi. Tekene junyutho ngo ng’atu m’ukwayu jumii ire thenge maeno, jucopo miogi ni judong cokiri kunoke ni jukony tic m’uromo. Ento jucikiri nimio yeny mi cokiri ni jadit cokiri.

  • Ponji mi Biblia mi cokiri: Dakika 30. Jucikiri nimio thenge maeni ni jadit cokiri m’uromo. (Ka wend judong cokiri utie nok, jucopo tio bende ku jukony tic m’uromo, kan ukwayere.) Guriri mi judong cokiri bing’io nia ng’a m’uromo nitelo wi Ponji mi Biblia mi cokiri. Umego ma jung’io gicikiri nitelo wi ponjine cuu man nidare i saa ma juketho, niketho nwoc iwi giragora ma pigi tek man nikonyo ng’atuman unen kite m’ecopo tio ko ku lembe ma juponjo. Gibinwang’u paru ma bikonyogi nitelo wi ponjine ka gisomo telowic ma jumio iwi kite mi telo wi ponji mi Otkur ma Wiw. Ka copere, kubang’ yenga jubibetio kud umego ma tung’ tung’ pi nitelo wi ponjine man pi nisomo udukuwec. Ka jawikom mi coko mi Kwo man tic ukwayu nia jujwig saa mi ponji maeno, umego m’ubetelo wie bineno nia ejwige nenedi. Ecopo ng’io nia kud jusom udukuwec moko.

  6. Wec mi dolo dhu program: Kud ekadh dakika 3. Jawikom mi coko mi Kwo man tic, bidok iwi lembe moko ma pigi tek ma juai juponjo i coko, man bende penji ku dwokowang’e ma nwang’ere i Karatasi mi dwokowang’ penji i coko mi Kwo man tic. Ecikere bende ninyutho lembe moko ma jubiweco i wie i yenga m’ulubo, man ecopo nyutho penji ma jubidwoko wang’e ma cen. Ka saa nuti, ecopo nyutho nying awiya mi somo ma jumio igi thengponji pi yenga m’ulubo. Ka junyutho ngo telowic mange m’ukoc, i saa maeni mi dolo dhu program, jawikom bisomo atwong’a man barua moko ci m’ukwayu jusom. Atwong’a ma nja, calu ve yub mi rweyo lembanyong’a man program mi ketho leng’o, jubitwong’ogi ngo niai kud iwi bop, ento jubimwonogi i kor bau mi lembang’eya. Ka saa ma jupangu pi dolo dhu program copo romo ngo pi somo atwong’a kunoke barua moko, jawikom bikwayu umego ma gitie ku thengponji i thengcoko mi Kwo mi Jukristu, gijwig saa mi thengponji migi. (Nen  udukuwec mir 5 ku  mir 9.) Jubidaru coko ku wer man rwo.

 7. Miiri zoo i somo piny man i ponji: Niai i yenga mi nindo 7, dwi mi 1, 2019, jawikom mi coko mi Kwo man tic ucikere nitio ku nyathibuku Somo piny man ponji pi nifoyo awiya mi somo man nimio igi juk. Nyathinman mi somo ucikere nitio ku bodho mi ponji ma nwang’ere i thum mi thengponji ma jumio ire i Buku mi coko mi Kwo man tic. Bodhone nwang’ere i ayi ma e ( ). I yenga mi caku pa dwi, jawikom mi coko mi Kwo man tic biweco karacelo ku juwinj iwi ponji acel mi nyathibuku Somo piny man ponji. Thenge ma thiwie tie “Lub mediri peri” i nyathibukune, juyiko kara awiya mi somo re m’utii kude; jawikom mi coko bikiewo ngo ie en.

   8. Juk: Ka nyathinman mi somo udaru thengponji pare, jawikom mi coko mi Kwo man tic bitio ku dakika acel kumeni pi nifoye man nimio ire juk m’ujengere iwi nyathibuku Somo piny man ponji. I wang’ ma fodi nyathin mi somo utimo ngo thengponji pare, jawikom binyutho ngo bodho m’ebitio ko. Ento, ka nyathin maeno mi somo udaru thengponji pare, jawikom biyero wec moko pi nifoye, man i ng’eye, ecopo nyutho bodho mi ponji ma nyathin ne utio ko. Ebinyutho thelembe m’uketho etimo thenge pare cuu, kunoke ebikoro i ayi ma ber nia pirang’o ukwayu eketh wie kilili iwi bodho maeno. Jawikom copo weco bende iwi bodho mange mi ponji ma nyathin ne utio ko man m’eneno nia copo bedo ku kony ni nyathin mi somo kunoke ni juwinj. Ecopo mio juk mange m’ujengere iwi nyathibuku Somo piny man ponji kunoke iwi buku Shule ya Huduma, i ang’et nyanok i ng’ei coko kunoke i saa mange. Ecopo mio juk maeno iwi bodho mi ponji m’etio ko kunoke iwi bodho mange.​—Som  udukuwec mir 13 ku mir  16 m’unyutho tic pa janen wi coko mi Kwo man tic, man tic pa jamii juk ma jakony.

    9. Saa: Thenge moko mbe m’ucikere nikadhu saa, kadok juk pa jawikom mi coko de. Ka saa romo, jawikom bikwayu ku riekowang’ nia nyathin mi somo ujig wec. Tek jumange gikadhu saa i thenge mange mi coko, jamii juk ma jakony ucikere nimio igi juk i ang’et. Coko ceke, uketho i ie wer ku rwo zoo, bitimo saa 1 ku dakika 45.

 10. Liew pa jaliew mi twodiri: I yenga ma jaliew mi twodiri ubeliewo i ie cokiri, program bikadhu calu ma junyutho i Buku mi coko mi Kwo man tic. Ento, jubiwilo Ponji mi Biblia mi cokiri ma nwang’ere i thengcoko Kwo mi Jukristu, ku korolembe mi tic ma jaliew mi twodiri bimio pi dakika 30. I wang’ korolembene, jawikom bidok iwi lembe ma juai juponjo, ebinyutho lembe mi program mi yenga m’ulubo, ebimio atwong’a man ebisomo bende barua m’ukwayere. I ng’eye, ebinyutho thiwi korolembe pa jaliew mi twodiri man ebiweko ire kaka. I ng’ei korolembe mi tic, jaliew mi twodiri bidolo dhu coko ku wer m’eng’io en. I yenga maeno mi liew pa jaliew mi twodiri, ot somo m’ameda i dhok mi cokiri bibedo mbe. Re, ungu ma timo coko i dhok mange gibitimo coko migi asu kadok i yenga ma jaliew mi twodiri uliewo ie cokiri migi de. Ento ungu maeno bidok dikiri karacelo ku cokiri i saa mi korolembe pa jaliew mi twodiri.

 11. Yenga mi coko ma dongo: I yenga mi coko ma dit mi twodiri kunoke mir adhura, coko bibedo mbe. Ng’atuman biponjo en gire kunoke juruotman biponjo gigi lembe ma nwang’u upangere pi yenga maeca.

 12. Yenga mi Poi pi tho pa Yesu: Ka nindo mi Poi pi tho pa Yesu upodho i nindo mi ceng’kasi, jubitimo ngo coko mi Kwo man tic. Ento jubitimo coko mi tic mi lembanyong’a i nindo mi Poi pi tho pa Yesu.

  13. Janen wi coko mi Kwo man tic: Janen wi coko mi Kwo man tic, bibedo jadit cokiri ma guriri mi judong cokiri re m’ung’io. Tic pare tie nipangu coko maeni ma ber, man niketho etimere de ma ber nimakere ku telowic ma nwang’ere iwi karatasi maeni. Ecikere nitimo tic karacelo ku jamii juk ma jakony. Ka Buku mi coko mi Kwo man tic mi dwi moko uwok, janen wi coko mi Kwo man tic bipangu wang’ acel umego ku nyimego ma gibitimo thengponji mir awiya mi somo i dwije. (Nen  udukuwec mir 4.) Jucikiri nimio thengponji ceke mir awiya mi somo, karacelo ku bodho mi ponji ma gibitio ko, yenga adek i wang’ nindo ma gibitimo ie thengponjine; jubimie igi nikadhu kud i Karatasi mi mio thengponji pi coko mi Kwo man tic mwa mi Jukristu (S-89).

 14. Jawikom mi coko mi Kwo man tic: Kubang’ yenga, jadit cokiri acel bibedo jawikom mi coko mi Kwo man tic. (Kaka ma wend judong cokiri tie nok i ie, jucopo tio ku jukony tic ma  giromo kan ukwayere.) En re m’ebiyiko wec mi caku man mi dolo dhu program, man ebiweco karacelo ku juwinj iwi video m’unyutho kite ma waromo weco ko ku dhanu man iwi video m’unyutho ponji ma nyen mi nyathibuku Somo piny man ponji. Ebilwong’o bende umego ma gibitimo thenge ma tung’ tung’ mi coko. Ka wend judong cokiri tie nok, ecopo bende nitimo thengcokone moko. Wec pare m’i kind thengponji ucikere nibedo adundo mandha. Guriri mi judong cokiri bing’io nia judong cokiri ma ng’agi re ma giromo nibedo juwikom mi coko. Jucopo bewilo judong cokiri ma giromone awila kubang’ yenga. Nimakere ku yeny m’i beng’wu, jucopo tio ku janen wi coko mi Kwo man tic pi nibedo jawikom pi yenga ma pol nikadhu judong cokiri mange. Ka jadit cokiri moko uromo nitelo wi Ponji mi Biblia mi cokiri, nyutho nia eromo bende nibedo jawikom mi coko. Re, wung’ei nia jadit cokiri ma tie jawikom, bibedo ku rwom mi mio foyofoc man juk ma ku mer ma romo konyo ju ma gitie ku thengponji mir awiya mi somo. Jawikom ucikere bende nineno nia coko uthum i saa ma juketho. (Nen  udukuwec mir 6 ku  mir 9.) Ka jawikom umaru man ka kabedo unuti iwi bop, jucopo ketho mikro mange m’ucungo iwi tiende iwi bop, kara kinde m’ebelwong’o umego ma bitimo ng’ete m’ulubo, nwang’u umegone ucungo i dhu mikro ma pare. Jawikom copo maru nia ebed i dhu meza moko i saa mi som mi Biblia man i saa mi thenge mi Miiri zoo i tic mi rweyo lembanyong’a, kara ku jucam saa.

 15. Jatel wi tic mi guriri mi judong cokiri: M’uweko thengponji mir awiya mi somo, jatel wi tic mi guriri mi judong cokiri re ma bipoko thengponji mange ceke ni umego. Eno uketho i ie bende nipangu umego ma bibedo jawikom mi coko pi yengaman, i kind judong cokiri ma guriri mi judong cokiri ung’io. Jatel wi tic mi guriri mi judong cokiri bineno nia jumwono program ceke mi coko iwi bau ma jumwono i wie lembang’eya; pieno, gibilar weco pi programne karacelo ku janen wi coko mi Kwo man tic.

  16. Jamii juk ma jakony: Kan ecopere, etie ber nitio ku jadit cokiri ma tie jakorlembe ma jabodho pi nitimo tic maeno. Jamii juk ma jakony bimio juk i ang’et ni judong cokiri man ni jukony tic, pi thengponji moko ci ma gibimio kan ukwayere. Ecopo bedo thengponji mi coko mi Kwo man tic, korolembe mi dhanu ceke, somo kunoke telo wi ponji mi Otkur ma Wiw, kunoke Ponji mi Biblia mi cokiri. (Nen  udukuwec mir 9.) Kan i cokiri mwu judong cokiri ma jumii korolembe kunoke juponji ma giweg bodho gitie dupa, jucopo bewilogi awila kubang’ oro pi nibedo jumii juk ma jukony. Pire tie tek ungo nia jamii juk ma jakony ubed umii juk i ng’ei theng ponjiman.

 17. Ot somo m’ameda: Nimakere ku wend awiya mi somo, cokiri copo medo ot somo mange pi thengponji mir awiya mi somo. Kubang’ ot somo m’ameda ucikere nibedo kokoro ku jamii juk m’uromo; ka copere, ebed jadit cokiri, kan ungo ke ebed jakony tic m’uromo andha. Guriri mi judong cokiri bing’io ng’atu ma copo romo nibedo jamii juk i ot somo m’ameda man ka nyo jubibewile kunoke ngo. Jamii juk maeno ucikere nilubo telowic ma nwang’ere i  udukuwec mir 8 mi karatasi maeni. Kan i cokiri mwu yub mi ot somo m’ameda utie, jubikwayu awiya mi somo gicidh i otne i ng’ei thengponji, Wagol lonyo mi tipo i Lembagora. Gibidok i ot ma dit i ng’ei thengcoko Miiri zoo i tic mi rweyo lembanyong’a. Kinde ma jubeweco iwi video moko, ju ma gini ot somo m’ameda gibiwinjo wec niai ku kuca kan ecopere. Kan ecopere ngo ke, jamii juk bitio ku jamtic mange pi niketho videone.

 18. Video: I coko maeni, jubibeneno video moko ma jupangu. Video maeno ma tie pi coko m’i kind yenga bibenwang’ere i application JW Library man jucopo benenogi ku jamtic ma tung’ tung’. I saa mange, i ng’ei ma judaru neno video m’unyutho kite ma waromo weco ko ku dhanu i coko mi Kwo man tic, jucopo betio kugi i coko mi rweyo lembanyong’a.