Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

Jukristu gicikiri nilimo batizo

Jukristu gicikiri nilimo batizo

‘M’ubodho wun kawono . . . en e babutisi.’​—1 PET. 3:21.

WER: 5241

1, 2. (a) Junyodo moko gipenjiri ku penji ma kani ka nyathin migi ubemito elim batizo? (b) Pirang’o jubed jupenjo ju m’ubecilimo nia nyo gidaru thiero kwo migi ni Yehova? (Nen cal mir acaki.)

JUNYODO pa Maria gibeneno nyathin migi ma Maria ucungo i kind dhanu m’ubecilimo batizo. Jakorlembe upenjo penji ario, man Maria udwoko ku dwal m’acanya. I ng’eye, elimo batizo.

2 Anyong’a nego junyodo pa Maria lee dit, pilembe nyathi nyaku migi uthiero kwo pare ni Yehova man elimo batizo. Re i wang’e, cwiny min ubedu pido nyanok. Ebed epenjere kumae: ‘Nyo Maria copo limo andha ma ke fodi etie nyathin e? Nyo enyang’ de nia nithiero kwo pare ni Yehova tie lembe m’ukwayu ngo enen ku tuko? Nyo ubekwayu ekekur nindo ukadh lee kan elim batizo?’ Junyodo ma dupa ma jumer gipenjiri ku kit penji ma kumeno ka nyathin migi ma co kunoke ma nyaku uyero nia ebemito elim batizo. (Ekl. 5:5) Re wang’eyo nia yub ma pire tek nisagu zoo ma ng’atuman copo maku, utie  nithiero kwo pare ni Yehova man nilimo batizo.​—Nen sanduku, “ Nyo idaru thiero kwo peri ni Yehova?

3, 4. (a) Jakwenda Petro utio ku lembang’o pi niponjowa nia batizo tie gin ma pire tek magwei? (b) Pirang’o Petro uporo batizo kud avur ma Noa ugiero?

3 Jakwenda Petro uporo batizo kud avur ma Noa ugiero. Ewacu kumae: ‘M’ubodho wun kawono calku [maeno] en e babutisi.’ (Som 1 Petro 3:20, 21.) Dhanu m’uneno avur ginyang’ kamaleng’ nia Noa uwodhere kud adundene ceke pi nitimo yeny pa Mungu. Ku bedopwe, etimo tic ma Yehova umio i kore. Nikum yioyic pa Noa, Yehova ubodho juruot pare ku en bende, i saa ma pii ma dit uumo ng’om. Petro umito ponjo iwa lembang’o?

4 Kinde ma dhanu gineno avur, ginyang’ nia Noa ubino ku yioyic i Mungu. Ka ng’atu moko ubelimo batizo, dhanu ma gibenene ging’eyo nia etie ku yioyic i cer pa Kristu, pieno re m’ethiero kwo pare ni Mungu. Calu Noa, dhanu m’udaru limo batizo giworo dwand Mungu, man gitimo tic m’emio i korgi. M’umedo maeno, tap calu ma Yehova ubodho Noa saa ma pii ma dit uumo ng’om, ebibodho bende jurutic pare ma gilimo batizo man ma gigwoko bedoleng’ migi ire, kinde m’ebinyotho ng’om maeni ma rac. (Mk. 13:10; Nyu. 7:9, 10) Pieno, pire tie tek magwei nia wathier kwo mwa ni Yehova, man walim batizo. I andha, ka ng’atini ubegalu ku limo batizo, ecopo bayu kaka mi nwang’u kwo ma rondo ku rondo.

5. I thiwiwec maeni, wabiponjo lembang’o?

5 Kawoni ma dong’ wang’eyo nia batizo utie gin mi tuku ngo, wakedwok wang’ penji adek ma e: Biblia uyero ang’o iwi batizo? I wang’ limo batizo ukwayu nilar timo ang’o? Kinde ma wabeponjo Biblia kud awiya mwa kunoke ku jumange, pirang’o  wiwa ucikere ngo niwil saa ceke nia batizo utie lembe ma pire tek?

BIBLIA UPONJO LEMBANG’O IWI BATIZO?

6, 7. (a) Batizo pa Yohana ubino ku thelembe ma kani? (b) Batizo pa ng’a m’ubino tung’ ku mange ceke, man pirang’o?

6 Biblia uyero nia ng’atu ma kwong’a m’umio batizo ni jumange ubino Yohana ma Jababutisi. (Mat. 3:1-6) Pirang’o dhanu ubed ubin ulimo batizo i bang’ Yohana? Gibed gibino i bang’e pi ninyutho nia gidaru yewo dubo migi, niwacu giyio nia andha gituro Cik pa Musa, man can ubenegogi lee pi lembene. Re batizo ma pire tek akeca ma Yohana umio, ubino ngo batizo mi lokocwiny. Yohana ubino ku rwom ma dit, mi mio batizo ni Yesu ma tie Wod Mungu m’umbe ku dubo. (Mat. 3:13-17) Yesu utimo ngo dubo nyanok de, pieno ebino mbe ku yeny mi lokocwinye. (1 Pet. 2:22) Dong’ pirang’o Yesu ulimo batizo? Elimo pi ninyutho nia etie ayika nitimo yeny pa Mungu i kwo pare zoo.​—Ebr. 10:7.

7 I ng’ei ma Yesu ucaku tic mi rweyo lembanyong’a, julubne gicaku mio batizo ni dhanu. (Yoh. 3:22; 4:1, 2) Dhanu m’ubino i bang’gi pi nilimo batizo de, giyewo dubo migi pi Cik pa Musa ma gituro. Re i ng’ei ma Yesu utho man ecer, dhanu ceke ma gibemito gibed julubne gicikiri nilimo batizo pi thelembe moko ma segi.

8. (a) Yesu umio ng’ol ma kani i ng’ei cer pare? (b) Pirang’o ubekwayu nia Jukristu gilim batizo?

8 I oro 33, nyanok i ng’ei cer pa Yesu, eweco i bang’ dhanu 500 ma co, ma mon man ve nia awiya de bino nuti. Ecicopere nia i saa maeca re m’eng’olo kumae: ‘Ka kumeno wucidhi, wuketh [dhanu m’i kind] thek ceke dok julub, wumi igi babutisi ku nying Wego ku Wod man tipo maleng’: wuponjgi ya giwor gin ceke m’ang’olo iwu.’ (Mat. 28:19, 20; 1 Kor. 15:6) Yesu ung’olo ni julubne nia giketh dhanu udok julub. Ng’atu moko ci m’ubemito elub toke, kunoke m’umito eting’ “mberembere” pare ucikere nilimo batizo. (Mat. 11:29, 30) Kara ng’atini utim ni Mungu i ayi ma foyo ie, ecikere niyio nia Mungu betio ku Yesu pi nitimo yeny pare. Kan i ng’eye, ecopo limo batizo, man Mungu romo jole. Biblia ukoro lembe dupa m’unyutho nia, julub ma kwong’a pa Yesu ginyang’ nia pire bino tek lee dit nilimo batizo. Gibed giparu ngo nia ukwayu gikekur nindo ukadh lee, ka gilim batizo.​—Tic. 2:41; 9:18; 16:14, 15, 32, 33.

KUD IGAL KU LIMO BATIZO

9, 10. Batizo pa Jaethiopia ku pa Saul ubemio iwa ponji ma kani?

9 Som Tic mi Jukwenda 8:35, 36. Jaethiopia moko m’ujolo yioyic mi Juyahudi uai utimo thier i hekalu i Yerusalem, man eloko ebedok i pacu. Malaika pa Yehova ugam uoro Filipo ucidh urwei ire, e Filipo uwok uponje ku lembanyong’a ‘iwi Yesu.’ Jaethiopia maeno utimo ang’o? Enyang’ nia kara ugam ukwayere nia eyii Yesu calu Rwoth, pieno emito nitimo lembe ma Yehova ubekwayu i bang’ Jukristu. E ndhundhu, elimo batizo m’umbe galu.

10 Lapor mange utie pa Jayahudi ma nyinge bino Saul. Thek mi Juyahudi ubino thek pa Mungu, ento Yehova ukwero Juyahudi, pilembe giwore ngo. Re Saul ubino geno nia fodi asu Juyahudi gibetimo ni Mungu i ayi m’atira, pieno ebed enyayu ragedo i kum Jukristu. Nindo moko, i ng’ei ma Yesu udaru cer, egam eweco i bang’ Saul niai kud i polo, ma ke Saul ubino paru nia etho. Saul utimo  ang’o? Eyio kud anyong’a, kony m’uai i bang’ jalub ma Jakristu ma nyinge Anania. Biblia uyero nia, ‘eai malu emaku babutisi.’ (Tic. 9:17, 18; Gal. 1:14) I ng’eye edok eng’eyere ku nying’ ma Paulo. Ubenen kamaleng’ nia saa ma Paulo unyang’ nia Mungu utio ku Yesu pi nitimo yeny pare, e ndhundhu elimo batizo m’umbe galu.​—Som Tic mi Jukwenda 22:12-16.

11. (a) Tin eni ang’o ma becwalu ju m’ubeponjo Biblia nilimo batizo? (b) Ka ng’atu moko ulimo batizo wawinjara nenedi?

11 Tin bende, juponj Biblia m’aradu ku ma judongo ceke gitimo lembe ma rom. Calu ma gimaru lembe mi Biblia man giyio lembene, eno ketho gibedo kud ava mi thiero kwo migi ni Yehova man mi limo batizo. I coko mwa ma dongo, saa mi korolembe mi batizo bebedo saa ma segi. Jumulembe pa Yehova gibedo ku mutoro, ka ju ma giponjo Biblia gijolo lemandha man gimaku yub mi limo batizo. Junyodo de bedo ku mutoro ma lee dit kan awiya migi ung’io nitimo kumeno. I kind oro mi tic 2017, dhanu ma kadhu 284 000 gilimo batizo pi ninyutho nia githiero kwo migi ni Yehova. (Tic. 13:48) Andha, ginyang’ kamaleng’ nia Jukristu gicikiri nilimo batizo. Re juponj Biblia gicikiri nilar timo lembang’o i wang’ limo batizo?

12. Japonj Biblia ucikere mi kwong’o nitimo ang’o i wang’ limo batizo?

12 I wang’ limo batizo, japonj Biblia ucikere mi kwong’o niponjo lemandha iwi Mungu, iwi lembakeca pare pi dhanu man pi ng’om, man ecikere ning’eyo lembe ma Mungu utimo pi nilaru dhanu. (1 Tim. 2:3-6) Ecikere nibedo ku yioyic, pilembe eno re ma bikonye niworo cik pa Mungu man niweko timo ma reco m’edagu. (Tic. 3:19) Lembe maeno pire tek akeca, pilembe Yehova jolo ngo thieriri pa ng’atu m’ubemedere asu ku timo lembe m’edagu. (1 Kor. 6:9, 10) Re eno kende uromo ngo. Ng’atu m’ubemito nithiero kwo pare ni Yehova ucikere nicidho i coko ceke mi cokiri, man ecikere nirweyo, ku niponjo dhanu wang’ ma pol. Ng’atu moko ci m’ubemito elub tok Kristu ucikere nitimo kumeno. (Tic. 1:8) Japonj Biblia ucikere ma kwong’a nilar timo lembe maeno ceke. Kan i ng’eye, ecopo thiero kwo pare ni Yehova i rwo kaka m’etie i ie kende, man ecopo limo batizo.

KETH BATIZO UBED NI LEMBAKECA KAN IBEPONJO BIBLIA KU DHANU

Kinde m’ibeponjo ng’atini, nyo ibed iyenyo yo mi konye kara enyang’ nia batizo tie gin ma pire tek hai?(Nen udukuwec mir 13)

13. Kinde ma wabeponjo jumange, pirang’o ukwayu ngo wiwa uwil nia gicikiri nilimo batizo pi nibedo Jukristu mandha?

13 Kinde ma wabekonyo awiya mwa man jumange kara gitim lembe ma pigi tek ma jukwanu i udukuwec m’i wang’e, wiwa ucikere ngo niwil nia ju ma gibemito gibed julub pa Yesu gicikiri nilimo batizo. I ng’eye, wacopo ng’io saa moko ma ber, pi nikoro igi m’umbe lworo nia thieriri man batizo tie lembe ma pigi tek akeca. Wabemito awiya mwa man jumange ma wabeponjo kugi Biblia gitim mediri man gilim batizo.

14. Pirang’o wabed wadiyo ngo ng’atini nia elim batizo?

14 I andha, wacopo ngo nicego mac i kum nyathin kunoke i kum japonj Biblia man nidiye nia elim batizo. Yehova diyo ngo ng’atu moko adiya nia utim ire. (1 Yoh. 4:8) Pieno, kinde ma wabeponjo nyathin mwa kunoke ng’atu mange, wacikara nikonye enyang’ nia pire tek lee mandha ire nibedo ku mer ma segi ku Yehova. I ng’eye, kan etie kud anyong’a ma lee pi lemandha m’eng’eyo iwi Mungu, man kan ebemaru nia etim lembe  ceke ma Jukristu mandha gicikiri nitimo, ecopo maku yub mi limo batizo.​—2 Kor. 5:14, 15.

15, 16. (a) Kara ng’atini ulim batizo, nyo ecikere nibedo ku oro moko ma tap? Kekor (b) Pirang’o japonj Biblia ucikere nilimo batizo pi nidoko Jamulembe, kadok nwang’u elar elimo i dini mange de?

15 Ng’atini ucikere ngo nibedo ku oro moko ma tap pi nilimo batizo. Dhanu tie tung’ tung’, man juponj Biblia moko gitimo mediri pio pio nisagu jumange. Ju ma dupa gilimo batizo ma fodi githindho, man gigwoko bedopwe migi nitundo gidongo. Jumange ke giponjo Biblia man gilimo batizo nwang’u gidaru teng’ini. Jumoko gilimo nwang’u dong’ oro migi ukadhu 100 de!

16 Mego moko uponjo Biblia nwang’u dong’ elar elimo i dini ma tung’ tung’. Pieno, egam epenjo ng’atu ma gibeponjo kude Biblia nia nyo andha pire tie tek ire nilimo batizo kendo. Japonjo pare unyutho ire verse moko mi Biblia m’udwoko wang’ penji pare. Kinde ma mego maeno unyang’ i kum lembe ma Biblia ubekwayu, egam elimo batizo, ma ke nwang’u dong’ etie ku oro ma romo 80. Lapor maeno ubemio iwa ponji ma kani? Yehova bijolo batizo mwa, kende kende tek wang’eyo lemandha iwi yeny pare. Pieno, kadok walar walimo batizo i dini mange de, asu wacikara nilimo batizo pi nidoko Jumulembe pa Yehova.​—Som Tic mi Jukwenda 19:3-5.

17. Ng’atu m’ubecilimo ucikere niparu cuu iwi lembang’o i ceng’ mi batizo pare?

17 Nindo mi batizo utie nindo mir anyong’a ma lee dit ni ng’atu m’ubelimo. Etie bende saa m’ubekwayu epar i ie cuu mandha iwi lembe m’ecikere nitimo i ng’ei thieriri man batizo pare. Nibedo Jakristu mandha man nitimo lembe ceke ma Mungu ubekwayu utie tic ma tek. Julub pa Yesu gicikiri ngo ‘nikwo [pigi] gigi kendo, endre pire m’etho [pigi] man ecer kendo.’​—2 Kor. 5:15; Mat. 16:24.

18. I thiwiwec m’ulubo, wabing’io i penji ma kani?

18 Calu ma waai waponjo i thiwiwec maeni, nimaku yub mi doko Jakristu mandha utie lembe mi tuko ngo. Pi thelembe maeno re ma min Maria upenjere ku penji ma juweco pigi i acaki mi ponji maeni. Kan itie janyodo, saa moko nyo ibed ipenjiri kumae: ‘Nyo nyathin para uromo andha nilimo batizo? Nyo nyathin para ung’eyo Yehova cuu, m’ecopo thiero ko kwo pare ngi ire? Nyo nyathin para ucikere nilar somo lee man ninwang’u tic de ma cuu kan i ng’eye ecopo limo batizo? Dong’ kan abeparu nia nyathin para romo timo dubo ma lee i ng’ei batizo pare ke?’ Wabing’io i penji maeno i thiwiwec m’ulubo, man wabing’eyo lembe ma junyodo ma Jukristu giromo nitimo kara gibed ku paru m’atira iwi batizo.