Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 33

Yesu upong’o lembila pa Isaya

Yesu upong’o lembila pa Isaya

MATAYO 12:15-21 MARKO 3:7-12

  • UDUL DHANU GICUNG’IRI IKUM YESU

  • YESU UPONG’O LEMBILA PA ISAYA

Kinde ma Yesu unyang’ nia Jufarisayo ku ju pa Herode gibepangu lembe kara ginege, ecoko julubne gikadhu loka nam mi Galilaya. Udul dhanu madit gilubo toke kuca; giai kud i Galilaya, kud i adhura mi Turo man Sidon ma tie ceng’ini ku dhu nam, ku yo nyang’u mi kulo Yordan, kud i Yerusalem man ku yo piny mi Idumaya. Yesu ukeyo kum ju ma dupa m’ikindgi. Kinde ma dhanu ma gitie ku twoyo m’unyang’ gineno lembuno, gicung’iri i kume. Gikuro ngo nia en re m’emul kumgi, ento gin re ma giridiri kara gimul kume.​—Marko 3:9, 10.

Dhanu upong’ lee dit, uketho Yesu uyero ni julubne nia gikel nyathi yei moko eidh i ie, kara ewek dhu wat nyanok man kara dhanu kud ucung’iri akeca i kume. Pieno ecopo ponjogi kud i yei kunoke ecopo coro ang’et nyanok kaka ma thwolo i dhu wat, kara ekonygi ceke.

Jalub ma nyinge Matayo uyero nia tic ma Yesu utimo upong’o “lembe ma Isaya ma jabila yero.” (Matayo 12:17) Lembila ma Yesu upong’one tie makani?

‘Nen, jatic para m’agoyo wiye; Jamerna ma mutoro nego ng’eyong’ec para i kume: abiketho tipo para i wie, man ebiyero lembapoka ni thekdhanumange. Ebidhau ngo, kadi ebikok ma tek de ngo; kadok ng’atu moko de mbe ma biwinjo dwande i gengi. Usi m’unyoc ebituro ngo, atutu m’udunyo yiro de ebinego ngo, cil ma fok’eoro lembapoka ni aloci ngo. Man i nyinge thekdhanumange bigeno.’​—Matayo 12:18-21; Isaya 42:1-4.

Andhandha Yesu utie jaratic ma Mungu umaru lee mandha. Yesu uketho dhanu ginyang’ kamaleng’ ikum bedopwe ma jurudini giumo wie ku vupo migi. Jufarisayo gibed gitio rac ku Cik pa Mungu, uketho kadok kum ng’atu moko uberemo i ceng’ Sabatu de, gibed gidieng’ ungo kude! Yesu ukoro bedopwe pa Mungu ngbeng’ man enyutho nia tipo pa Mungu ni iwie; pieno ewodho ter ma pek ma dini unuro ko dhanu. Nikum lembe maeno m’etimo, judong dini gimito ginege. Etie zungo ma lee dit!

Wec ma Biblia uyero nia “Ebidhau ngo, kadi ebikok ma tek de ngo; kadok ng’atu moko de mbe ma biwinjo dwande i gengi” utie ku thelembe makani? Yesu uyio ngo nia dhanu m’ekeyo kumgi man bende pajogi “giketh jung’eye.” (Marko 3:12) Emito ngo dhanu giwinj pire i dhu jumange i gengi, kunoke nia giwinj lembe ma  jubekoro igi akora, ma nyo saa moko jubekoro de cuu ngo.

Yesu uyero bende rwonglembe mi jukojuk ni dhanu ma juporogi ve lum m’unyoc man m’urungere. Dhanune gitie ve wuzi mi kwoyo bongu ma jucwinyo mac i kume man ubeliel nyaliriliri ma dong’ udhingo tho. Yesu urungo ngo lum m’unyoc man enego ngo mac mi wuzi ma dong’ udhingo nitho. Ento ku mer man nya yoo mandha, eting’o dhanu ma kero migi mbe malu. Ma jiji mbe, Yesu re m’utie ng’atu ma dhanu copo nigeno!