Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 59

Wod dhanu tie ng’a?

Wod dhanu tie ng’a?

MATAYO 16:13-27 MARKO 8:22-38 LUKA 9:18-26

  • YESU UKEYO WANG’ ABINGA MOKO

  • JUMIO KIFUNGULA MI KER IBANG’ PETRO

  • YESU ULAR UYERO PI THO MAN PI CER PARE

Yesu ku julubne gitundo i Bethsaida. E dhanu gikelo ng’atu moko m’abinga ibang’ Yesu, man gikwaye ku kisa madit nia emul kume man ekeye.

Yesu ugam umaku cing ng’atune man ewodhe woko kud i pacu. Ewok eng’ulo lau i wang’e man epenje kumae: “Ineno piny moko?” Edwoko ni Yesu kumae: “Aneno dhanu; [re] anenogi va yen, m’ubewotho.” (Marko 8:23, 24) Yesu uketho cinge kendo i wang’e, e ecaku neno piny cuu. Ing’eye eoro ng’atune udok thugi ma dong’ wang’e ubeneno piny cuu, ento eng’olo ire nia kud ewok emond i pacu moko.

Ing’eye, Yesu ku julubne gicidho i ng’ete ma yo malu mi Kaisaria Filipi. Pacu maeno udodere lir lir iwi got i metre 350 ku nam, man pi nitundo kuca, ubekwayu giidh got kilometre 40, eno copo bedo wotho mi nindo ario kumeni. Yor i ng’ete ma yo malu, juneno got Hermon ma pei ukworere i wie.

Kinde ma gini yo, Yesu uwekogi, ecidho eni kende pi nirwo. Dwi udong’ abung’wen kunoke apar iwang’ tho pa Yesu, man cwinye ubedieng’ dit pi julubne. Jumapol giweko nilubo ng’eye, jumange ke wigi ujebere man cwinygi utur. Saa moko nyo gibino penjiri nia pirang’o ekwero dhanu kud gikethe ni ubimo kunoke nia pirang’o etimo ngo giranyutha pi niketho jung’eye nia etie ng’a i andha.

Kinde ma julub gibino kaka m’eberwo i ie, epenjogi kumae: “Meno dhanu giwacu ya Wod dhanu en e ng’a?” Gidwoko kumae: ‘Jumoko wacu kumae, Yohana ma Jababutisi; jumoko ke, Eliya; jumoko ke, Yeremia, kadi ng’atu acel ma kind jubila.’ Dhanu giparu nia andha Yesu copo bedo acel m’ikind dhanu m’ucer ku kind ju m’utho. Pi ning’eyo paru migi, Yesu upenjogi kumae: “Wun ke wuwacu ya an a ng’a?” Pio pio Petro udwoko ire kumae: “In i Kristu, Wod Mungu ma kwo.”​—Matayo 16:13-16.

Yesu uwacu nia anyong’a uneg Petro, pilembe Mungu re m’unyutho ire lembe maeno; ing’eye emedo kumae: “Awacu iri, nia in i Petro, man ke abigomo [cokiri] para iwi cana maeni; e dhugang’ mi [liel] de biloye ngo.” Yesu unyutho nia en gire ebigiero cokiri, man kadok liel de bibedo mbe ku tego iwi dhanu mi cokirine ka gimediri nigwoko bedoleng’ migi iwi ng’om. Eng’olo ni Petro kumae: “Abimio iri kifungula mi Ker mi polo.”​—Matayo 16:18, 19.

Yesu uketho ngo nia Petro ubed dit nisagu jukwenda mange man ekethe ngo ni kathere mi cokiri. Yesu en gire re m’etie Cana ma jubigiero cokiri i wie. (1 Jukorinto 3:11; Juefeso 2:20) Yesu ugam umio kifungula adek ni Petro. Ebinwang’u rwom mi mio kaka ni kit dhanu ma tung’ tung’ kara gimond i Ker mi polo.

Petro bitio ku kifungula ma kwong’a i Pentekoste mi oro 33 R.M., pi ninyutho lembe ma Juyahudi  man dhanu ma gijolo yioyic mi Juyahudi gicopo timo kara gibothi. Ebitio ku kifungula mir ario pi niyabu, niwacu nimio kaka mi mondo i Ker pa Mungu ni Jusamaria ma giyio. Kifungula ma tokcen ke ebitio ko i oro 36 R.M. pi nimio kaka ni dhanu mi thek mange bende ma jutimo ngo yaa ikumgi, calu ve Kornelio ku jumange.​—Tic mi Jukwenda 2:37, 38; 8:14-17; 10:44-48.

Ikind wec maeno, Yesu uyero nia ebecisendere i Yerusalem man jubiwok nege kuca; lembuno unyotho wi jukwenda pare magwei. Petro unyang’ ungo nia ing’eye Yesu bicer pi kwo mi polo, pieno eting’o Yesu ecidho kude ang’et man ejuke kumae: “Maeni kud uwok i kumi, Rwoth: maeno biwok i kumi ki ngo.” Ento Yesu uloko ire ng’eye man edwoko ire kumae: “Kadh i ng’eya, Jok: kum ibedo ni cudho mi kier ira: kum ii pido pi gin pa Mungu ngo, ento gin mi dhanu re.”​—Matayo 16:22, 23.

Yesu udok ulwong’o julub mange gibino kaka ma gini ie ku jukwenda, man ekoro igi nia ebibedo yot ungo nibedo jalub pare. Ewacu igi kumae: “Tek ng’atu moko yenyo elub ng’eya, wek ekwere gire, eting’ yen [mi can] pare, elub ng’eya. Kum ng’atu ma tek uyenyo ebodh kwo pare ebirwinye; ng’atu ma tek birwinyo kwo pare de pira ku pi lembanyong’a ma juboth ko de e ebibodhe.”​—Marko 8:34, 35.

Dong’ kara Yesu ukwan julubne ni dhanu m’uromo, ubekwayu cwinygi ubed tek man gibed ku pidoic mi miiri gigi. Yesu uwacu kumae: “Ng’atu ma tek lewic binege i kuma kum lembe para de i kind dhanum’utuk maeni mi gier ku dubo de, Wod dhanu bende lewic binege i kume, kan ebino i dwong’ pa Won ku malaika maleng’ de.” (Marko 8:38) Andhandha, kinde ma Yesu bibino, “ebilund mio ni dhanu ceke kubang’gi calku tic pare.”​—Matayo 16:27.