Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

Nyuth kisa ni “dhanu ceke”

Nyuth kisa ni “dhanu ceke”

KINDE ma Yesu ubeponjo julubne kud ayi mi rweyo lembanyong’a, epoyogi nia dhanu moko biwinjogi ngo. (Lk. 10:3, 5, 6) Lembuno bewok iwa bende ka waberweyo lembanyong’a. Dhanu moko copo nyotho iwa wec, kunoke gicopo doko kwiny kudwa. Eno copo ketho ebedo iwa tek ninyutho igi kisa man nirweyo igi lembanyong’a.

Ng’atu ma jakisa neno yeny mi jumange, peko migi, kisa nege i kumgi man emito ekonygi. Re lembang’o ma copo wok ka kisa ubenegowa ngo i kum dhanu ma wanwang’u i lembanyong’a? Amora mwa bithum, niwacu wabibedo mbe kud ava mi rweyo igi, man konyogi bibedo tek iwa. Wacopo poro amora mwa ku mac. Kara mac umedere asu niliel, ukwayu juwoth medo yen i wang’e. Kumeno bende, kara wamedara nibedo kud amora, wacikara nineno kisa i kum jumange!​—1 Tes. 5:19.

Dong’ wacopo timo ang’o kara wanyuth kisa, kadok i saa ma nyutho kisane utie tek de? Wakewec iwi lapor adek ma e ma wacopo nilubo: pa Yehova, pa Yesu man pa jakwenda Paulo.

LUB LAPOR MI KISA PA YEHOVA

Dhanu ucaku cwayu ndra iwi Yehova niai con. Re asu etimo bero “ni ju m’umbe [ku] foyofoc ku judubo bende.” (Lk. 6:35) Etimo berone nenedi? Yehova ubenyutho cirocir ni ng’atuman, pilembe ebeyenyo “dhanu ceke bothi.” (1 Tim. 2:3, 4) Kadok Mungu udagu lembe ma reco de, re asu pi dhanu tek i ie, man ebemito ngo ng’atu acel de m’i kindgi utho.​—2 Pet. 3:9.

Yehova ung’eyo nia Sitani tie jabodho mi ketho dhanu uyii vupo. (2 Kor. 4:3, 4) Dhanu ma dupa jucaku ponjogi ku vupo iwi Mungu niai ma fodi githindho. Pieno, kite ma giparu ko lembe man timo migi copo ketho gijolo ngo lemandha yot yot. Re Yehova ubemito ekonygi. Pirang’o wabeyero kumeno?

Kepar kite ma Yehova uwinjere ko pi dhanu mir adhura mi Nineve. Kadok gibino weg rop de, re Yehova upenjo Yona kumae: “Emaku piny ungo nia kisa nega kum adhura ma dit maeno ma Nineve, ma dhanu ma sagu rubanga dak acel ku pier ario ni i ie ma copo ng’eyo cing’gi ma yor acwic ku ma yor acam de ngo”? (Yon. 4:11) Kisa unego Yehova i kum dhanu mi Nineve ma ging’eyo ngo lemandha i wie, uketho eoro Yona ucidh upoigi.

Calu Yehova, wan de ubekwayu kisa unegwa i kum dhanu, pilembe pigi tek. Eno bimio iwa ava mi konyogi kara ging’ei lemandha iwi Yehova, kadok ubenen nia gibiwinjowa ngo de.

LUB LAPOR MI KISA PA YESU

Calu Yehova, Yesu de kisa unege i kum dhanu, pilembe “givoc gilal de, calu rombe ma jakwac umbe kugi.” (Mat. 9:36) Yesu ung’eyo nia dhanu maeno gilal man givoc, pilembe judong dini migi ubed usendogi man ubed uponjogi ku vupo. Bende, kadok Yesu ung’eyo nia dhanu dupa ma gibino winje, gibidoko ngo julubne pi thelembe ma tung’ tung’ de, re asu eponjogi ku lembe dupa.​—Mk. 4:1-9.

Cwinyi kud utur ka ng’atu moko uwok uwinji ngo wang’ ma kwong’a

Ng’atini copo winjo lemandha i ng’ei ma peko moko uwok i kwo pare

 Ka dhanu ukwero niwinjo lembanyong’a ma waberweyo igi, wakepim ninyang’ nia pirang’o gikwero. Saa moko nyo gitie ku nen ma rac iwi Biblia kunoke iwi Jukristu, pilembe nyo gineno jumoko ma wacu ya gi Jukristu gibetimo lembe ma reco. Jumoko nyo uwinjo lembe dupa mi vupo iwi ponji mwa. Jumange ke nyo gibelworo nia juwagi copo nywarugi ka gibeweco kudwa.

Saa moko nyo ju ma warombo kugi i lembanyong’a, gikadhu kud i peko ma dongo m’uweko litho i adundegi. Nyamego Kim ma tie misioner uyero nia, dhanu ma dupa mi kabedo m’erweyo i ie giboth kud i lwiny, man piny migi ma pol unyothere. Gimbe ku genogen mandha pi nindo m’ubino. Gitie ku ng’ecwiny man gigeno ngo ng’atu moko ci. Wang’ ma pol, ka Jumulembe pa Yehova giberweyo lembanyong’a, gicerogi. Nindo moko, gifwodo Kim kinde m’eberweyo.

Lembang’o ma konyo Kim kara emedere ninyutho kisa ni dhanu kadok kinde ma jubetime rac? Ebed epoi i kum Lembrieko 19:11, m’uwacu kumae: “[Rieko] mi dhanu kwio wi ng’ecwiny pare.” Kan eparu pi lembe ma dhanu mi teritwar pare gikadhu kud i ie, eno ketho kisa nege i kumgi. Re eyero nia i teritwar ma rom eno, jumoko tie ma winje ma ber. Etie bende ku dhanu moko m’ebed eliewo.

Wacopo penjara kumae: ‘Ka nwang’u ang’eyo ngo lemandha, nwang’u acopo jolo Jumulembe pa Yehova nenedi ka gibino rweyo ira lembanyong’a?’ Ka nwang’u alar awinjo vupo dupa i wigi ke? Saa moko nyo nwang’u wan de wabecikwero, man nwang’u ubecikwayu nia jubed ku kisa i kumwa. Yesu uyero nia gin ma tek wamito jutim iwa, wan de watim ni dhanu mange kumeca. Pieno, wacikara nitimo kero ninyang’ i kite ma jumange giwinjiri ko, man ninyutho igi cirocir kadok etie tek de.​—Mat. 7:12.

LUB LAPOR MI KISA PA PAULO

Kisa ubed unego jakwenda Paulo i kum dhanu, kadok gibed ginyayu ragedo i kume pilembe eberweyo lembanyong’a. Pirang’o? Pilembe ebed epoi i kum kite m’elar ebino ko con. Ekoro kumae: “Naka an a jayer lembacidi, man jaragedo, man jarop bende: ento anwang’u kisa, kum atime cobo ma yioyic umbe.” (1 Tim. 1:13) Paulo ung’eyo nia Yehova giku Yesu gineno kisa i kume. Pieno, ka dhanu ubecere nirweyo lembanyong’a, epoi nia en de elar ebino ve gin.

Saa moko, Paulo ubed unwang’u dhanu ma ponji mi vupo unyang’ lee i wigi. Lembuno ubed uketho ewinjere nenedi? Tic mi Jukwenda 17:16 ukoro nia, kinde m’ebino  i Athene, ng’ecwiny umake saa ‘m’eneno adhurane dhir kud ayi m’acwia.’ Ento etio ku lembe m’unyayu ng’ecwiny i ie, pi niponjo dhanu. (Tic. 17:22, 23) Ebed eloko bodho mi rweyo lembanyong’a nimakere ku kwond dhanu m’enwang’u, ‘kara ku yo moko ebodh dhanu moko.’​—1 Kor. 9:20-23.

Wan de ka dhanu ubewinjowa ngo i lembanyong’a, kunoke warombo ku ju ma ponji mi vupo unyang’ lee i wigi, waromo timo ve Paulo. Wacopo tio ku lembe ma wang’eyo i wigi kara wakonygi ging’ei “rwonglembe ma ber mi gin ma ber.” (Isa. 52:7) Nyamego moko ma nyinge Dorothy uwacu kumae: “I teritwar mwa, juponjo ni dhanu ma dupa nia Mungu kwiny man epoko lembe vur vur. Kan anwang’u dhanu ma kumeno, afoyogi pi yioyic ma tek ma gitie ko iwi Mungu, man atelo nen migi iwi lembe ma Biblia ukoro iwi mer pa Yehova, man iwi lembang’ola ma beco m’etimo pi nindo m’ubino.”

‘SAG TIC MA RAC KU BERO’

Calu ma wabedhingo ajiki mi ng’om maeni, wang’ei nia dhanu moko “gibisagri asaga” nitimo lembe ma rac. (2 Tim. 3:1, 13) Ento wacikara ngo niweko kite ma gibejolo ko lemandha ucerwa nineno kisa i kumgi, kunoke udar anyong’a mwa. Yehova copo mio iwa kero kara wamedara nivoyo “tic ma rac ku bero.” (Rum. 12:21) Nyamego Jessica ma tie jayab yo ukoro nia, wang’ ma pol ebed enwang’u dhanu ma weg doro, man ma cayuwa ku ponji mwa zoo. Emedo kumae: “Lembuno copo ton i ijo. I ng’ei ma ng’atini udwoko ira wang’ wec, akwayu Yehova nyaling’ ling’ nia ekonya anen ng’atune calu ma en de enene ko.” Eno konyo Jessica nineno kite m’ecopo konyo ko dhanu, kakare niketho wie i kum cac migi.

Wamedara nisayu dhanu ma gimito ging’ei lemandha

Yo yo, dhanu moko biyio nia wakonygi man gibiponjo lemandha

Ukwayu bende waketh cwiny umego ku nyimego kinde ma waberweyo kugi. Jessica uyero nia ka ng’atu m’eberweyo kude ukoro ire nia juwinje ngo i lembanyong’a, emito ngo giwec akeca iwi lembuca. Ento ekoro ire lembe ma beco, calu ve matoke ma cuu m’enwang’u i lembanyong’a, kadok jumoko giwinje ngo de.

Yehova ung’eyo cuu dit nia saa moko ebedo iwa tek nirweyo. Re anyong’a nege lee dit tek wabelubo lapor mi kisa pare! (Lk. 6:36) I andha, kisa binego Yehova nja ngo i kum dhanu mi ng’om maeni, man ebiciro ngo igi lembe nja. Ma jiji mbe, eng’eyo nindo ma tap m’ebikelo i ie ajiki. Ento pi kawoni, ukwayu watim tic mi lembanyong’a m’umbe galu. (2 Tim. 4:2) Dong’ wek wamedara nirweyo kud amora man wanyuth kisa mandha ni “dhanu ceke.”