Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 72

Yesu uoro julubne 70 nirweyo lembanyong’a

Yesu uoro julubne 70 nirweyo lembanyong’a

LUKA 10:1-24

  • YESU UNG’IO JULUBNE 70 MAN EOROGI GICIDH GIRWEI LEMBANYONG’A

Kawoni watie i thum mi oro 32 R.M., oro ma romo 3 ukadhu niai ma Yesu ulimo batizo. Yesu ku julubne giai nitimo Agba mi Otbak i Yerusalem. Ecicopere nia fodi asu gitie ceng’ini ku Yerusalem. (Luka 10:38; Yohana 11:1) Pi dong’ dwi abusiel m’udong’, Yesu urweyo lembanyong’a akeca i Yahudi, kunoke loka kulo Yordan i ng’om mi Perea. Yeny mi rweyo lembanyong’a utie lee i ng’ombuno.

Iwang’e nyanok, ing’ei Kadhukuwijo mi oro 30 R.M., Yesu urweyo lembanyong’a pi dwi ma pol i Yahudi man ebed ecidho i Samaria bende. I nindo moko mi Kadhukuwijo mi oro 31 R.M., Juyahudi mi Yerusalem gimito ginege. I ng’eye Yesu uponjo akeca i Galilaya pi oro acel ku nusu, kaka m’enwang’u ie julub pare mapol. I Galilaya keca, egam etendo julub pare man emio igi telowic mi rweyo lembanyong’a, ewacu kumae: “Wuyer, wuwac kumae, Ker m’i polo dhingo.” (Matayo 10:5-7) Kawoni epangu nirweyo lembanyong’a lee i Yahudi.

Pi nicaku ticne, Yesu ung’io julubne 70 man eorogi gicidh ario ario. Pieno eoro julubne ni ungu 35 pi nicidho nirweyo lembanyong’a mi Ker, pilembe “mwoka bedo dit andha, ento jutic e ma gi nok.” (Luka 10:2) Gilar gicidho iwang’e i kabedo ma Yesu de ukeco nicidho i ie. Emio ni julubne 70 copo mi keyo kum dhanu, man mi yero lemkwenda marom ma en de ebino niyero.

Ukwayu ngo julub gibed giponj kwa i kacokiri. Yesu uyero igi nia gicidh ginwang’ dhanu i pacu migi. Emio igi telowic ma e: “I ot de ma tek wumondo i ie, wular wuwac kumae, kwiocwiny ubed ba ot maeni. Man tek wod kwiocwiny ni i ie, kwiocwiny mu bibedo i kume.” Gibiyero lembang’o ni dhanu? Yesu uyero igi kumae: “Wuwac igi kumae, Ker pa Mungu bino ceng’ni i vutwu.”​—Luka 10:5-9.

Telowic ma Yesu umio ni julubne 70 urombo ku telowic m’elar emio ni jukwenda pare 12 oro acel i wang’e. Eyero igi nia tie ngo dhanu ceke re ma bijologi. Re lembe ma gibeyero, bikonyo dhanu ma gibiyio lembe migi nijolo Yesu i ng’eye, kinde m’ebibino. Dhanu dupa bibedo kud ava mi jolo Rwoth man mi nwang’u ponji i bang’e.

I ng’eye nyanok, ungu 35 maeno mi jurwei lembanyong’a mi Ker, gidwogo i bang’ Yesu. Giyero ire ku mutoro kumae: “Rwoth, cil pajogi gibedo wor iwa ni kum nyingi.” Lembe ma giyero unyayu anyong’a i Yesu, uketho eyero kumae: “Aneno Jok upodho kud i polo calu lukoth. Nen, amio iwu ng’ol ma wunyon ko thwol man ith.”​—Luka 10:17-19.

 Yesu utielo cwiny julubne nia gibivoyo lembe ma reco dupa, ma bibedo igi ve gibenyono thwol man ith. M’umedo maeno, ukwayu ging’ei nia jubibolo Sitani kud i polo. Bende, Yesu unyutho ni julubne 70 nia ging’ei pi lembe ma pire tek m’ukethere pigi i wang’gi. Eyero kumae: “Anyong’a kud unegwu kum maeni, nia tipo gibedo wor iwu; ento anyong’a negwu kum nyingwu gore i polo.”​—Luka 10:20.

Mutoro unego Yesu lee mandha, uketho epaku Won ngbeng’ iwang’ dhanu, pilembe emio tego ni jutic pare ma jucayu. Ing’eye elokere ibang’ julubne, man eyero igi kumae: “Mugisa ni wang’ m’uneno gin ma wuneno: kum awacu iwu, nia jubila dupa ku ju m’ubimo bim giyenyo ginen gin ma wuneno, ere ginenogi ngo; man giyenyo giwinj gin ma wuwinjo, ere giwinjogi ngo.”​—Luka 10:23, 24.