Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 50

Etendogi pi nirweyo kadok iwang’ ragedo

Etendogi pi nirweyo kadok iwang’ ragedo

MATAYO 10:16–11:1 MARKO 6:12, 13 LUKA 9:6

  • YESU UTENDO JUKWENDA PARE MAN EOROGI

Yesu umio telowic maber ni jukwenda pare iwi kite mi rweyo lembanyong’a, man eorogi ario ario. Lembe mange de nuti m’eyero igi. Epoyo wigi pi lembe ma gibinwang’iri ko, eyero kumae: “Nen, aorowu calu rombe i kind urudi: . . . Wukuru ni dhanu: kum gibimiowu i dilo, i kacokri migi de gibifodowu; eyo man gibiterowu iwang’ jubim ku ju m’ubimo de pira.”​—Matayo 10:16-18.

Andha, julub pa Yesu gibinwang’iri ku ragedo ma tung’ tung’, pieno Yesu utielo cwinygi kumae: “Ka jumiowu, cwinywu kud uring maram wubiweco ko kadi pi lembe de ma wubiweco: kum gin ma wubiyero bimire iwu i saa nica. Kum wuweco wun ungo, ento tipo pa Wegu e m’ubeweco i iwu.” Yesu udok umedo kendo kumae: “Umego de biting’o umin wang’ tho, won nyathin de biting’o nyathin pare: nyithindho de gibijai kum junyodo migi, e gibiketho juneggi. Man dhanu ceke gibidaguwu kum nyinga: ento ng’atu m’uciro cil i kajikne, ng’atuni e ma biboth.”​—Matayo 10:19-22.

Calu ma tic mi rweyo lembanyong’a pire tie tek, Yesu uyero ni julubne nia gibed ku wang’gi, kara gimediri nitimo tic maeno. Eyero kumae: “Ka ginyayu ragedo i kumwu i adhura maeni, wuring i mange: kum andha awacu iwu kumae, wubikadhu ku i adhura pa Israel ungo, ka fodi Wod dhanu kubino ngo.”​—Matayo 10:23.

Eno tie telowic, poyowic, man tielocwiny ma pire tek ma Yesu umio ni jukwenda pare 12! Lembe maeno pire tek bende ni dhanu ma bidong’ timo tic yo ng’ei tho pare, man yo ng’ei cer pare. Lembe m’eyero ni julub pare nia “dhanu ceke gibidaguwu,” ubenyutho ngo nia dhanu m’eorogi ibang’gi kende re ma bidagugi. M’umedo maeno, giragora unyutho ngo nia jutero julubne iwang’ jubim man iwang’ rwodhi kunoke nia wat migi ucibogi ni tho, i saa ma gibino nirweyo ie lembanyong’a i Galilaya.

Ubenen kamaleng’ nia, Yesu ubino niweco iwi lembe ma jukwenda gibidong’ nwang’iri ko ing’eye. Eyero nia julub pare bidaru ngo wotho migi mi rweyo lembanyong’a ‘nitundo ma Wod dhanu bibino ko.’ Yesu ubino ninyutho nia julubne bidaru ngo tic mi rweyo lembanyong’a mi Ker pa Mungu ma fok’enwang’u ngo dwong’ nibedo Rwoth ma Mungu ung’io man japoklembe.

I jukwenda ucikere ngo niwang’ ka jubinyayu ragedo i kumgi pi lembanyong’a, pilembe Yesu uyero kumae: “Jalub sagu japonji pare ngo, kadok jamiru de sagu rwodhe ngo.” Lembe ma Yesu uyero utie ngbeng’. Calu ma junyayu  ragedo ikume pi lembanyong’a mi Ker pa Mungu, eno nyutho nia jubinyayu ikum julubne bende. Yesu uketho cwinygi kumae: “Kud wulwor ju ma nego kum, ento ng’eyong’ec re negere igi ngo: ento ma sagu wulwor ng’atu ma copo nyotho ng’eyong’ec ku kum de i gehena.”​—Matayo 10:24, 28.

Yesu uweko lapor ma ber i lembe maeno. Eyio m’umbe lworo nia timba etho kakare ninyotho gwoko bedoleng’ pare ni Yehova, ma tie ku tego ceke. Mungu ma Jategokpo re ma romo ninyotho “ng’eyong’ec” pa ng’atini (genogen mi kwo mi nindo m’ubino) kunoke nicere kara kud enwang’ kwo ma rondo ku rondo. Lembe maeno umio tegocwiny ma lee ni jukwenda!

Yesu unyutho ni julubne kite ma Mungu bedieng’ ko pigi. Eyero kumae: “Kira ario juloko ku sente ngo? Man acel mi kindgi mbe ma bipodho i ng’om ma [Wegwu k’ung’eyo ngo]. . . . Ka kumeno kud wulwor: wun wuber ma sagu kira dupa.”​—Matayo 10:29, 31.

Lembe ma julub pa Yesu gibeyero bipoko kind juruot, jumoko biyio, jumoko ke bikwero. Pieno Yesu uyero kumae: “Iwu kud uwac nyo abino bolo kwiocwiny i ng’om.” Eno tie lemandha, ukwayu nibedo ku tegocwiny pi niworo lemandha mi Biblia, ka juruot mange ung’eyo ngo lemandha. Yesu umedo kendo kumae: “Ng’atu m’umaru won kadi min masagu an eromo kuda ngo; [man] ng’atu m’umaru wode kadi nyare de masagu an eromo kuda ngo.”​—Matayo 10:34, 37.

Ento, dhanu moko nuti ma gibijolo julub pare. Ewacu kumae: ‘Ng’atu ma tek bimio kikombe mi pi ma ng’ic ni ng’atu acel m’i kind nyithindho maeni ya emadhi pilembe etie jalub, awacu iwu andha sukulia pare birwinyo ire ki ngo’.​—Matayo 10:42.

Calu ma dong’ jukwenda ginwang’u telowic, poyowic, man tielocwiny, “gicidho ku ba pacu, ku yero lembanyong’a ma juboth ko, ku keyo kum i kaka ceke.”​—Luka 9:6.