Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

Tim tic karacelo ku Yehova kubang’ ceng’

Tim tic karacelo ku Yehova kubang’ ceng’

“Wan wa jutic ma watimo karacelo waku Mungugi.”​1 KOR. 3:9.

WER: 64, 111

1. Wacopo timo tic ku Yehova i yo ma kani ma tung’ tung’?

KINDE ma Yehova ucwio dhanu, egam emito nia gitim tic karacelo kude. Kadok tin dhanu gileng’ ungo de, re asu ju ma gigwoko bedoleng’ migi gicopo timo tic ku Yehova kubang’ nindo. Ku lapor, ‘watimo tic karacelo ku Mungu’ kinde ma waberweyo lembanyong’a mi Ker, man wabeketho dhanu udok julub. (1 Kor. 3:5-9) Etie iwa yung ma dit nineno nia Jacwic ma jategokpo ung’iowa nitimo tic maeno ma pire tek! Re, watimo tic ku Yehova nikadhu kud i rweyo lembanyong’a kende ngo. I thiwiwec maeni, wabineno kite ma watimo ko tic ku Yehova kinde ma wabekonyo juruot mwa man dhanu mi cokiri, kinde ma wabenyutho jol, kinde ma wabemiara pi nikonyo tic m’ubetimere i dilo i wang’ ng’om zoo, man kinde ma wabetimo tic lee ni Yehova.​—Kol. 3:23.

2. Pirang’o wacikara ngo niporo lembe ma wabetimo ni Yehova ku mi jumange?

2 Saa ma wabeponjo thiwiwec maeni, ubekwayu wapoi nia dhanu zoo tie rom ungo. Oro mwa, leng’kum mwa, lembe ma wok i kwo mwa, man copo mwa ubed ukoc. Pieno, kud ipor lembe m’icopo timo ni Yehova ku ma jumange copo timo. Jakwenda Paulo uwacu kumae: “Dong’ ng’atuman ukor i tic  pare cu, e kulula bilund nege i kume gire kende, man kum wadi re ngo.”​—Gal. 6:4.

KONY JURUOT PERI MAN UMEGO KU NYIMEGO MI COKIRI

3. Pirang’o waromo yero nia ng’atu m’ubegwoko juruot pare ubetimo tic ku Mungu?

3 Yehova ubemito wagwok juruot mwa. Ku lapor, saa moko nyo ubekwayu isai sente pi nipong’o yeny migi. Mego ma dupa ke ubekwayu nia gibed kud awiya migi i pacu. Ka junyodo mwa gimbe ku copo mi gwokiri gigi ke, ubekwayu wagwokgi wan. Eno tie lembe ma pigi tek akeca, kum Biblia uyero kumae: “Tek ng’atu moko gwoko dhanu pare gire ngo, e ka juode ma dhe de k’egwokogi ngo, meca ekwero yioyic, man edoko rac ma sagu ng’atu ma jayic ungo.” (1 Tim. 5:8) Kan itie ku rwom mi gwoko juruot, saa moko nyo icopo timo ngo lee ni Yehova calu ma nwang’u imaru. Ento cwinyi kud utur! Anyong’a nego Yehova kan ibegwoko juruot peri.​—1 Kor. 10:31.

4. Junyodo giromo ketho Ker pa Mungu i kabedo ma kwong’a nenedi, man matokene romo bedo ang’o?

4 Junyodo ma Jukristu gicopo timo tic ku Yehova, nwang’u gibekonyo awiya migi ubed ku lembakeca mi tipo. Junyodo ma dupa gikonyo awiya migi ma co ku ma nyir nitimo kumeno. Uketho kinde m’awiyane gidongo, gimaku yub mi timo tic mi saa ceke ni Yehova, kadok bor ku pacu migi. Jumoko gibedo bamisioner, jumange gicidh gitimo tic pa jayab yo kaka ma yeny mi jurwei utie lee i ie, jumange ke gitimo i Bethel. I andha, kan awiya gini kabedo ma bor, junyodo copo bedo ngo karacelo kugi calu ma nwang’u gimito. Ento giketho cwiny awiyane nia gimediri asu nitimo ni Yehova kaka ma gibenwang’iri i ie. Pirang’o? Pilembe anyong’a negogi nia awiya migi uketho Yehova i kabedo ma kwong’a i kwo migi. (3 Yoh. 4) Ju ma dupa m’i kind junyodone gitie ku kit paru ma rom ku pa Hana m’uwacu nia, ‘emio’ wode ma Samuel ni Yehova. Ginwang’u nia etie yung ma dit nitimo karacelo ku Yehova i ayi maeno.​—1 Sam. 1:28.

5. Iromo konyo umego ku nyimego mi cokiri peri nenedi? (Nen cal mir acaki.)

5 Kan imbe ku macero ma lee mi gwoko juruot peri, nyo icopo konyo umego ku nyimego ma giberemo, ma gitii kunoke ma gitie ku yeny moko? Kunoke nyo icopo konyo ju m’ubegwokogi? Kepim nineno i cokiri peri ka nyo dhanu moko tie ma jucopo konyogi kumeno. Ku lapor, nyo nyamego moko tie m’ubegwoko janyodo pare m’utii? Nyo icopo nwang’u saa mi bedo karacelo ku janyodone kara etim tic mange? Ka ng’atu moko umbe ku copo mi cidho gire i coko, nyo icopo miiri pi nitere, man nyo icopo konye ku ng’iewo piny? Kunoke nyo iromo cineno ng’atu moko i odiyath? Kan ibetimo kumeno, nwang’u ibetimo tic karacelo ku Yehova pi nidwoko wang’ sala pa ng’atini.​—Som 1 Jukorinto 10:24.

BED JAJOL

6. Nyutho jol uketho i ie ang’o?

6 Dhanu ma gitimo tic karacelo ku Yehova ging’eiri nikum jol ma ginyutho. I Biblia, wec mi dhu Jugiriki ma juloko nia “jol,” thelembene tie “ninyutho berocwiny ni ng’atu m’ing’eyo ngo.” (Ebr. 13:2) I Biblia, junwang’u lapor dupa m’ubeponjowa iwi ayi mi nyutho berocwiny. (Tha. 18:1-5) Wacopo, man wacikara nitio ku kaka ceke m’unen pi nikonyo jumange, kadok gitie ‘juot mwa mi yioyic’ kunoke ngo de.​—Gal. 6:10.

7. Tek wabejolo ju ma gibetimo tic mi saa ceke, wanwang’u bero ma kani?

 7 Icopo bende nitimo tic karacelo ku Yehova nwang’u ibemio ot ni umego ku nyimego ma gibetimo tic mi saa ceke, ma gitie ku yeny mi kabedo. (Som 3 Yohana 5, 8.) Ka wabetimo kumeno, wakugi ceke wanwang’u berone, niwacu “wajukra” i kindwa. (Rum. 1:11, 12) Wakenen lapor p’umego Olaf. Saa m’ebino nyathin, jaliew moko mi twodiri ma jamusuma ubin uliewo cokiri migi, man ebino ku yeny mi kaka m’ecopo bedo i ie, re ng’atu moko mi cokiri acel de mbe m’uwodhere nijole. Olaf upenjo junyodo pare ma gitie ngo Jumulembe, ka nyo jaliew eno copo bedo yo pagi. Giyio, re giyero nia Olaf bivuto iwi kom. Olaf uyio, man edieng’ ungo. Yenga acel ma jaliew utimo yo pagi unyang’e lee mandha! Nja kugweno, kinde ma giai man kinde ma gibemadhu cai, giweco iwi lembe dupa ma beco. Jaliew uketho cwiny Olaf lee dit, man lembene ucwale nicaku tic mi saa ceke. Olaf utimo tic mi misioner i ng’om ma tung’ tung’ pi oro 40.

8. Pirang’o wacikara ninyutho mer ni dhanu ma wang’eyo ngo kadok gifoyowa ngo wang’ ma kwong’a de? Kemii lapor moko.

8 Wacopo nyutho mer ni dhanu ma wang’eyo ngo i ayi ma dupa, kadok gifoyowa ngo wang’ ma kwong’a de. Ku lapor, nyamego moko mir Espagne ubed uponjo Biblia ku dhaku moko ma nyinge Yesica, mi ng’om mir Équateur. Nindo moko, kinde ma gibeponjo Biblia, Yesica ucaku wak man ekwero niling’. E nyamego eno upenje nia ebewagang’o. Yesica ukoro ire nia i wang’ nibino i Espagne, ebino jacan ma ngolo ngolo. Nindo acel, cam ubino mbe nyanok de m’eromo mio ni nyathi nyaku pare, ndhu pii kende. Kinde m’ebepiele kara enindi, Yesica urwo nia Mungu ukonye. E ndhu ndhu i ng’eye, nyimego moko ario ma gi Jumulembe pa Yehova gigam gitundo yo pare, man gimio ire gazeti moko. Eng’ologi ku rac, man eyeco i gazetine cen, e eyero igi kumae: “Wugeno eni tie cam m’acopo mio ni nyara?” Nyimego gimito giketh cwinye, re eyio ngo. I ng’eye, nyimego maeno gibin giketho cam katoko acel i dhugola pare. Karaman ecaku wak i saa mi ponji, pilembe epoi nia egam ecayu lembe ma Mungu utimo pi nidwoko wang’ rwo pare. Yesica ukeco nia ebitimo ni Yehova. Ma jiji mbe, berocwiny ma nyimego ginyutho uwodho cegonying’ ma ber.​—Ekl. 11:1, 6.

MIIRI KU BEROCWINYI PI NIKONYO TIC M’UBETIMERE I DILO

9, 10. (a) Kenyuth yore moko ma nyithindho mir Israel gibed gimiiri ko gigi. (b) Tin eni umego gicopo konyo nenedi i cokiri?

9 I rundi ma con, nyithindho mir Israel gibino ku yore dupa dit ma giromo nimiiri ko gigi. (Ai 36:2; 1 Kei. 29:5; Neh. 11:2) Tin, in bende itie ku kaka mi mio saa peri, jamcingi man bodho peri ku berocwinyi, pi nikonyo umego ku nyimego. Tek ibetimo kumeno, ibinwang’u mutoro ma lee man Yehova bimio iri mugisa.

10 Lembe pa Mungu ubeketho cwiny umego mi cokiri nia gitim tic karacelo ku Yehova, nwang’u gibemiiri pi nitimo ni jumange, calu jukony tic man judong cokiri. (1 Tim. 3:1, 8, 9; 1 Pet. 5:2, 3) Umego ma gibetimo kumeno gimito gikony dhanu mange i thenge mi kum ku mi tipo bende. (Tic. 6:1-4) Nyo judong cokiri udaru kweyi nia ijol dhanu m’ubebino i coko i Ot Ker, inen wi girasoma, inen wi teritwar, ikony tic mi yiko Ot Ker kunoke tic mange? Umego ma gibekonyo i ayi maeno giyero nia tije nyang’ugi mandha.

Wang’ ma pol ju ma gimiiri pi nikonyo tic mi giedo ma dilo ubetimo, githeyo mer ku jurimo ma nyen (Nen udukuwec mir 11)

11. Nyamego moko unwang’u bero ma kani i tic mi giedo?

 11 Wang’ ma pol, ju ma gimiiri gigi i tic mi giedo githeyo mer ku jurimo dupa ma nyen. Nyamego moko ma nyinge Margie utimo tic mi giedo mi Udi Ker pi oro 18. I saa mi giedone, ebed emaru ning’iyo ku nyimego m’aradu, man ebed ekonyo nitendogi. Eyero nia eno tie yo ma cuu dit ma jumiiri ko pi niketho cwiny jumange. (Rum. 1:12) Kan ebekadhu kud i peko moko, dhanu m’etheyo kugi mer i saa mi giedo, gibed giketho cwinye. Nyo idaru miiri pi nikonyo tic moko mi giedo? Kadok imbe ku bodho moko ma segi de, asu iromo nikonyo tic mi giedo.

12. Icopo konyo umego ku nyimego nenedi ka peko ma rek uwok i wigi?

12 Waromo bende nitimo tic karacelo ku Yehova, nwang’u wabekonyo umego ku nyimego mwa ma peko ma rek uwok i wigi. Ku lapor, wacopo mio sente. (Yoh. 13:34, 35; Tic. 11:27-30) Lembe mange ma wacopo timo, utie niyiko piny m’unyothere i ng’ei peko m’uwok rek iwi umego. Nyamego Gabriela mi ng’om mi Pologne ma pii upong’ man unyotho ot pare, uwacu nia ebino ku mutoro lee dit nineno nia umego ma giai kud i cokiri ma ceng’ini ceng’ini gibin gikonye. Eyero nia kan ebeparu pi lembuno, cwinye pido ngo pi piny pare m’unyothere, ento eketho wie akeca iwi piny m’edok enwang’u. Ekoro kumae: “Lembe m’umego gitimo ira uketho anyang’ nia nibedo i cokiri mi Jukristu utie rwom ma lee dit, man emio iwa mutoro.” Dhanu dupa ma jukonyogi i ng’ei peko ma kumeno, ginwang’u kit mutoro ma rom. Ju ma gitimo tic ku Yehova pi nikonyo umego ku nyimego ma peko uwok i wigi de, ginwang’u mutoro lee dit.​—Som Tic mi Jukwenda 20:35; 2 Jukorinto 9:6, 7.

13. Ka wabemiara pi nikonyo jumange, mer ma wamaru ko Yehova doko tek nenedi? Kemii lapor moko.

13 Nyamego Stephanie ku jurwei mange mi kabedo m’eni ie, gitimo tic karacelo ku Yehova, kinde ma gikonyo umego ku nyimego ma lwiny utuk i ng’om ma  thugi man giringo i États-Unis. Gikonyogi ninwang’u ot man jamtic ma gitie ku yenyne. Stephanie ukoro kumae: “Anyong’a man foyofoc ma gibino ko pi mer m’umego mi ng’om zoo unyutho igi umulo adundewa lee. Giparu nia wan re ma wakonyogi, ento i andha, gin re ma gikonyowa ma sagu. Mer ma waneno i bang’gi, bedo i acel, yioyic, man kite ma gijengiri ko iwi Yehova uketho mer ma wamaru ko Yehova udoko tek, man uketho wabedwoko foyofoc lee dit pi kony ceke ma dilo pare umio iwa.”

TIM LEE NI YEHOVA

14, 15. (a) Jabila Isaya unyutho pidoic ma nenedi? (b) Jukristu giromo lubo lapor pa Isaya nenedi?

14 Nyo icopo maru itim tic karacelo ku Yehova kadok nisagu? Nyo icopo maru idok kaka ma yeny mi jurwei utie lee i ie? I andha, pi nitimo bero, ubekwayu ngo nia kokoro wadok kaka ma bor. Re umego ku nyimego moko ginuti ma gicopo nidok. Gitie ayika ve jabila Isaya. Kinde ma Yehova upenjo nia, “Abioro ng’a man ng’a ma bicidho iwa?” ewacu kumae: “Anuti eni; ora.” (Isa. 6:8) Nyo in de itie ayika niwodhiri pi nikonyo dilo pa Yehova? Icopo konyo i ayi moko ma kani?

15 Yesu uyero pi tic mi rweyo lembanyong’a man mi ketho dhanu udok julub kumae: “Mwoka bedo dit andha ere jutic gi lam. Ka kumeno wukwai Rwoth mi mwoka, ya eor jutic i mwoka pare.” (Mat. 9:37, 38) Nyo icopo timo tic pa jayab yo kaka ma yeny mi jurwei utie lee i ie? Kunoke nyo icopo konyo ng’atu moko kara etim kumeno? Kan itimo kumeno, ibinwang’u mutoro ma lee akeca. Umego ku nyimego ma dupa ginwang’u nia yo ma cuu akeca mi nyutho mer ni Mungu man ni dhanu wagi, utie nitimo tic pa jayab yo kaka ma yeny mi jurwei tie lee i ie. Nyo ineno nia ayi mange nuti m’icopo medo ko tic m’ibetimo ni Mungu?

16, 17. Icopo timo lee ni Yehova i ayi mange ma kani?

16 Nyo icopo bedo ayika nitimo i Bethel, kunoke nikonyo tic mi giedo pi nindo moko, kunoke pi nindo acel kadi nindo dupa i kind yenga? Dilo pa Yehova utie ku yeny mi dhanu ma gibedo ayika nikonyo kaka ma jubekwayu gitim i ie, man ma giromo timo tic moko ci ma jubekwayu i bang’gi, kadok nwang’u ging’eyo kit tic mange de. Dhanu ma gitie ayika niwodhiri gigi pi nicitimo kaka ma yeny utie i ie, pigi tie tek lee i Yehova.​—Zab. 110:3.

17 Nyo imaru inwang’ ponji mange dupa kara itim lee ni Yehova? Saa moko nyo icopo pong’o karatasi pi nisomo Somo mi jurwei Injili mi Ker. I somo maeno, jutendo umego ku nyimego ma giteng’ini i tipo, ma dong’ gibetimo tic mi saa ceke ni Yehova, kara gitim lee i dilo pare. Dhanu maeno gicikiri nibedo ayika nicitimo kaka moko ci ma jubiorogi i ie. Nyo iromo bedo ayika nitimo lee ni Yehova i ayi maeno?​—1 Kor. 9:23.

18. Kenyuth bero moko ma wacopo nwang’u ka wabetimo tic karacelo ku Yehova kubang’ nindo.

18 Calu ma watie dhanu pa Yehova, wamio ni jumange, wanyutho igi berocwiny, wabedo kugi ma ber man wamarugi. Wadieng’ pi jumange kubang’ nindo. Eno ketho wanwang’u mutoro man kwiocwiny. (Gal. 5:22, 23) Kadok ibenweng’iri ku lembe ma nenedi i kwo peri de, ibinwang’u anyong’a tek ibenyutho berocwiny calu Yehova, man ibibedo acel m’i kind jurutic wadi ma pigi tek lee i ie!​—Rie. 3:9, 10.