Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 65

Yesu ubeponjo kinde ma gibecidho i Yerusalem

Yesu ubeponjo kinde ma gibecidho i Yerusalem

MATAYO 8:19-22 LUKA 9:51-62 YOHANA 7:2-10

  • UMEGO PA YESU GINENO YESU CALU NG’A?

  • NITIMO TIC MI KER TIE LEMBE MA PIRE TEK RUKANI

Pi nindo moko, Yesu utimo tic pare akecane i Galilaya, pilembe dhanu mi Galilaya giwinje maber nisagu mi Yahudi. Bende kinde m’ebino i Yerusalem, ekeyo kum ng’atu moko i ceng’ Sabatu, pieno “Juyahudi giyenyo ginege.”​—Yohana 5:18; 7:1.

Kawoni utie dwi mir abung’wen kunoke apar kumeni mi oro 32 R.M., man agba mi otbak udhingo romo. Jutimo agbane pi nindo abiro man i nindo mir aborane coko madit bedo nuti. Jutime pi nitwiyo dhu oro ma jufuro ie fur; saa maeno tie saa mir anyong’a madit, man mi dwoko foyofoc ni Mungu.

Umego ang’wen pa Yesu, Yakobo, Simon, Yosefu man Yuda gilund giwacu ire kumae: “Ai kakeni icidh i Yahudi.” I Yahudi kuca jubed jucokiri i adhura mi Yerusalem pi niworo Mungu. Wang’ adek kubang’ oro jubed jutimo agba kuca, man dhanu de bepong’ lee. Umego pa Yesu giyero ire kumae: “ng’atu moko mbe, ma timo gin moko ling’ ma en ebeyenyo jung’eye ngbeng’. Tek itimo gin maeni, nyuthri giri ni ng’om.”​—Yohana 7:3, 4.

I andha umego pare ang’wen maeno “giyie ngo” nia etie Masiya. Re gibemito ecidh etim udu kuca kara dhanu m’ucokiri i agba de ginen. Ento Yesu unyang’ ikum ariti ma copo wok nwang’e, uketho eyero igi kumae: “Ng’om copo daguwu ngo; ento an edagu, kum atuco pire, nia tic pare rac. Wuidh malu i agba: aidho malu i agba maeni ngo, kum nindo para foduromo ngo.”​—Yohana 7:5-8.

Nindo moko ing’eye, umego pa Yesu gigam gicidho ku jumange, ento Yesu ku julubne gicidho nyaling’ ma ng’atu moko mbe m’unenogi. Ging’olo de gengi mange m’ukadhu atira kud i Samaria, kakare ning’olo gengi ma dhanu zoo wotho i ie ma ceng’ini ku kulo Yordani. Yesu ku julubne gibino ku yeny mi ot moko ma gicopo wok yom i ie i Samaria, pieno eoro julubne moko gilar gitelo yo pi niwok yenyo otne. Dhanu mi pacu moko mi Samaria uwok ukwero nijologi man nimiyo igi kabedo, pilembe giwinjo nia Yesu ubecidho i agba mi Juyahudi. E ng’ecwiny umaku Yakobo giku Yohana, uketho gipenje kumae: “Rwoth, iyenyo walwong’ mac uai i polo lor piny, uwang’gi?” (Luka 9:54) Yesu ujukogi pi paru maeno, man gimedo ku woth migi.

Kinde ma gini yo, jagorcik moko uwok uyero ire kumae: “Japonji, abilubo ng’ei ka ma tek icidho i ie ceke.” Yesu udwoko ire kumae: “Kaki bedo ku odng’om, winyo ma kor polo de bedo ku odgi; ento Wod dhanu bedo ku kamoko ngo m’ejeng ie wie.” (Matayo 8:19, 20) Yesu ubemito ninyutho ni jagorcik maeno nia kan ebemaru nilubo toke, peko nuti m’ebinwang’ere ko, man unen  nia ng’atune ufoyo lembe ceke m’ecopo nwang’ere ko. Dong’ ng’atuman ikindwa ucikere nipenjere kumae: ‘nyo an de atie ayika nilubo Yesu kadok nwang’u abenwang’ara ku peko de?’

Ni ng’atu mange ke Yesu uyero kumae: “Lub ng’eya.” Ng’atune uloko ire kumae: “Rwoth, wek alar acidh ayik vwa.” Yesu ung’eyo pidoic pare, pieno eyero ire kumae: “Wek ju m’utho gikuny ju m’utho migi; ento cidh iyer pi Ker pa Mungu mba mba.” (Luka 9:59, 60) Ubenen kamaleng’ nia fodi won utho ngo, kum ka nwang’u edaru tho andha wode copo bedo ngo keno niweco ku Yesu. Eno ubenyutho nia ng’atuno utie ngo ayika niketho Ker pa Mungu i kabedo ma kwong’a i kwo pare.

Kinde ma gibemediri asu ku wotho migi pi nicidho i Yerusalem, ng’atu mange ubin uyero ire kumae: “abilubo ng’ei, Rwoth; ento wek alar amoth ju ma ni i ot para.” Yesu udwoko ire kumae: “Ng’atu moko mbe, m’uromo ku Ker pa Mungu, ma ketho cinge kum kwej dhiang’, man eneno ng’eye.”​—Luka 9:61, 62.

Dhanu ceke ma gibemito gibed julub mandha pa Yesu gicikiri niketho wigi zoo pi nitimo tic mi Ker. Ka ng’atu m’ubefuro podho ku kwej dhiang’ ubeneno ngo wang’e atira, leni m’ebelubo copo jondere. Kan ejengo kwej dhiang’ne man eneno ng’eye, tic mi podho m’ebetimo copo tho. Romrom kumeno, ng’atu m’uloko wang’e pi nineno lembe mi ng’eye i ng’om maeni marac copo weko yo ma terojo i kwo ma rondo ku rondo.