Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 47

Nyaku moko udok ubedo kwo kendo!

Nyaku moko udok ubedo kwo kendo!

Yairo uneno nia andha Yesu ukeyo kum dhaku ma rimo ubino nioi i kume. Pieno enwang’u nia Yesu copo nikonyo nyaku pare bende, kadok saa maeno ebino niparu nia nyare copo bedo dong’ ni “avu.” (Matayo 9:18) Nyo asu Yesu copo nimio kony moko ni nyaku pare?

Kinde ma fodi Yesu ubeweco ku dhaku ma kume uai ukei, dhanu moko m’uai i pacu pa Yairo utundo, man giyero ni Yairo kumae: “Nyeri tho.” Gidok giyero kendo kumae: “Isendo Japonji nedi kendo?”​—Marko 5:35.

Eno utie lembe mi can mandha! Yairo utie ng’atu ma dhanu mi pacu migi ceke giwore awora, kawoni dong’ wie ulal. Nyaku pare m’acel kulong’ utho. Ento kinde ma Yesu uwinjo lem pa thone, eloko wang’e ibang’ Yairo, man ejuko cwinye kumae: “Lworo kud unegi, [nyuth yioyic] kende.”​—Marko 5:36.

Yesu gicidho karacelo ku Yairo nitundo i pacu pare. Kinde ma gitundo, ginwang’u woy madit i pacu. Dhanu m’ucokiri kakeca gibeywak, man gibepadu kumgi gigi ku can. Yesu umondo i ot, man ecaku niyero wec ma e: “Nyathinuno tho ngo, ento enindo aninda.” (Marko 5:39) Kinde ma giwinjo wec maeno, gicaku nicaye. Gin ging’eyo nia nyaku maeno utho andha. Yesu ung’eyo nia ku tego pa Mungu, ecopo nidwoko dhanu m’utho kendo kwo, tap calu ma ng’atini cew ko kud i wang’ nindo.

Yesu uwodho dhanu mange ceke woko, man edong’ ku Petro, Yakobo, Yohana, man junyodo pa nyathin m’utho. Yesu umondo ku dhanu abic maeno i ot ka ma juketho ie nyathin m’uthone. Emaku cinge, man eyero ire kumae: ‘Talita kumi; thelembene, ka juloke edoko kumae, nyaku, awacu iri kumae, ai malu.’ (Marko 5:41) E ndhundhu nica, eai malu man ecaku niweco. Kepar kit anyong’a ma Yairo ku dhaku pare gibino ko kinde ma gineno lembuno! Pi ninyutho nia andha nyathin maeno utie kwo, Yesu ukwayu nia jumii ire cam ecam.

I wang’e, Yesu ubed ung’olo ni ju m’ebed ekeyo kumgi nia kud gibed giyer lembene ni dhanu mange; ni junyodo maeni de eng’olo lembe marom. Re mutoro uketho junyodo maeno ku jumange de, ginyayu lembene tir “i ng’om maeno ceke.” (Matayo 9:26) Ka nwang’u eca jucero ng’atu m’imaru, nyo icopo niling’ iwi lembene? Eni utie wang’ mir arionde ma Yesu ucero ie dhanu.