Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 27

Yesu ulwong’o Matayo

Yesu ulwong’o Matayo

MATAYO 9:9-13 MARKO 2:13-17 LUKA 5:27-32

  • YESU ULWONG’O MATAYO MA JOKO AJOK

  • KRISTU UDIKERE KU JUDUBO KARA EKONYGI

Ing’ei ma Yesu ukeyo kum ng’atu ma tie ku tho ma nego kum nding’, ebedo asu nyanok ceng’ini ku Kapernaum, kago ku dhu wat mi nam Galilaya. Udul dhanu ubino kendo ibang’e man ecaku ponjogi. Kinde m’eai ebecidho, eneno Matayo ma julwong’e bende Lawi ubedo kaka ma jujoko ie ajok. Yesu ulwong’e ewacu ire kumae: “Lub ng’eya.”​—Matayo 9:9.

Ecicopere nia Matayo ular uwinjo pi ponji man pir udu moko ma Yesu utimo i adhura maeno calu ma Petro, Andrea, Yakobo man Yohana de gilar giwinjo iwang’ nilubo Yesu. Calu gin, Matayo de uai wang’ acel man ecaku lubo tok Yesu. Matayo ukoro lembe maeno i injili kumae: ‘E eai malu, [Matayo en gire] elubo ng’ei’ Yesu. (Matayo 9:9) Niai saa nica ci, Matayo uweko tic pare mi joko ajok edoko jalub pa Yesu.

Ing’ei nindo moko Matayo uyiko fet madit i ot pare, saa moko nyo pi ninyutho nia efoyo lwong’o masegi ma Yesu ulwong’e ko. I fetne, elwong’o Yesu ku julubne, man bende weg ajok wadi ma gibed gitimo kugi con. Gibed gijoko ajok ni judong ng’om mi Roma ma dhanu udagu; ajokne gibed gigamu ibang’ weg yei m’ubenyiko, ju ma wotho ku kana, ju ma wotho i ndaki ma dongo man ibang’ jukuloka. Juyahudi gibed gineno weg ajok maeno nenedi? Dhanu udagu weg ajok pilembe gibed gijoko sente lee nisagu ma cik ukwayu. Matayo ulwong’o bende ‘weg dubo’ i fet maeno niwacu dhanu ma pigi yik nia gibed gitimo lembe mareco.​—Luka 7:37-39.

Kinde ma Jufarisayo ma gibed gikethiri giki nia gipwe gineno Yesu i fet karacelo ku dhanu maeno, gipenjo julubne kumae: “Japonji mu ke gibecicamu giku weg ajok ku judubo de nedi?” (Matayo 9:11) Saa ma Yesu uwinjogi ewacu igi kumae: “Ju ma kumgi leng’ can jakeikum negogi ngo, ento ju ma kumgi lith re. Ento wucidh wung’ei ka thelembe nini, ayenyo kisa, lam re ngo: kum abino lwong’o weg bedopwe ngo endre judubo.” (Matayo 9:12, 13; Hoseya 6:6) Jufarisayo gilwong’o Yesu nia “japonji” re i andha giyie ngo, ento Yesu ponjo igi lembe iwi bedopwe.

Copere nia Matayo ulwong’o weg ajok man judubo i ot pare kara giwinj ponji pa Yesu man ginwang’ keyokum i thenge mi tipo; e dupa m’ikindgi “gilubo ng’eye.” (Marko 2:15) Yesu ubemito nikonyogi kara gitund nibedo ku mer ma cuu ku Mungu. Tung’ ku Jufarisayo ma gikethiri gigi ni dhanu ma pwe, Yesu udagu ngo dhanu ma kumeno. Ebedieng’ man kisa ubenege ikumgi; pieno eromo keyo kum dhanu ceke ma giberemo i thenge mi tipo.

Ka Yesu udieng’ ku weg ajok man judubo, eno nyutho ngo nia ecwaku dubo migi, ento enyutho igi kit kisa marom m’enyutho ni ju ma kumgi uberemo. Ku lapor kepoi ikum wec mae, m’eyero ku kisa ni won dhobu moko kinde m’emulo kume: “Ayenyo; dong’ kumi dok leng’.” (Matayo 8:3) Nyo wan de wacopo ngo nibedo ku kit paru marom ma kumeno mi kisa, man nikonyo dhanu ma gitie i yeny asagane nikonyogi i thenge mi tipo?