Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

Dhanu ma mio ku berocwinygi gitie jumutoro

Dhanu ma mio ku berocwinygi gitie jumutoro

“Mio en e mugisa ma sagu gamu.”​TIC 20:35.

WER: 76, 110

1. Ang’o m’ubenyutho nia Yehova tie won berocwiny?

I WANG’ nicaku cwic, Yehova ular ubedo kende. I ng’eye eng’io nia emii giramia mi kwo ni giracwia ma riek i polo man iwi ng’om. Yehova, “Mungu ma jamugisa” niwacu ma jamutoro, bemaru nimio giramia ma beco ni dhanu. (1 Tim. 1:11; Yak. 1:17) Ebemito wan de wabed jumutoro, pieno ebeponjowa kara wanyuth berocwiny.​—Rum. 1:20.

2, 3. (a) Pirang’o wabedo ku mutoro ka wamio ni jumange? (b) Wabiponjo lembang’o i thiwiwec maeni?

2 Mungu ucwio dhanu i ayi pare. (Tha. 1:27) Eno ubenyutho nia Yehova ucwiowa ku kite ma tung’ tung’ ma en de etie ko. Kara wabed ku mutoro mandha, man wanwang’ mugisa pare, wacikara nilubo lapor pare. Ubekwayu wadieng’ pi yeny mi jumange, man wabed dhanu ma mio ku berocwiny. (Flp. 2:3, 4; Yak. 1:5) Pirang’o? Pilembe Yehova ucwiowa ku kite maeno. Kadok waleng’ ungo de, asu wacopo lubo lapor pa Yehova man nitimo bende bero ni jumange.

3 Kawoni wabiweco iwi ponji moko ma Biblia ubemio iwa iwi berocwiny. Wabiponjo bende thelembe m’uketho anyong’a  nego Yehova ka wabetimo bero. Bende, wabineno nia berocwiny copo konyowa nenedi nitimo tic ma Yehova umio iwa, man wabing’eyo thelembe m’uketho wabedo ku mutoro ka wabenyutho berocwiny. M’umedo maeno, wabineno nia pirang’o ukwayu wamedara nitimo bero ni jumange.

ANYONG’A NEGO YEHOVA KA WABEMIO NI JUMANGE

4, 5. Yehova giku Yesu ginyutho berocwiny nenedi, man pirang’o wacikara nilubo lapor migi?

4 Yehova ubemito walub lapor pare, pieno anyong’a nege ka wabemio ni jumange. (Ef. 5:1) Ebemito bende dhanu gibed jumutoro. Lembe maeno unen kamaleng’ i kite m’ecwio kowa i ayi mir udu. M’umedo maeno, ecwio ng’om ma leng’, man ecwio piny ceke m’iwi ng’ombe, kara wabed ku mutoro. (Zab. 104:24; 139:13-16) Pieno ka wabeketho jumange de gibed ku mutoro, Yehova nwang’u yung.

5 Yesu bende uweko iwa lapor ma ber mi nyutho berocwiny. Eyero kumae: “Wod dhanu bino ya jutim ire ngo, ento kara etim, emi kwo pare de ni gony mi dhanu dupa.” (Mat. 20:28) Jakwenda Paulo de uketho cwiny Jukristu kumae: “Dong’ pidoic maeni e m’ubed i iwu, ma yang’ ubedo i Kristu Yesu bende . . . ewenjre gire, edong’ egamu kum ng’eca re.” (Flp. 2:5, 7) Pieno, ng’atuman m’i kindwa copo penjere kumae: ‘Nyo acopo timo tego nilubo batiend Yesu ceng’ini ceng’ini akeca?’​—Som 1 Petro 2:21.

6. Kpawa pa Jasamaria ma cwinye leng’ ubemio iwa ponji ma kani? (Nen cal mir acaki.)

6 Anyong’a nego Yehova ka wabelubo lapor pare man pa Yesu. Walubo lapor migine, nwang’u wabedieng’ pi dhanu mange man nwang’u wabesayu ayi ma wakony kogi. Pi ninyutho nia eno tie lembe ma pire tek akeca, Yesu ukoro kpawa pa Jasamaria moko ma cwinye leng’. (Som Luka 10:29-37.) Eponjo julubne nia gicikiri nikonyo jumange m’umbe nineno nia gi jukani, kunoke gi dhanu ma kani. Nyo ibepoi i kum thelembe m’uketho Yesu ukoro kpawa maeno? Ekoro kpawane pilembe Jayahudi moko ubin upenje kumae: “Wada en e ng’a?” Lembe ma Yesu udwoko ire ubeponjowa nia ka wamaru wanyai anyong’a i Yehova, wan de wacikara nitimo bero calu Jasamaria maeno.

7. Wacopo nyutho nenedi nia lembe ma Yehova ubekwayu watim utie ber nisagu? Kekor.

7 Thelembe mange m’ucwaluwa nitimo bero utie lembe m’ugam utimere i podho mir Eden. Sitani uloko nia Adamu giku Eva gibibedo kud anyong’a ka gituro cik pa Yehova, man ka gidieng’ pigi kendgi. De andha Eva udieng’ pire kende uketho emito ebed ve Mungu. Adamu de udieng’ pire gire, man emito enyai anyong’a i Eva kakare ninyayu anyong’a i Mungu. (Tha. 3:4-6) Matoke mi lembe ma gitimo ubino rac magwei. Eno ubenyutho kamaleng’ nia ng’atu moko mbe ma copo nwang’u anyong’a kan ebedieng’ kwa pire gire. Re ka wabedieng’ pi jumange, man watimo igi bero, nwang’u wabenyutho nia lembe ma Yehova ukwayu watim utie ber nisagu.

TIM TIC MA MUNGU UMIO IWA

8. Nwang’u Adamu giku Eva gicikiri nidieng’ pi jumange. Pirang’o?

8 Kadok Adamu giku Eva gibino kendgi i podho mir Eden de, re nwang’u asu gicikiri nidieng’ pi dhanu mange. Pirang’o? Yehova ugam umio igi tic ma  gitim. Ewacu nia ginyol, ginyai gipong’ ng’om man gidwoke ni paradiso. (Tha. 1:28) Nwang’u Adamu giku Eva gicikiri nidieng’ pi bero mir awiya ma gibinyolo, calu ma Yehova de umito nia gin ceke gibed kud anyong’a. Nwang’u gin ceke gibecitimo tic karacelo pi niketho ng’om zoo udok ni paradiso. Eno ubino tic ma lee dit!

9. Nwang’u dhanu gibecinwang’u mutoro saa ma gibedwoko ng’om udok ni paradiso. Pirang’o?

9 Nwang’u dhanu ma gimbe ku dubo gibecitimo bende tic karacelo ku Yehova kara gidwok ng’om ni paradiso, man kara yeny pa Mungu utimere. I ayi maeno re ma nwang’u gicopo mondo i yom pa Mungu. (Ebr. 4:11) Kepar kite ma nwang’u tic maeno copo mio ko igi mutoro! Nwang’u Yehova ubemio igi mugisa lee mandha, pilembe gidieng’ ungo kende kende pi bero migi gigi, ento gidieng’ pi jumange bende.

10, 11. Ang’o ma bikonyowa nirweyo lembanyong’a man niketho dhanu udok julub?

10 Tin, Yehova umio iwa tic ma segi m’ukwayu watim. Ebemito warwei lembanyong’a ni dhanu man waketh gidok julub. Kara tije utimere ma ber, ukwayu wadieng’ pi dhanu mange. I andha, lembe ma copo konyowa nitimo tic maeno utie kende kende mer ma wamaru ko Yehova, man ma wamaru ko dhanu.

11 Jakwenda Paulo uyero nia en ku Jukristu mi rundi ma kwong’a gibino ‘jutic ma gitimo karacelo ku Mungu,’ pilembe gibed girweyo man gibed giponjo lemandha ni dhanu. (1 Kor. 3:6, 9) Tin, wan de wacopo timo ‘karacelo ku Mungu,’ nwang’u wabemio saa mwa, tego mwa, man jamcingwa ku berocwinywa pi nitimo tic ma Mungu umio i korwa. Eno utie rwom ma dit mandha!

Ibinwang’u mutoro ma lee dit kan ibekonyo dhanu ging’ei lemandha (Nen udukuwec mir 12)

12, 13. Mugisa ma kani ma wanwang’u ka wabeketho dhanu udok julub?

12 Wanwang’u anyong’a ma lee dit ka wabemio saa mwa man tego mwa i tic mi rweyo lembanyong’a. Umego ku nyimego ma dupa ma gitelo wi ponji mi Biblia giyero kumeno. Anyong’a negowa lee dit ka ju ma waponjo kugi Biblia gibenyang’ cuu i lembe ma Biblia ubeponjo iwa, ka yioyic migi ubedoko tek, ka gibetimo alokaloka i kwo migi man ka gibeyero lembe ma giponjone ni dhanu mange. Yesu de anyong’a unege lee dit kinde ma jurwei 70 m’eoro “gidwogo ku mutoro,” pilembe ginwang’u adwogi ma ber i lembanyong’a.​—Lk. 10:17-21.

13 Umego ku nyimego mwa m’i wang’ ng’om ngung’ ginwang’u anyong’a, ka gibeneno kite ma lembe mi Biblia ubemulo ko adunde dhanu, man ubeloko ko kwo migi. Ku lapor, nyamego moko  ma jamusuma ma nyinge Anna * ugam umito etim lee dit ni Yehova. Pieno, eai kud i Europe, edok kaka ma yeny mi jurwei tie lee i ie. Ekoro kumae: “Kakeni, ninwang’u ponji mi Biblia utie yot, man amaru lembene. Bende, tic para mi rweyo lembanyong’a mio ira mutoro lee mandha. Kan adok i pacu, aparu pi dhanu m’aponjo kugi Biblia, pi peko migi man adieng’a migi. Pieno, abedo mbe ku saa mi dieng’ akeca i kum peko para. Asayu yore m’acopo ketho ko cwinygi, man m’acopo konyo kogi. Ang’eyo andha nia ‘mio en e mugisa ma sagu gamu.’”​—Tic. 20:35.

Ka waberweyo ni dhanu mi teritwar mwa kubang’ dhugola, nwang’u wabemio igi kaka mi winjo lembanyong’a mi Ker (Nen udukuwec mir 14)

14. Icopo timo ang’o kara inwang’ mutoro i tic mi lembanyong’a kadok jubewinji ngo de?

14 Kadok dhanu gibewinjowa ngo kinde ma waberweyo de, asu wacopo bedo ku mutoro pilembe wabemio igi kaka mi winjo lembanyong’a. Yehova ubekwayu watim lembe ma rom m’egam ekwayu jabila Ezekiel utim. Eyero ire kumae: “Ibiyero lembe para igi, kadok gibiwinjo, kadi kadok gibiwinjo ngo.” (Eze. 2:7; Isa. 43:10) Pieno, kadok dhanu giwinjowa kunoke ngo de, Yehova neno kero ma wabetimo. (Som Juebrania 6:10.) Umego moko ukoro pi tic mi rweyo lembanyong’a kumae: “Wapidho, wakwoyo pii, man warwo ku genogen ma nia Yehova biketho edongi.”​—1 Kor. 3:6.

LEMBE MA COPO MIO IWA MUTORO

15. Nyo wacopo timo bero kende kende ka jubefoyowa? Kekor.

15 Yesu ubemito watim bero ni jumange, kara wanwang’ mutoro. Tek wabetimo kumeno, jumange de bitimo bero iwa. Eno re m’uketho ewacu kumae: “Wumi, e ka jubimio iwu; mukero ma ber, ma jucung’o ie, ma juyenge de, ma jukonjo pong’ hau, gibimio i korwu. Kum ku mukero ma wuporo ko jubiporo ko iwu bende.” (Lk. 6:38) I andha, dhanu moko bifoyi ngo pi berocwiny m’ibetimo. Re kadok gibefoyi ngo de, mediri asu nitimo bero. Ing’eyo ngo nia bero acel kende m’itimo copo wodho cegonying’ ma rukani.

16. Berocwiny mandha utie berocwiny ma nenedi?

 16 Dhanu ma gitimo berocwiny mandha, gikuro ngo nia judwok kawang’e. Yesu uwacu kumae: “Kan itimo agba, lwong’ jucan, ku weg abala mi bot, ku weg abala mi tielo ku ju ma abinga: e mugisa bikwenyi: kum gin moko mbe kugi ma gicul kawang’e.” (Lk. 14:13, 14) Bende, Biblia uyero nia, “ng’atu ma wang’e ni woko mugisa bikwanye,” man emedo nia, “mugisa ni ng’atu m’upido pi jacan.” (Rie. 22:9; Zab. 41:1) Wacikara nitimo bero ni jumange, pilembe wabemito wakonygi.

17. Wacopo timo ang’o mange kara wabed kud anyong’a?

17 Kinde ma Paulo udok iwi wec pa Yesu ma nia “mio en e mugisa ma sagu gamu,” ebino weco ngo kende kende pi giki mi kum. Gin mange ma wacopo mio ni dhanu utie tielocwiny, juk mi Biblia, man kony. (Tic. 20:31-35) Nikadhu kud i wec man timo pare, Paulo uponjowa nia pire tie tek nimio saa mwa, kero mwa pi nikonyo dhanu mange, nidieng’ pigi, man nimarugi.

18. Jururieko ma dupa giwacu lembang’o iwi timo bero?

18 Jururieko ma giponjo lembe iwi kura mi dhanu, ginwang’u bende nia ka dhanu gibemio ni jumange gibedo ku mutoro. Girasoma moko mi ng’om de ukoro nia dhanu beyero ya ginwang’u anyong’a lee dit i ng’ei ma gitimo bero ni jumange. Jururiekone giyero nia, ka wabekonyo dhanu mange, wanwang’u nia kwo mwa utie ku thelembe. Pieno, giwacu nia kara kum ng’atini ubed ma leng’ man ebed ku mutoro, ukwayu ebed ekony jumange. Wacopo zungo ngo lembe ma giyero, pilembe Yehova ma Jacwic mwa uwacu nia ka wabemio ni dhanu mange, wabibedo ku mutoro.​—2 Tim. 3:16, 17.

MEDIRI NIMIO

19, 20. Pirang’o ibemito itim berocwiny?

19 Ka dhanu ma wabekwo kugi gibedieng’ kende kende pigi gigi, ecopo bedo iwa tek nitimo bero ni jumange. Ento Yesu upoyo wiwa nia cik ario ma dongo m’usagu zoo, utie nimaru Yehova kud adunde mwa, ku ng’eyong’ec mwa, ku pidoic mwa, man ku tego mwa ceke, man nimaru jumange calu wan giwa. (Mk. 12:28-31) I thiwiwec maeni, waponjo nia dhanu ma gimaru Yehova gilubo lapor pare. Yehova giku Yesu ginyutho berocwiny. Gibemito wan de walub lapor migi pilembe ging’eyo nia ka watimo kumeno, wabinwang’u anyong’a mandha. Tek wabetimo gin ma Mungu ubekwayu watim, man wabetimo bero ni jumange, wabimio yung ni Yehova man wan ku dhanu mange de wabinwang’u konyne.

20 M’umbe jiji, ibetimo kero ninyutho berocwiny man nikonyo jumange, asagane umego ku nyimego. (Gal. 6:10) Kan ibemediri nitimo kumeno, dhanu bifoyi man gibimeri, e ibibedo jamutoro. Biblia uwacu kumae: “Ng’eyong’ec ma mio piny bicwe; man ng’atu ma kwoyo pi jubikwoyo pi i wie bende.” (Rie. 11:25) I kwo mwa ma kubang’ ceng’ man i tic mi lembanyong’a, wacopo nyutho berocwiny, man wacopo dieng’ pi dhanu mange i ayi dupa. I thiwiwec m’ulubo, wabineno ayine moko.

^ par. 13 Juloko nyinge.