Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

Penji mi jusom

Penji mi jusom

I ayi ma kani ma juting’o jakwenda Paulo “malu cil i polo mir adege” man ‘i paradiso’?​—2 Kor. 12:2-4.

I 2 Jukorinto 12:2, 3, jakwenda Paulo uweco pi ng’atu moko ma juting’o “malu cil i polo mir adege.” Ng’atu maeno bino ng’a? Saa ma Paulo ubekiewo barua ni cokiri mi Korinto, ewacu nia Mungu utio kude ni jakwenda. (2 Kor. 11:5, 23) I ng’eye, eweco pi ‘ginmawokiwang’ ku giranyutha pa Rwoth.’ Saa maeno Paulo uweco ngo pir umego mange. Pieno, ubenen nia ng’atu ma Paulo uwacu nia uneno ginmawokiwang’ man giranyutha utie en gire.​—2 Kor. 12:1, 5.

Andha, Paulo re m’ubino ng’atu ma juting’o “malu cil i polo mir adege” man ma ‘juting’o malu i paradiso.’ (2 Kor. 12:2-4) Wec m’eyero nia ‘giranyutha,’ uketho wanyang’ nia jubino nyutho ire gin ma bitimere nindo m’ubino.

“Polo mir adege” ma Paulo uneno utie ang’o?

I Biblia, “polo” copo nyutho polo ma wang’eyo eni. (Tha. 11:4; 27:28; Mat. 6:26) Ento “polo” copo nyutho bende gin mange. Saa moko enyutho bimobim mi dhanu. (Dan. 4:20-22) Bende, eromo nyutho bimobim pa Mungu, calu ve Ker pa Mungu.​—Nyu. 21:1.

Paulo uyero nia eneno “polo mir adege.” Emito yerang’o? I Biblia jubed judwogo iwi lembe moko wang’ adek pi niketho nwoc kunoke pi niketho peko iwi lembene. (Isa. 6:3; Eze. 21:27; Nyu. 4:8) Ubenen nia kinde ma Paulo uyero nia eneno “polo mir adege,” ebino weco iwi bimobim moko ma yawe mbe acel de, niwacu Ker pa Masiya ma Yesu Kristu re ma bibedo jabimne karacelo ku dhanu 144 000. Calu ma jakwenda Petro ukiewo, nimakere ku lembang’ola pa Mungu, wabekuro “polo ma nyen.”​—2 Pet. 3:13.

Dong’ “paradiso” ma Paulo uweco i wie tie ang’o?

“Paradiso” copo nyutho lembe ma tung’ tung’ ma e: (1) Nimakere ku kabedo ma Mungu ular uketho dhanu i ie, m’umbe jiji “paradiso” copo nyutho Paradiso mi kum ma bibedo iwi ng’om. (2) Paradiso mi tipo, niwacu kwiocwiny ma yawe mbe i thenge mi tipo, ma dhanu pa Mungu bikwo ko i ng’om ma nyen. (3) Bende, ecopo nyutho mugisa ma yawe mbe ma bibedo i polo, niwacu i ‘Paradiso pa Mungu.’ Nyu. 2:7.​—Nen Otkur ma Wiw, mi nindo 15, dwi mir 7, 2015, mba. 8. udu. 8.

Ecopere nia Paulo umulo kum lembe adek maeno zoo kinde m’ebino weco iwi ginmawokiwang’ m’eneno, ma nwang’ere i 2 Jukorinto 12:4.

I adundo:

“Polo mir adege” ma juweco pire i 2 Jukorinto 12:2 copo nyutho Ker pa Masiya ma Yesu Kristu bibedo jabimne karacelo ku dhanu 144 000, eno re ma tie “polo ma nyen.”​—2 Pet. 3:13.

Juyero nia etie “polo mir adege” pilembe etie kit bimobim m’usagu mange ceke.

“Paradiso” ma juting’o jakwenda Paulo nitundo cil i ie i ginmawokiwang’ copo nyutho, (1) Paradiso mi kum ma bibedo iwi ng’om, (2) paradiso mi tipo ma bibedo nuti saa maeca; ebibedo lee nisagu paradiso mi tipo ma kawoni, man (3) “paradiso pa Mungu,” i polo, ma bibedo nuti i saa ma rom ku m’i ng’om ma nyen.

Pieno, paradiso ma wabekuro bidiko polo ma nyen ku ng’om ma nyen zoo. Ebibedo lembe moko ma nyen, ma biketho i ie Ker mi polo, man dhanu ma gibitimo ni Yehova iwi ng’om m’udoko ni paradiso.