Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 THIWIWEC MIR 13

Kethiri kaka jumange i tic mi lembanyong’a

Kethiri kaka jumange i tic mi lembanyong’a

“E ngisi nege i kumgi . . . man emaku ponjogi ku gin dupa.”​—MK. 6:34.

WER 70 Wayeny dhanu ma giromo

LEMBE MA NWANG’ERE I IE *

1. I kind copo ma Yesu utie ko, ma kani ma benyayu mutoro i iwa nisagu? Kemii lapor.

I KIND copo ma tung’ tung’ ma Yesu utie ko, acel ma nyayu mutoro lee akeca i iwa utie copo pare m’enyang’ ko i peko ma wabeii ko pikum waleng’ ungo. Kinde m’ebino iwi ng’om, ‘anyong’a ubed unege ku ju ma anyong’a negogi,’ man ebed ‘eywak ku ju m’uywak.’ (Rum. 12:15) Ku lapor, nindo moko kinde ma julubne 70 giai i tic mi rweyo lembanyong’a man gidwogo ma gitie ku mutoro pilembe tije uwotho ma ber, ‘anyong’a nego Yesu i tipo maleng’.’ (Lk 10:17-21) Nindo mange lundo kinde ma Lazaru utho, Yesu uneno kite ma jurimbe gibino wage ko; e en bende “ecur kud i ie cwinye de pido.”​—Yoh. 11:33.

2. Lembang’o m’ugam ukonyo Yesu nikethere kaka dhanu mange?

2 Kadok nwang’u Yesu ubino mbe ku dubo alaga de, re ebed ekethere kaka dhanu ma leng’ ungo. Dong’ ang’o m’ugam ukonye? Gin ma pire tek m’ukonyo Yesu utie mer m’emaru ko dhanu. Calu ma waneno i thiwiwec m’ukadhu, anyong’a ubed unege nisagu i kum “wot dhanu.” (Rie. 8:31) Mer maeno uketho etimo kero ning’eyo cuu mandha kite ma dhanu paru ko lembe. Jakwenda Yohana uwacu nia Yesu ‘ng’eyo lembe ma nuti i dhanu.’ (Yoh. 2:25) Yesu ubed uneno kisa i kum dhanu, man gin de gibed ginwang’u nia andha emarugi; pieno gibino ayika niwinjo rwonglembe mi Ker m’eyero igi. Wan bende ka saa ceke wabeii nikethara kaka jumange, wabituc nikonyogi cuu mandha i tic mi lembanyong’a.​—2 Tim. 4:5.

3-4. (a) Ka wabed wakethara kaka jumange wabineno tic mwa mi lembanyong’a nenedi? (b) I thiwiwec maeni wabiweco iwi lembang’o?

3 Jakwenda Paulo ugam ung’eyo nia ecikere nirweyo lembanyong’a, man wan de wang’eyo nia wacikara nirweyo lembanyong’a. (1 Kor. 9:16) Re ka wabed wakethara kaka jumange, wabineno ngo rweyo lembanyong’a kende kende ni tic ma wacikara nitimo, ento wabirweyo pilembe wabedieng’ pi dhanu.  Wang’eyo nia “mio en e mugisa ma sagu gamu.” (Tic. 20:35) Ka waberweyo lembanyong’a pilembe wabemito wakony dhanu, wabinwang’u mutoro lee i tije.

4 I thiwiwec maeni, wabiweco iwi kite ma waromo kethara ko kaka jumange i lembanyong’a. Mi kwong’o, wabineno nia kite ma Yesu ubed ukethere ko kaka jumange ubemio iwa ponji ma kani; i ng’eye, wabineno lembe ang’wen ma wacopo timo pi nilubo lapor pare.​—1 Pet. 2:21.

YESU UBED UKETHERE KAKA JUMANGE I LEMBANYONG’A

Yesu ubed ukethere kaka jumange, eno ubed ucwale nitielo cwinygi (Nen udukuwec mir 5-6)

5-6. (a) Yesu ugam ukethere kaka jukani? (b) Calu ma Isaya 61:1, 2 uyero, pirang’o ngisi ubed unego Yesu i kum dhanu m’eberweyo igi?

5 Wakenen lapor moko m’unyutho kite ma Yesu ugam ukethere ko kaka jumange. Nindo moko Yesu ku julubne girweyo lembanyong’a duu, man ginwang’u de ngo saa mi yom. Gibino mbe ku saa “kadok ma gicam ie cam.” Pieno, Yesu uting’o julubne man ecidho kugi “i ka ma ngele kakendgi” kara ‘giyom tundu.’ Ento udul dhanu giringo man gilar gitundo ni Yesu ku julubne kaka ma gibecidho i ie. Kinde ma Yesu utundo kuca man eneno udul dhanu etimang’o? Biblia uyero nia, “ngisi * nege i kumgi, kum gibedo calu rombe ma jakwac migi mbe: man emaku ponjogi ku gin dupa.”​—Mk. 6:30-34.

6 Pirang’o ngisi ubed unego Yesu i kum dhanu? Neno dhanu nia “gibedo calu rombe ma jakwac migi mbe.” Ecicopere nia Yesu ubed uneno jumoko m’i kindgi gibetimo tic ku kero pi nipong’o yeny mi juruot migi. Jumange ke nyo gibino ku can lee i cwinygi pilembe wedi migi utho. Ka tie kumeno, ubenen nia Yesu unyang’ i peko migi. Calu ma waneno i thiwiwec m’ukadhu, copere nia Yesu en gire de enwang’ere ku kit peko moko ma dhanu gibino nwang’iri ko. Ebed edieng’ lee pi jumange, eno ubed ucwale nijuko cwinygi.​—Som Isaya 61:1, 2.

7. Wacopo lubo lapor pa Yesu nenedi?

 7 Lapor pa Yesu ubemio iwa ponji ma kani? Calu Yesu, wan de wabekwo ku dhanu ma gitie ve “rombe ma jakwac migi mbe.” Gibeii ku peko ma tung’ tung’, ento wan watie ku gin ma copo pong’o yeny migi, niwacu rwonglembe mi Ker. (Nyu. 14:6) Pieno, calu Rwoth mwa, wacikara nirweyo igi lembanyong’a pilembe watie ku ‘ngisi i kum dhanu ma adhura (niwacu dhanu ma jucayu), ku jacanpiny.’ (Zab. 72:13) M’umbe jiji, ka ngisi ubenegowa i kum dhanu, wabitimo lembe moko kokoro pi nikonyogi.

WACOPO KETHARA KAKA JUMANGE NENEDI?

Par pi yeny pa ng’atuman (Nen udukuwec mir 8-9)

8. Yo mi kwong’o ma copo konyowa nikethara kaka jumange i lembanyong’a utie ma kani? Kemii lapor moko.

8 Lembang’o ma copo konyowa kara wabed wakethara kaka ju ma warweyo igi lembanyong’a? Ubekwayu walar wapar pi gin m’ubedieng’o cwiny dhanu ma waberweyo igi, man watim igi lembe i kite ma wan de wacopo maru jutim iwa. * (Mat. 7:12) Wakenen lembe ang’wen ma wacopo timo pi ninyutho nia wabekethara kaka jumange. Mi kwong’o, par pi yeny pa ng’atuman. Wacopo poro lembe ma watimo saa ma waberweyo lembanyong’a ku lembe ma munganga timo ni jurutwoyo. Munganga mandha paru pi yeny pa jaratwoyoman. Epenjo jaratwoyo ku penji dupa, man ewinje kilili kinde m’ebekoro ire pi twoyo pare. Kakare nikiewo ire yath nyapio pio, etimo ekzame pa jaratwoyone pi ning’eyo nia ebetwoyo ang’o i andha; eno ketho ekiewo ire tap yath ma copo thiedho twoyone. Kumeno bende, i tic mi rweyo lembanyong’a, wacikara ngo nitio ku bodho ma rom pi nicaku wec ku dhanu ceke. Ento ukwayu watim kero ninyang’ cuu i lembe ma ng’atuman ubekadhu kud i ie, man ninyang’ i paru pare.

9. Wacikara ngo niparu lembang’o? Kekor.

9 Kan irombo ku ng’atu moko i lembanyong’a, kud ipar nia dong’ ing’eyo kwo pare, ing’eyo yioyic pare man thelembe m’uketho etie ku yioyicne. (Rie. 18:13) Ento penje ku penji mi rieko pi ning’eyo paru pare man yioyic pare. (Rie. 20:5) Kan etie lembe ma rac ungo i beng’wu, penje ekor iri pi tic pare, juruot pare, lembe m’ekadhu kud i ie, man nen pare. Ka wabepenjo dhanu ku penji mi rieko, eno biketho gibikoro iwa lembe ma bikonyowa ninyang’ nia gitie ku yeny mi lembanyong’a. Ka wang’eyo lembe maeno, wabikethara kakagi man wabikonyogi tap tap nimakere ku yeny migi calu ma Yesu ubed utimo.​—Nen 1 Jukorinto 9:19-23.

Kepim niparu pi kit peko ma ng’atu m’iberweyo ire ubenwang’ere ko (Nen udukuwec mir 10-11)

10-11. Nimakere ku 2 Jukorinto 4:7, 8, yo mir ario ma copo konyowa nikethara kaka jumange i lembanyong’a utie ma kani? Kemii lapor moko.

10 Mir ario, kepim niparu pi kit peko ma dhanu gibenwang’iri ko. Wacopo nyang’  i peko mi dhanu i kadiri moko. Calu ma wan de waleng’ ungo, wabed wanwang’ara bende ku kit peko ma gibekadhu kud i ie. (1 Kor. 10:13) Wang’eyo nia nikwo i ng’om maeni utie lembe ma yot ungo. Wacire ndhu ku kony pa Yehova. (Som 2 Jukorinto 4:7, 8.) Re kepar lundo pi dhanu ma gimbe ku winjiri ma ceng’ini ku Yehova. M’umbe jiji, ecopo bedo igi lembe ma yot ungo ninyego ku kwo i ng’om maeni m’umbe kony pa Yehova. Calu Yesu, ka ngisi ubenegowa i kum dhanu, eno bicwaluwa niyero igi “rwonglembe ma ber mi gin ma ber.”​—Isa. 52:7.

11 Wakenen lapor p’umego moko ma nyinge Sergey. I wang’ niponjo lemandha, Sergey ubino ng’atu ma lwor man ma weco ngo akeca. Ebino ire lembe ma yot ungo niweco i bang’ dhanu mange. Re egam ecaku niponjo Biblia. Sergey ukoro kumae: “Saa m’abeponjo Biblia, anyang’ nia Jukristu ceke gicikiri ninyutho pi yioyic migi ni jumange. Ento an abino paru nia abitimo ngo lembuno nyanok de.” Re Sergey ucaku paru pi dhanu ma fodi giwinjo ngo lemandha, man enyang’ nia calu ma ging’eyo ngo Yehova, kwo migi copo bedo yot ungo. Ewacu kumae: “Lemandha m’abino ponjo umio ira mutoro ma lee man uroyo kwiocwiny i adundena. Agam anwang’u nia dhanu mange de gitie ku yeny mi winjo lemandha maeno.” Kinde ma Sergey ubemedere niparu pi yeny mi dhanu, egam enwang’u amora mi rweyo lembanyong’a. Ekoro kumae: “Saa m’acaku koro lembe mi Biblia ni dhanu, cwinya doko tek; lembene uzungo ia lee dit. Bende, yioyic para ugam udoko tek kinde m’abemedara ninyutho lembe ma jubeponja ko ni jumange.” *

Ni dhanu moko ebed eting’o nindo kara gitim mediri i thenge mi tipo (Nen udukuwec mir 12-13)

12-13. Pirang’o wacikara ninyutho cirocir ni dhanu ma waberweyo igi? Kemii lapor moko.

12 Mir adek, nyuth cirocir ni dhanu m’iberweyo igi. Ng’ei nia saa moko nyo fodi giparu ngo apara de pi lemandha moko mi Biblia ma in ke dong’ idaru ng’eyo cuu dit. Bende, jumoko gimaru ponji ma ginwang’u i dini migi lee mandha. Gineno dini migi ni gin ma pire tek m’udiko kindgi ku juruot  migi, ku dhanu mi kabedo ma gikwo i ie, man nia dinine uweko gitie agonya nitimo lembe ma suru migi uyio. Dong’ wacopo konyogi nenedi?

13 Kepar lembe ma e: Ka kilalu moko utii man ubekwayu nia juwile, jubed jutimang’o? Wang’ ma pol, jucaku giero ma nyen nang’u fodi asu jubewotho kadhu kud iwi ma con. Tek ma nyen uthum ka jurwombo m’utii. Kumeno bende, i wang’ nikwayu nia ng’atini uwek ponji “m’utii” m’umondo akeca i wie, ubekwayu mi kwong’o walar wakonye eng’ei lemandha “ma nyen,” niwacu ponji mi Biblia ma nwang’u eng’eyo ngo i saa m’ecaku ponjo Biblia acaka. I saa maeno re m’ecopo bedo ayika niweko ponji mi ndra m’elar eyio. Re kara ng’atini utim alokaloka maeno, etie lembe mi bang’ acel ungo.​—Rum. 12:2.

14-15. Wacopo konyo dhanu ma ging’eyo ngo lembe akeca iwi kwo mi Paradiso nenedi? Kemii lapor.

14 Ka wabenyutho cirocir ni dhanu ma waberweyo igi, wabisayu ngo nia giyii lemandha ceke ma wabeponjo igi de ndhundhu nica. Ento wabitimo kero nikethara kakagi, man wabikonyogi nok nok kara ginyang’ i ponji mi Biblia. Keketh nia ibemito konyo ng’atu moko kara enyang’ nia kwo ma rondo ku rondo bibedo i Paradiso iwi ng’om. Dhanu ma dupa ging’eyo ngo lembe akeca iwi genogen mwa mi kwo i Paradiso. Saa moko nyo giyio nia ju m’utho gibicer ungo. Kunoke nyo giparu nia dhanu m’atira ceke gibicidh’i polo. Dong’ waromo konyo dhanu ma kumeno nenedi?

15 Umego moko ukoro kite m’ebed ekonyo ko dhanu kara ginyang’ nia kwo ma rondo ku rondo bibedo i Paradiso iwi ng’om. Mi kwong’o, esomo Thangambere 1:28. I ng’eye epenjo jawinj pare nia Mungu ugam umito nia dhanu gikwo kani, man kit kwo migi ubed nenedi. Ju ma dupa dwoko nia, “egam emito gikwo ku mutoro iwi ng’om.” Umego maeno dok somo Isaya 55:11 man epenjo jawinj pare ka nyo lembakeca pa Mungu ulokere. Wang’ ma pol juwinj pare gidwoko nia ungo. Tokcen ne, esomo Zaburi 37:10, 11 man epenjo jawinj nia kwo pa dhanu bibedo nenedi i nindo m’ubino. Bodho maeno uketho ekonyo dhanu ma dupa ninyang’ nia asu yeny pa Mungu utie nia dhanu m’atira gikwo rondo ku rondo i Paradiso iwi ng’om.

Bero ma kabang’e mbe ma watimo ni ng’atini, calu ve nioro ire barua romo bedo kud adwogi ma ber (Nen udukuwec mir 16-17)

16-17. Nimakere ku Lembrieko 3:27, wacopo kethara kaka jumange i ayi moko ma kani? Kemii lapor.

16 Mir ang’wen, sai kite m’icopo nyutho ko nia ibedieng’ pi dhanu. Ku lapor, saa moko nyo itundo i bang’ ng’atini i saa ma cuu ngo ire. Ka kumeno iromo kwayu kisa man icopo nyutho ire nia ibidok i bang’e ma cen. Dong’ icopo timang’o kan iwok inwang’u ng’atini utie ku nyathi tic moko m’ubekwayu jukonye ko? Kunoke iromo timang’o tek ng’atu m’icidho liewo utie ku yeny mi kony moko pilembe remo kunoke tio udwoke jakaracelo? I saa maeno,  ubekwayu watim lembe moko pi nikonye.​—Som Lembrieko 3:27.

17 Nyamego moko ugam unwang’u adwogi ma ber mandha i ng’ei m’etimo bero ma kabang’e mbe ni juruot moko. Saa ma nyathin migi utho, nyamego maeno ukethere kakagi, pieno ekiewo igi barua. I baruane, ekiewo bende verse moko ma copo tielo cwinygi. Barua maeno ubedo kud adwogi ma nenedi iwi juruotne? Min avu ukoro ku can i cwinye kumae: “Nyaworo, cwinya ng’abere mi tuko ngo. Re barua peri ukonyowa lee mandha. Abefoyi pi baruane pilembe ejuko cwinywa magwei. Nyaworo kende ci asome ma kadhu wang’ 20. Ing’eyo ngo kite ma barua peri utielo ko cwinywa. Wafoyi ku cwinywa ceke.” M’umbe jiji, wacopo nwang’u adwogi ma cuu ka wabekethara kaka ju ma gibekadhu kud i peko moko, man ka wabetimo lembe moko pi nikonyogi.

RWEI LEMBANYONG’A I KADIRI M’ICOPO

18. 1 Jukorinto 3:6, 7 unyutho lembang’o iwi tic mi lembanyong’a, man ning’eyo lembene tie iwa ku kony ma kani?

18 I andha, ubekwayu wang’ei kadiri mi gin ma Yehova ubemito watim i tic mi rweyo lembanyong’a. Wabedikara i tic mi konyo dhanu kara ging’ei Mungu, re wang’ei nia theng tije ma lee wabetimo wan ungo. (Som 1 Jukorinto 3:6, 7.) Yehova re ma telo dhanu i bang’e. (Yoh. 6:44) Bende, adunde pa ng’atini en gire re ma bicwale niyio kunoke nikwero lembanyong’a. (Mat. 13:4-8) Poi nia Yesu de dhanu ma dupa gigam giwinjo ngo lembe m’erweyo igi, ma nwang’u ke i andha ebino Japonji ma dit m’usagu zoo! Pieno, cwinywa kud utur ka dhanu ma pol ma waberweyo igi ubewinjowa ngo.

19. Wabinwang’u adwogi ma kani tek wabekethara kaka jumange i lembanyong’a?

19 Tek wabekethara kaka jumange i tic mi rweyo lembanyong’a, wabinwang’u adwogi ma tung’ tung’. Wabimaru tic mwa mi lembanyong’a nisagu, wabinwang’u mutoro lee mandha i tije, man wabikonyo “dhanu m’adundegi bedo ayika pi kwo ma rondo ku rondo” niyio lemandha yot yot. (Tic. 13:48) Pieno, “ka fodi kakare nuti iwa, dong’ watim ber ni dhanu ceke.” (Gal. 6:10) Ka watimo kumeno, wabimio yung ni Wegwa mi polo.​—Mat. 5:16.

WER 64 Watimu tic mi kayu cam ku mutoro

^ par. 5 Ka wabekethara kaka jumange i tic mi rweyo lembanyong’a, wabinwang’u mutoro lee, man eno biketho gibibedo ayika niwinjo rwonglembe ma wabetwong’o igi. Pirang’o wabeyero kumeno? I thiwiwec maeni, wabinwang’u ponji niai kud i lapor pa Yesu, man wabineno lembe ang’wen ma waromo timo pi ninyutho nia wabekethara kaka ju ma waberweyo igi.

^ par. 5 KORO I WEC: Wec ma nia ngisi nyutho can ma lee ma ng’atini nwang’u i adundene pi ng’atu m’ubesendere kunoke ma jubesendo mananu. Ka watie ku ngisi, eno bicwaluwa nitimo lembe moko ci ma wacopo pi nikonyo dhanu.

^ par. 8 Nen thiwiwec m’uyero, Applique la Règle d’or dans ton ministèrei Otkur ma Wiw mi nindo 15, dwi mir 5, 2014.

^ par. 11 Nen Otkur ma Wiw mi nindo 1, dwi mir  8, 2011, mba. 21-22.