Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 138

Kristu ni yo ku cing’ Mungu ma yor acwic

Kristu ni yo ku cing’ Mungu ma yor acwic

TIC MI JUKWENDA 7:56

  • YESU UBEDO YO KU CING’ MUNGU MA YOR ACWIC

  • SAUL UDOKO JALUB

  • UKWAYU ANYONG’A UNEGWA

Nindo apar ing’ei dok pa Yesu i polo, tipo maleng’ uromo julub i ceng’ mi Pentekoste; eno unyutho andhandha nia dong’ Yesu ni polo. Ing’eye, lembe mange de udok unyutho nia andha etie i polo. Kinde ma jubecicanyu Stefano ku kidi pilembe ebemio lembatuca ma pwe, ewacu kumae: “Nen, aneno polo yabre, ku Wod dhanu m’ucungo acunga yo ku cing’ Mungu ma yor acwic.”​—Tic mi Jukwenda 7:56.

Saa ma Yesu gitie giku Won i polo, ugam ukwayere nia ekur nitundo jumii ire cik ma Giragora ular uyero pire. Mungu utelo wi Daudi ku tipo pare uketho ekiewo kumae: ‘Yehova wacu ni Rwoth para [Yesu] kumae, jany yo ku cinga ma yor acwic, [nitundo] aketh judegini ni kom mi the tiendi.’ Saa ma nindo m’ebekuro bithum, ebiworo lembe ma e: “Bim i kind judegi peri.” (Zaburi 110:1, 2) Dong’ Yesu bitimo ang’o i polo kinde m’ebekuro nindo m’ebinyotho ie judegine?

I Pentekoste mi oro 33 R.M., the cokiri mi Jukristu ucaku. Yesu ucaku telo wi julubne ma tipo wiro, niai kud i polo. (Jukolosai 1:13) Etelo wigi i tic mi rweyo lembanyong’a man etendogi pi tic ma gibitimo ing’eye. Tic ma nenedi? Ju ma gibigwoko bedoleng’ migi nitundo i tho gibicer man gibibimo karacelo ku Yesu i Ker.

Lapor acel ma ngbeng’ mi dhanu ma bibimo karacelo ku Yesu i nindo m’ubino utie Saul, m’ung’eyere maber ku nyinge ma Paulo ma tie nying’ mi Roma. Ebino Jayahudi m’unyutho amora pi Cik pa Mungu pi nindo dupa, ento judong dini mi Juyahudi gibed giroye i kosa, uketho ecwaku bende nia jucany Stefano. Ing’eye, Kayafa ma jalam madit umio ire ng’ol nia ecidh etwii julub pa Yesu man edwog kugi i Yerusalem. E Saul umaku woth pi nicidho i Dameski, “[m’ethung’o kwinyo] man nek kum julub Rwoth.” (Tic mi Jukwenda 7:58; 9:1) Re kinde ma fodi eni gengi, der ulund ucare ngbeng’ man epodho rwa i ng’om.

E dwal moko ulwong’e ngbang’ kumae: “Saul, Saul, inyayu ragedo i kuma nedi?” Saul upenjo kumae: “In i ng’a, Rwoth?” Edwoko kumae: “An a Yesu m’ibenyayu ragedo i kume.”​—Tic mi Jukwenda 9:4, 5.

 Yesu uyero ni Saul nia emond i Dameski man ekur lembe mange m’ebiyero ire ku kuca, re ubekwayu jutere atera i adhurane, pilembe der m’ucare unego wang’e. I ginmawokiwang’ mange Yesu unen ni Anania, ma tie acel m’ikind julubne mi Dameski. Eore nia ecidh kaka ma Saul nwang’ere i ie. Anania ubino ku lworo mi cidho, re Yesu utielo cwinye kumae: “En e agulu m’agoyo wie ira, ya eter nyinga i wang’ Thekdhanumange ku ju m’ubimo ku nyithi Israel bende.” Kinde ma wang’ Saul ulero, ndhundhu i Dameski keca, “eyero pi Kristu nia en e Wod Mungu.”​—Tic mi Jukwenda 9:15, 20.

Ku kony pa Yesu, Paulo ku juyerlembe mange, gimedo ku tic mi rweyo lembanyong’a ma Yesu ucaku dhoge. Mungu upoko mugisa iwi ticne, uketho ginwang’u matoke maber. Oro ma romo 25 ing’ei ma Yesu uwok iwang’ Paulo i gengi mi Dameski, ekiewo nia juyero lembanyong’a “i giracwia pa Mungu ceke ma the polo.”​—Jukolosai 1:23.

Ing’ei oro moko kumeni Yesu uketho jakwenda Yohana m’emaru lee uneno ginmawokiwang’ ma tung’ tung’ ma jukiewo pire i buku mi Lembanyutha. Nikadhu kud i ginmawokiwang’ maeno, udong’ ubedo ve Yohana ukwo nitundo ma Yesu udwogo calu Rwoth i Ker pare. (Yohana 21:22) Andha, “tipo uketho [Yohana] unwang’ere i ceng’ pa Rwoth.” (Lembanyutha 1:10, NWT) Re ceng’ pa Rwoth ne uromo awene?

Ponji ma kilili mi lembila mi Biblia unyutho nia “ceng’ pa Rwoth” ucaku i rundi mwa. I oro 1914, lwiny ma kwong’a madit mi ng’om zoo utuk. I oro m’udok ulubo ing’eye, lwiny, thong’om ma tung’ tung’, ndru, digidi, ku lembe mange dupa unyai lee dit, man ubino ni “giranyutha” ma kamaleng’ ma Yesu uwacu ni jukwenda pare nia binyutho bedonuti pare man ‘ajiki’ mi ng’om. (Matayo 24:3, 7, 8, 14) Bende, kawoni tic mi rweyo lembanyong’a mi Ker ubetimere i kabedo ma bimobim mi Roma ubetelo wie kende ngo, ento i ng’om ngung’.

Tipo maleng’ uketho Yohana ukoro nia tic maeno ubenyutho ang’o, eyero kumae: “Kawono both uwok, man tego man Ker pa Mungu mwa ku ng’ol pa Kristu pare.” (Lembanyutha 12:10) Andhandha, Ker pa Mungu ma Yesu urweyo pire akeca utie lemandha!

Eno utie lembanyong’a ma yawe mbe ni julub pa Yesu ceke ma gigwoko bedoleng’ migi. Re ubekwayu ngo wigi uwil ikum wec ma e, ma Yohana uyero: “Ka kumeno anyong’a negwu, e polo, ku wun ma wubedo i igi de. Can ni ng’om ku nam de: kum Wonabali loro piny i beng’wu, ma kwinyo ma dit ni i bang’e, m’eng’eyo ko nia nindo dong’ ire nyanok kende.”​—Lembanyutha 12:12.

Kawoni dong’ Yesu ubedo ngo abeda pi nikuro i cing’ Won ma yor acwic, ento ebebimo calu Rwoth man ceng’ini eni ebikabu judegine ceke. (Juebrania 10:12, 13) Dong’ lembang’o maber dit m’ubekurowa ke?