Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

Nyo Yakobo udoko kwaru pa Masiya kende kende pilembe eng’iewo twero pa Esau mi bedo kayu?

Penji mi jusom

Penji mi jusom

I Israel ma con, kara ng’atini ubed i thekwaru pa Masiya, nyo ugam ukwayere nia ebed kokoro wod ma kayu?

Lembe ma wakorone uyenyo rombo ku paru ma nwang’ere i Juebrania 12:16. I Biblia Traduction du monde nouveau, verse maeno uyero nia Esau “uneno ngo piny maleng’ ni gin ma pire tek,” uketho “eloko twero mi bedo kayu [ni Yakobo] ku cam ma wang’ acel.” Eno uyenyo royo paru ma nia kinde ma Yakobo unwang’u “twero mi bedo kayu,” emondo bende wang’ acel i thekwaru pa Masiya.​—Mat. 1:2, 16; Luka. 3:23, 34.

Re lundo lembe ma jukoro i Biblia unyutho ngo nia ukwayu ng’atini ukeubed kokoro wod ma kayu kara ebed i thekwaru pa Masiya. Wakenen lembene moko.

Ikind awiya pa Yakobo (Israel) m’enyolo ku Leya, Ruben re m’ubino kayu. I ng’eye, nyathin ma kayu m’edok enyolo ku Rahel m’ubino dhaku m’emaru lee ubino Yosefu. Kinde ma Ruben utimo lembe mir acidi, jugam jumayu twero pare mi bedo kayu, man jumie ni Yosefu. (Tha. 29:31-35; 30:22-25; 35:22-26; 49:22-26; 1 Kei. 5:1, 2) Re asu Masiya uwok ungo kud i thekwaru pa Ruben kadi pa Yosefu. Ento ebin ewok kud i thekwaru pa Yuda m’ubino nyathin mir  ang’wende pa Yakobo m’enyolo ku Leya.​—Tha. 49:10.

Luka 3:32 urieyo nying’ dhanu abic ma i ng’eye gidok gimondo bende i thekwaru pa Masiya. Re ubenen nia gin abic ceke gibino kayu. Ku lapor, Boaz unyolo Obed, Obed ke udok unyolo Yese.​—Rut. 4:17, 20-22; 1 Kei. 2:10-12.

Ento Daudi ma wod Yese ubino ngo kayu. Ebino nyathin ma cogo ikind awiya ma co abora. Re en re m’egam emondo i the thekwaru pa Masiya. (1 Sam. 16:10, 11; 17:12; Mat. 1:5, 6) Bende ikind awiya pa Daudi, thekwaru pa Masiya udok ukadhu kud ibang’ Suleman m’ubino ngo wode ma kayu.​—2 Sam. 3:2-5.

Re eno ubenyutho ngo nia bedo kayu pire ubino tek ungo. Awiya ma co ma kayu ubino ku dito moko ikind awiya mange, man wang’ mapol gin re ma gibed gidong’ nitelo wi ot kaka weggi. Bende, jubed jumio igi mutuma wang’ ario ka jupore ku mir awiya mange.​—Tha. 43:33; Poi. 21:17; Yoc. 17:1.

Ento con eca, jubed jumio bende twero mi bedo kayu ni wot mange. Ku lapor, Abraham umayu Icmael ku twero mi bedo kayu man edok emie ni Isak. Man calu ma waai waneno, juloko twero pa Ruben mi bedo kayu ni Yosefu.

Kawoni wakedwog iwi Juebrania 12:16, ma i Biblia Traduction du monde nouveau juloko kumae: “Kara won tarwang’ kud ubed nuti, kadi ng’atu ma neno ngo piny maleng’ ni gin ma pire tek, calu Esau, m’uloko twero mi bedo kayu ku cam ma wang’ acel.” Verse maeno umito yero ang’o?

I verse maeno, jakwenda Paulo ubino weco ngo pi thekwaru pa Masiya. Ento ebino kende kende niketho cwiny Jukristu nia ‘gitim yo m’atira ni tiendgi.’ Ka gitimo kumeno, gicopo ‘rem ungo ku bero pa Mungu,’ re tek gimondo i timo mi tarwang’, gicopo nwang’u ngo berone. (Ebr. 12:12-16) Eno copo ketho gibedo ve Esau ‘m’uneno ngo piny maleng’ ni gin ma pire tek,’ uketho emiere lee i lembe mi kum.

Esau ukwo i rundi mi kwaru ma con, man ve nia en de wang’ acel acel ebed enwang’u rwom mi thiero lam. (Tha. 8:20, 21; 12:7, 8; Yob 1:4, 5) Ento awanya marac mi kume uketho ebayu rwom maeno ceke, ke pi cam sani acel kende. Ecicopere nia emito eurere kud ikum masendi ma jular juewo nia nyikwai Abraham gibinwang’iri ko. (Tha. 15:13) Esau unyutho bende cac ikum lembe mi tipo, kinde m’egamu ire mon ario mi thek mange; lembuno unyayu can lee i junyodo pare. (Tha. 26:34, 35) Timo pare ukoc bor dit ku pa Yakobo, m’utimo tego nigamu dhaku ma woro Mungu mandha.​—Tha. 28:6, 7; 29:10-12, 18.

Dong’ wacopo yero ang’o i adundo pi thekwaru m’ulubere nitundo ikum Yesu, ma tie Masiya? Saa moko, thekwarune ubed ukadhu kud ibang’ wod ma kayu, re kwa ngo. Juyahudi ging’eyo lembuno, man giyie kumeno, calu ma gigam ging’eyo bende nia Kristu binyolere kud i thekwaru pa Daudi m’ubino nyathin ma cogo pa Yese.​—Mat. 22:42.